Revelation 4:1-11
4 After this one, I see one door wey open for heaven, and the first voice wey I hear wey de talk with me be like trumpet. E talk say: “Come up, come here, and I go show you the things wey must happen.”
2 After this one, the spirit of God come start to control me at once, and I see one throne wey dey for im position for heaven, and somebody sitdown for the throne.
3 And the Person wey sitdown ontop de shine like jasper stone and sardius stone,* and rainbow wey be like emerald stone dey around the throne.
4 Twenty-four thrones dey around the throne and I see 24 elders wey sitdown ontop this thrones and them wear white cloth, and gold crowns dey their head.
5 Thunder light and different-different voice and thunder de come from the throne and seven lamps wey fire de burn ontop dey front of the throne, and this lamps mean the seven spirits of God.
6 Something wey resemble sea wey be like glass or crystal dey front of the throne.
And four cherubs* wey eyes full their body for front and back dey for the center of the throne* and around the throne.
7 The first cherub be like lion, and the second cherub be like young bull, and the face of the third cherub be like person face, and the fourth cherub be like eagle wey de fly.
8 As for the four cherubs, each of them get six wings, and na so-so eyes full the wings for inside and outside. And day and night, them de talk everytime say: “Jehovah God the Almighty, wey be dey, and wey dey, and wey de come, dey holy, holy, and holy.”
9 Anytime wey the cherubs de praise, de honor and de thank the Person wey sitdown for the throne, the One wey de live forever and ever,
10 the 24 elders go bow down for front of the Person wey sitdown for the throne and them go worship the Person wey de live forever and ever and them go throw their crown put for front of the throne, de talk say:
11 “Jehovah our God, you reach to receive the praise, the honor and the power, because na you make everything, and them dey because na wetin you want, and na im make you make them.”
Footnotes
^ Or “and special stone wey get red color.”
^ Or “four living creatures.” Cherubs na angels wey get authority well-well.
^ Or “dey middle with the throne.”
