Ochatp’antehchahi Sajonia, lhip toj lhey p’ante República Democrática Alemana(RDA). Toj iyej olhamel ow’et iche wuj n’ohumnhayaj, wet ojcha lhay’e oko ichufwen n’oyej okeyis toj isen toj wuj toj laha ihi. Toj RDA hope p’ante honhat toj Comunista, wichi toj ihi Sajonia yen w’et m’ayeka religión. Olham, ot’ekhahiyet’a Dios. Iche dos m’ayhay toj n’omatitche toj yaj n’oye nichate toj oihi 18 nekchomis: toj hope ateísmo wet comunismo.

¿Atsi m’ak toj tamenej toj ohumin hop comunismo? Hop toj ohumin n’otichunhayaj toj nilhokej wichi wenhit’a lhamejen. Ts’ilakhit’a tajtso, oyenek, hopkhilak ihichet’a wichi toj p’alitses wet iyhaj toj hiw’en m’ayhay, oyen tichunhayaja toj wichi toj hiw’en m’ak is che hiw’enho m’ak toj hiw’en hop iyhaj toj p’alitses hopkhilak nilhokej w’awulhcha. Hop toj tamenej och’ote hop mamses iyhaj toj hote ihi comunismo. Lewhay toj ow’en 14 nekchomis, wuj toj och’ote n’ochumet toj isyen honhat toj n’onech’aynhi papel hopkhilak yachajo toj n’ochumyenlhi. Wichi toj ihi municipalidad toj ihi Aue hiw’en n’oho laka gracias toj owoyetso wet hop toj tamenej iwon’o w’ayhata. Tej toj omamse p’ante, otafwelej políticos toj wujpe wichi itafwelej toj ihi lhip toj oihi. Oyenek is alhoho m’ak toj owoye wet wuj toj is m’ak toj ottaye.

Toj paj, m’ak toj omatitche tatay. Toj ihi nekchom 1989 n’okanchi n’olafwek toj ihi Berlín. Hate wichi toj lhaithatche comunismo toj ihi p’ante Este toj Europa. M’ayhaytso tamenej toj oniwhayaj tataypej. Yofwajkwet ow’en toj iche m’ayhay toj isihent’a. Malhyej toja, ow’en toj wichi toj lhaithathichet’a comunismo n’oyen hopeya wichi toj laj lahaya. Mat, ¿atsi m’ak toj tamenej toj iche m’ayhaytso? Hop toj comunismo yome toj nilhokej wichi nahate t’at iwoye wichi iyhaj. ¿Ha política letichunhayaj hope m’ak toj kamatache? Tajtso tamenej toj wuj toj olhakli ihi.

Owo elha m’ak toj ichun toj ohuminchek owoye, wet owo tesa toj otetshan música wet pintura. Ohoye n’ochufwenyajw’et toj inu’pe iyhaj, toj ichufwenej wichi música hop toj ot’uhlak ohoye n’ochufwenyajw’et toj lhamya; tajlhamet toj oyen tichunhayaja toj oyenla chumeta música wet pintura. Oleche okeyis toj isen toj wuj toj laha ihi toj n’ochufwen n’oyej toj on’afwaj. Wet tajlhamet toj ot’uhlak owoye m’ak toj hiw’en n’oho okajyaj; wet hate ohumin toj olhay’e wujpey atsinhay. Nilhokej m’ayhaytso ikalhihit’a toj inofwat olhaklis, wet tajtso n’al toj ihi cuadros toj oyenlhi. ¿Atsi m’ak toj ihichela lewhayis toj tatay alhoho?¿Atsi m’ak toj tamenej toj n’echehen?

Lewhay toj ow’en n’oy’atshanhay lechulhyajay, wuj toj oseltej. Ichehte honaj, toj oiyej n’ochufwenyajw’et, otayphawhaye iyhaj mamses wet lhutshay toj yome m’ayhay toj ihichela toj tatay alhoho. Iche atsinha lhutsha toj lhey Mandy *, toj hope elh wichi toj yen lhometa Heowa toj hiw’en n’oho n’ofwonyajay toj wuj toj is. Wet yok: «Andreas, che let’uhlak lew’en nilhokej ay’atshanhay lechulhyajay malhyej m’ak toj tamenej toj n’echehen wet m’ak toj tatay alhoho, tetshan m’ak toj ihi Dios lhomtes».

