Mga Batan-on—Ano an Iyo Bubuhaton ha Iyo Kinabuhi?

“KARUYAG ko nga magpahimulos han gimaopayi ha kinabuhi.” Ito an siring han usa nga daragita. Sigu-rado nga ito liwat an imo karuyag. Kondi paonan-o ka magkakaada han “gimaopayi” ha kinabuhi? An media ngan an imo mga igkasi-batan-on, bangin an imo mga magturutdo pa ngani, posible magsiring nga nakakarawat ito pinaagi han pakatirok hin damu nga kwarta ngan pagkaada hin dungganon nga propesyon—pagin malampuson!

Kondi, an Biblia nagpapahamangno ha mga batan-on nga an pagtinguha hin kalamposan ha materyal usa la nga “panalinguha ha hangin.” (Eklesiastes 4:4) An usa nga hinungdan amo nga gutiay la nga mga batan-on an tinuod nga nagkakaada karikohan ngan kabantogan. Adton nagkakaada hito agsob nga nakakaeksperyensya hin duro nga kapakyasan. “Pariho ito han waray sulod nga kahon,” siring han usa nga batan-on ha Britanya nga nangalimbasog ha pagkaada hin dungganon nga akademiko nga propesyon. “Kon imo kikitaon ha sakob, waray ito sulod.” Totoo, an trabaho mahimo usahay magdara hin karikohan ngan pagkilala. Kondi diri ito makakatagbaw han imo ‘espirituwal nga panginahanglan.’ (Mateo 5:3) Dugang pa, an 1 Juan 2:17 nagpapahamangno nga “an kalibotan nawawara.” Bisan kon magmalampuson ka dinhi hini nga kalibotan, diri ito mag-iiha.

Salit an Eklesiastes 12:1 nagsasagda ha mga batan-on: “Hinumdumi an imo Maglalarang samtang batan-on ka pa.” (Today’s English Version) Oo, an pag-alagad kan Jehova nga Dios amo an gimaopayi nga paagi ha paggamit han imo kinabuhi. Kondi, kinahanglan magin kuwalipikado ka anay ha pag-alagad ha Dios. Paonan-o mo bubuhaton ito? Ngan ano an ginkikinahanglan ha pag-alagad ha Dios?

Pagin Kuwalipikado nga Magin Saksi ni Jehova

Siyahan, kinahanglan patuboon mo an hingyap ha pag-alagad ha Dios—ngan ito nga hingyap diri awtomatiko, bisan kon mga Kristiano an imo mga kag-anak. Kinahanglan magkaada ka kalugaringon nga relasyon kan Jehova. “An pag-ampo nabulig ha imo nga magkaada kalugaringon nga relasyon kan Jehova,” siring han usa nga daragita.—Salmo 62:8; Jakobo 4:8.

Iginpapatin-aw han Roma 12:2 an usa pa nga paagi nga kinahanglan buhaton mo. Nasiring ito: “[Pamatud-i niyo ha iyo kalugaringon] kon ano an maopay ngan karuruyagon ngan hingpit nga kaburut-on han Dios.” Naeksperyensyahan mo na ba nga magruhaduha ha pipira nga  mga butang nga igintututdo ha imo? Niyan, sunda an sagdon han Biblia, ngan ‘pamatud-i ha imo kalugaringon’ nga totoo ini nga mga butang! Maglugaring ha pagsaliksik. Basaha an Biblia ngan an basado-ha-Biblia nga mga publikasyon. Kondi, an pag-aram mahitungod ha Dios diri la kay paggamit han hunahuna ha pag-usisa han mga impormasyon. Magkaada panahon ha pamalandong han imo ginbabasa basi maisilsil ito ha imo simboliko nga kasingkasing. Hini nga paagi magtutubo an imo gugma ha Dios.—Salmo 1:2, 3.

Sunod, pangalimbasog nga isumat an imo hinbabaroan durante han ordinaryo nga pakiistorya, mahimo nga ha imo mga kaeskwela. An pagsangyaw ha kada balay amo an sunod nga pagbubuhaton. Usahay bangin igkita mo an usa nga kaeskwela samtang nagsasangyaw ka, ngan bangin kulbaon ka ha siyahan. Kondi an Biblia nagsasagda ha aton nga diri ‘ikaawod an maopay nga sumat.’ (Roma 1:16) Gindadara mo an mensahe mahitungod han kinabuhi ngan paglaom! Kay ano nga ikaawod ito?

Yana, kon mga Kristiano an imo mga kag-anak, bangin naupod ka na ha ira ha pagsangyaw. Kondi may-ada ka pa ba dugang nga nahihimo kay ha pagtindog nga waray aringasa ha purtahan o pagpahamutang la hin mga magasin ngan mga tract? Nakikiistorya ka na ba ha tagbalay, nga ginagamit an Biblia ha pagtutdo ha iya? Kon diri pa, pangaro hin bulig ha imo mga kag-anak o ha hamtong nga membro han kongregasyon. Himoa nga imo tumong nga magin kuwalipikado sugad nga diri-bawtismado nga magwarali han maopay nga sumat!

