Neemia 2:1-20
2 Tawamhã maparane siꞌuiwa na aꞌamo siꞌutõrĩ pari, apito Artazesi nhimiꞌmadâꞌâzém na 20 na ãma iwahub ꞌremhã nimahã bâtâ na apito hã sai ré, wa tô uwa ꞌrãi waꞌu isé hã tãma tiꞌâ. Ãhã wamhã, ĩwi irobzeiꞌõzém na hã te te ĩꞌmadâꞌâ õ di aré.
2 Tahawa te ĩzadanha ãne:
— E marĩ wa, ma tô bété aiꞌubu zeiꞌõ, aihâzé õ nherẽ. Ãté tô aipẽꞌẽzé wa.
Ãhã wa, wa tô imreme ma ĩpahi.
3 Tahawa, wa tô ãma tãma waꞌrã ãne: — Apito, õne uꞌâ ꞌre iꞌaihâimana mono da si, iwẽ hã! E niha wa za bété ĩꞌubu zeiꞌõ ãna hã ĩhâiba, ꞌri nhoꞌõmo ãma wahiꞌrata norĩ na da te ãma ꞌre itiꞌa zaꞌra mono zé sipru pese na ꞌre saꞌwari mono nherẽ, duré taha te ꞌridawa zaꞌẽtẽ na da te ãma sazu zaꞌra haré ꞌre saꞌwari mono nherẽ!
4 Tawamhã te apito ĩzadanha ãne:
— E marĩ te asima iwẽ.
Tawamhã wa tô mre ꞌRe ihâimana uꞌâsi mono, hâiwa ãma ꞌre isãmra mono ma hã.
5 Taha pari wa tô oto apito ma tinha ãne:
— Aima irowẽ zarina ĩma aipẽꞌẽ toi wamhã, maꞌãpé ĩma waprosi, Zuda u ĩmorĩ da, ꞌri nhoꞌu ĩhiꞌrata norĩ da te iwa ꞌre iséme mono zé hã apâ te ꞌri da.
6 Tawamhã apito zababa imro sãmra ré, ma tô te tiwi irowaptẽrẽzém na hã ãma ĩzaze. Tahawa, ma tô ĩzadanha, niha bâtâ na za ĩhâimana zô õmemhã, duré niwa za we te ĩsina isiri zô apâ hã. Tawamhã za niha aꞌamo te ĩsina iꞌuprosizém na hã wa tô ãma wasisaze ni.
7 Tahawa wa tô apito wi waptẽ, te te ĩma sõmri da tinhimirobꞌuiꞌéré hã, dazaꞌrui waꞌõno Eufrati-Oeste na isisi ãma iꞌrãnhoꞌõmo norĩ ma, te tãma sõmri zaꞌra wa, isaꞌru waꞌwaibaba zaꞌra te roꞌrazâri wẽ wa, ta hawimhã Zuda u ĩwisi wẽ da hã.
8 Tawamhã wa tô duré waptẽ robꞌuiꞌéré hã, Asafi apito marã ꞌmadâꞌâꞌwai ma da hã, wede norĩ te te ĩma ꞌmaiꞌru da, ꞌRe ihâimana uꞌâsi mono nhorõwa ꞌri ꞌwawi ꞌri isiptede ꞌre isimapa mono ꞌridawa zaꞌẽtẽ norĩ hã da te dasiwi ãma ꞌmanharĩ da, duré ꞌri nhoꞌõmo ꞌwawi waꞌra ꞌrãihâ ꞌmanharĩzéb da hã, duré ĩnhorõwa ꞌmanharĩzéb da hã. Tawamhã apito ma tô uburé ĩma sõmri zaꞌra, te tiwi iwaptẽrẽ hã. E marĩ wa, ꞌRe ihâimana uꞌâsi mono hã ĩsiré hâimana wa.
9 Tawamhã apito ma tô duré ĩsiré siꞌabaꞌré da hã, tãma robꞌru zaꞌra, nima norĩ ma, dasiꞌwapéi ꞌmanharĩꞌwa nhibꞌihâꞌa norĩ hã duré awaru na dasiꞌwapéi ꞌmanharĩꞌwa norĩ hã. Tawamhã Eufrati-Oeste u wa tô oto mo. Tamomo ĩwisi wamhã, wa tô oto apito nhimiꞌuiꞌéré hã te tãma sõmri zaꞌra, hâiba mono bâ iꞌrãnhoꞌõmo norĩ ma hã.
10 Tane nherẽ, Sãbalati hã ꞌri nhoꞌu Bete-Horõ ãmamhã, duré Tobia daꞌmadâꞌâꞌwa tiꞌai waꞌõtõ nhoꞌu Amo na isisi ãma me, ma tô tawamhã tizahi zahuré, we niꞌwa imorĩzé te te waihuꞌu zahuré wa, Izaraéu nhihudu norĩ te te ipawaptob zaꞌra da hã.
11 Tawamhã wa tô oto duré wi, Zeruzalẽ u hã. Siꞌubdatõ bâdâ ineb ꞌremhã
12 niꞌwai ma hã te wasuꞌu õ di, te irosaꞌratazé za ꞌri nhoꞌu apâ te iwahutuzém na hã, ꞌRe ihâimana uꞌâsi mono ĩpẽꞌẽ ꞌre te te ĩma iwaihuꞌuzéb zarina. Tawamhã mara waꞌwamhã wa tô udu, rob u ĩwatobro da, nima norĩ we ĩsiré isiꞌabaꞌré norĩ siré. Tahawa, wa tô misi awaru poꞌre pore hã saprõ, tô we ãma ĩmorĩzé hã.
