“An Dios . . . magpapahid han ngatanan nga luha ha ira mga mata, ngan mawawara na an kamatayon, pag-antos, pagtangis, o kasakit.”​—Pahayag 21:3, 4, Contemporary English Version.

Makakasarig ka nga diri an Dios an hinungdan han aton mga problema.​—Santiago 1:13.

Maliliaw ka ha paghibaro nga nasasabtan gud han Dios an aton inaabat kon nag-aantos kita.​—Zacarias 2:8.

Makakalaom ka nga matatapos an ngatanan nga pag-antos.​—Salmo 37:9-11.

Oo, ha diri maminos duha nga hinungdan:

• An Dios nangangalas ha pag-antos ngan kawaray-hustisya. Tagda an inabat ni Jehova nga Dios han ginmaltrato an iya katawohan ha kadaan nga panahon. An Biblia nasiring nga nasubo gud hiya tungod han “mga nag-aabuso ha ira.”​—Hukom 2:18, Bag-o nga Kalibotan nga Hubad.

  Nasisina gud an Dios ha mga nagbubuhat hin maraot ha iba. Pananglitan, an Biblia nasiring nga mangil-ad ha iya an “mga kamot nga nagpapatay hin inosente nga tawo.”​—Proberbios 6:16, 17.

• An Dios nagtatagad ha tagsa ha aton. Diri la an kada tagsa an maaram “han iya kalugaringon nga pag-antos ngan han iya kalugaringon nga kasakit,” kondi maaram liwat hito hi Jehova!​—2 Cronicas 6:29, 30.

  Diri na mag-iiha, tatapuson ni Jehova an pag-antos han tagsa nga tawo pinaagi han iya Ginhadian. (Mateo 6:9, 10) Samtang diri pa ito nahitatabo, mahigugmaon nga ginliliaw niya an mga sinsero nga namimiling ha iya.​—Buhat 17:27; 2 Corinto 1:3, 4.