Tej toj iche m’ak toj omatitchet’a, mat wuj toj ot’uhlak ohanej. Mandy ipayen n’oye capítulo 2 toj ihi libro toj lhey Daniel, wet toj oyahyen wuj toj oseltej m’ak toj yome. Profeciana yome toj niyatey wet m’ak toj iwoye wuj toj yaje wichi, nichate ifwalasna. Toj paj, Mandy ipayen n’oye iyhaj profecías toj ihi Dios lhomtes toj yome m’ayhay toj ihiyeja wichi lewhay toj tatay alhoho. Okajyaj ihi toj ow’en oy’atshanhay lechulhyajay. Mat, ¿atsi elh toj ilesayen profeciastso? ¿Atsi elh toj iwoyek yome m’ayhay toj ihichela toj tatay alhoho wet yam kalelhaj? ¿Ha tajtso in’alit toj Dios iche?

Mandy ipayen n’oye Horst wet lech’efwa Angelika, lhamel hopehen wichi toj yen lhometa Heowa. Lhamel tach’ot n’oye toj lhay’e lhip toj otafwelche m’ak toj ihi Dios lhomtes. Yofwajkwet ow’en toj tajlhamet wichi toj yen lhometa Heowa laka religión toj ichumyenlhi Dios lhey wet itafwnhatej wichi (Salmo 83: 18, La Biblia. Traducción del Nuevo Mundo [NWT]; Mateo 6:9). Olhaichufwenej toj Heowa t’uhlak wichi ihi honhat toj w’atshan wet isilataj pajlaʼtha tiyajʼattsiy. Salmo 37:9 yok: «mat häp lhamel tä t’ekhaye Lhawuk häpkhilek lew’et häp honhat tä lham hiw’enho». Wuj toj ohumin toj ohanej toj nilhokej wichi toj lhaikhajyenej toj iwoye lechufwenyaj iwoyek isej tajtso.

Wuj toj atha n’oho toj owo elha okeyis wet toj owoye m’ak toj Dios lhomtes yome. Toj is alhoho toj oyenlhi música wet pintura tamenej toj olhaichajlhi. Hop toj tamenej toj is che olhaichufwenej toj olhayen w’et m’ayeka. Hate, wuj toj atha n’oho toj oleyej toj owo okain’oyaja. Wuj toj ow’enho gracias hop Heowa toj itelaytej iyhaj toj lhaikhajyenej toj iwoye lhomtes, itafwelej m’ak toj ilate toj tume lehusek wet itiyej lehumnhayaj.

Hop comunismo wet ateísmo yaj n’oye paj toj nichate toj ow’en 18 nekchomis, mat talhe ifwalatso Dios lhomtes iwo elha m’ak toj oihi. M’ak toj olhaichufwenej hiw’en n’oho okajyaj wet otamsek nemhit oyen olhakliya m’ayhay toj tatay alhoho. Toj ihi nekchom 1993 olhaiwo bautisaya wet olhayen elh wichi toj yen lhometa Heowa, wet toj nekchom 2000 otawhayey toj oiyej Tabitha, lham hate yen kajyaja toj n’okwiyej Heowa. Olhay’e Tabitha olhaikhajyenej toj ochufwenej wichi m’ak toj Dios lhomtes yome. Wichitso hate iwoye olham toj comunismo wet ateísmo yaje wet iwo elha lekeyis. Toj owoye tajtso wuj toj isyen n’o wet ikajyenlhi n’o toj och’ote wichi hopkhilak itafwelej Heowa.

Lewhay toj oyamwhaye wichi toj yen lhometa Heowa ojcha wet oko nowaye. Mat toj paj lhamel hiw’en toj wuj toj oisej tajtso. Athana okajyaj ihi hop toj lhamel lhaichufwenej m’ak toj ihi Dios lhomtes wet hate ihoye wichi toj yen lhometa Heowa laka reuniones.

Olhay’e Tabitha olhaikhajyenej toj ohanlhi m’ayhay toj yiwite wichi toj lech’efwa ihi, wet isej tajtso olhamel wuj toj okajyaj ihi. Toj olhamel och’ahuye n’ofwonyajay toj yome toj is che ot’ifwti lhamejen toj isej tajtso olhamel wuj toj ois lhamehen (Hebreos 13:4).

Nemhit oyen lhakliya m’ak toj tamenej toj n’echehen wet m’ak toj ihichela toj tatay alhoho. Toj ohope elh wichi toj yen lhometa Heowa toj oiyej lhamel, hate iwoye che oiyej ow’et lheley wet matche toj otamsek ihi toj oiwek. Nilhokej olhamel ihichet’a elh che w’enha lhamej, tajtso hope m’ak toj omatitche toj iche wet pajche toj ot’ukwe.