Kingdom News No. 37

Mensahe ha Bug-os nga Kalibotan

Hirani Na an Kataposan han Palso nga Relihiyon!

▪ Ano an palso nga relihiyon?

▪ Paonan-o ito matatapos?

▪ Paonan-o ka maaapektohan hito?

 Ano an Palso nga Relihiyon?

Nasusubo ka ba mahitungod han mga krimen nga ginbubuhat ha ngaran han relihiyon? An mga girra ba, terorismo, ngan panlimbong nga ginbubuhat hadton nag-aangkon nga nag-aalagad ha Dios nakontra ha imo pag-abat hin hustisya? Kay ano nga an relihiyon baga hin amo an hinungdan han damu hinduro nga mga problema?

Diri ngatanan nga relihiyon, kondi an palso la nga relihiyon an responsable hinin damu nga mga problema. Iginpasabot han tinahod gud nga relihiyoso nga persona, hi Jesu-Kristo, nga an palso nga relihiyon nagbubunga hin magraot nga mga buhat, sugad la nga “an maraot nga kahoy nabunga hin magraot nga mga bunga.” (Mateo 7:15-17) Ano nga mga bunga an nahihimo han palso nga relihiyon?

An Palso nga Relihiyon  . . .

◼ NAGHIHILABOT HA GIRRA NGAN HA POLITIKA: “Ha Asia ngan ha iba nga mga lugar,” siring han magasin nga Asiaweek, “tuso nga kontrolado han gutom-ha-gahum nga mga lider an mga opinyon han mga tawo mahitungod han relihiyon basi matuman an ira kalugaringon nga mga panginahanglan.” Sugad nga resulta, an magasin nagpapahamangno: “An kalibotan namimeligro nga mahilubong ha kasamok.” Usa nga bantogan nga lider han relihiyon ha Estados Unidos an nagsiring: “Kinahanglan pamatayon mo an mga terorista basi matapos na an ira pamatay.” Ano an iya solusyon? “Pamatayon hira ngatanan ha ngaran han Ginoo.” Ha kabaliktaran, an Biblia nasiring: “Kon may tawo nga sumiring: Ako nahigugma ha Dios, ngan nadumot ha iya bugto, buwaon hiya.” (1 Juan 4:20) Hi Jesus nagsiring pa ngani: ‘[Padayon nga] higugmaa an iyo mga kaaway.’ (Mateo 5:44) Ha imo paghunahuna, mationan-o kadamu an mga relihiyon nga an mga membro hito naapi ha girra?

◼ NAGTUTUTDO HIN PALSO NGA DOKTRINA: An kadam-an nga mga relihiyon nagtututdo nga an kalag o espiritu amo an diri-nakikita nga bahin han tawo nga padayon nga nabubuhi katapos mamatay an pisikal nga lawas. Pinaagi hini nga katutdoan, damu hini nga mga relihiyon an naglilimbong ha ira mga membro, nagpapabayad hin kwarta ha pag-ampo para ha binulag nga mga kalag. Kondi, an Biblia nagtututdo hin iba nga doktrina. ‘An kalag nga nakakasala, ini mapatay.’ (Esekiel 18:4) “An mga buhi maaram nga hira mapatay; kondi an mga patay diri maaram han bisan ano.” (Eklesiastes 9:5) Hi Jesus nagtutdo nga an mga patay babanhawon—diri ini kinahanglanon kon an mga tawo may-ada diri-namamatay nga kalag. (Juan 11:11-25) Igintututdo ba han imo relihiyon nga an kalag diri namamatay?

