Jeremias 35:1-19
-
Mga Recabita susbaranan ha pagin masinugtanon (1-19)
35 Ini an pulong nga inabot kan Jeremias tikang kan Jehova ha mga adlaw ni Jehoiakim+ nga anak nga lalaki ni Josias, nga hadi han Juda, nga nasiring:
2 “Pakadto ha panimalay han mga Recabita+ ngan pakiistorya ha ira ngan dad-a hira ha balay ni Jehova, ha usa han mga kwarto nga pangaonan;* katapos tagi hira hin bino nga maiinom.”
3 Salit gindara ko hi Jaazanias nga anak nga lalaki ni Jeremias nga anak nga lalaki ni Habazinias, an iya mga bugto nga lalaki, an ngatanan niya nga anak nga lalaki, ngan an bug-os nga panimalay han mga Recabita
4 ngadto ha balay ni Jehova. Gindara ko hira ha kwarto nga pangaonan han mga anak nga lalaki ni Hanan nga anak nga lalaki ni Igdalias nga surugoon han tinuod nga Dios, nga sapit han kwarto nga pangaonan han mga prinsipe nga nahimumutang ha igbaw han kwarto nga pangaonan ni Maaseias nga anak nga lalaki ni Salum nga parabantay han purtahan.
5 Katapos, nagbutang ako hin mga kopa ngan mga irimnan hin bino nga puno hin bino ha atubangan han kalalakin-an han panimalay han mga Recabita ngan nagsiring ha ira: “Inom kamo hin bino.”
6 Pero nagsiring hira: “Diri kami mainom hin bino, kay ini an iginsugo ha amon ni Jehonadab*+ nga anak nga lalaki ni Recab, nga amon kaapoy-apoyan, ‘Ayaw gud kamo ngan an iyo mga anak pag-inom hin bino.
7 Ngan ayaw kamo pagtukod hin balay, pagsabwag hin binhi, o pagtanom o pagtag-iya hin urubasan. Lugod, kinahanglan umukoy kamo pirme ha mga tolda, basi mabuhi kamo hin maiha nga panahon ha tuna nga gin-uukyan niyo sugad nga mga dayo.’
8 Salit padayon nga ginsusugot namon an ngatanan nga iginsugo ha amon ni Jehonadab nga anak han amon kaapoy-apoyan nga hi Recab, pinaagi han diri gud pag-inom hin bisan ano nga bino—kami, an amon mga asawa, an amon mga anak nga lalaki, ngan an amon mga anak nga babaye.
9 Ngan diri kami nagtutukod hin mga balay nga uukyan, ngan waray liwat kami mga urubasan o mga uma o mga binhi.
10 Padayon kami nga naukoy ha mga tolda ngan nasugot ha ngatanan nga iginsugo ha amon ni Jehonadab* nga amon kaapoy-apoyan.
11 Pero han gin-atake ni Hadi Nabucodonosor* han Babilonya ini nga tuna,+ nagsiring kami, ‘Tana, kadto kita ha Jerusalem basi makapalagiw tikang ha kasundalohan han mga Caldeo ngan han mga Siryano,’ ngan yana naukoy kami ha Jerusalem.”
12 Ngan an pulong ni Jehova inabot kan Jeremias, nga nasiring:
13 “Ini an siring ni Jehova han mga hugpo, an Dios han Israel, ‘Lakat ngan sidnga an katawohan han Juda ngan an mga naukoy ha Jerusalem: “Waray ba kamo aghata hin pauroutro nga sugton an akon mga pulong?”+ nasiring hi Jehova.
14 “Ginsugo ni Jehonadab nga anak ni Recab an iya katulinan nga diri uminom hin bino, ngan gintuman nira an iya mga pulong pinaagi han diri pag-inom hito tubtob hini nga adlaw, kay ginsusunod nira an sugo han ira kaapoy-apoyan.+ Pero ako nakiistorya ha iyo hin pauroutro,* kondi waray niyo ako sugta.+
15 Ngan padayon ko nga ginsugo ha iyo an ngatanan ko nga surugoon nga mga propeta, nga ginsusugo hira hin pauroutro,*+ nga nasiring, ‘Alayon bayai niyo, han tagsa ha iyo, an iyo magraot nga mga panggawi,+ ngan buhata an husto! Ayaw kamo pagsunod ha iba nga mga dios ngan pag-alagad ha ira. Kon buhaton niyo ito, padayon kamo nga maukoy ha tuna nga akon iginhatag ha iyo ngan ha iyo mga kaapoy-apoyan.’+ Pero waray niyo ikiling an iyo talinga ngan waray kamo mamati ha akon.
16 Gintuman han katulinan ni Jehonadab nga anak ni Recab an iginsugo han ira kaapoy-apoyan ha ira,+ kondi ini nga katawohan waray mamati ha akon.”’”
17 “Salit ini an siring ni Jehova, an Dios han mga hugpo, an Dios han Israel: ‘Kitaa, pahihinaboon ko ha Juda ngan ha ngatanan nga naukoy ha Jerusalem an ngatanan nga kadaot nga akon iginpahamangno ha ira,+ kay nakiistorya ako ha ira, pero diri hira namamati, ngan nagpadayon ako ha pagtawag ha ira, pero diri hira nabaton.’”+
18 Ngan hi Jeremias nagsiring ha panimalay han mga Recabita: “Ini an siring ni Jehova han mga hugpo, an Dios han Israel, ‘Tungod kay iyo ginsugot an sugo ni Jehonadab nga iyo kaapoy-apoyan ngan padayon niyo nga ginsusunod an ngatanan niya nga sugo, nga ginbubuhat kon ano gud an iya iginsugo ha iyo,
19 ini an siring ni Jehova han mga hugpo, an Dios han Israel: “Hi Jehonadab* nga anak ni Recab diri gud mawawad-an hin tulin nga mag-aalagad ha akon atubangan.”’”
Mga footnote
^ O “mga ruwang.”
^ Lit., “Jonadab,” an ginpahalipot nga porma han Jehonadab.
^ Lit., “Jonadab,” an ginpahalipot nga porma han Jehonadab.
^ Lit., “Nabucodorosor,” usa pa nga ginagamit nga ispeling.
^ Lit., “nga nabuhát hin temprano ngan nakikiistorya.”
^ Lit., “nga nabuhát hin temprano ngan ginsusugo hira.”
^ Lit., “Jonadab,” an ginpahalipot nga porma han Jehonadab.
