MANATU TAFITO | KOTEA TE MEʼA ʼOFA ʼAE ʼE LELEI TUKUPAU?
Kotea Te Meʼa ʼOfa ʼAe ʼe Lelei Tukupau?
ʼE ui fenei ʼi te Tohi-Tapu: “Ko te ʼu meʼa ʼofa lelei fuli mo haohaoa ʼe haʼu mai ʼoluga, ʼe hifo mai te Tamai ʼo te ʼu malama ʼae ʼe ʼi selo.” (Sakopo 1:17) ʼE palalau te vaega ʼaeni ki te lotofoaki ʼo Sehova ʼAtua, tatatou Tamai ʼae ʼe ʼi selo. ʼE moʼoni ʼe lahi te ʼu meʼa ʼofa neʼe foaki mai e te ʼAtua ki te malamanei. Kae ʼe ʼi ai te meʼa ʼofa ʼe lahi tokotahi ʼi te ʼu meʼa ʼofa fuli. Kotea te meʼa ʼofa ʼaia? Neʼe fai e Sesu te ʼu palalau ʼaeni ia Soane 3:16: “Neʼe ʼofa mamahi te ʼAtua ki te malamanei ʼo ina foaki ai tona ʼAlo ʼulu tokotahi, pea ko ʼae ʼe tui kia te ia ʼe mole mate anai kae ʼe ina maʼu anai te maʼuli heʼe gata.”
Neʼe foaki e te ʼAtua tona ʼAlo ʼulu tokotahi maʼa tatou ke feala ai ke tou ʼateaina mai te agahala, mo te vaivai matuʼā pea mo te mate. ʼE ko te meʼa ʼofa ʼaia ʼe lahi tokotahi ia meʼa ʼofa fuli neʼe tou maʼu. (Pesalemo 51:7; Soane 8:34) ʼE mole he meʼa ʼe feala ke ina fakaʼateainaʼi tatou mai te agahala pea mo te mate. Kae neʼe ʼofa mamahi te ʼAtua ia tatou, koia neʼe ina foaki mai ai te meʼa ʼofa ʼae ʼe ina fakafealagia te faʼahi ʼaia. Neʼe foaki e Sehova ʼAtua tona ʼAlo ʼulu tokotahi ko Sesu Kilisito ko he totogi, ke feala ai ki te hahaʼi ʼae ʼe talagafua ke natou maʼu ia te maʼuli heʼe gata. Kae kotea koa te totogi ʼaia? Kotea tona ʼaoga? Kotea ʼe tonu ke tou fai ke feala ai hatatou maʼu ʼona lelei?
Ke fakaʼateainaʼi he tahi mai te popula peʼe toe liufaki he meʼa kua puli, ʼe ʼaoga ki ai he totogi. ʼE fakamatala ʼi te Tohi-Tapu neʼe fakatupu haohaoa ʼatatou ʼuluaki matuʼā, ia Atama mo Eva. Pea neʼe nā maʼu ia te fealagia ʼae ke nā maʼuʼuli ʼo heʼe gata ʼi te palatiso ʼi te kele pea mo ʼanā fanau. (Senesi 1:26-28) Kae neʼe nā talagataʼa ki te ʼAtua, ʼo nā agahala ai. Koia neʼe mole kei nā maʼu ia te maʼuli heʼe gata. Kotea tona fua? ʼE ui fenei ʼi te Tohi-Tapu: “ ʼAki te tagata pe ʼe tahi neʼe hu ai te agahala ki te malamanei, pea ʼaki te agahala ia te mate, ʼo mafola ai te mate ki te tagata fuli pe he neʼe natou agahala fuli.” (Loma 5:12) Neʼe mole maʼu e te hologa ʼo Atama ia te maʼuli haohaoa, kae neʼe pikisia ʼi te agahala, pea mo tona ikuʼaga ʼae ko te mate.
ʼI te aluʼaga ʼaia, ʼe tonu ke tatau te maʼuhiga ʼo te totogi pea mo te maʼuhiga ʼo te meʼa ʼae neʼe puli. ʼI te temi ʼae neʼe talagataʼa ai ia Atama ki te ʼAtua, neʼe agahala, ʼo puli ai tona maʼuli heʼe gata. Pea ʼo hage pe ko tona ui ʼi te Tohi-Tapu, neʼe liliu ai leva te hologa ʼa Atama ʼo popula ki te agahala pea mo te mate. Koia neʼe maʼua ko he tagata haohaoa, Sesu, ke ina sakilifisioʼi tona maʼuli ke feala ai ke fakaʼateainaʼi te tagata mai te agahala pea mo te mate. (Loma 5:19; Efeso 1:7) ʼUhi pe ko te ʼofa ʼo te ʼAtua, neʼe ina foaki ai te totogi ke toe maʼu e te tagata ia te maʼuli heʼe gata ʼi te palatiso ʼi te kele, ʼae neʼe puli ia Atama mo Eva.—Fakaha 21:3-5.
