1-2. (a) Ano an panhunahuna ni Jehova hadton nagbubuhat hin seryoso nga sala ngan diri nagbabasol? (b) Ano an ginlalaoman ni Jehova ha mga nagbubuhat hin sala?

 HI Jehova diri konsintidor nga Dios; diri niya ginbabalewaray an sala. (Sal. 5:​4-6) Naglalaom hiya nga rirespetuhon naton an iya magtadong nga suruklan, nga iya iginhatag ha aton pinaagi han iya Pulong. Syempre, hi Jehova diri naglalaom hin pagin perpekto ha diri perpekto nga mga tawo. (Sal. 130:​3, 4) Ha pariho nga paagi, diri niya ginbabalewaray an ‘diri diosnon nga mga tawo, nga ginhihimo nga pasangil an iya diri matupngan nga pagkabuotan para ha mapasiparahon nga panggawi.’ (Jud. 4) Lugod, an Biblia nagsusumat han ‘kabungkagan han mga diri diosnon’ ha girra han Dios ha Armagedon.​—2 Ped. 3:7; Pah. 16:16.

² Pero diri karuyag ni Jehova nga mabungkag an bisan hin-o. Sugad han aton ginhisgotan ha naglabay nga mga artikulo hini nga serye, an Biblia klaro nga nagsusumat nga “karuyag niya nga magbasol an ngatanan.” (2 Ped. 3:9) Ginsusubad han Kristiano nga mga tigurang hi Jehova samtang pasensyoso nga ginbubuligan nira an mga nagbubuhat hin sala nga bag-uhon an ira mga paagi ngan maibalik an pag-uyon ni Jehova. Pero diri ngatanan nga nagbubuhat hin sala nagbabasol. (Isa. 6:9) An iba padayon nga nagbubuhat hin sala bisan pa kon pauroutro nga ginbubuligan hira han mga tigurang nga magbasol. Ano an dapat buhaton ha sugad nga sitwasyon?

‘TANGGALA AN MARAOT NGA TAWO’

3. (a) Ano an ginsisiring han Biblia nga dapat buhaton ha diri mabinasulon nga mga nagbubuhat hin sala? (b) Kay ano nga makakasiring kita nga an nagbubuhat hin sala an nagpili nga tanggalon hiya ha kongregasyon?

³ Kon an nagbubuhat hin sala diri nagbabasol, waray na mahihimo  an mga tigurang kondi sundon an instruksyon nga mababasa ha 1 Corinto 5:13: “Tanggala tikang ha iyo an maraot nga tawo.” Salit masisiring nga hiya an nagpipili nga tanggalon hiya; gin-aani niya an iya iginsabwag. (Gal. 6:7) Kay ano nga makakasiring kita hito? Kay diri niya ginkakarawat an pauroutro nga pagbulig ha iya han mga tigurang nga magbasol. (2 Hadi 17:​12-15) An iya mga buhat nagpapakita nga iya ginpili nga diri sundon an mga suruklan ni Jehova.​—Deut. 30:​19, 20.

4. Kay ano nga iginpapahibaro nga gintanggal ha kongregasyon an diri mabinasulon nga nagbubuhat hin sala?

⁴ Kon tanggalon ha kongregasyon an diri mabinasulon nga nagbubuhat hin sala, ipapahibaro ha kongregasyon nga diri na hiya usa han mga Saksi ni Jehova. a Diri katuyoan hito nga pahibaro nga pakaalohan hiya. Lugod, ginhihimo ito basi masunod han kongregasyon an ginsusugo han Biblia nga “diri na . . . makig-upod” hito nga tawo, “bisan ha pakig-upod ha pagkaon.” (1 Cor. 5:​9-11) May maopay nga rason kon kay ano nga ginhatag ito nga instruksyon. Hi apostol Pablo nagsurat: “An gutiay nga libadura nakakapatubo han bug-os nga minasa.” (1 Cor. 5:6) An diri mabinasulon nga nagbubuhat hin sala makakapaluya han determinasyon hadton nangangalimbasog nga magkinabuhi uyon ha magtadong nga suruklan ni Jehova.​—Prob. 13:20; 1 Cor. 15:33.

