THINK OF THIS EXAMPLE: Think-am say you go one museum and e get plenty old things. Plenty of the things wey you see for the museum don fade, get hole for body, and don nearly spoil finish. For some of them, some parts de miss. But one of them still dey fine and all the parts dey complete. You ask the person wey de take you round the museum say: “This one new pass the other ones?” And e answer say: “No, na this one old pass the other ones and they never ever repair-am.” You still ask say: “They cover and protect this one make e no spoil?” E answer say: “No, strong wind and rain don really beat this one and plenty bad people don try to spoil-am.” Then you start to think, ‘Wetin they use make-am?’

Bible just be like that fine thing for the museum wey all the parts dey complete. Bible na really old book, e even old pass plenty other books. Na true say plenty other old books dey. But just like the other old things for the museum don fade, na so this old books don fade as time de go. For example, some of the things wey this old books mention about science no correct again because of the new-new things wey science people don know now. The kind advice wey this old books de give about how to care for our body and dey strong no de help again, instead e de even cause trouble. And plenty of this old books no dey complete again because some parts don lost or spoil.

But Bible dey different. E don pass 3,500 years wey they start to write Bible, but all the parts dey complete. Even though say some people don try plenty times for plenty years to destroy Bible—they burn the Bible, ban the Bible and no see-am as anything—wetin dey inside Bible no change. Even though say people de learn new-new things, this new things still de agree with wetin Bible don talk long time ago. This one show say Bible de talk things even before people go ever know about-am.

You fit de wonder say, ‘Wetin Bible de teach fit really help us today?’ To answer that question, ask yourself say: ‘Wetin be the worst problems wey people de face today? Which of them de make you fear pass?’ Maybe you de think of war, the way people de dirty this earth, the bad-bad things wey people de do or the way people de cheat other people to make gain. Now make we talk about some better advice wey Bible de give us. As we de discuss this things, ask yourself say, ‘If people de follow this advice, you think say the world go be better place?’

DE MAKE PEACE

“When people de make peace, they go dey happy because they go call them sons of God.” (Matthew 5:9) “Make wuna do everything wey wuna fit do, to dey in peace with everybody.”—Romans 12:18.

DE SHOW PITY, DE FORGIVE

“When people de show pity, they go dey happy because they go show them pity.” (Matthew 5:7) “Make wuna no tire to endure wetin wuna do each other and to always use wuna heart forgive each other, even if wuna get reason to complain about another person. Just as Jehovah * de always use e heart forgive wuna, make wuna still do like that.”—Colossians 3:13.

DE LIVE TOGETHER AS ONE WITH PEOPLE OF DIFFERENT SKIN COLOR

God “make all the nation of people from one man so that they go live for the earth.” (Acts 17:26) “Na now I really understand say God no de do partial, but for every country, the person wey e get the fear of God and de do the right thing, God de accept the person.”—Acts 10:34, 35.

DE CARE FOR THE EARTH

“Jehovah God take the man and put the man for the garden of Eden, make e de work and de take care of the garden.” (Genesis 2:15) God go “destroy those wey them de destroy the earth.”—Revelation 11:18.

NO GET LONGTHROAT AND NO PUT HAND FOR SEX WEY GOD HATE

“No dey greedy at all, because even when person get plenty things, those things wey e get no fit give the person life.” (Luke 12:15) “Make sex wey God hate and all kind of bad things or longer throat no dey among wuna, and make wuna no even talk about-am, because no be so holy people de do.”—Ephesians 5:3.

DE TALK TRUE, DE WORK HARD

“We de make sure say we de talk true for everything.” (Hebrews 13:18) “Make the person wey e de thief no thief again; but make e do hard work.”—Ephesians 4:28.

E DEY IMPORTANT TO HELP PEOPLE WHEN THEY NEED HELP

“Encourage people wey they no dey happy, help people wey them dey weak, dey patient with everybody.” (1 Thessalonians 5:14) “De care for widow and children wey they no get papa and mama when they get problem.”—James 1:27.

Bible no de only tell us wetin we go do, e still de tell us how we go do-am everyday for our life. If people follow this things wey Bible de teach, problems for the world go reduce. True-true, the advice for Bible fit help us now pass any other time! Wetin you go gain now if you learn about the things wey Bible de teach?

One man wey get sense pass talk say: “Better sense de use the kind work wey e de do show say e dey righteous.” (Matthew 11:19, footnotes) You no go gree say na only when the advice wey person give really work we fit talk say that advice really make sense? So you fit de think say: ‘If the advice for Bible de really work, e no suppose help me for my life? How Bible fit help me for the problems wey I de face now?’ Make we see one example.

Delphine * de live better life. Small time, bad things wey e no expect happen. E small girl die. E marriage scatter. And e start to get money problem. Delphine talk say: “I no know myself again—my pikin die, I no get husband again, I no get house again. I start to feel say I no be anything—I no know who I be, I no get power and my life no get meaning.”

Na this time Delphine see say wetin the book of Psalms talk na true. E talk say: “We de live reach 70 years, or 80 years if person really dey strong. But na so-so trouble and pain plenty for inside; the years de finish quick, and we go just go like that.”—Psalm 90:10.

Delphine get the help wey e need for that time from Bible. The thing wey Bible do for Delphine really dey wonderful. As the next three articles go show, plenty people don see say Bible don do wonderful things for their life when they follow the advice wey e de give to solve their problems. They don see say Bible be like that one fine old thing for museum wey we talk for the start of this article. Bible no be like plenty other old books wey people no fit use the information after some time. Na because Bible dey different from this other books? Or e dey possible say na God get Bible?—1 Thessalonians 2:13.

Maybe you too don see say life dey short and plenty problems dey this life. When you de face plenty problems, where you fit get comfort, support and better advice?

Make we see three important ways wey Bible fit help you for your life. E fit teach you how to

1. avoid problems if e dey possible.

2. solve problems when problems come.

3. cope for some condition wey we no fit change.

The following articles will discuss these three areas.