Esther 7:1-10
7 Salit an hadi ngan hi Haman+ kinadto ha panagtawo ni Rayna Esther.
2 An hadi nagsiring utro kan Esther ha ikaduha ka adlaw durante han panagtawo diin iginserbi an bino: “Ano an imo aaroon, Rayna Esther? Ihahatag ito ha imo. Ngan ano an imo hangyo? Bisan tubtob ha* katunga han akon ginhadian, matutuman ito!”+
3 Hi Rayna Esther binaton: “Kon nakakarawat ako han imo pag-uyon, O hadi, ngan kon ikakalipay han hadi, gin-aaro ko nga talwason mo an akon kinabuhi* ngan ginhahangyo ko nga tipigan mo nga buhi an akon katawohan.+
4 Kay iginbaligya kami,+ ako ngan an akon katawohan, basi poohon, patayon, ngan bungkagon.+ Kon iginbaligya la kami sugad nga mga uripon nga lalaki ngan babaye, mahilom na la unta ako. Pero ini nga karat-an diri angayan, kay makakadaot ini ha hadi.”
5 Katapos, hi Hadi Ahasuero nagsiring kan Rayna Esther: “Hin-o ito, ngan hain an tawo nga nangahas pagbuhat hin sugad hito nga butang?”
6 Hi Esther binaton: “An parakontra ngan kaaway amo inin maraot nga hi Haman.”
Hi Haman nahadlok gud tungod ha hadi ngan ha rayna.
7 An hadi nasisina gud nga binuhát tikang ha panagtawo ngan kinadto ha garden han palasyo, kondi hi Haman tinindog basi makimalooy kan Rayna Esther para ha iya kinabuhi,* kay nasantop niya nga an hadi determinado nga sirotan hiya.
8 Tikang ha garden han palasyo an hadi binalik ha balay han panagtawo ngan nakita niya hi Haman nga nahapa ha higdaan nga hinmumutangan ni Esther. An hadi ginuliat: “Luluguson ba liwat niya an rayna ha akon mismo balay?” Katapos gud igyakan han hadi ini nga mga pulong, ira gintabonan an nawong ni Haman.
9 Yana hi Harbona,+ nga usa han mga opisyal ha palasyo han hadi, nagsiring: “Nag-andam liwat hi Haman hin kahoy para kan Mordecai,+ nga naghatag hin sumat nga nagtalwas ha hadi.+ Natindog ito ha balay ni Haman, 50 ka siko* an kahitaas hito.” An hadi binaton: “Ibitay hiya didto.”
10 Salit ira ginbitay hi Haman ha kahoy nga iya igin-andam para kan Mordecai, ngan an kasina han hadi nawara.