5. Ano an dapat naton magin panhunahuna ha usa nga gintanggal ha kongregasyon, ngan kay ano?

⁵ Salit ano an dapat naton magin panhunahuna ha igkasi-tumuroo nga gintanggal ha kongregasyon? Bisan kon diri kita nakikig-upod ha iya, dapat naton hiya hunahunaon sugad nga nawara nga karnero, diri nga waray na paglaom. An karnero nga binaya ha panon mahimo bumalik. Hinumdumi nga an nawara nga karnero nagdedikar kan Jehova. Makasurubo, diri hiya yana nagkikinabuhi uyon ha iya dedikasyon, salit aada hiya ha delikado nga sitwasyon. (Ezek. 18:31) Bisan pa hito, tubtob nga may kalooy hi Jehova, may paglaom hiya nga makabalik. Paonan-o maipapakita han mga tigurang ito nga paglaom ha usa nga gintanggal ha kongregasyon?

KON PAONAN-O GINBUBULIGAN HAN MGA TIGURANG ADTON GINTANGGAL

6. Ano an mga bubuhaton han mga tigurang basi mabuligan an usa nga gintanggal ha kongregasyon?

⁶ Kon may usa nga gintanggal ha kongregasyon, diri na ba hiya bubuligan han mga tigurang nga makabalik kan Jehova? Diri gud! Kon ginsusumatan an diri mabinasulon nga nagbubuhat hin sala nga tatanggalon hiya ha kongregasyon, isusumat ha iya han komite han mga tigurang an iya mga bubuhaton basi makabalik ha kongregasyon. Pero may bubuhaton pa an mga tigurang. Ha kadam-an nga sitwasyon, susumatan nira hiya nga karuyag nira makiistorya utro ha iya katapos hin pipira ka bulan basi makita kon nagbag-o na an iya disposisyon. Kon karuyag niya utro makiistorya ha mga tigurang, mahigugmaon nga dadasigon nira hiya nga magbasol ngan bumalik. Bisan kon waray pa hiya magbasol hito nga panahon, an mga tigurang maniningkamot nga makaistorya hiya utro.

7. Paonan-o iginpapakita han mga tigurang an kan Jehova pagpaid kon gin-aasikaso an usa nga gintanggal ha kongregasyon? (Jeremias 3:12)

⁷ An mga tigurang naniningkamot nga ipakita an kan Jehova pagpaid samtang ira gin-aasikaso an usa nga gintanggal ha kongregasyon. Pananglitan, waray ni Jehova hulata nga magbasol anay an iya matinalapason nga katawohan ha kadaan nga Israel antes niya hira buligan. Lugod, hiya an nag-una ha pagbulig  ha ira bisan kon waray pa hira magpakita hin bisan ano nga tigaman han pagbasol. Sugad han nahisgotan na ha ikaduha nga artikulo hini nga serye, iginpakita ni Jehova an iya pagpaid pinaagi ha pagsumat kan propeta Hosea nga makigbalik ha iya asawa, nga nagbibinuhat la gihapon hin sala. (Hos. 3:1; Mal. 3:7) Ha pagsubad kan Jehova, karuyag gud han Kristiano nga mga tigurang nga bumalik an nagbubuhat hin sala, ngan diri hiya ginpapakurian ha pagbuhat hito.​—Basaha an Jeremias 3:12.

8. Paonan-o an parabola ni Jesus mahitungod han nawara nga anak naghahatag ha aton hin mas hilarom nga pagsabot han kan Jehova pagpaid ngan kalooy? (Lucas 15:7)

⁸ Hinumdumi an parabola ni Jesus mahitungod ha nawara nga anak, nga ginhisgotan han ikaduha nga artikulo hini nga serye. Pakakita gud la han tatay ha iya anak nga nauli, “dinalagan an . . . tatay ngan ginhangkopan hiya ngan mahigugmaon nga ginharokan hiya.” (Luc. 15:20) Pansina nga waray maghulat an tatay nga makimalooy an iya anak nga pasayloon. Lugod, sugad han ginbubuhat han mahigugmaon nga amay, hiya an nag-una. An mga tigurang naniningkamot nga ipakita an sugad nga disposisyon hadton mga binaya. Karuyag nira nga “bumalik” ini nga nawara nga mga karnero. (Luc. 15:​22-24, 32) May kalipay ha langit ngan pati ha tuna kon nabalik an makasasala!—Basaha an Lucas 15:7.