Maabot an panahon, mapapagios ka nga magpahinungod—nagsasaad ha Dios nga mag-aalagad ka ha iya tikang hito nga takna. (Roma 12:1) Kondi, an pagpahinungod diri kay ginbubuhat la ha pribado. Ginkikinahanglan han Dios nga an ngatanan maghimo hin “pagtug-an [ha kadaygan] ngadto ha kaluwasan.” (Roma 10:10) Ha panahon han bawtismo, berbal nga iginpapahayag mo siyahan an imo pagtoo. Nasunod an bawtismo ha tubig. (Mateo 28:19, 20) Oo, seryoso nga desisyon an pagpabawtismo. Kondi ayaw pag-alang tungod kay naabat ka nga bangin mapakyas ka. Kon sumarig ka ha Dios para han kusog, mahatag hiya ha imo hin “kapin kaopay nga gahum” ha pagbulig ha imo nga magmarig-on.—2 Korinto 4:7; 1 Pedro 5:10.

Ha panahon han bawtismo, nagigin usa ka han mga Saksi ni Jehova. (Isaias 43:10) Sadang magkaada ini daku nga epekto ha imo paagi han paggamit han imo kinabuhi. Nahiuupod ha pagpahinungod an ‘pagsalikway ha imo kalugaringon.’ (Mateo 16:24) Mahimo mo isalikway an pipira nga personal nga mga tumong ngan mga ambisyon ngan ‘pamilngon siyahan an ginhadian han Dios.’ (Mateo 6:33) Hini nga paagi an pagpahinungod ngan bawtismo nag-aabri hin damu nga mga higayon ha pagbuhat hito. Aton paghisgotan an pipira hini.

 Mga Higayon ha Bug-os-Panahon nga Pag-alagad ha Dios

● Pagpayunir an usa nga higayon. An payunir nga magwarali usa ka susbaranan nga bawtismado nga Kristiano nga naghikay ha paggasto hin diri maminos ha 70 ka oras kada bulan ha pagsangyaw han maopay nga sumat. An paggasto hin dugang nga panahon ha kanataran mabulig ha imo nga mapauswag an imo mga abilidad ha pagsangyaw ngan pagtutdo. Nakakaeksperyensya hin kalipay an damu nga mga payunir tungod ha pagbulig ha ira mga estudyante han Biblia nga magin bawtismado nga mga Saksi. May-ada ba sekular nga trabaho nga mahimo magin pariho hito kamakalilipay ngan makapatagbaw?

Basi mataparan an ira mga gastos, kadam-an han mga payunir an may-ada part-time nga mga sekular nga trabaho. Damu an abanse nga nagpaplano para hini nga responsabilidad pinaagi han pag-aram hin bokasyonal nga kurso ha eskwelahan o tikang ha ira mga kag-anak. Kon ikaw ngan an imo mga kag-anak naabat nga magigin maopay para ha imo nga magpadayon pa ha pag-eskwela katapos han high school, siguroha nga an imo motibo, diri magtirok hin damu nga kwarta, kondi suportahan an imo ministeryo ngan kon mahihimo, mag-alagad sugad nga bug-os-panahon nga ministro.

Kondi, an kinabuhi han usa nga payunir nakasentro, diri ha iya sekular nga trabaho, kondi ha iya ministeryo—ha pagbulig ha iba nga magkaada kinabuhi! Kay ano nga diri magin personal nga tumong an pagpayunir? An pagpayunir agsob nga nagtutugway ngadto ha iba pa nga mga pribilehiyo. Pananglitan, an iba nga mga payunir nabalhin ngadto ha mga lugar nga mas nanginginahanglan hin dugang nga mga magwarali han Ginhadian. An iba nag-aaram hin lain nga yinaknan ngan nag-aalagad ha lokal nga kongregasyon nga lain an yinaknan o kon diri man, ha iba nga nasud pa ngani. Oo, an pagpayunir makapatagbaw gud nga paagi han pagkinabuhi!

 ● An School for Kingdom Evangelizers usa pa nga higayon ha bug-os-panahon nga pag-alagad. Inin duha ka bulan nga pag-eskwela gindisenyo basi bansayon adton eksperyensyado nga mga payunir nga andam bumaya ha ira lugar basi mag-alagad ha bisan diin nga may panginahanglan. Hito nga paagi, sugad hin nasiring hira, “Iini ako; pakadtoa ako,” sugad nga pagsubad ha pinakabantogan nga Ebanghelisador dinhi ha tuna, hi Jesu-Kristo. (Isaias 6:8; Juan 7:29) An pagbalhin ha hirayo nga lugar mahimo mag-upod ha pagkinabuhi hin mas simple. An kultura, klima, ngan pagkaon bangin iba gud kay han nahiaraan han usa. Bangin kinahanglan pa ngani mag-aram hin iba nga yinaknan. Ini nga eskwelahan nabulig ha solo nga kabugtoan nga kalalakin-an ngan kababayin-an pati ha mga inasaw-an, nga nag-iedad hin 23 tubtob 65, ha pagkultibar hin diosnon nga mga kalidad nga ira pagkikinahanglanon ha ira toka ngan hin mga abilidad nga mabulig ha ira basi mas magamit hira ni Jehova ngan han iya organisasyon.

