1. მუშა დარწმუნენდჷ ისრაელეფს ესაიაშ სიტყვეფ?

 ᲬᲘᲜᲐᲡᲬᲐᲠᲛᲔᲢᲧᲕᲔᲚ ესაიაქ იეჰოვა მიშინუ, მუჭოთ „ართგურ ღორონთ“. სიტყვა „ართგურ“ პირდაპირ გაგებათ ნიშნენს „ამინს“ (ეს. 65:16). „ამინ“ ნიშნენს „რდას თაშ“ ვარდა „ჭეშმარიტო“. ბიბლიას სიტყვა „ამინ“ ხშირას თიშ ეიოჭარალო გიმირინუაფ, ნამდა, მუდგას იეჰოვა დო იესო იჩიებნა აუცილებერო შისრულებ. თაშ ნამდა, ესაიაშ სიტყვეფ ისრაელეფს ართ მუდგარენშა დარწმუნენდჷ — იეჰოვაშ სიტყვეფ სანდო რე დო მუდგას იჩიებ აუცილებერო შეასრულენს. თეშა იეჰოვაქ ბრელშა დარწმუნ მუშ ხალხ. თიქ მუშ დოდვალირ არძა პირობა შეასრულ დო ნამთინ ვა გუმტყუნებ, მუდგათ ოძირუ, ნამდა დღას ვეგნურთანს მუშ სიტყვას.

2. მუშენ შემლებნა ვენდათ იეჰოვაშ დუნაპირებუეფს დო მუს გუვარჩიენთ თე სტატიას?

² ჩქი ხოლო შემლებნანო ბჯერდან, ნამდა მომავალწკუმა დაკავშირებულ იეჰოვაშ დუნაპირებუეფ აუცილებერო შისრულებ? ესაიაშ უკულ, სოდგარენ 800 წანაშა, ებრაელეფშა მეჭარილ წერილს პავლე მოციქულქ ხოლო ჯგირო ენწყჷ, მუშენ რე იეჰოვაშ დუნაპირებუეფ სანდო. თიქ თქუ: „დღას ვა მოხვადუ, ღორონთიქ ტყურა ქოთქუას“ (ებრ. 6:18). დეფიქრით თეცალ მუდგარენშე: შეიოლებერ ვა რე, წყურგილეშე ქოთ სუფთა დო ქოთ ჯიმუამ წყარ მიშას. თეშნერო, დღას ვა მოხვადუ, ტყურა ქოთქუას იეჰოვაქ, მიდგაშეთ ჭეშმარიტება მოურს, თაშ ქოფთქუათინ, მით „ჭეშმარიტებაშ წყურგილე“ რე. ათეშენ, შემლებნა ბოლოშა ბჯერდან, ნამდა ირფელ, მუდგას იეჰოვა იჩიებ, თინეფ შქას მომავალწკუმა დაკავშირებულ დუნაპირებუეფ, აუცილებერო შისრულებ. თე სტატიაშე ქიგებგენთ, მუს დემეპირეს იეჰოვაქ მომავალწკუმა დაკავშირებით დო მუ საფუძვლიან მიზეზეფ მუჩეს თიშ დაჯერებელო, ნამდა თინა აუცილებერო შისრულებ.

3. ა) ნამ ბიბლიურ დუნაპირებ უჰამუანს გურს ღორონთიშ მსახურეფს? (გამოცხ. 21:3, 4). ბ) მუნერ დამოკიდებულება უღჷ ნამთინეს თე დუნაპირებუშ მიმართ?

³ მთელ მსოფლიოს ღორონთიშ მსახურეფს გურს უჰამუანს დუნაპირებ, ნამუთ გამოცხადებაშ წიგნის ინოჭარ (წეკითხით გამოცხადებაშ 21:3, 4). იეჰოვა მოპირნა, ნამდა იფცხოვრენთ თიცალ დროს, მუჟამსით „მეტო ვეჸუაფ ღურა, ვართ ნგარა, თვალუა დო ჭუა“. თე ბიბლიურ მუხლის მსახურებას ხშირას უკითხანთ ადამიანეფს თიშ ოძირაფალო, მუნერ იჸუაფ სამოთხეს ცხოვრება. მარა თე დუნაპირებუს წუკითხენთინ უკულ, ნამთინე მირაგადუნა: „ჰამენ, თაშ ქოჸოფედას, მარა ვა ბჯერს თე დრო ქუდოდირთუნ“.

4. ა) მუ უჩქუდ იეჰოვას წინასწარ, მუჟამსით ბიბლიას მუშ დუნაპირებ ინაჭარაფუ? ბ) გურიშემაკინალ დუნაპირებწკუმა ართო ხოლო მუ მუჩეს იეჰოვაქ?

