Jeremias 45:1-5
-
Mensahe ni Jehova kan Baruc (1-5)
45 Ini an pulong nga iginyakan ni Jeremias nga propeta kan Baruc+ nga anak nga lalaki ni Nerias han iginsurat niya ha usa nga libro ini nga mga pulong nga igindikta ni Jeremias+ ha ikaupat ka tuig ni Jehoiakim+ nga anak nga lalaki ni Josias, nga hadi han Juda:
2 “Ini an siring ni Jehova nga Dios han Israel mahitungod ha imo, Baruc,
3 ‘Nagsiring ka: “Kairo ko, kay gindugangan ni Jehova hin kasubo an akon kasakit! Kinakapoy na ako ha akon pangaraba, ngan waray ako makaagi hin lugar nga pahuwayan.”’
4 “Sadang mo hiya sidngan, ‘Ini an siring ni Jehova: “Kitaa! An akon gintukod akon rurub-on, ngan an akon igintanom akon gagabuton—an bug-os nga tuna.+
5 Pero namimiling* ka hin dagku nga mga butang para ha imo kalugaringon. Ayaw na pamiling han sugad nga mga butang.”’
“‘Kay hirani na ako magpadapat hin kabungkagan ha ngatanan nga tawo,’*+ nasiring hi Jehova, ‘ngan bisan diin ka kumadto, ihahatag ko ha imo an imo kinabuhi* sugad nga dinag-an.’”*+
Mga footnote
^ O “naglalaom.”
^ Lit., “unod.”
^ O “kalag.”
^ O “tutugotan ko ikaw nga makapalagiw nga buhi.”
