Jeremias 30:1-24
-
Saad nga pagpahiuli ngan pagtambal (1-24)
30 An pulong nga inabot kan Jeremias tikang kan Jehova, nga nasiring:
2 “Ini an siring ni Jehova nga Dios han Israel, ‘Isurat ha usa nga libro an ngatanan nga pulong nga akon iginyayakan ha imo.
3 Kay “kitaa! maabot an mga adlaw,” nasiring hi Jehova, “nga titirukon ko an mga nabihag ha akon katawohan, an Israel ngan Juda,”+ nasiring hi Jehova, “ngan ibabalik ko hira ha tuna nga akon iginhatag ha ira mga kaapoy-apoyan, ngan pagtatag-iyahon nira ito utro.”’”+
4 Ini an mga pulong nga iginyakan ni Jehova ha Israel ngan Juda.
5 Ini an siring ni Jehova:
“Nakabati kami han mga aringasa han pangurog;May-ada duro nga kahadlok, ngan waray kamurayawan.
6 Alayon pagpakiana kon puydi ba mag-anak an usa nga lalaki.
Kay ano man nga nakikita ko nga ginkakaptan han tagsa nga makusog nga lalaki an iya tiyan*Pariho hin babaye nga nag-aanak?+
Kay ano nga nanduas an tagsa nga nawong?
7 Abaadaw! Kay maraot gud* ito nga adlaw.+
Waray ito kapariho,Usa nga panahon han kasakitan para ha Jacob.
Kondi tatalwason hiya tikang hito.”
8 “Ngan hito nga adlaw,” nasiring hi Jehova han mga hugpo, “babarion ko an yugo tikang ha imo liog, ngan uutdon ko an imo mga higot; ngan an mga estranghero* diri na mag-uuripon ha iya.*
9 Mag-aalagad hira kan Jehova nga ira Dios ngan kan David nga ira hadi, nga akon ihahatag ha ira.”+
10 “Ngan ikaw Jacob nga akon surugoon, ayaw kahadlok,” nasiring hi Jehova,“Ngan ayaw kalisang, O Israel.+
Kay tatalwason ko ikaw tikang ha hirayoNgan an imo tulin tikang ha lugar diin bihag hira.+
An Jacob mabalik ngan magigin murayaw ngan waray ginkakabarak-an,Ngan waray bisan hin-o nga makakapahadlok ha ira.”+
11 “Kay kaupod mo ako,” nasiring hi Jehova, “basi talwason ka.
Pero pupoohon ko an ngatanan nga nasud diin ko ikaw iginsarang;+Kondi diri ko ikaw pupoohon.+
Didisiplinahon* ko ikaw ha husto nga sukol,Ngan diri gud ako matugot nga diri ka masirotan.”+
12 Kay ini an siring ni Jehova:
“Waray tambal ha imo kadaot.+
Diri mag-oopay an imo samad.
13 Waray nagdidepensa ha imo,Waray paagi ha pagtambal han imo samad.
Waray tambal para ha imo.
14 Ginkalimtan ka han ngatanan mo nga karelasyon.+
Diri ka na nira ginbibiling.
Kay ginhampak ko ikaw pariho han pagbalbag han usa nga kaaway,+Pariho han pagsirot han mapintas nga tawo,Tungod han imo duro nga pagkasalaan ngan han imo damu nga sala.+
15 Kay ano nga nangangaraba ka tungod han imo kadaot?
Diri natatambal an imo kasakit!
Tungod han imo duro nga pagkasalaan ngan han imo damu nga sala+Ginbuhat ko ini ha imo.
16 Salit an ngatanan nga naglalamoy ha imo lalamuyon liwat,+Ngan an ngatanan mo nga kaaway bibihagon liwat.+
An mga nangangagaw ha imo pangangagawan,Ngan an ngatanan nga nangunguha han imo mga butang sugad nga dinag-an itutubyan ko basi panguhaan hin mga butang.”+
17 “Kondi ibabalik ko an imo kahimsog ngan tatambalon an imo mga samad,”+ nasiring hi Jehova,“Bisan kon gintawag ka nira nga babaye nga ginpaiwas:
‘An Zion, nga waray bisan hin-o nga namimiling.’”+
18 Ini an siring ni Jehova:
“Kitaa, titirukon ko an mga nabihag ha mga tolda han Jacob,+Ngan malolooy ako ha iya mga tabernakulo.
An syudad tutukuron utro dida ha iya bungdo,+Ngan an marig-on nga torre matindog dida ha lugar nga angayan para hito.
19 Ngan tikang ha ira mababatian an pagpasalamat ngan an pagkaragtatawa.+
Padadamuon ko hira, ngan diri hira magigin gutiay;+Hihimoon ko hira nga damu*Ngan diri pipira la.+
20 An iya mga anak magigin pariho han ha naglabay,Ngan an iya katawohan marig-on nga maiestablisar ha akon atubangan.+
Sisirotan ko an ngatanan nga nagtatalumpigos ha iya.+
21 An iya dungganon magtitikang ha iya,Ngan an iya magmarando magtitikang ha butnga niya.
Pahihiranion ko hiya, ngan madaop hiya ha akon.”
“Kay hin-o an may kaisog* ha pagdaop ha akon?” nasiring hi Jehova.
22 “Ngan kamo magigin akon katawohan,+ ngan ako magigin iyo Dios.”+
23 Kitaa! Usa nga bagyo tikang kan Jehova an tigda nga magawas nga may kapungot,+Usa nga buhawi nga magbibirik-birik ha ulo han magraot.
24 An naglalaga nga kasina ni Jehova diri mawawaraTubtob nga diri pa niya mabuhat ngan matuman an karuyag han iya kasingkasing.+
Ha ultimo nga bahin han mga adlaw masasabtan niyo ini.+
Mga footnote
^ O “mga pig-i.”
^ Lit., “daku.”
^ O “an mga taga-iba nga nasud.”
^ O “ira.”
^ O “Tatadungon.”
^ O posible nga “pinasidunggan.”
^ Lit., “maghahatag han iya kasingkasing sugad nga garantiya.”
