1. Ano an makakabulig ha aton basi mag-enjoy kita ha pag-aram ha mga tagna han Biblia?

 “NAG-I-ENJOY ako ha pag-aram ha mga tagna han Biblia,” siring han batan-on nga brother nga hi Ben. Ito ba liwat an imo inaabat? O inaabat mo ba nga makuri masabtan an mga tagna han Biblia? Bangin inaabat mo nga boring an pag-aram ha mga tagna. Pero kon mahibaroan mo kon kay ano nga iginpasurat ito ni Jehova ha iya Pulong, bangin magbag-o an imo hunahuna.

2. Ano an aton hihisgotan hini nga artikulo?

² Hini nga artikulo, hihisgotan naton kon kay ano nga dapat naton hibaroan an mga tagna han Biblia ngan kon paonan-o naton ito aadman. Katapos, uusisahon naton an duha nga tagna ha libro ni Daniel basi mahibaroan kon paonan-o an pagsabot hito makakabulig ha aton yana.

3. Ano an dapat naton buhaton basi masabtan an mga tagna han Biblia?

³ Dapat kita mangaro hin bulig basi masabtan an mga tagna han Biblia. Tagda ini nga ilustrasyon. Imadyina nga nabisita ka ha usa nga lugar nga diri ka pamilyar, pero an kaupod mo nga sangkay pamilyar gud hito. Maaram hiya kon hain na kamo dapit ngan kon tipakain an tagsa nga dalan. Sigurado nga malilipay ka nga an imo sangkay inupod ha imo. Ha pariho nga paagi, maaram hi Jehova kon hain na kita hini nga peryodo han panahon ngan kon ano an aton magigin kabubuwason. Salit basi masabtan an mga tagna han Biblia, kinahanglan mapainubsanon nga mangaro kita hin bulig kan Jehova.—Dan. 2:28; 2 Ped. 1:19, 20.

4. Kay ano nga hi Jehova nagpasurat hin mga tagna ha iya Pulong? (Jeremias 29:11) (Kitaa liwat an piktyur.)

⁴ Pariho han maopay nga kag-anak, karuyag ni Jehova nga an iya mga anak magkaada malipayon nga kabubuwason. (Basaha an Jeremias 29:11.) Pero diri pariho ha tawhanon nga kag-anak,  maisusumat ha aton ni Jehova kon ano an eksakto nga mahitatabo ha tiarabot. Nagpasurat hiya hin mga tagna ha iya Pulong basi mahibaroan naton an importante nga mga panhitabo antes pa ito mahitabo. (Isa. 46:10) An mga tagna han Biblia mahigugmaon nga regalo tikang ha aton langitnon nga Amay. Pero paonan-o mo masisiguro nga an mga tagna han Biblia matutuman?

5. Ano an mahibabaroan han mga batan-on ha eksperyensya ni Max?

⁵ Ha eskwelahan, an aton mga batan-on agsob nga napapalibotan han mga tawo nga gutiay la an respeto o waray gud respeto ha Biblia. Tungod han ira mga ginyayakan ngan ginbubuhat, an batan-on nga mga Saksi bangin magruhaduha ha ira mga gintotoohan. Pansina an eksperyensya han brother nga hi Max. Siring niya: “Han tin-edyer ako, nagruhaduha ako kon igintututdo gud ba han akon mga kag-anak an totoo nga relihiyon ngan kon an Biblia giniyahan gud ba han Dios.” Ano an ginbuhat han iya mga kag-anak? Nagsiring hiya, “Kalmado la hira, pero maaram ako nga nababaraka hira.” Ginbaton han mga kag-anak ni Max an iya mga pakiana parte ha Biblia. May ginbuhat liwat hi Max. “Gin-adman ko an mga tagna han Biblia,” siring niya, “ngan iginsumat ko an akon mga nahibaroan ha iba nga mga batan-on.” Ano an resulta? Hi Max nagsiring, “Katapos, nakombinse ako nga an Biblia giniyahan han Dios!”

6. Ano an dapat mo himoon kon may mga pagruhaduha ka, ngan kay ano?

⁶ Pariho kan Max, kon nagruruhaduha ka kon kamatuoran ba an aada ha Biblia, ayaw kakonsensya. Pero kinahanglan gumios ka dayon. An pagruhaduha pariho hin taoy. Kon papabay-an la ito, hinay-hinay nga dadauton hito an usa nga importante nga butang. Basi matanggal an bisan ano nga “taoy” ha imo pagtoo, pakianhi an imo kalugaringon, ‘Natoo ba ako ha ginsisiring han Biblia mahitungod ha tiarabot?’ Kon diri ka sigurado, kinahanglan adman mo an mga tagna han Biblia nga natuman na. Paonan-o mo ito bubuhaton?