9. Paonan-o ni Jehova mahigugmaon nga gindadasig an mga nakasala?

⁹ Aton nahibaroan tikang ha aton nahisgotan, klaro nga diri ni Jehova ginkukonsinter an diri mabinasulon nga mga nagbubuhat hin sala. Pero diri niya hira ginpapabay-an. Karuyag niya nga bumalik hira. An inaabat ni Jehova ha mga mabinasulon iginsusumat ha Hosea 14:4: “Tatambalon ko an ira pagin diri matinumanon. Kinaburut-on nga hihigugmaon ko hira, kay waray na ako masina.” Makapadasig gud ito nga mga pulong para ha mga tigurang nga gumios ha bisan ano nga tigaman han pagbasol. Ngan naghahatag ito hin pasarig hadton binaya kan Jehova basi bumalik dayon.

10-11. Paonan-o an mga tigurang mabulig hadton maiha na nga gintanggal ha kongregasyon?

¹⁰ Kumusta naman an mga indibiduwal nga maiha na nga gintanggal ha kongregasyon, posible damu ka tuig na an naglabay? An sugad nga mga indibiduwal bangin diri na nagbubuhat han sala nga hinungdan nga gintanggal hira. Ha iba nga mga kahimtang, bangin diri na ngani nira nahinunumdoman kon kay ano nga gitanggal hira. Anoman an kahimtang, an mga tigurang maniningkamot nga bilngon ngan bisitahon ini nga mga indibiduwal. Ha sugad nga mga pagbisita, an mga tigurang mag-aampo pa ngani kaupod hira ngan mahigugmaon nga dadasigon hira nga bumalik ha kongregasyon. Syempre, kon an usa damu ka tuig na nga nagpahirayo ha kongregasyon, sigurado nga maluya na gud hiya ha espirituwal. Salit kon magsiring hiya nga karuyag niya bumalik ha kongregasyon, an mga tigurang mahimo mag-asayn hin magba-Bible study ha iya, bisan kon waray pa hiya makabalik. Ha ngatanan nga kahimtang, an mga tigurang an maghihikay ha sugad nga pag-Bible study.

¹¹ Ha pagsubad han kan Jehova pagpaid, karuyag han mga tigurang nga bilngon ngan buligan an damu tubtob nga posible basi nira hibaroan nga abrido an purtahan para ha ira pagbalik. Kon an nakasala nagbasol ngan ginbayaan an iya maraot nga buhat, puydi dayon hiya ibalik.​—2 Cor. 2:​6-8.

12. (a) Ha ano nga mga kahimtang kinahanglan maghirot gud an mga tigurang? (b) Kay ano nga diri kita dapat maghunahuna nga may klase hin mga sala nga imposible makakarawat han kalooy ni Jehova? (Kitaa liwat an footnote.)

¹² Ha pipira nga kahimtang, an mga tigurang  kinahanglan maghirot gud antes ibalik an usa. Pananglitan, kon an usa nag-abuso hin bata o nag-apostata o gintapos an iya pag-asawa ha malimbong nga paagi, sisiguraduhon han mga tigurang nga tinuod gud hiya nga nagbabasol. (Mal. 2:14; 2 Tim. 3:6) Dapat nira protektaran an panon. Pero dapat liwat naton masantop nga ginkakarawat utro ni Jehova an bisan hin-o nga tinuod nga nagbabasol ngan diri na nagbubuhat hin maraot. Salit bisan kon an mga tigurang naghihirot gud ha pag-asikaso hadton mga nanlimbong ha iba, diri hira dapat sumiring nga an mga tawo nga nakabuhat hin sugad nga klase hin mga sala diri  gud makakakarawat han kalooy ni Jehova. b—1 Ped. 2:10.

KON ANO AN MAHIHIMO HAN KONGREGASYON

13. Ano an kaibahan han paagi han aton pagtratar hadton ginsaway han mga tigurang ngan hadton gintanggal ha kongregasyon?

¹³ Sugad han ginhisgotan han naglabay nga artikulo, usahay iginpapahibaro nga ginsaway an usa. Ha sugad nga kahimtang, puydi kita padayon nga makig-upod ha iya kay nagbasol hiya ngan ginbayaan an iya maraot nga buhat. (1 Tim. 5:20) Kaapi la gihapon hiya han kongregasyon ngan nagkikinahanglan hin pagdasig tikang ha pakig-upod ha iya mga igkasi-tumuroo. (Heb. 10:​24, 25) Pero naiiba gud an pagtratar ha usa nga gintanggal ha kongregasyon. ‘Diri na kita nakikig-upod’ ha iya, “bisan ha pakig-upod ha pagkaon ha sugad nga tawo.”​—1 Cor. 5:11.

