ROMNHORÉ 52
E marĩ wa, ĩpire wa te rotsaꞌrata wẽ dzaꞌra da watsiꞌudzadzém na duré wahöiba mana wawi dzém na.
Wahöiba mono bö wa dza watsiꞌudza dzaꞌra ni duré wa dza watsipetse dzaꞌra ni watsima ĩwẽdzéb dzarina. Tadzahã, Ropotoꞌwai mreme ꞌremhã ĩré hã rowahudu te te ĩwadzaprõni dzaꞌra watsima ĩwẽ dzarina watsiꞌudza dzaꞌra da Ropotoꞌwai ma wa te tãma rowẽ dzaꞌra tsina. Wa te waihuꞌu dzaꞌra na nimahã rowahutu norĩ.
1. E mahã rowahutu norĩ te dza wadzaprõni dzaꞌra watsiꞌudzadzém na duré watsipetsedzém na wa te pitsutu wẽ da.
Jeová ma romhuriꞌwa na, wahöiba mana wawi tsiꞌuptob ãna wa dza wahöimana dzaꞌra ni duré wa dza watsiꞌudza dzaꞌra ni “ĩwẽ dzarina, wanhimiwadzé petse na duré waꞌrãi petse na”. Ãne, wa dza höiꞌré dzaꞌra ni “Ropotoꞌwai ãma ꞌre ĩwawata dzaꞌra mono dzém na hã.” (1 Timóteo 2:9, 10 TNM) ꞌMadöꞌö 4 rowahutu nhimidzaprõni norĩ: (1) “Ĩwẽ dzarina” wa dza watsiꞌudza dzaꞌra ni. Ãté ma tô ĩꞌmadö datsiꞌrãꞌõtõdzéb ãma hã Jeová nhibꞌaꞌuwẽ norĩ daꞌudza aimawi te te tsima ĩpitsutu dzaꞌra na hã. Tadzahã, waꞌudza na hã duré wadzéré na hã wa dza höiꞌré dzaꞌra ni wate Ropotoꞌwa Jeová wa te ĩwadzéb dzaꞌra na hã. (2) Wa dza watsiꞌudza dzaꞌra ni “wanhimiwadzé petse na”, niwamhã ĩwati petse ãna duré ĩꞌrutu ãna da te waꞌmadöꞌö dze dzô. (3) Wa dza höiꞌré dzaꞌra ni “waꞌrãi petse na”, ĩwatsiꞌudza dzaꞌra na hã wa te tsidzutsi dzaꞌra õ wamhã wa te rotsaꞌrata ãna uburé ꞌre ĩdatsiꞌudza dzaꞌra mono dzém na hã. (4) Wahöiba mana wawi dzém na wa dza höiꞌré dzaꞌra ni “Ropotoꞌwai ãma ꞌre ĩwawata dzaꞌra mono na” da te wawaihuꞌu dzaꞌra da Ropotoꞌwa ĩꞌuptabi ma wa te ĩromhuri dzaꞌra na hã. — 1 Coríntios 10:31.
2. E niha wa dza rétsi dzaꞌra ni watsitsãnawã norĩ watsiꞌudzadzém na hã.
Waꞌudza watsima ĩwẽ dzarina wa te pitsutu dzaꞌra nherẽ, wa dza duré rotsaꞌrata dzaꞌra ni e niha wa dza ãma darétsi dzaꞌra ni. Wa watsiwatsutu dzaꞌra ni wa te daꞌawaiꞌre tõ da. Ĩwaꞌrãmi, ‘watsiré ĩtsadzeiꞌwa norĩ hã marĩ te te tsima ꞌre ĩwẽ dzaꞌra mono dzéb dzarina, wa dza wa te ãma ꞌre tsadzei petse dzaꞌra, marĩ ĩwẽ na tsi, wa te ãma ꞌre pawaptob uꞌötsi dzaꞌra mono da, höimana prédub tsina oto ãma ꞌre höimana uꞌötsi dzaꞌra mono da.’ — Tsõré na Romanos 15:1, 2.
3. E niha watsiꞌudzadzéb dzarina te dza da te datsina rotété dzaꞌra Jeová tẽme.
Wa natsi watsiꞌudza dzaꞌra ni ĩwẽ dzarina romhöimanadzé mono bö. Tadzahã, tahã danhipai u ĩpire datsiꞌrãꞌõtõdzéb u watsiꞌabaꞌréi wamhã duré wa te dama roꞌmahörö dzaꞌra wamhã. Wa te watsima wẽ dzaꞌra õ di watsiꞌudzadzéb uꞌöbö da te rotsaꞌrata watsété dzaꞌra da wa te dama ĩroꞌmahörö dzaꞌra mono dzéb ãma. Wa watsima wẽ dzaꞌra ni ꞌre watsiꞌudza dzaꞌra mono da ‘ꞌRe ĩhöimana uꞌötsi mono Waꞌanhoꞌreptuiꞌwa nhimiroti hã da te datsima ꞌre watsuꞌu wẽ dzaꞌra mono da’, niwamhã Jeová ãma da te ꞌre waihuꞌu dzaꞌra mono da. — Tito 2:10.
WAIHUꞌU DURÉ
Te dza ĩꞌmadö e niha watsiꞌudzadzé duré watsipetsedzé te dza dama höiꞌré dzaꞌra, wa norĩ hã Jesus dzadawa dzamarĩꞌwa ĩꞌuptabi norĩ na.
Wahöiba mana wawi dzé te dza höiꞌré dama ĩpire norĩ wa te wadzéb dzaꞌra dzô. Ãne duré wahöiba mana wawi dzém na wa dza höiꞌré dzaꞌra ni Jeová wa te ĩwadzéb dzaꞌra na hã tãma waihuꞌu petse tsirõmo nherẽ wapẽꞌẽ ꞌre.
