“MAAATOHAN ko an bisan ano labot la han pagsulay.” Iginpapakita hini nga para ha damu makalilipay an pagsulay. Kondi para ha iba, kaaway ito nga diri nabulag ha ira nga karuyag nira mapirde. Kumusta ka man? Kon naatubang hin pagsulay, sadang ka ba magpadára o sadang mo ito atohan?

Diri ngatanan nga pagsulay nagriresulta ha dagku nga problema. Pananglitan, an pagpadára ha pagkaon hin keyk kon nagdidyeta ka diri man makakadaot ha imo. Kondi an pagpadára ha iba nga pagsulay—labi na hadton nagtutugway ha imoralidad—mahimo magkaada makasurubo nga resulta. An Biblia nagpapahamangno: “Hiya nga nanlilibog . . . waray sarabotan: hiya nga nagbubuhat hini maggugunaw han iya kalag.”—Proberbios 6:32, 33.

Kon tigda nga umatubang ka hin pagsulay, ano an imo sadang buhaton? An Biblia nabaton: “Kaburut-on han Dios nga magin baraan kamo ngan maglikay ha imoralidad. An tagsa ha iyo sadang mahibaro pagkontrol han iya lawas ha baraan ngan dungganon nga paagi.” (1 Tesalonica 4:3, 4) Paonan-o mo makukultibar an sugad nga determinasyon? Iini an tulo nga paagi nga makakabulig:

An pagkita hin malaw-ay nag-aaghat hin sayop nga hingyap. Basi pabug-atan nga an aton nakikita nakaaghat han aton ginhihingyap, hi Jesus nagpahamangno: “An bisan hin-o nga padayon nga nagkikinita ha usa nga babaye ngan may malaw-ay nga hingyap ha iya, nag-aadulteryo na ha iya kasingkasing.” Pinaagi hin ilustrasyon, hiya nagsagda: “Kon an imo too nga mata nagigin hinungdan han imo pakasala, lukata ito ngan ilabog.” (Mateo 5:28, 29) Ano an iya karuyag sidngon? Basi maatohan an pagsulay, sadang gumios dayon kita ngan diri magkinita hin maglaw-ay.

 Ha pag-ilustrar: Handurawa nga nakasiplat ka ha nakakasilaw nga kalamrag han welding. Padayon ka ba nga magsisiniplat hito? Syempre diri! Malingiw ka o papanalipdan mo an imo mata. Ha pariho nga paagi, kon makasiplat ka hin nakakaaghat ha sekso nga hulagway—ha barasahon, ha screen, o ha aktuwal—lingiw dayon. Panalipdi an imo hunahuna basi diri mahugawan. Hi Juan, nga adik ha pornograpiya hadto, nagsiring: “Kon nakakita ako hin mahusay nga babaye, agsob nga naaaghat ako lumingi basi kitaon utro hiya. Salit ginpipirit ko lumingiw, ngan ginsisidngan an akon kalugaringon: ‘Pag-ampo! Yana na!’ Katapos ko mag-ampo, diri nag-iiha nawawara na an akon hingyap.”—Mateo 6:9, 13; 1 Corinto 10:13.

Tagda liwat an matinumanon nga hi Job nga nagsiring: “Ako naghimo hin kauyonan ha akon mga mata; Dida hito oonanhon ko in pagtan-aw ha usa nga uray?” (Job 31:1) Kay ano nga diri subaron an determinasyon ni Job?

Sarihi ini: Kon makakita ka hin malaw-ay, lingiw dayon. Subara an parasurat han Biblia nga nag-ampo: “Birika an akon mga mata tikang ha pagkinita ha paglabaw [“waray pulos,” NW].”—Salmo 119:37.

Diri kita hingpit, salit nakukurian kita pag-ato han aton sayop nga hingyap. An Biblia nasiring: “An kada tagsa nasasarihan kon nadadani ngan nasusulay hiya han iya kalugaringon nga hingyap. Ngan an hingyap, kon igburod na, nanganganak hin sala.” (Santiago 1:14, 15) Paonan-o mo malilikyan ito nga sitwasyon?

