Ezra 9:1-15
9 Ngan katapos gud mabuhat ini nga mga butang, an mga prinsipe dinaop ha akon ngan nagsiring: “An katawohan han Israel ngan an mga saserdote ngan an mga Levita waray bumulag ha mga katawohan han katunaan ngan ha ira mangil-ad nga mga binuhatan,+ adton ginbubuhat han mga Canaanita, han mga Hiteo, han mga Perizita, han mga Jebusita, han mga Ammonita, han mga Moabita, han mga Ehiptohanon,+ ngan han mga Amorita.+
2 Ginkuha nira an iba han ira mga anak nga babaye basi magin asawa nira ngan han ira mga anak nga lalaki.+ Yana hira, an baraan nga tulin,*+ nahisalakot ha mga katawohan han katunaan.+ An mga prinsipe ngan an kabulig nga mga magmarando an nangunguna nga mga salaan may kalabotan hini nga pagkadiri-matinumanon.”
3 Pakabati ko gud mahitungod hini, gin-gisi ko an akon pan-ilarom ngan pantungbaw nga bado ngan gin-gabot ko an pipira nga buhok han akon ulo ngan han akon bungot, ngan liningkod ako nga diri makatoo.
4 Katapos, an ngatanan nga may hilarom nga respeto* ha mga pulong han Dios han Israel nagtirirok ha palibot ko tungod han pagkadiri-matinumanon han nadistyero nga katawohan, samtang nagliliningkod ako nga diri makatoo tubtob ha paghalad han lugas nga iginhahalad ha pagsirom.+
5 Ngan ha panahon han paghalad han lugas nga iginhahalad ha pagsirom,+ tinindog ako tikang ha akon paghiubos, nga gisi an akon pan-ilarom ngan pantungbaw nga bado, ngan linuhod ako ngan igin-unat an akon mga kamot ngadto kan Jehova nga akon Dios.
6 Ngan nagsiring ako: “O Dios ko, naaawod ako ngan naaalo nga humangad ha imo, O Dios ko, kay an kadamu han amon mga sayop lahos na ha amon mga ulo ngan an amon mga sala inabot na ha langit.+
7 Tikang ha mga adlaw han amon mga kaapoy-apoyan tubtob hini nga adlaw duro an amon pagin salaan;+ ngan tungod han amon mga sayop, kami, an amon mga hadi, ngan an amon mga saserdote igintubyan ha kamot han mga hadi han mga nasud ngan ha espada,+ ngan ginbihag+ kami, ginpanguhaan hin mga butang sugad nga dinag-an,+ ngan ginpakaalohan, sugad han kahimtang yana.+
8 Pero yana ha halipot nga takna, hi Jehova nga amon Dios nagpakita hin kalooy pinaagi ha pagtugot ha mga nanhibilin nga makatalwas ngan pinaagi ha paghatag ha amon hin marig-on nga dapit* ha iya baraan nga lugar,+ basi pahinaboon nga maglamrag an amon mga mata, O amon Dios, ngan basi tagan kami hin gutiay nga kapahuwayan tikang ha amon pagkauripon.
9 Kay bisan kon mga uripon kami,+ waray kami bayai han amon Dios durante han amon pagkauripon; kondi iginpakita niya an iya maunungon nga gugma ha amon ha atubangan han mga hadi han Persia,+ basi tagan kami hin bag-o nga kusog para tindugon an balay han amon Dios+ ngan tukuron utro an nabungkag nga mga lugar hito ngan tagan kami hin pader nga bato* ha Juda ngan ha Jerusalem.
10 “Pero yana, O amon Dios, ano an amon masisiring katapos hini? Kay ginbayaan namon an imo mga sugo,
11 nga imo iginhatag ha amon pinaagi han imo mga surugoon nga mga propeta, nga nasiring: ‘An tuna nga iyo susudlon basi pagtag-iyahon usa nga mahugaw nga tuna tungod han kahugaw han mga katawohan han katunaan; tungod han ira mangil-ad nga mga binuhatan, ira ito ginpuno hin kahugawan tikang ha usa nga kataposan ngadto ha luyo nga kataposan.+
12 Salit ayaw ihatag an iyo mga anak nga babaye ha ira mga anak nga lalaki, ngan ayaw karawata an ira mga anak nga babaye para ha iyo mga anak nga lalaki;+ ngan ayaw gud kamo pagbuhat hin bisan ano nga maghahatag ha ira hin kamurayawan ngan kauswagan,+ basi magin makusog kamo ngan kaunon niyo an mag-opay nga mga butang han tuna ngan pagtag-iyahon ito para ha iyo mga anak ha kadayonan.’
13 Ngan katapos han ngatanan nga nahitabo ha amon tungod han amon magraot nga mga buhat ngan han amon duro nga pagin salaan—kay ikaw, O amon Dios, waray magtratar ha amon sumala ha amon sala,+ ngan igintugot mo nga makatalwas an iba ha amon dinhi+—
14 tatalapason ba namon utro an imo mga sugo ngan makikig-alyansa pinaagi han pag-asawa* ha mga katawohan nga nagbubuhat hinin mangil-ad nga mga butang?+ Diri ba masisina ka gud ha amon nga tungod hito bubungkagon mo kami hin bug-os, ngan waray ka ibibilin o isasalin nga buhi?
15 O Jehova nga Dios han Israel, matadong ka,+ kay nakatalwas kami sugad nga mga nanhibilin tubtob hini nga adlaw. Yana aadi kami ha imo atubangan bisan kon salaan kami, kay katapos hini ngatanan, waray bisan hin-o ha amon nga may katungod nga tumindog ha imo atubangan.”+
Mga footnote
^ Lit., “binhi.”
^ Lit., “nga nangungurog.”
^ O “hin usok han tolda.”
^ O “hin nagpapanalipod nga pader.”
^ O “ngan makikig-asawa.”
