Surat ha mga Taga-Efeso 2:1-22
2 Dugang pa, ginbuhi kamo han Dios bisan kon patay kamo tungod han iyo mga pagtalapas ngan mga sala,+
2 nga hadto naglakat kamo uyon ha sistema han mga butang* hini nga kalibotan,+ uyon ha magmarando nga may awtoridad ha pagkontrol han hangin,+ an espiritu+ nga nagios yana ha mga anak han pagkadiri-masinugtanon.
3 Oo, kita ngatanan nanggawi hadto upod nira uyon ha mga hingyap han aton unod,+ ginbubuhat an kaburut-on han unod ngan han aton mga panhunahuna,+ ngan tikang ha katawo mga anak kita han kapungot+ sugad han iba.
4 Pero daku an kalooy han Dios,+ ngan tungod han iya daku nga gugma nga iya iginpakita ha aton,+
5 ginbuhi kita niya basi makaupod an Kristo, bisan kon mga patay kita tungod han aton mga pagtalapas+—pinaagi han diri matupngan nga pagkabuotan gintalwas kamo.
6 Dugang pa, ginbuhi kita nga magkaupod ngan ginpalingkod nga magkaupod ha langitnon nga mga lugar kahiusa ni Kristo Jesus,+
7 basi ha tiarabot nga mga sistema han mga butang* maipakita niya an pagkadaku gud han iya diri matupngan nga pagkabuotan pinaagi han iya pagkamaopay* ha aton nga kahiusa ni Kristo Jesus.
8 Pinaagi hini nga diri matupngan nga pagkabuotan gintalwas kamo pinaagi han pagtoo,+ ngan diri ini tungod han iyo mga pangalimbasog; lugod, regalo ito han Dios.
9 Diri, diri ito resulta han mga buhat,+ basi waray hinungdan nga maghinambog an bisan hin-o.
10 Mga hinimo kita han Dios* ngan ginlarang kita+ nga kahiusa ni Kristo Jesus+ para ha mag-opay nga mga buhat, nga ginhikay nga daan han Dios basi maglakat kita dida hito.
11 Salit hinumdumi nga kamo hadto, nga katawohan han mga nasud tikang ha katawo, an mga gintawag nga “diri turi” han mga gintawag nga “turi,” nga ginturi ha unod pinaagi han mga kamot han tawo.
12 Hito nga panahon, diri kamo nakilala ha Kristo, bulag ha nasud han Israel, diri upod ha mga kasabotan han saad;+ waray kamo paglaom ngan waray kamo Dios ha kalibotan.+
13 Pero yana sugad nga kahiusa ni Kristo Jesus, kamo nga hirayo hadto nagin hirani na pinaagi han dugo han Kristo.
14 Kay hiya an aton kamurayawan,+ an nagtig-ob han duha nga grupo+ ngan nagbungkag han pader nga aada ha butnga nga nagbubulag ha ira.+
15 Pinaagi han iya unod ginwara niya an away, an Balaud nga ginkukompwesto hin mga sugo ngan mga turumanon, basi himoon an duha nga grupo nga kahiusa niya nga magin usa nga bag-o nga tawo+ ngan basi magpahinabo hin kamurayawan,
16 ngan basi bug-os nga maipahiuli an duha nga grupo han katawohan ha usa nga lawas ngadto ha Dios pinaagi han pasakitan nga kahoy,*+ kay ginwara niya an away+ pinaagi han iya kalugaringon.
17 Ngan kinanhi hiya ngan iginpasamwak an maopay nga sumat han kamurayawan ha iyo nga mga hirayo, ngan kamurayawan ha mga hirani,
18 kay pinaagi ha iya kita, nga duha nga grupo han katawohan, waray kaulangan nga nakakadaop ha Amay pinaagi han usa nga espiritu.
19 Salit diri na kamo mga estranghero ngan mga dayo,+ lugod mga igkasi-tuminungnong+ kamo han mga baraan ngan mga membro han panimalay han Dios,+
20 ngan gintukod kamo dida ha pundasyon han mga apostol ngan mga propeta,+ samtang hi Kristo Jesus mismo an pundasyon nga bato nga pandugtong ha eskina.+
21 Sugad nga kahiusa niya an bug-os nga tinukod, nga an ngatanan nga bahin ginturugkop hin maopay,+ nagigin usa nga baraan nga templo para kan Jehova.*+
22 Kamo liwat, sugad nga kahiusa niya, gintutukod nga magkaurupod basi magin usa nga lugar nga urukyan han Dios pinaagi han espiritu.+