● An pag-alagad ha Bethel amo an pagboluntaryo ha usa han mga pasilidad han sanga nga opisina han mga Saksi ni Jehova. An pipira nga mga membro han pamilya han Bethel nagtatrabaho mismo ha panhimo hin mga literatura han Biblia. An iba gintatagan hin trabaho ha pagbulig, sugad han pagtipig han mga tinukod ngan mga kagamitan o han pag-ataman han mga kinahanglanon ha pisikal han pamilya han Bethel. An ngatanan nga mga toka sagrado nga mga pribilehiyo han pag-alagad kan Jehova. Dugang pa, malipayon adton aada ha Bethel tungod kay maaram hira nga anoman an ira buhaton, para ito ha kapulsanan han damu nga kabugtoan nira ha bug-os nga kalibotan.

 Usahay, an kabugtoan nga may-ada espesyal nga mga kaabtik gin-aaghat nga mag-alagad ha Bethel. Kondi, an kadam-an ha ira ginbabansay kon aadto na hira. Adton aada ha Bethel diri nag-aalagad tungod han materyal nga bentaha kondi natatagbaw ha mga tagana nga pagkaon, urukyan, ngan gutiay nga panggastos para ha kalugaringon. Sugad hini an iginsaysay han usa nga batan-on nga membro han pamilya han Bethel mahitungod han iya pag-alagad: “Makalilipay gud ito! Diri masayon an rutina, kondi damu nga mga bendisyon an akon nakakarawat ha pag-alagad dinhi.”

● An pag-alagad ha konstruksyon naghahatag hin higayon ha usa nga makigbahin ha pagtukod hin mga pasilidad han sanga nga opisina ngan mga Kingdom Hall. An construction servant, sugad han tawag ha ira, nabulig ha sugad nga buruhaton ha pagpanukod. Usa ini nga klase hin sagrado nga pag-alagad, pariho han buruhaton hadton nagtukod han templo ni Salomon. (1 Hadi 8:13-18) An mga kahikayan para ha pag-ataman ha mga construction servant pariho ha mga kahikayan ha pag-ataman ha pamilya han Bethel. Pagkadaku nga pribilehiyo hinin kabugtoan nga nag-aalagad hini nga bahin han buruhaton para ha kadayawan ni Jehova!

Bug-os-Kalag nga Mag-alagad kan Jehova

An pag-alagad kan Jehova amo an gimaopayi gud nga paagi ha paggamit han imo kinabuhi. Kay ano nga diri hunahunaon nga magin personal nga tumong an bug-os-panahon nga pag-alagad ha Dios? Hisguti an bug-os-panahon nga pag-alagad upod han imo mga kag-anak, mga tigurang ha iyo lugar, ngan ha iyo paramangno han sirkito. Kon interesado ka pag-alagad ha Bethel, o pag-eskwela ha School for Kingdom Evangelizers, tambong ha mga katirok para ha mga aplikante nga gindudumara ha regional nga mga kombensyon.

Siyempre, diri ngatanan mahimo magin kuwalipikado o makakahimo hin bug-os-panahon nga pag-alagad. Usahay limitado an nahihimo han usa tungod han mga problema ha kahimsog, mga kahimtang ha pinansyal, ngan mga obligasyon ha pamilya. Kondi, kinahanglan sundon han ngatanan nga dedikado nga mga Kristiano an sugo han Biblia nga: “Higugmaon mo an Ginoo nga imo Dios ha bug-os mo nga kasingkasing ngan ha bug-os mo nga kalag, ngan ha bug-os mo nga hunahuna.” (Mateo 22:37) Hi Jehova nagsusugo nga kinahanglan buhaton mo an gimaopayi nga imo mahihimo nga itinutugot han imo mga kahimtang. Salit anoman an imo kahimtang, himoa an pag-alagad kan Jehova nga magin an pinakaimportante ha imo kinabuhi. Maghimo hin praktikal nga teokratiko nga mga tumong. Oo, “hinumdumi an imo Maglalarang samtang batan-on ka pa”—ngan bibendisyonan ka ha waray kataposan tungod ha pagbuhat hito!

Gawas la kon iba an ipinakita, an ngatanan nga mga kotasyon ha Biblia tikang ha American Standard Revision nga iginhubad pinaagi han Philippine Bible Society.