Jeremias 19:1-15
19 Ini an siring ni Jehova: “Lakat ngan palit hin tibod tikang ha parahimo hin daba.+ Iupod an pipira nga tigurang han katawohan ngan an pipira nga tigurang han mga saserdote,
2 ngan pakadto ha Walog han Anak nga Lalaki ni Hinom,+ nga hirani ha aragian tipasulod ha Ganghaan han Buong nga mga Daba. Ngan didto ipasamwak an mga pulong nga akon ginsiring ha imo.
3 Masiring ka, ‘Pamatii an pulong ni Jehova, kamo nga mga hadi han Juda ngan mga naukoy ha Jerusalem. Ini an siring ni Jehova han mga hugpo, an Dios han Israel:
“‘“Hirani na ako magpadapat hin kabungkagan hini nga lugar, ngan an bisan hin-o nga makabati mahitungod hito mahahadlok gud.*
4 Tungod ito kay ginbayaan nira ako+ ngan ini nga lugar ginhimo nira nga diri na nakikilala.+ Dida hini naghahalad hira ha iba nga mga dios, nga diri nira kilala ngan han ira mga kaapoy-apoyan ngan han mga hadi han Juda, ngan ini nga lugar ginpuno nira han dugo han inosente nga mga tawo.+
5 Gintukod nira an higtaas nga mga lugar ni Baal basi sunugon ha kalayo an ira mga anak sugad nga bug-os nga mga halad nga sinunog para kan Baal,+ usa nga butang nga waray ko igsugo o igyakan ngan waray gud ngani sumulod ha akon kasingkasing.”’*+
6 “‘“Salit kitaa! maabot an mga adlaw,” nasiring hi Jehova, “nga ini nga lugar diri na tatawagon nga Tofet o Walog han Anak nga Lalaki ni Hinom kondi Walog han Pagpamatay.+
7 Pupugngan ko an mga plano han Juda ngan Jerusalem hini nga lugar, ngan pahihinaboon ko nga mamatay hira pinaagi han espada ha atubangan han ira mga kaaway ngan pinaagi han kamot han mga nag-iikaparatay ha ira.* Ngan ipapakaon ko an ira patay nga mga lawas ha mga tamsi ha langit ngan ha mga hayop ha tuna.+
8 Ngan ini nga syudad hihimoon ko nga makaharadlok ngan taramayon.* An kada tagsa nga nalabay dida hito magkikita nga nahahadlok ngan magtatamay tungod han ngatanan nga peste hito.+
9 Ngan pahihinaboon ko nga kaunon nira an unod han ira mga anak nga lalaki ngan mga anak nga babaye, ngan kakaunon han tagsa ha ira an unod han iya igkasi-tawo, tungod han pag-atake ngan han kakurian ha panahon nga palibotan hira han ira mga kaaway ngan han mga nag-iikaparatay ha ira.”’*+
10 “Katapos, ipusak an tibod ha atubangan han kalalakin-an nga maupod ha imo,
11 ngan sidnga hira, ‘Ini an siring ni Jehova han mga hugpo: “Ha sugad hini nga paagi ko pupusakon ini nga katawohan ngan ini nga syudad, pariho hin tawo nga nagpupusak hin surudlan han parahimo hin daba salit diri na ito mabubug-os pa; ngan iglulubong nira ha Tofet an mga patay tubtob nga waray na espasyo dida hito nga paglulubngan.”’+
12 “‘Ito an akon bubuhaton hini nga lugar,’ nasiring hi Jehova, ‘ngan ha mga naukoy hini, basi himoon ini nga syudad nga pariho han Tofet.
13 Ngan an mga balay ha Jerusalem ngan an mga balay han mga hadi han Juda magigin mahugaw pariho hini nga lugar han Tofet,+ oo, an ngatanan nga balay nga ha mga atop naghahalad hira ha bug-os nga hugpo han langit+ ngan nagbububo hira hin mga halad nga irimnon ngadto ha iba nga mga dios.’”+
14 Pagbalik ni Jeremias tikang ha Tofet diin hiya ginpakadto ni Jehova basi managna, tinindog hiya ha bungsaran han balay ni Jehova ngan nagsiring ha ngatanan nga katawohan:
15 “Ini an siring ni Jehova han mga hugpo, an Dios han Israel, ‘Kitaa, pahihinaboon ko hini nga syudad ngan ha ngatanan nga bungto hini an ngatanan nga kadaot nga akon iginyakan kontra hini, kay nadiri gud hira nga* sugton an akon mga pulong.’”+
Mga footnote
^ Lit., “manggigirabo an mga talinga.”
^ O “waray ko gud mahunahuna.”
^ O “namimiling han ira kalag.”
^ Lit., “ngan usa nga butang nga tataghoyan.”
^ O “namimiling han ira kalag.”
^ Lit., “ginpatig-a nira an ira liog basi diri.”
