Revelation 5:1-14
5 And for the right hand of the Person wey sitdown for the throne, I see one scroll wey them write things for the back and front,* and them use seven seal* seal-am tight.
2 And I see one strong angel wey de talk with loud voice say: “Na who reach to open the scroll and break the seals wey them take seal-am?”
3 But nobody for heaven or for earth or under the earth fit open the scroll or look wetin dey inside.
4 I come de cry well-well, because them no see anybody wey reach to open the scroll or look wetin dey inside.
5 But one of the elders come tell me say: “Make you no cry again. See! The Lion wey come from the tribe of Judah, wey be the root of David, don win, so e reach to open the scroll and the seven seal wey them take seal-am.”
6 And I see one lamb wey be like say them don kill-am, wey stand for the center of the throne and the four cherubs and for the center of the elders. E get seven horns and seven eyes, and the eyes mean the seven spirits of God, wey God don send go the whole earth.
7 And at once, the Lamb waka go front and collect the scroll from the right hand of the Person wey sitdown ontop the throne.
8 When e collect the scroll, the four cherubs and the 24 elders come bow down for front of the Lamb and each of the elders hold harp* and gold bowl wey incense full inside. (The incense mean the prayers of the holy ones.)
9 Them come de sing new song, de talk say: “You reach to collect the scroll and open the things wey them take seal-am, because them kill you and you use your blood buy people for God from every tribe, language,* skin color* and every nation.
10 And you make them to be kingdom and priests to our God, and them go rule as kings over the earth.”
11 And I see, plenty angels around the throne, and around the cherubs and the elders, and I still hear their voice. Their number na ten thousand times ten thousand and plenty thousand times plenty thousand.*
12 And them use loud voice de talk say: “Na the Lamb wey them kill, na im reach to receive the authority and the riches and the sense and power and honor and glory and blessing.”
13 And I hear as everything wey them don make for heaven, for earth, under the earth, and for sea, and everything inside them de talk say: “Make the Person wey sitdown for the throne and the Lamb get the blessing and the honor and the glory and the power forever and ever.”
14 And the four cherubs come de talk say: “Amen!” and the elders bow down worship God.
Footnotes
^ For Greek na, “for inside and back.”
^ Check the part, Meaning of Words.
^ This one na, something wey be like guitar wey them de use play music for olden days, but e different from the guitar wey people de use today.
^ Or “tongue.”
^ Or “people.”
^ Or “myriads of myriads and thousands of thousands.”