7. Ano nga ehemplo an iginpakita ni Daniel kon paonan-o aadman an mga tagna? (Daniel 12:10) (Kitaa liwat an piktyur.)

⁷ Hi Daniel nagpakita hin maopay nga ehemplo kon paonan-o aadman an mga tagna. Gin-adman niya ito nga may husto nga motibo—basi mahibaroan an kamatuoran. Hi Daniel mapainubsanon liwat. Maaram hiya nga mabulig hi Jehova ha mga nakilala ha Iya ngan nagkikinabuhi uyon ha iya malimpyo nga mga suruklan nga masabtan an mga tagna. (Dan. 2:27, 28; basaha an Daniel 12:10.) Ginpamatud-an ni Daniel nga mapainubsanon hiya kay sinarig hiya ha bulig ni Jehova. (Dan. 2:18) Dugang pa, hi Daniel nag-aram hin maopay. Gin-adman niya an giniyahan nga mga sinurat nga may-ada ha iya panahon. (Jer. 25:11, 12; Dan. 9:2) Paonan-o mo masusubad hi Daniel?

8. Kay ano nga may mga diri natoo nga natutuman an mga tagna han Biblia, pero ano an dapat ta buhaton?

⁸ Usisaha an imo motibo. Gin-aadman mo ba an mga tagna han Biblia tungod kay karuyag mo gud mahibaroan an kamatuoran? Kon amo, bubuligan ka ni Jehova. (Juan 4:23, 24; 14: 16, 17) Pero iba an motibo han pipira ha ira pag-aram ha mga tagna. Bangin karuyag nira pamatud-an nga an Biblia diri tikang ha Dios. Kon ito an mahitabo, may-ada hira mga rason nga maghimo han ira kalugaringon nga mga suruklan han tama ngan sayop ngan magkinabuhi uyon hito. Pero kita, kinahanglan mag-aram nga may husto nga motibo. Dugang pa, may importante nga kalidad nga ginkikinahanglan basi masabtan an mga tagna han Biblia.

9. Ano nga kalidad an ginkikinahanglan basi masabtan an mga tagna han Biblia? Isaysay.

⁹ Magin mapainubsanon. Nagsasaad hi Jehova nga bubuligan niya an mga mapainubsanon. (San. 4:6) Salit dapat mag-ampo kita para han iya bulig basi masabtan an mga tagna han Biblia. Dapat liwat naton karawaton nga kinahanglan ta an bulig han matinumanon nga uripon nga ginagamit ni Jehova basi maghatag ha aton hin espirituwal nga pagkaon ha husto nga panahon. (Luc. 12:42) Hi Jehova organisado nga Dios, salit makatadunganon la nga magamit hiya hin usa la nga grupo basi buligan kita nga masabtan an mga kamatuoran nga aada ha iya Pulong.—1 Cor. 14:33; Efe. 4:4-6.

10. Ano an imo nahibaroan ha eksperyensya ni Esther?

¹⁰ Pag-aram hin maopay. Unaha pag-aram an tagna nga naruruyagan mo gud. Ito an ginhimo han sister nga hi Esther. Interesado hiya ha mga tagna mahitungod ha pag-abot han Mesias. “Han 15 anyos ako,” siring niya, “nagtikang ako mag-research hin ebidensya nga ini nga mga tagna iginsurat antes pa han panahon ni Jesus.” Nakombinse hiya ha iya mga nahibaroan tikang ha iya pagbasa mahitungod ha Dead Sea Scrolls. “An pipira hito iginsurat antes pa han panahon han Kristo,” siring niya, “salit an mga tagna nga aada hito sigurado nga tikang ha Dios.” Ini an gin-amin ni Esther, “Kinahanglan ko ito basahon hin makadamu basi masabtan ito.” Pero nalipay hiya nga naningkamot hiya. Katapos adman hin maopay an pipira nga tagna han Biblia, nagsiring hiya, “Klaro na ha akon nga totoo an ginsisiring han Biblia!”

