Habakuk 3:1-19
3 An pag-ampo han propeta nga hi Habakuk, pinaagi hin mga kanta nga masurub-on:*
2 O Jehova, nabatian ko an sumat mahitungod ha imo.
Nahipapausa gud ako, O Jehova, han imo ginbubuhat.
Ha butnga han katuigan* buhia ito!
Ha butnga han katuigan* ipahibaro ito.
Mahinumdom ka unta ha pagpakita hin kalooy ha panahon han kasamok.+
3 An Dios inabot tikang ha Teman,An Baraan nga Dios tikang ha Bukid Paran.+ (Selah)*
An iya pagkaharangdon nakaputos han langit;+An tuna napuno han pagdayaw ha iya.
4 An iya kahayag pariho han kalamrag.+
Duha nga sanag an naglalamrag tikang ha iya kamot,Didto nakatago an iya kusog.
5 An peste nag-uuna ha iya,+Ngan an hitaas nga hiranat nasunod ha iya mga tiil.
6 Tinindog hiya ngan ginbay-og an tuna.+
Pinaagi hin siplat, iya ginpalukso an mga nasud.+
An waray kataposan nga kabukiran ginpusak,Ngan an maiha na nga mga bungtod nanyukbo.+
Iya an mga aragian ha nag-agi nga mga panahon.
7 Nakita ko an duro nga kabaraka ha mga tolda han Cusan.
An pantolda nga mga tela ha tuna han Midian nangurog.+
8 Kontra ba ha mga salog, O Jehova,Kontra ba ha mga salog nga an imo kasina naglalaga?
O ha dagat ka nasisina hinduro?+
Kay sinakay ka ha imo mga kabayo;+An imo mga karuwahe amo an nagdaog.*+
9 An imo bawog waray putos ngan andam na.
An mga tungkod* may panumpa.* (Selah)
Imo ginbuka an tuna pinaagi hin mga salog.
10 An kabukiran nagkuriot ha kasakit ha pakakita ha imo.+
Binuhos an masulog nga katubigan.
An kahiladman inuwang pinaagi han tingog hito.+
Gin-alsa hito hin hitaas an mga kamot hito.
11 An adlaw ngan an bulan inundang ha hitaas nga urukyan hito.+
An imo mga pana nagkagawas pariho han kapawa.+
An kidlat han imo bangkaw malamrag.
12 Naglakat ka ha tuna nga nangangalas.
Gintamak-tamakan* mo an mga nasud kay nasisina ka.
13 Ginawas ka para ha katalwasan han imo katawohan, basi talwason an imo dinihogan.
Imo gindugmok an lider* ha balay han maraot.
Iginbuhayhag ito tikang ha pundasyon tubtob ha atop.* (Selah)
14 Imo ginbuno an ulo han iya mga girriro pinaagi han iya kalugaringon nga mga armas*
Han ginios hira sugad hin bagyo basi sarangon ako.
Nalipay gud hira ha paglamoy han tawo nga nag-aantos tikang ha tago nga lugar.
15 Gintara mo an dagat upod an imo mga kabayo,Ngada ha mabalud nga haluag nga katubigan.
16 Nabatian ko ngan nangurog ako;*
Ha tunog hito nangurog an akon mga im-im.
An pagkadunot sinulod ha akon mga tul-an;+An akon mga bitiis nangurog.
Pero hilom nga naghuhulat ako ha adlaw han kasakitan,+Kay maabot ito ha mga tawo nga naatake ha amon.
17 Bisan kon an kahoy nga igos diri mamukad,Ngan waray bunga an mga tanom nga ubas;Bisan kon an olibo diri mamunga,Ngan an mga uma* diri maghatag hin pagkaon;Bisan kon an panon mawara ha toril,Ngan waray mga baka ha mga kwadra;
18 Pero ha akon bahin, magrarayhak ako tungod kan Jehova;Malilipay ako tungod han Dios nga nagtatalwas ha akon.+
19 Hi Jehova nga Soberano nga Ginoo amo an akon kusog;+An akon mga tiil iya hihimoon pariho hin kanan bugsok
Ngan iya ako patatamakon ha higtaas nga mga lugar.+
Mga footnote
^ O “mga kanta han pagtaguminatay.”
^ O posible nga “Ha amon panahon.”
^ O posible nga “Ha amon panahon.”
^ O “katalwasan.”
^ O posible nga “mga pana.”
^ O posible nga “An mga panumpa han mga tribo iginpahayag.”
^ Lit., “Gin-giok.”
^ Lit., “ulo.”
^ Lit., “liog.”
^ Lit., “iya mga baston.”
^ Lit., “ngan an akon tiyan nangurog.”
^ O “mga hagdan-hagdan nga uma.”