13 Tawamhã zahadu mara hâ ré, wa tô ꞌri nhoꞌõmo hawimhã watobro, Romharé na ꞌridawa zaꞌẽtẽ nhisi na bâtâ zasizém niwĩ. Tahawa, hâiwa nhimire niwĩ wa tô aꞌre haꞌoto.
Ãhã wamhã, wa tô Dragã na âꞌaꞌa nhisi na hã saprĩ, Roprum na ꞌridawa zaꞌẽtẽ nhisi u ĩwisi da. Tawamhã ĩne mono sidâpâsi, wa tô ꞌri ꞌwawi waꞌra ꞌrãihâ hã te nasi aꞌmadâꞌâ, nima niwĩmhã da te dasiwi iprubzé hã, duré ꞌridawa zaꞌẽtẽ norĩ, unhama na da te ãma isazu zaꞌra zé hã.
14 Tawamhã hâiwa nhimiꞌe niwĩ oto ĩsipiꞌrai wamhã, Âꞌaꞌa na ꞌridawa zaꞌẽtẽ nhisi u, duré apito te â nhowada u zama wa tô mo. Tane nherẽ, ĩte awaru poꞌre pore hã niha te te ãma saprĩ waihuꞌu õ di, ꞌri sipru waꞌwaibabamhã.
15 Tahawa wa tô duré mo, Cedrõ na romharé nhisi u. Tawamhã ĩne mono sidâpâsi wa tô ta hawimhã ꞌri ꞌwawi waꞌra ꞌrãihâ hã te aꞌmadâꞌâ uꞌâsi. Taha parimhã tô õ hã bâdâdi ãma ĩmorĩzéb ꞌrata na wa tô apâ mo. Oto apâ ĩmorĩ wamhã, Romharé na ꞌridawa zaꞌẽtẽ nhisi na wa tô apâ ãzé, ꞌri nhoꞌõmo u hã.
16 Tawamhã ꞌri nhoꞌõmo ꞌremhã dama ipire norĩ hã te te waihuꞌu zaꞌra õ di bara na ꞌre ĩmorĩzé hã, duré te irowaimrami mono zé te iꞌmanharĩ hã. Ãhã wamhã, zahadu tameb ꞌre ma hã te tãma wasuꞌu zaꞌra õ di zudeu norĩ ma hã — sasedoti norĩ ma, dama ipire norĩ ma, daꞌmadâꞌâꞌwa norĩ ma, duré aꞌuwẽ aimawi za te te dame iromhuri zaꞌra norĩ ma hã.
17 Tawamhã ta norĩ ma, wa tô oto tãma nharĩ zaꞌra ãne:
— Maꞌãpé ãma rosaꞌrata pese zaꞌra waꞌaba, ipire wama ihâimana zaꞌra zém na hã! ꞌRi nhoꞌu Zeruzalẽ hã te siprum haré ꞌre saꞌwari. Duré ite ꞌridawa zaꞌẽtẽ mono hã ma tô unhama na ãma dasiwi sazu zaꞌra ni. Tahawa oto apâ wa te wasiwi wahutu aba, ꞌri nhoꞌõmo ꞌwawi waꞌra ꞌrãihâ hã, wama irowazéb zaꞌra zé wa te ãma wasiwi pari da.
18 Tawamhã wa tô duré oto tãma wasuꞌu zaꞌra, ꞌRe ihâimana uꞌâsi mono iwẽ te te ĩma ipisutuzé hã, duré te te ĩpawaptobzé hã. Wa tô duré tãma wasuꞌu zaꞌra, apito te te ĩma ĩnharĩzé hã, marĩ mono na.
Tahawa, ma te ãne ãma ĩzadaꞌâbâ zaꞌra:
— Tane wamhã, ꞌri ꞌwawi waꞌra wahutuzém na wa te oto ãma sãnaꞌrata zaꞌra waꞌaba!
Tawamhã ma tô oto sada robꞌubumro zaꞌra, romhuri na te te ãma isãnaꞌrata zaꞌra zéb da hã.
19 Tane nherẽ, Sãbalati norĩ, Tobiaha me duré Gesẽ, Arabia norĩ siré me, ãne na wa te iꞌmanharĩ zaꞌra zé te te waihuꞌu zaꞌra wamhã, ma tô waꞌãma to zaꞌra sina waꞌãma aihâ zaꞌra. Tahawa te ãne wazadanharĩ zaꞌra:
— E marĩ te bété asiwi iꞌmanharĩ ꞌwa. E taha zarina apito da, aihâimana zaꞌra waꞌaba da.
20 Tawamhã wa ãma tãma waꞌrãmi zaꞌra ãne:
— ꞌRe ihâimana uꞌâsi mono, hâiwa ãma ꞌre isãmra mono hã te za iwẽ si wama pisutu zaꞌra, wa te irowaꞌõtõ zaꞌra zéb zarina, wama iwatobro zaꞌra zéb da hã. Wa norĩ hã tãma iromhuriꞌwai wa, wa za oto ãma sãnaꞌrata zaꞌra ni, ꞌri ꞌwawi waꞌra wahutu na hã. Tane nherẽ, a norĩ waꞌwa hã Zeruzalẽ ꞌremhã marĩ tedeꞌwa na hã aihâimana zaꞌra waꞌaba õ di. Duré iꞌre ꞌre aihâimana zaꞌra waꞌaba mono nherẽ, marĩ dai õ di, a norĩ waꞌwa hã. Duré Izaraéu nhihudu norĩ ꞌre ihâimana zaꞌra mono zém na ꞌre iꞌaihâimana zaꞌra waꞌaba mono da hã mare di.
