Jeová aima tsawi petse uptabi nherẽ, duré tãma ĩwẽ dzarina ꞌre aihöimana mono da atsiwatsutu nherẽ, nimahã na hã te dza ãma ĩꞌupa marĩ ĩtsuru na. Tadzahã nima norĩ ĩwatsédé danhipai u ĩtsaꞌẽne. (1 Coríntios 6:9, 10) Aiwatsété dzaꞌẽtẽ wamhã ãma aipoꞌre puꞌu: Jeová ma dzahadu atsawi petse di. Õ hã, te tsima wẽ aiwatsédé te te aima pari da duré te te aipawaptob da.

1. E marĩ, wa dza ꞌmanharĩ dzaꞌra ni Jeová wawatsédé te te wama apari da.

Niꞌwa Jeová dzawiꞌwai ma, robdzeiꞌõ uptabi di dza te te tsina waihuꞌu wamhã ĩwatsété dzaꞌẽtẽ na hã. Tadzahã, Jeová nhimiropitsudu hã tinhibꞌaꞌuwẽ norĩ ma, te dza dapẽꞌẽ nomri petse: “Aiwatsédé ĩpré roꞌo uptabi ne nherẽ, te dza apö tiꞌa rowahödzé pĩni uꞌẽne ĩꞌa petse ne hã.” (Isaías 1:18 TNM) ꞌRöwi wapẽꞌẽ na watsiꞌruiwapari dzaꞌra wamhã, Jeová te dza tô wama tipa wawatsédé. E niha wa dza höiꞌré dzaꞌra ni watsiꞌruiwaparidzé. Watsiꞌruiwapari uptabi dzaꞌra wamhã, wa dza tsadzöri dzaꞌra ni ĩwatsédé duré wa dza rowaptẽrẽ dzaꞌra ni Jeová wi te te waꞌruiwapari dzaꞌra tõ da. Tawamhã, wa dza watsiwatsutu petse dzaꞌra ni wa te rẽme dzaꞌra da rotsaꞌrada duré dahöimanadzé ĩꞌupa te te ĩwadzaprõni dzaꞌra ĩwatsété u. Duré wa dza tsada ꞌre wanhiptete dzaꞌra Jeová ma, ĩwẽ dzarina ꞌre wahöimana dzaꞌra mono da. — Tsõré na Atos 3:19.

2. Wawatsété dzaꞌra wamhã e niha Jeová te wapawaptob dzaꞌra daꞌmadöꞌöꞌwa norĩ hawi.

Wawatsété dzaꞌẽtẽ dzaꞌra wamhã, Jeová te tinha ‘ĩtsadzeiꞌwa norĩ ꞌmadöꞌöꞌwa norĩ dzô wahörö dzaꞌra da’. (Tsõré na Tiago 5:14, 15.) Daꞌmadöꞌöꞌwa norĩ ma, tsawi petse di poneꞌẽrebö norĩ Jeováhá te. Tinhimirowaihuꞌu na Ropotoꞌwai mreme na te wapawaptob dzaꞌra watsiwaihuꞌudzé Jeová ãma wa te apö tsiptete dzaꞌra da. — Gálatas 6:1.

E niha daꞌmadöꞌöꞌwa norĩ te dza wapawaptob dzaꞌra wawatsété dzaꞌẽtẽ dzaꞌra wamhã. Maparane niwamhã tsiꞌubdatõ daꞌmadöꞌöꞌwa norĩ te dza wama waihuꞌu dzaꞌra Ropotoꞌwai mreme dzarina wanhimiꞌmanharĩdzé ĩꞌupa na hã. Te dza wanhiptete dzaꞌra duré te dza wama roti dzaꞌra wawatsédé wa te ãma tsahu dzaꞌra tõ da. Niꞌwa watsété dzaꞌẽtẽ wamhã, tsiꞌruiwapari õ wamhã bété. Ãne wamhã, daꞌmadöꞌöꞌwa norĩ te dza tsiwi wadze te te dahöimana wamnarĩ tõ da datsiꞌrãꞌõtõ ãma.

 WAIHUꞌU DURÉ

3. Wawatsété na watsiwatsuꞌu na wa dza wadzéptöꞌö dzaꞌra ni wahöimana na

Wawatsété dzaꞌra wamhã, wa tiwi robdzeiꞌõ dzaꞌra ni Jeová wi. Taha wa, tãma ĩwatsiwatsuꞌu dzaꞌra da tsi wawatsété na. Atsiré tsõré aba Salmo 32:1-5. Taha parimhã atsima robdzanhamri aba ãhã dadzadanharĩ ãma piꞌrebamhã:

• Niꞌwam norĩ tiwatsédé Jeová wi, te udö dzaꞌra. Tadzahã, e marĩ wa, wẽ di dza tãma watsiwatsuꞌu dzaꞌra wamhã.

 4. Jeová te ãma aiba te te ãma ĩꞌupa dzaꞌra norĩ ãma

Niꞌwa watsété dzaꞌẽtẽ wamhã, duré Jeová ma ĩwẽ hã te te wẽꞌõ wamhã, datsiꞌrãꞌõtõ hawi te dza wadzere ni. Ãne wamhã, ĩme wahöimana dzaꞌra õ di dza oto. Atsiré tsõré aba 1 Coríntios 5:6, 11. Taha parimhã atsima robdzanhamri aba ãhã dadzadanharĩ ãma piꞌrebamhã:

• Ĩꞌuꞌẽtẽ wapudzé hã tsuru nherẽ, te dza dupu ĩꞌuꞌẽne hã. E marĩ wa, ĩwatsété ꞌmanharĩꞌwa ĩtsiꞌruiwapariꞌõ me dahöimana te dza tiwi roꞌwaꞌré aihĩni norĩ wi datsiꞌrãꞌõtõ ãma.

E niha Jeová te tsihöiꞌré ĩbö na, ĩtsiba petse na duré ĩtsimidzawi petse na te te ãma ĩꞌupa dzaꞌra norĩ ma tãma ĩhöimana dzaꞌra dzém na.

 ĨWAIHUꞌUDZÉ HÃ

Wawatsété dzaꞌẽtẽ dzaꞌra wamhã tsada hã Jeová wawatsédé te te wama apari da. Taha da, ꞌröwi wapẽꞌẽ na wa dza watsiꞌruiwapari dzaꞌra ni duré wawatsédé wa dza rẽme petse dzaꞌra ni.

Ãma aipoꞌre puꞌu

• E marĩ wa, wẽ di dza wawatsété na watsiwatsuꞌu dzaꞌra wamhã Jeová ma.

• E marĩ, wa dza ꞌmanharĩ dzaꞌra ni wawatsédé Jeová te te wama apari da.

• Wawatsété dzaꞌẽtẽ dzaꞌra wamhã, e marĩ wa, wa te ĩwaptẽrẽ dzaꞌra da tsi daꞌmadöꞌöꞌwa norĩ nhimipawaptobdzéb dzô.