Kon magkaada ka sayop nga hingyap, hinumdumi nga may-ada ka mahihimo. Atohi ito. Kuhaa ito ha imo hunahuna. Likyi an pagpantasya. Hi Troy nga naadik ha pornograpiya ha Internet, nagsiring: “Nangalimbasog ako pagkuha han sayop nga panhunahuna pinaagi ha pagpokus ha positibo nga butang. Diri ito masayon. Makadamu ako mapakyas. Pero ha urhi, nahibaro ako pagkontrol han akon hunahuna.” Hi Elsa nga nangalimbasog pag-ato ha imoral nga pagsulay han tin-edyer pa hiya, nahinumdom: “Pinaagi ha pagkaada damu nga buruhaton ngan pag-ampo kan Jehova, nalamposan ko an sayop nga panhunahuna.”

 Sarihi ini: Kon nakakahunahuna ka hin imoral nga mga butang, undang dayon ngan pag-ampo. Atohi ito pinaagi ha pagpokus ha “bisan ano nga totoo, bisan ano nga sadang tagdon hin seryoso, bisan ano nga matadong, bisan ano nga putli, bisan ano nga makapaaghat han gugma, bisan ano nga dungganon, bisan ano nga maopay, ngan bisan ano nga darayawon.”—Filipos 4:8.

Kon an usa nga may-ada hingyap aada ha sitwasyon nga presente an pagsulay, mas masayon hiya madára. (Proberbios 7:6-23) Paonan-o mo malilikyan nga mabiktima?

An Biblia maaramon nga nagsasagdon: “An tawo nga mainalam-agamon nakita han karaotan, ngan naluok; kondi an tapang nagpapadayon ha unhan ngan nag-aantos tungod hini.” (Proberbios 22:3) Salit bantayi an imo pitad. Abanse nga hunahunaa an sitwasyon nga mahimo magresulta hin problema, ngan likyi ito. (Proberbios 7:25) Hi Filipe, nga naglampos kontra ha pornograpiya, nagsiring: “Iginbutang ko an amon kompyuter ha dapit nga makikita han ngatanan ngan gintaoran hin filter software. Ngan nag-i-Internet la ako kon may iba nga tawo.” Hi Troy, nga gin-unabi kanina, nagsiring liwat: “Diri ako nagkikita hin malaw-ay nga salida ngan ginlilikyan ko adton mahilig mag-istorya mahitungod ha sex. Diri ko karuyag ibutang an akon kalugaringon ha peligro.”

Sarihi ini: Tangkod nga usisaha an imo mga kaluyahan, ngan abanse nga magplano ha paglikay ha mga sitwasyon nga magpapahirani ha imo ha pagsulay.—Mateo 6:13.

Ano man kon bisan pa han duro nga pangalimbasog, nasulay ka la gihap? Ayaw panluya ngan ayaw undang. An Biblia nasiring: “An tawo nga matadong nahuhulog ha makapito, ngan mabangon liwat.” (Proberbios 24:16) Oo, an aton Amay ha langit nag-aaghat ha aton ha ‘pagbangon.’ Kakarawaton mo ba an iya mahigugmaon nga bulig? Salit ayaw undang pagdaop ha iya pinaagi ha pag-ampo. Kultibara an imo pagtoo pinaagi ha pag-aram han Biblia. Parig-ona an imo determinasyon pinaagi ha pagtambong ha Kristiano nga mga katirok. Tuguti nga pakusgon ka han saad han Dios: “Ako magpaparig-on ha imo; oo, ako mabulig ha imo.”—Isaias 41:10.

Hi Cody, nga gin-unabi kanina, nagsiring: “Nangalimbasog gud ako basi malamposan an akon pagkaadik ha pornograpiya. Damu ka beses nga nasulay ako, pero ha bulig han Dios, nalamposan ko ito.” Hi Dylan liwat nagsiring: “Hapit na ako masulay ha pakig-sex ha akon katrabaho. Pero nagin marig-on ako ngan waray magpadára. Maopay gud an pagkaada limpyo nga konsensya. Labaw ha ngatanan, maaram ako nga napalipay ko hi Jehova.”

Kon magigin marig-on ka ngan aatohan an pagsulay, sigurado nga mapapalipay mo gihap an Dios!—Proberbios 27:11.