11. Paonan-o kita nagpapahimulos kon mapamatud-an ta mismo nga totoo an Biblia?

¹¹ Kon nakikita naton kon paonan-o natutuman an pipira nga tagna ha Pulong han Dios, nagkakaada kita marig-on nga pagsarig kan Jehova ngan ha paagi han iya paggiya ha aton. An mga tagna han Biblia nabulig liwat nga matipigan naton an positibo nga paglaom para ha tiarabot, anoman nga problema an aton gin-aatubang yana. Hisgotan naton an duha nga tagna nga iginsurat ni Daniel nga natutuman na yana. Kon nasasabtan ta ito, makakabulig ito nga makahimo kita hin maaramon nga mga desisyon.

12. Ano an ginsisimbolohan han mga tiil nga “puthaw [nga] may halo nga mahumok nga lapok”? (Daniel 2:41-43)

¹² Basaha an Daniel 2:41-43. Ha inop ni Hadi Nabucodonosor nga iginsaysay ni Daniel an kahulogan, an mga tiil han estatwa nga nakita han hadi hinimo tikang ha “puthaw [nga] may halo nga mahumok nga lapok.” Pinaagi ha pagkompara hini nga tagna ha iba pa nga tagna ha libro han Daniel ngan Pahayag, makakasiring  kita nga an mga tiil nagsisimbolo ha Anglo-Amerikano nga alyansa, an pinakagamhanan nga mga gobyerno ha kalibotan yana. May kalabotan hini nga gahum ha kalibotan, hi Daniel nagsiring nga ‘an ginhadian may bahin nga makusog ngan may bahin nga maluya.’ Kay ano nga may bahin nga maluya? Kay ginpapaluya han mga tawo, nga nagrirepresentar ha mahumok nga lapok, an abilidad hito nga gumios nga may sugad-puthaw nga kusog. b

13. Ano nga importante nga mga kamatuoran an mahimo naton mahibaroan tungod kay nasasabtan naton ini nga tagna?

¹³ May nahibaroan kita nga pipira nga importante nga kamatuoran tikang ha paghulagway ni Daniel ha estatwa ha inop ngan labi na ha mga tiil hito. Siyahan, iginpakita han Anglo-Amerikano nga Gahum ha Kalibotan nga gamhanan ito. Pananglitan, upod hira ha nagdaog ha Girra ha Kalibotan I ngan ha Girra ha Kalibotan II. Pero ini nga gahum ha kalibotan nagluya ngan padayon nga nagluluya tungod kay kontra han mga sakop hito an usa kag usa ngan pati na an gobyerno. Ikaduha, ini nga alyansa an magigin ultimo nga gahum ha kalibotan nga magmamando antes tapuson han Ginhadian han Dios an ngatanan nga ginhadian han tawo. Bisan kon bangin may mga nasud nga usahay nakontra ha Anglo-Amerikano nga Gahum ha Kalibotan, diri nira ito masasaliwnan. Maaram kita hito kay dudugmukon han “bato,” nga nagsisimbolo han Ginhadian han Dios, an mga tiil han estatwa nga nagsisimbolo han Anglo-Amerikano nga alyansa.—Dan. 2:34, 35, 44, 45.

14. Paonan-o an pagsabot ha tagna mahitungod ha mga tiil nga puthaw ngan lapok makakabulig ha aton nga makahimo hin maaramon nga mga desisyon?

¹⁴ Kombinsido ka ba nga tinuod an tagna ni Daniel may kalabotan ha mga tiil nga puthaw ngan lapok? Kon oo, makakaapekto ito ha imo paagi han pagkinabuhi. Diri ka magpupokus ha pagkaada damu nga materyal nga panag-iya kay maaram ka nga hirani na bungkagon inin maraot nga kalibotan. (Luc. 12:16-21; 1 Juan 2:15-17) An pagsabot hini nga tagna mabulig liwat ha imo nga makita an pagkaimportante han pagsangyaw ngan pagtutdo nga buruhaton. (Mat. 6:33; 28:18-20) Katapos adman ini nga tagna, pakianhi an imo kalugaringon, ‘An akon ba mga desisyon nagpapakita nga kombinsido ako nga hirani na bungkagon han Ginhadian han Dios an ngatanan nga gobyerno han tawo?’

