Mga Hukom 2:1-23
2 Katapos, tikang ha Gilgal+ an anghel ni Jehova+ sinagka ngadto ha Bokim ngan nagsiring: “Igin-gawas ko kamo tikang ha Ehipto ngadto ha tuna nga iginpanumpa ko ha iyo mga kaapoy-apoyan.+ Dugang pa, nagsiring ako, ‘Diri ko gud bubungkagon an akon kasabotan ha iyo.+
2 Ha iyo bahin, kinahanglan diri kamo maghimo hin kasabotan ha mga umurukoy hini nga tuna+ ngan sadang niyo bungkagon an ira mga halaran.’+ Kondi waray niyo ako sugta.+ Kay ano nga ginbuhat niyo ini?
3 Amo nga nagsiring liwat ako, ‘Diri ko hira paiiwason tikang ha iyo atubangan,+ ngan ira kamo lilit-agon,+ ngan isisimang kamo han ira mga dios.’”+
4 Han ginyakan han anghel ni Jehova ini nga mga pulong ha ngatanan nga Israelita, an katawohan nagtikang pagtangis hin makusog.
5 Salit ginngaranan nira ito nga lugar hin Bokim,* ngan naghalad hira didto kan Jehova.
6 Han ginpalakat ni Josue an katawohan, an tagsa nga Israelita kinadto ha iya panurundon basi pagtag-iyahon an tuna.+
7 An katawohan padayon nga nag-alagad kan Jehova ha ngatanan nga adlaw ni Josue ngan ha ngatanan nga adlaw han mga tigurang nga nagpadayon nga buhi katapos mamatay hi Josue ngan nakakita han ngatanan nga gamhanan nga buhat ni Jehova para ha Israel.+
8 Katapos hi Josue nga anak ni Nun, nga surugoon ni Jehova, namatay han 110 anyos hiya.+
9 Salit iginlubong nira hiya ha teritoryo nga iya panurundon ha Timnat-heres,+ ha kabukiran han Efraim, ha norte han Bukid Gaas.+
10 Iton bug-os nga henerasyon igintampo ha ira mga kaapoy-apoyan,* ngan katapos nira, sumunod an henerasyon nga diri nakilala kan Jehova o diri maaram han iya ginbuhat para ha Israel.
11 Salit ginbuhat han mga Israelita an maraot ha pagkita ni Jehova ngan nag-alagad* ha mga Baal.+
12 Hito nga paagi ginbayaan nira hi Jehova, an Dios han ira mga amay, nga naggawas ha ira ha tuna han Ehipto.+ Ngan sinunod hira ha iba nga mga dios, an mga dios han mga katawohan nga nakapalibot ha ira,+ ngan yinukbo hira ha ira ngan ginpasina hi Jehova.+
13 Ira ginbayaan hi Jehova ngan nag-alagad kan Baal ngan ha mga imahen ni Astoret.+
14 Tungod hito naglarab an kasina ni Jehova ha Israel, salit igintubyan niya hira ha mga tawo nga nanguha han ira mga butang sugad nga dinag-an.+ Iya hira iginbaligya ha kamot han mga kaaway nga nakapalibot ha ira,+ ngan waray na hira makaato ha ira mga kaaway.+
15 Diin man hira kumadto, nakontra ha ira an kamot ni Jehova ngan nagdadara hin kadaot ha ira,+ sugad han ginsiring ni Jehova ngan sugad han iginpanumpa ni Jehova ha ira,+ ngan duro gud an ira pag-antos.+
16 Salit hi Jehova naghatag ha ira hin mga hukom nga magtatalwas ha ira tikang ha kamot han mga nanguha han ira mga butang sugad nga dinag-an.+
17 Kondi nadiri hira pagpamati bisan ha mga hukom ngan nagbuhat hin imoralidad pinaagi ha pagsingba ha iba nga mga dios ngan pagyukbo ha ira. Madagmit hira nga sinimang tikang ha dalan nga ginlaktan han ira mga kaapoy-apoyan, nga sinugot ha mga sugo ni Jehova.+ Waray nira ito buhata.
18 Ha kada panahon nga hi Jehova naghahatag hin mga hukom para ha ira,+ hi Jehova kaupod han hukom ngan gintatalwas hira tikang ha kamot han ira mga kaaway ha ngatanan nga adlaw han hukom; kay hi Jehova nalooy*+ ha ira pangaraba tungod han mga nagtalumpigos ha ira+ ngan han mga nag-aabuso ha ira.
19 Kondi pagkamatay han hukom, nabalik hira ha pagbuhat hin mas maraot pa kay ha ginbuhat han ira mga amay pinaagi ha pagsunod ha iba nga mga dios, pag-alagad ha ira ngan pagyukbo ha ira.+ Waray nira bayai an ira mga binuhatan ngan an katig-a han ira ulo.
20 Ha urhi an kasina ni Jehova naglarab kontra ha Israel,+ ngan nagsiring hiya: “Tungod kay gintalapas hini nga nasud an akon kasabotan+ nga akon iginsugo ha ira mga kaapoy-apoyan ngan waray hira sumugot ha akon,+
21 diri ko gud paiiwason tikang ha ira atubangan an bisan usa han mga nasud nga waray masakop ni Josue tubtob han namatay hiya.+
22 Katuyoan hini nga masarihan kon titipigan han Israel an dalan ni Jehova+ pinaagi ha paglakat dida hito sugad han ginbuhat han ira mga amay.”
23 Salit gintugotan ni Jehova ini nga mga nasud nga magpabilin. Waray dayon niya hira paiwasa, ngan waray niya hira ihatag ha kamot ni Josue.
Mga footnote
^ Nangangahulogan nga “Mga Paratangis.”
^ Pasiday ini nga mga pulong nga nagpapasabot hin kamatayon.
^ O “nagsingba.”
^ O “nasubo.”
