Na ngal mol yaumine wond kunum, Got nolmal na wal porpor ersem kankawei kanj. Kunum puli na pemili aina bol seori molpin pu, ond kerma kerma na nol gop pende kin taun aijen Javaskila, Finlan tuwalto mom bar kanwan wane enjin. Ala na tukong na koika kanka kankane erind. Na ngal kere mond kunum, kambru na tupusi ende kanj kunum si ngunj kangle erind! Ala yaumine wond kunum, alamb tukong to erkes erngonjip na keswei pilpile erind. Kanan napungo, alamb dulom ende tukong erkes naenam paninjip bol kongan ai erind. E kin bunuman dingmal pam alamb.

Kin tukong na wal meim, erkes naenam pane yu dongal ninjin. Kin pepa yu pende bol moklo alamb ngo si makero, pu alamb tukong na wal pende nganjep kindin gulsi stua gar kubosim bar mapane, ala marasin esim ga, kongan enda mo naenda ne tukong nganja erkanamen ne enjip mapa ninjin eri. Ala tukong kantawol enam alamb dulom ende simin kel mokjin eri. Kin tukong pakeronamen ne kongan omblom bol wei enjin pile, kunum puli gapman ye kerma monjip kinbol ka napinjip. Embe pile kunum puli na tosip kot erngonjip.

Na tukong pakeronal ne erind, ba mal yemyem ombun papum bar kes pinj eri. Embe erpu alamb dulom pende monjip bar tuwal pund, dulom tal e kangjel, Amnesti Intanesnal na Grinpis. Na dongal pal kele enjep kongan enjip pakerond. Na alamb konbengel molo kono gol monjip, na enjep enjep pakeronam kaple naerim alamb, pakeronal ne ombol erind.

Embe erind ba bulto omukro kanj, na alamb wal porpor enjip erkun enal kaple naerim. Alamb dulom pende monjip, ombun kere kere pende erkun enjip, ba ombun kerma kerma wose keswei pum. E wal kes ende pa mala alamb pel bunuman kol tungdo, alamb ende nepil nangonjip mal pam. Na wal ende erkun enal pinj kaple naerim.

Alamb ende pakeronal kaple naerim bar keswei pinj. Na pulnom bolo Got na Baibel nepinj. Na kombei Johova Witnis gabol Baibel yu duwom er ere erind.

Enjep mambnem ka ere na pakeronam ne enjip bar kapinj, ba nomolpa erind bar wal erkun enal ne naerind. Ba yipe wal wose jelmal punom.

Na Baibel pakinj siori kele pulnom bol gerind. Gerind erkelnge na kumbol amin wei sind. Baibel yu puli mom kanj, tukong kantawol ka eya nim. Ende Provep 12:10 yu, embe dom: “Mambnem dulto paim ye tukong kantawol ka enem.” (Good News Translation) Ala na pilkane erind, mala ombun porpor piam Got erkelde mine nawonom. Ombun wose kerma wei punom nalenem, alamb puli olom yuwom karkar naesim. Na Johova kanka mambnem na, wimuk wamnam nadom mambnem Baibel a ger kanj kane malmal erind.—Buk Song 103:8-14.

Kunum ele, buk Tru Tru Baibel I Tok Wanem? pepe bol kele buk e sinal pepe pam, kansi bolkend. Kanan wonapungo Witnis andam ambiyem tal na gara wo, Baibel yu duwom endel mo ninjil, na enal panind. Kunum ele na pulnom bolo, Witnis ga make pambar pund eri. Embe erind bar, Baibel yuwei na kumbola wei pinj.

Baibel na pakerongo, nomolpa erind bar wal puli erkun erind bar kapile sangiyo nind. Irr no nol bia puli keswei nono erind sikend. Konkongol ka ere, yusep nene erind sikend. Ala kongan pengem enjip alamb bol molmene kend eri. (Rom 13:1) Ala pasdia erind mambnem, sikeral ne erind amin napam wakro sikend.

Ala wal ende, alamb dulom ende molo tukong na alamb pakeronam ne enjip ga wakronal amin napam. Na wamnam wakronal kaple naerim. Na yero embe nipinj, alamb dulom e sikend dal enjep bul ngonal nepinj. Ba na pilkane erind, Got Gapman mongse mala ombun porpor erkun enda pam. Embe pile na kunum na dongal pel kele Got Gapman pakero, alamb ende nengono pilkane enam nepinj.—Matyu 6:33.

Gapman bol nganmal erind kunum, bunuman a alamb si dulom tal kelkel erind—ende alamb kes, ende alamb ka—alamb kes nepinj alamb tonal bar mond. Na Baibel yu kanj bar kawei pis nalenem, alamb dulom ende kankes kanj mambnem wakrond. Na ombol ere kanka mambnem alamb porpor bol taninal ne erind. (Matyu 5:44) Wusngam ende embe erind e, Got Gapman yuka neori kel alamb ende ngond. Ala na kawei pis nalenem, kongan ka e erkelde alamb kumbol amin sende kawei pile wal kawei kui esim.

Na bu puli kend wal, Johova angela kend kunum kumbol amin wei sind. Na wei eri pilkane erind, wal porpor ersem Ye kankere alamb na tukong, alamb ende angela ombun anjngo sinapunam. Ala mala wal porpor erkem meim tokes namoksam eri. Olom Gapman wusngam a, wal porpor alamb erkenjip wokes pumeim, erkun enda mand wei enem. (Aisaia 11:1-9) Na yuwei e pilkane erind bar kapis, ala alamb ende pakerono yu e pilgi ninam nepis. Na pilkane erind, alamb mambnem kes enjip na erkun enal kaple naerim