14. Paonan-o mahimo gamiton han mga Kristiano an ira konsensya nga binansay ha Biblia ha ira pagtratar hadton gintanggal ha kongregasyon? (Kitaa liwat an piktyur.)

¹⁴ Karuyag ba ipasabot han aton ginhisgotan nga diri na gud naton papansinon an usa nga gintanggal ha kongregasyon? Diri man. Syempre, diri kita makikig-upod-upod ha iya. Pero mahimo gamiton han mga Kristiano an ira konsensya nga binansay ha Biblia kon iimbitaron ba an usa nga gintanggal ha kongregasyon—posible usa nga paryente o duok nga sangkay hadto—nga umatender ha katirok han kongregasyon. Ano man kon umatender hiya? Ha naglabay, diri kita nagyayakan hin pangumusta ha sugad nga indibiduwal. Kinahanglan gihap gamiton han tagsa nga Kristiano an iya konsensya nga binansay ha Biblia ha pagdesisyon parte hini. An iba bangin komportable nga magyakan hin pangumusta o i-welcome ha katirok ito nga indibiduwal. Pero diri kita makikig-istorya hin hilaba o makikig-upod-upod ha iya.

15. Ano nga klase hin magpakasasala an gin-uunabi ha 2 Juan 9-11? (Kitaa liwat an kahon nga “ Pariho ba nga Klase hin Sala an Ginhihisgotan Nira Juan Ngan Pablo?”)

¹⁵ An iba bangin maghunahuna, ‘Diri ba an Biblia nagsusumat nga an usa nga Kristiano  nga nangungumusta ha sugad nga tawo makikigbahin ha iya magraot nga buhat?’ (Basaha an 2 Juan 9-11.) Iginpapakita han konteksto hini nga teksto nga ini nga instruksyon aplikado ha mga apostata ngan ha iba pa nga aktibo nga nag-aaghat ha iba hin sayop nga buhat. (Pah. 2:20) Salit kon an usa aktibo nga nag-aaghat hin apostata nga mga katutdoan o iba pa nga sayop nga buhat, an mga tigurang diri maghihikay nga bisitahon hiya. Syempre, may-ada pa paglaom nga makapamurubuot hiya nga magbasol. Pero tubtob nga diri pa ito nahitatabo, diri naton hiya kukumustahon o iimbitaron ha katirok han kongregasyon.

PAGSUBAD HAN KAN JEHOVA PAGPAID NGAN KALOOY

16-17. (a) Ano an karuyag ni Jehova nga buhaton han nagbubuhat hin sala? (Ezekiel 18:32) (b) Paonan-o maipapakita han mga tigurang nga igkasi-magburuhat hira ni Jehova kon ginbubuligan nira an mga nagbubuhat hin sala?

¹⁶ Ano an aton nahibaroan hini nga serye nga may lima ka bahin? Diri ni Jehova karuyag nga mabungkag an bisan hin-o! (Basaha an Ezekiel 18:32.) Karuyag niya nga an mga nagbubuhat hin sala bumalik ha iya. (2 Cor. 5:20) Amo ito nga ha bug-os nga kasaysayan, pauroutro nga gin-aghat ni Jehova an iya matinalapason nga katawohan nga magbasol ngan bumalik ha iya, pati na an matinalapason nga mga indibiduwal. An mga tigurang ha kongregasyon may pribilehiyo nga magin igkasi-magburuhat ni Jehova samtang naniningkamot hira nga giyahan nga magbasol an mga nagbubuhat hin sala.​—Roma 2:4; 1 Cor. 3:9.

¹⁷ Imadyina la an kalipay ha langit kon nagbabasol an magpakasasala! Gin-aabat mismo han aton Amay ha langit, hi Jehova, an kalipay ha kada panahon nga an iya nawara nga karnero nabalik ha kongregasyon. An aton gugma kan Jehova padayon nga naghihilarom samtang aton ginpapamalandong an iya pagpaid, kalooy, ngan diri matupngan nga pagkabuotan.​—Luc. 1:78.