15. Hin-o an “hadi han norte” ngan an “hadi han sur” yana? (Daniel 11:40)

¹⁵ Basaha an Daniel 11:40. An Daniel kapitulo 11 nag-uunabi hin duha nga hadi, o gobyerno, nga nagkukompetensyahay. Kon igkukompara ta ini nga tagna ha iba pa nga mga tagna han Biblia, mahibabaroan naton nga an “hadi han norte” amo an Russia ngan an mga kaalyado hito, ngan an “hadi han sur” amo an Anglo-Amerikano nga Gahum ha Kalibotan. c

16. Ano nga kakurian an gin-aatubang han katawohan han Dios nga naukoy ha nasasakopan han “hadi han norte”?

¹⁶ An katawohan han Dios nga naukoy ha nasasakopan han “hadi han norte” gintitimaraot hito nga hadi. May mga Saksi nga ginkastigo ngan ginpriso tungod han ira pagtoo. Imbes nga mahadlok an aton kabugtoan, an ginbubuhat han “hadi han norte” nagparig-on han ira pagtoo. Kay ano? Kay an aton kabugtoan maaram nga an pagtimaraot ha katawohan han  Dios katumanan han tagna ni Daniel. d (Dan. 11:41) An paghibaro hito makakabulig ha aton nga maparig-on an aton pagtoo ngan matipigan an aton integridad.

17. Ano nga kakurian an gin-aatubang han katawohan han Dios nga ilarom han pagmando han “hadi han sur”?

¹⁷ Ha naglabay, gintimaraot liwat han “hadi han sur” an katawohan ni Jehova. Pananglitan, han siyahan nga katunga han ika-20 ka siglo, damu nga kabugtoan an ginpriso tungod han ira neutralidad ngan may kabataan nga Saksi nga ginpaiwas ha eskwelahan tungod kay nagpabilin hira nga neutral. Pero hinin naglabay pa la nga mga dekada, an mga surugoon ni Jehova nga naukoy ha nasasakopan hito nga hadi nakaeksperyensya hin diri abat nga mga pagsari han ira pagkamaunungon ha Ginhadian han Dios. Pananglitan, ha panahon han mga kampanya ha eleksyon, bangin masulay an usa nga Kristiano nga suportaran an usa nga partido o kandidato. Bangin diri hiya bumutos, pero ha iya hunahuna ngan kasingkasing, may gindadapigan  hiya. Importante gud nga magpabilin kita nga neutral ha politika diri la ha aton mga ginbubuhat kondi pati liwat ha aton mga ginhuhunahuna ngan gin-aabat!—Juan 15:18, 19; 18:36.

18. Ano an aton reaksyon ha away han “hadi han norte” ngan “hadi han sur”? (Kitaa liwat an piktyur.)

¹⁸ Adton waray pagtoo ha mga tagna han Biblia bangin sobra nga mabaraka kon nakikita nira nga an “hadi han sur” ‘nakikigsungayay’ ha “hadi han norte.” (Dan. 11:40, ftn.) Iton duha nga hadi may nuklear nga mga armas nga makakapatay han ngatanan nga kinabuhi dinhi ha tuna. Pero maaram kita nga diri ni Jehova tutugotan nga mahitabo ito. (Isa. 45:18) Salit imbes nga mabaraka ha away han “hadi han norte” ngan “hadi han sur,” napaparig-on lugod hito an aton pagtoo. Iginpapakita hito nga hirani na an kataposan hini nga sistema.

19. Ano an dapat naton akseptaron mahitungod ha mga tagna han Biblia?

¹⁹ Diri kita maaram kon paonan-o matutuman an pipira nga tagna han Biblia. Bisan hi propeta Daniel waray makasabot han kahulogan han tagsa niya nga ginsurat. (Dan. 12:8, 9) Pero bisan kon diri naton bug-os nga nasasabtan kon paonan-o matutuman an usa nga tagna, diri karuyag sidngon nga diri na ito matutuman. Makakasiguro kita nga ipapahayag ha aton ni Jehova an kinahanglan naton mahibaroan ha husto nga panahon, sugad la han iya ginbuhat ha naglabay.—Amos 3:7.

20. Ano nga makapainteres nga mga tagna han Biblia an hirani na matuman, ngan ano an dapat naton padayon nga buhaton?

²⁰ Magkakaada deklarasyon han “kamurayawan ngan kasigurohan.” (1 Tes. 5:3) Sunod, aatakehon han mga gobyerno ha kalibotan an buwa nga relihiyon ngan bubungkagon ito. (Pah. 17:16, 17) Katapos, aatakehon nira an katawohan han Dios. (Ezek. 38:18, 19) Ito nga mga panhitabo magtutugway ngadto ha ultimo nga girra han Armagedon. (Pah. 16:14, 16) Makakasiguro kita nga ito ngatanan hirani na matuman. Samtang waray pa ito, padayon nga ipakita naton an aton apresasyon ha aton mahigugmaon nga langitnon nga Amay pinaagi ha paghatag hin atensyon ha mga tagna han Biblia ngan pagbulig ha iba nga ito liwat an buhaton.