An Ikatulo nga Surat ni Juan 1:1-14
1 Tikang ha lagas nga lalaki,* para kan Gayo nga hinigugma, nga akon gud hinigugma.
2 Hinigugma nga bugto, igin-aampo ko nga ha ngatanan nga butang padayon ka nga mag-uswag ngan magpahimulos hin maopay nga kahimsog, sugad la nga nag-uuswag ka* yana.
3 Kay nagrayhak gud ako han inabot an kabugtoan ngan nagpamatuod mahitungod han kamatuoran nga aada ha imo, samtang nagpapadayon ka ha paglakat ha kamatuoran.+
4 Waray na ako mas daku nga kalipay* kay hini: nga mabatian ko nga an akon mga anak padayon nga naglalakat ha kamatuoran.+
5 Hinigugma nga bugto, iginpapakita mo an imo pagkamatinumanon ha imo ginbubuhat para ha kabugtoan, bisan kon diri mo hira kilala.+
6 Nagpamatuod hira mahitungod han imo gugma ha atubangan han kongregasyon. Alayon updi hira hin pipira ka distansya ha ira pagbiyahe ha paagi nga takos ha Dios.+
7 Kay tungod han iya ngaran linakat hira, nga diri nakuha hin bisan ano+ tikang ha katawohan han mga nasud.
8 Salit obligado kita nga magpakita hin pagkamaabiabihon ha sugad nga mga tawo,+ basi kita magin mga igkasi-magburuhat ha kamatuoran.+
9 May iginsurat ako ha kongregasyon, pero hi Diotrepes, nga karuyag manguna ha ira,+ diri ginkakarawat nga may pagrespeto an bisan ano nga tikang ha amon.+
10 Salit kon makakada ako, isusumat ko an iya mga ginbubuhat ha pagpasarang hin nakakadaot nga istorya mahitungod ha amon.*+ Diri pa hiya kontento hini, nadiri hiya pag-abiabi nga may pagrespeto ha kabugtoan;+ ngan an mga naruruyag pag-abiabi ha ira, iya ginpapangalimbasogan nga pugngan ngan paiwason ha kongregasyon.
11 Hinigugma nga bugto, ayaw pagsubad han maraot, lugod pagsubad han maopay.+ An nagbubuhat hin maopay nagtitikang ha Dios.+ An nagbubuhat hin maraot waray makakita ha Dios.+
12 Maopay gud an ginsisiring nira ngatanan mahitungod kan Demetrio ngan han kamatuoran mismo. Ha pagkamatuod, kami liwat nagpapamatuod mahitungod ha iya, ngan maaram kamo nga tinuod an amon pamatuod.
13 Damu pa nga butang an akon igsusurat ha imo, pero diri ko karuyag nga padayon nga magsurat ha imo gamit an pansurat ngan tinta.
14 Kondi naglalaom ako nga ha diri mag-iiha makikita ko ikaw, ngan magkakaistorya kita hin personal.
Makarawat mo unta an kamurayawan.
An kasangkayan nangungumusta ha imo. Ipaabot an akon pangumusta ha tagsa han kasangkayan.
Mga footnote
^ O “tigurang.”
^ O “an imo kalag.”
^ O posible nga “hinungdan ha pagpasalamat.”
^ Lit., “pag-inistorya mahitungod ha amon hin magraot nga mga pulong.”
