Malakias 4:1-6
4 “Kay kitaa! an adlaw maabot, nga naglalaga pariho hin hudno,+ nga an ngatanan nga paragbuot ngan an ngatanan nga nagbubuhat hin karaotan magigin pariho han dagami. An maabot nga adlaw sigurado nga maglalamoy ha ira,” nasiring hi Jehova han mga hugpo, “ngan waray ito igsasalin ha ira bisan ugat o sanga.
2 Pero ha iyo nga nagpapasidungog* ha akon ngaran, masirang an adlaw han katadongan, nga an mga sanag* hito nakakatambal; ngan magluluksolukso kamo pariho hin pinatambok nga nati nga mga baka.”
3 “Ngan iyo tatamakan an magraot, kay magigin pariho hira han tapotapo ha ilarom han iyo mga rapadapa ha adlaw nga gumios ako,” nasiring hi Jehova han mga hugpo.
4 “Hinumdumi an Balaud han akon surugoon nga hi Moises, an mga regulasyon ngan mga paghukom nga akon iginsugo didto ha Horeb nga angay sugton han bug-os nga Israel.+
5 “Kitaa! Akon ginsusugo ngada ha iyo hi Elias nga propeta+ antes umabot an daku ngan urusahon gud nga adlaw ni Jehova.+
6 Ngan iya igpapahiuli an kasingkasing han mga tatay ngadto ha mga anak,+ ngan an kasingkasing han mga anak igpapahiuli ngadto ha mga tatay, basi diri ako kumada ngan magsirot han tuna, ha pagbungkag hito.”
