HA PAGTIKANG han tuig 2017, iginpahibaro han mga syentista an usa nga makasurubo nga sumat. Han Enero, usa nga grupo hin mga syentista an nagsiring nga an kalibotan mas nagtikahirani na ha pinakamaraot nga trahedya nga mahitatabo. Gamit an Doomsday Clock, ira iginpakita nga hirani na an katawohan ha kabungkagan han kalibotan pinaagi ha pagdus-og han minute hand hin 30 segundo. An oras ha Doomsday Clock yana, duha ngan tunga ka minutos na la antes magkatutnga han gab-i—hirani na gud ha kabungkagan han kalibotan kay ha kakan-o pa man ha sobra 60 ka tuig!

Ha 2018, plano han mga syentista nga usisahon utro kon mationan-o na kita kahirani ha kataposan han kalibotan. Makikita la ba gihapon ha Doomsday Clock nga nagtitikahirani na an waray kapariho nga kabungkagan? Ano ha imo hunahuna, hirani na ba mabungkag an kalibotan? Bangin makurian ka pagbaton hini nga pakiana. Aw, bisan an mga eksperto iba-iba an panhunahuna mahitungod hini. Diri ngatanan natoo nga may-ada diri mapupugngan nga kataposan han kalibotan.

Ha pagkamatuod, minilyon an naglalaom hin maopay nga tidaraon. Nasiring hira nga may-ada hira ebidensya nga nagpapamatuod nga magpapabilin an katawohan ngan an aton planeta ha kadayonan, ngan mag-uuswag an kalidad han aton kinabuhi. Masasarigan ba ito nga ebidensya? Hirani na ba mabungkag an kalibotan o diri pa?