◼ NAKONSINTER HA IMORAL NGA PAKIGHILAWAS: Ha mga nasud ha Weste, tinutugotan han mga relihiyon an mga bayot ngan mga tomboy nga magin mga klero, ngan ginsasagda an mga opisyal han gobyerno nga aprobahan an pag-asawa han pariho an sekso. Bisan an mga relihiyon nga nagkukondenar han imoralidad nakonsinter ha mga lider han relihiyon nga seksuwal nga nag-aabuso ha kabataan. Kondi, ano an igintututdo han Biblia? Matin-aw nga nasiring ito: “Diri kamo kalimbongan; bisan an mga makihihilawason, masingbahon ha mga diosdios, bisan an mga manlilibog, bisan an mga babayin-on, bisan an mga Sodomanhon, . . . diri makakapanunod ha ginhadian han Dios.” (1 Korinto 6:9, 10) May-ada ka ba hinbabaroan nga mga relihiyon nga nakonsinter ha imoral nga pakighilawas?

 Ano an magigin tidaraon han mga relihiyon nga namumunga hin dunot? Hi Jesus nagpahamangno: “An tagsa nga kahoy nga diri nabunga hin maopay nga bunga, pinupulod ngan isungo ha kalayo.” (Mateo 7:19) Oo, an palso nga relihiyon pupudlon ngan bubungkagon! Kondi paonan-on ngan san-o ini mahitatabo? An matagnaon nga bisyon nga iginrekord ha libro han Biblia nga Pahayag, kapitulo 17 ngan 18, naghahatag han baton.

Paonan-o Matatapos an Palso nga Relihiyon?

Handurawa nga usa nga puta an nasakay ha makaharadlok nga mananap. An mananap may-ada pito nga ulo ngan napulo nga sungay. (Pahayag 17:1-4) Hin-o an ginrirepresentaran han puta? May-ada hiya impluwensya ha “kahadian ha tuna.” Purpura an iya bado, nagamit hin insenso, ngan riko hinduro. Dugang pa, pinaagi han iya espiritistiko nga buhat, ‘an ngatanan nga mga nasud nagkalilimbongan.’ (Pahayag 17:18; 18:12, 13, 23) An Biblia nabulig ha aton nga masabtan nga ini nga puta usa ka bug-os-kalibotan nga relihiyoso nga organisasyon. Nagrirepresentar hiya, diri ha usa la nga relihiyon, kondi ha ngatanan nga relihiyon nga nagbubunga hin dunot.

An mananap nga sinasakyan han puta naglaladawan ha politikal nga mga gahum han kalibotan. * (Pahayag 17:10-13) An palso nga relihiyon nasakay hini nga politikal nga mananap, nangangalimbasog ha pag-impluwensya ha mga desisyon hito ngan ha pagkontrol ha direksyon hito.

Kondi, diri na mag-iiha, may-ada urusahon nga mahitatabo. “An napulo nga mga sungay nga imo hinkit-an, ngan an mananap, ini hira magdudumot han puta, ngan paglalaglagon ngan paghuhuboan hiya nira, ngan pangangaunon nira an iya unod, ngan pagsusunugon gud hiya ha kalayo.” (Pahayag 17:16) Tigda la ngan makangingirhat nga aatakehon han politikal nga mga gahum an palso nga relihiyon ngan bug-os nga bubungkagon ito! Ano an magpapagios ha ira nga buhaton ini? An libro han Biblia nga Pahayag nabaton: “Iginbutang han Dios ha ira mga kasingkasing an pagbuhat han iya kaburut-on.” (Pahayag 17:17) Oo, huhukman han Dios an palso nga relihiyon tungod ha ngatanan nga duro nga karaotan nga ginbubuhat hito ha iya ngaran. Ha hingpit nga hustisya, gagamiton an mga kaalyansa hito ha politika sugad nga iya instrumento ha pagbungkag.

Ano an kinahanglan buhaton mo kon diri mo karuyag mahiupod ha dadangatan han palso nga relihiyon? “Gawas kamo tikang ha iya, mga tawo ko,” nagsasagda an mensahero han Dios. (Pahayag 18:4, NW) Oo, panahon na yana ha pagpalagiw tikang ha palso nga relihiyon! Kondi ngain ka man makakapalagiw? Diri ngadto ha ateyismo, tungod kay an tidaraon hito waray liwat paglaom. (2 Tesalonika 1:6-9) An talwas la nga arayopan amo an totoo nga relihiyon. Paonan-o mo makikilala an totoo nga relihiyon?