ʼAki te totogi ʼae neʼe foaki e te ʼAtua kua feala ai leva ke tou maʼu ia te maʼuli heʼe gata. Koia ka tou fakakaukauʼi te aluʼaga ʼaia, ʼe tou tui papau ai ko te totogi ʼe ko te meʼa ʼofa ʼaia ʼae ʼe lahi tokotahi. Neʼe tou palalau ʼi te alatike ʼae kua ʼosi atu, ki te ʼu faʼahi ʼae ʼe tupu ai hatatou leleiʼia he meʼa ʼofa. Koia ke feala ke tou mahino ki te lelei tukupau ʼo te meʼa ʼofa ʼaia ʼae ko te totogi, tou vakaʼi pe ʼe maʼu te ʼu faʼahi ʼaia.
ʼE tou loto ki ai. Neʼe fakatupu tatou mo te holi ʼae ke tou maʼuʼuli ʼo fualoa. (Ekelesiasi 3:11) ʼE mole feala kia tatou takitokotahi ke tou maʼu ia te fealagia ʼae ke tou maʼuʼuli ʼo heʼe gata. Kae ʼaki te totogi, kua feala leva ke tou maʼu ia te ʼamanaki ʼaia. ʼE ui fenei ʼi te Tohi-Tapu: “Koteʼuhi ko te totogi ʼo te agahala ʼe ko te mate, kae ko te meʼa ʼofa ʼae ʼe foaki e te ʼAtua ʼe ko te maʼuli heʼe gata ʼaki ia Kilisito Sesu totatou ʼAliki.”—Loma 6:23.
ʼE ʼaoga kia tatou. ʼE mole feala ki te tagata ke ina foaki te totogi. ʼE fakamahino fenei ʼi te Tohi-Tapu: “ ʼE mamafa fau te totogi ʼo ʼonatou maʼuli, koia ʼe mole feala anai ʼi he ʼaho ke natou totogi.” (Pesalemo 49:8, MN) Koia ʼae ʼe ʼaoga ai te tokoni ʼa te ʼAtua ke feala hatatou ʼateaina mai te agahala pea mo te mate. ʼAki “te totogi ʼae neʼe foaki e Kilisito Sesu,” neʼe foaki mai e te ʼAtua ia te meʼa ʼofa ʼae neʼe ʼaoga kia tatou.—Loma 3:23, 24.
ʼE foaki ʼi tona temi totonu. ʼE ui fenei ʼi te Tohi-Tapu: “ ʼAki te mate ʼa Kilisito maʼa tatou ʼi tatatou kei agahala.” (Loma 5:8) Neʼe foaki mai e te ʼAtua te totogi “maʼa tatou ʼi tatatou kei agahala.” ʼE ha mai ai tona ʼofa lahi ia tatou logo la totatou ʼuhiga agahala. Pea ko he fakaʼamu kia tatou, ke tou katakiʼi ai te ʼu nunuʼa ʼo te agahala.
ʼE ha ai te ʼofa moʼoni. ʼE fakamahino ʼi te Tohi-Tapu te tupuʼaga ʼo te foaki e te ʼAtua tona ʼAlo ko he totogi: “Neʼe fakaha mai e te ʼAtua tona ʼofa kia tatou ʼi te aluʼaga ʼaeni: Neʼe ina fekauʼi mai tona ʼAlo ʼulu tokotahi ki te malamanei ke feala ai hatatou maʼu te maʼuli ʼaki ia ia. Ko te fakaʼuhiga ʼaeni ʼo te ʼofa: Neʼe mole ko tatou ʼae neʼe ʼoʼofa ki te ʼAtua, kae neʼe ko ia ʼae neʼe ʼofa kia tatou.”—1 Soane 4:9, 10.
ʼE feafeaʼi hatatou fakaha ʼe tou lotofakafetaʼi ki te meʼa ʼofa ʼae ʼe lahi tokotahi? Tou manatuʼi neʼe ui e Sesu ia Soane 3:16 ko natou pe ʼae ʼe “tui kia te ia” ʼae ka haofaki anai. Ohage pe ko tona ui ʼi te Tohi-Tapu, ko te tui ʼe ko “te falala malohi ʼe hoko anai te ʼu meʼa ʼae ʼe tou ʼamanaki ki ai.” (Hepeleo 11:1) Kapau ʼe kotou fia maʼu ia te falala ʼaia, ʼe maʼuhiga ke kotou maʼu ia te ʼatamai malama. Koia ʼe matou fakalotomalohiʼi kotou ke toʼo he temi ʼo ako ke kotou iloʼi ia Sehova ʼAtua, ia ia ʼae ko te Matapuna ʼo te ‘meʼa ʼofa haohaoa’ ʼaia. ʼE kotou ako anai pe kotea ʼae ʼe tonu ke kotou fai ke feala ai hakotou maʼu ia te maʼuli heʼe gata ʼae neʼe fakafealagia ʼaki te sakilifisio faitotogi ʼo Sesu.
Kapau ʼe kotou fia ako te manatu fakatohi-tapu ʼaia, olo ki tomatou tuʼasila ʼi te Neti www.pr418.com/wls. ʼE fiafia anai te kau Fakamoʼoni ʼa Sehova ʼi te tokoni atu kia kotou. ʼE matou tui papau, kapau ʼe kotou ako te faʼahi ʼaia pea mo te ʼu lelei ʼae ʼe feala anai ke kotou maʼu ʼaki te meʼa ʼofa lahi tokotahi ʼaia, ʼe kotou ui fenei anai: “ ʼE au fakafetaʼi ki te ʼAtua ʼaki ia Sesu Kilisito totatou ʼAliki!”—Loma 7:25.