4. Wahöiba mana wawi dzé ĩwẽ na wa dza wadzéb dzaꞌra ni Jeová
E marĩ ĩpire uptabi dzarina wa dza pibui petse dzaꞌra ni wahöiba mana wawi dzém na. Atsiré tsõré aba Salmo 47:2. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
-
Wa watsuꞌu dzaꞌra ni Jeová. E niha taha na rotsaꞌrada te dza warétsi dzaꞌra watsiꞌudzadzém na hã.
-
Aima hã, e tô tsena ĩpire wa te pibui petse dzaꞌra da wahöiba mana wawi dzém na hã datsiꞌrãꞌõtõdzéb u duré dama roꞌmahörö u watsiꞌabaꞌréi wamhã. E marĩ wa.
5. E niha wa dza pitsutu wẽ dzaꞌra ni watsiꞌudzadzém na hã duré watsipetsedzém na hã.
Waꞌudza hã waꞌöbö dzaꞌẽtẽ õ nherẽ, uptob ãna duré romhöimanadzé bö ĩhöimana da tsi. Atsiré tsõré aba 1 Coríntios 10:24 duré 1 Timóteo 2:9, 10. Taha parimhã, atsima robdzanhamri aba e marĩ wa, watsiꞌudza dzaꞌra õ di . . .
-
daꞌudza ĩtsatsibi na hã niwamhã romhöimanadzé bö ĩhöimana õ na hã.
-
ĩwati petse na, dahöiba höiꞌréꞌwa na niwamhã da te waꞌmadöꞌö dze da.
Duréihã Jeová ma tô roti tinhibꞌaꞌuwẽ norĩ ma Moisés hawi. Ãhã roti norĩ ꞌrudzahi õ di Jesus dzadawa dzamarĩꞌwa norĩ ma. Tadzahã, ãhã roti norĩ te wama waihuꞌu dzaꞌra e niha Jeová te rotsaꞌrata. Atsiré tsõré aba Deuteronômio 22:5 TNM. Taha parimhã atsima robdzanhamri aba ãhã dadzadanharĩ ãma piꞌrebamhã:
-
E marĩ wa, wa dza wẽꞌõ dzaꞌra ni daꞌudza duré dadzéré te te ĩꞌmanharĩ dzaꞌra aibö piꞌõ ne da duré piꞌõ aibö ne da.
Atsiré tsõré aba 1 Coríntios 10:32, 33 duré 1 João 2:15, 16. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
-
E marĩ wa, wẽ di ꞌröwi watsitsadanharĩ da: ‘E ĩ̱höiba mana wawi dzém na wa dza daꞌawaiꞌre datsiꞌrãꞌõtõdzéb ãma hã niwamhã ĩ̱nhorõwa ꞌratamhã.’
-
E niha te natsi ꞌre datsiꞌudza dzaꞌra duré te natsi ꞌre datsipetse dzaꞌra atsõrõwa ꞌratamhã.
-
Aima hã, e wẽ di Jesus dzadawa dzamarĩꞌwai ma datsine ãne ꞌre tsiꞌudza mono da duré ꞌre tsipetse mono da. E marĩ wa.
Tsada hã watsima ĩwẽ na watsiꞌudza dzaꞌra da Jeová ma wa te tãma rowẽ dzaꞌra tsina.
NIꞌWAM NORĨ TE NHARĨ DZAꞌRA ÃNE: “Te daꞌãma rotsaꞌrata õ di dza. Ĩ̱tsima ĩwẽ na wa dza ĩ̱tsiꞌudza.”
-
E ãne te ĩrotsaꞌra. E marĩ wa.
ĨWAIHUꞌUDZÉ HÃ
Wa te pitsutu wẽ dzaꞌra wamhã watsiꞌudzadzém na duré watsipetsedzém na, wa dza höiꞌré dzaꞌra ni wanhimiwadzé Jeová ãma duré daꞌãma.
Ãma aipoꞌre puꞌu
-
E marĩ wa, watsiꞌudzadzé duré watsipetsedzé ĩpire Jeová ma.
-
E mahã rowahutu norĩ te dza wadzaprõni dzaꞌra watsiꞌudzadzém na duré watsipetsedzém na wa te pitsutu wẽ da.
-
E niha te dza rotsaꞌrata dzaꞌra ni Jeová ãma wahöiba mana wawi dzém na.
TSÔ AIRĨTĨ DURÉ
ꞌMadöꞌö e marĩ aiꞌudza norĩ te aiꞌãma dama höiꞌré dzaꞌra.
“E marĩ aiꞌudza norĩ te aiꞌãma dama höiꞌré dzaꞌra.” (Ĩtsihötödzé jw.org na)
ꞌMadöꞌö e marĩ wa, wẽ di atãma na rotsaꞌrata da tatuagem ꞌmanharĩ wana ré.
“E marĩ Ropotoꞌwai mreme te tinha tatuagem norĩ na.” (Ĩtsihötödzé jw.org na)
ꞌMadöꞌö rowahudu ĩhöiba amo norĩ te te ĩꞌaipawaptob dzaꞌra da aiꞌudza hã pitsutu wẽ da.
“E aiꞌudza hã te höiꞌré a hã Ropotoꞌwai ma romhuriꞌwa na.” (Roꞌmadöꞌöꞌwa, setembro 2016 na)
ꞌMadöꞌö e marĩ wa, piꞌõ ĩhöimana wẽ ma tô tãma udze datsiꞌudzadzé hã aimawi nherẽ.