 Kon Paonan-o Makikilala an Totoo nga Relihiyon

Ano nga mag-opay nga mga bunga an sadang mahimo han totoo nga relihiyon?—Mateo 7:17.

An Totoo nga Relihiyon  . . .

◼ NAGBUBUHAT HAN GUGMA: An totoo nga mga magsiringba “diri kanan kalibotan,” diri nagkakabahin-bahin tungod han rasa o kultura, ngan nagpapakita hin ‘gugma ha usa kag usa.’ (Juan 13:35; 17:16; Buhat 10:34, 35) Imbes nga patayon an usa kag usa, disidido hira mamatay para ha usa kag usa.—1 Juan 3:16.

◼ NASARIG HA PULONG HAN DIOS: Imbes nga igtutdo an “tradisyon” ngan “an mga sugo han mga tawo sugad nga mga doktrina,” iginbabasar han totoo nga relihiyon an mga doktrina hito ha Pulong han Dios, an Biblia. (Mateo 15:6-9, NW) Kay ano? Tungod kay ‘an ngatanan nga mga baraan nga surat nga ginpakaaghat han Dios may kapulsanan ha pagtutdo, ha pagbadlong, ha pagsaway, ha panutdoan nga ha katadongan.’—2 Timoteo 3:16.

◼ NAGPAPARIG-ON HAN MGA PAMILYA NGAN NAGBUBUHAT HAN HITAAS NGA MGA PRINSIPYO HA MORAL: An totoo nga relihiyon nagbabansay ha mga bana nga ‘higugmaon an ira mga asawa sugad ha ira kalugaringon nga lawas,’ nabulig ha mga asawa nga patuboon an hilarom nga ‘pagtahod ha ira asawa nga lalaki,’ ngan nagtututdo ha mga anak nga magin ‘masinugtanon ha ira mga kag-anak.’ (Efeso 5:28, 33; 6:1) Dugang pa, adton gintaporan hin mga katungdanan nga may awtoridad kinahanglan magin susbaranan ha moral.—1 Timoteo 3:1-10.

May-ada ba relihiyon nga nasunod hini nga mga prinsipyo? An libro nga Holocaust Politics nga iginpublikar han 2001, nasiring: “Kon mas damu nga mga tawo an nagkinabuhi uyon ha mga katutdoan ngan mga buhat han mga Saksi ni Jehova, napugngan unta an Holocaust ngan waray na unta pamatay ha rasa nga hinungdan han duro nga pag-antos ha kalibotan.”

Ha pagkamatuod, ha 235 nga mga nasud, an mga Saksi ni Jehova diri la kay nagsasangyaw han mga prinsipyo han Biblia ha moral —ira ginbubuhat ito. Gindadasig ka namon nga maghangyo ha mga Saksi ni Jehova nga buligan ka nga mahibaro kon ano an ginkikinahanglan han Dios ha imo basi makagsingba ka ha iya ha paagi nga kinakarawat niya. Kinahanglan gumios ka na yana. Ayaw paglangan. Hirani na an kataposan han palso nga relihiyon!—Sepania 2:2, 3.

Kon karuyag mo hin dugang pa nga impormasyon mahitungod han basado-ha-Biblia nga mensahe nga iginsasangyaw han mga Saksi ni Jehova, ayaw pag-alang ha pakigkomunikar ha ira ha adres ha ubos.

□ Karuyag ko makakarawat hin libre nga kopya han brosyur nga Padayon nga Magbantay!

□ Interesado ako ha libre nga pag-aram ha Biblia.

[Footnote]

[Blurb ha pahina 3]

An palso nga relihiyon may-ada impluwensya ha “kahadian ha tuna”

[Blurb ha pahina 3]

“Gawas kamo tikang ha iya, mga tawo ko”