⁴ მუჟამსით იეჰოვაქ მოციქულ იოანეს სამოთხეწკუმა დაკავშირებულ მუშ დუნაპირებ ბიბლიას ინაჭარაფუ, ჯგირო უჩქუდ, ნამდა სახიოლო ამბეშ ქადაგებაშ დროს, თე ძვირფას იმენდის შხვეფს ხოლო გეგნოფჩანდით. იეჰოვას თინა ხოლო წინასწარ უჩქუდ, ნამდა ბრელს გუჭირდუდ თე სიტყვეფიშ დაჯერა (ეს. 42:9; 60:2; 2 კორ. 4:​3, 4). მუჭო შემლებნა ქოთ შხვეფ დო ქოთ ჩქინ დუდ დუვარწმუნათ თიშა, ნამდა გამოცხადებაშ 21:3 დო 4-ის ინოჭარილ სიტყვეფ აუცილებერო შისრულებ? იეჰოვაქ ხვალე თე გურიშემაკინალ დუნაპირებ ვარინ, თიშ საფუძვლიან მიზეზეფ ხოლო მუჩეს, მუშენ შემლებნა ბჯერდან, ნამდა თინა აუცილებერო შისრულებ? მორთ ასე ქიგებგათ თე მიზეზეფ დო ქობძირათ, მუჭო მარწმუნენა იეჰოვა, ნამდა ვეგნურთანს მუშ სიტყვას.

5. მუ საფუძვლიან მიზეზეფ მიღნა, ნამდა ბჯერდან ღორონთიშ დუნაპირებუშ დო სო შემლებნა თინეფიშ ძირაფა?

⁵ ღორონთიშ დუნაპირებუშ სანდოობაშა უკულიან მუხლეფ მარწმუნენა. თექ ბგებულენთ თიშ საფუძვლიან მიზეზეფს, მუშენ შემლებნა ბჯერდან, ნამდა სამოთხეწკუმა დაკავშირებულ იეჰოვაშ დუნაპირებ აუცილებერო შისრულებ. თე მუხლეფს ბკითხულენთ: «ტახტის გეხედუნ თიქ თქუ: „ქიდეკვირ, ვოჭყანქ ირფელს ახალს“. უკულ გეუძინ: „დოჭარ, მუშენდა თე სიტყვეფ სარწმუნო დო ჭეშმარიტ რე“. თიქ მიწუ: „შისრულ! მა ვორექ ალფა დო ომეგა, დაჭყაფ დო ბოლო“» (გამოცხ. 21:5, 6ა).

6. მუშენ მიმანგარენა იეჰოვაშ დუნაპირებუშ მიმართ ნდობას გამოცხადებაშ 21:5, 6-ის ინოჭარილ სიტყვეფ?

⁶ მუშენ მიმანგარენა თე ბიბლიურ მუხლეფ ღორონთიშ დუნაპირებუშ მიმართ რწმენას? წიგნის „გამოცხადებაშ დიდებულ აპოგეა“ თე მუხლეფწკუმა დაკავშირებით ბკითხულენთ: „იეჰოვა, თაშ ქოფთქუათინ, ხეს ოჭარანს საგარანტიო ხელშეკრულებას, მუდგაშ საფუძველშა ართგურ ადამიანეფ კურთხეულეფ იჸუაფნა“. b გამოცხადებაშ 21:3, 4-ის ღორონთიშ დუნაპირებ რე მოჩამილ, მარა უკულიან მა-5 დო მა-6 მუხლეფს იეჰოვა საფუძვლიან მიზეზეფს მარზენა, მუშენ შემლებნა ბჯერდან, ნამდა აუცილებერო შეასრულენს მუშ სიტყვას. მორთ ასე კილ-კილშა გუვარჩუათ თე მუხლეფს რაგადებულ იეჰოვაშ სიტყვეფ დო ქობძირათ, მუჭო მარწმუნენა ღორონთ, ნამდა შემლებნა ვენდათ თის.

7. მი იჩიებ მა-5 მუხლის მოჩამილ სიტყვეფს დო მუშენ რე თინა განსაკუთრებულ?

⁷ მა-5 მუხლ თეცალ სიტყვეფით იჭყაფ: „ტახტის გეხედუნ თიქ თქუ“ (გამოცხ. 21:5ა). თე სიტყვეფს განსაკუთრებულ მნიშვნელობა უღჷ, მუშენდა თენა რე წიგნ „გამოცხადებას“ მოჩამილ სუმ შემთხვევაშე ართ-ართ, სოდეთ პირადო იეჰოვა იჩიებ. მუჭოთ ვორწყეთ, იეჰოვაქ მუშ დუნაპირებუშ შესრულებაშ საფუძვლიან მიზეზეფ ძალიერ ანგელოზიშ ვარდა გათელებურ იესოშ საშვალებათ ვარინ, პირადო მუქ გამცხადეს. თე ფაქტ ამტკიცენს, ნამდა ღორონთიშ დუნაპირებ სანდო რე დო აუცილებერო შისრულებ. ხვალე თენა ვარინ, ბიბლიაშე თის ხოლო ბგებულენთ, ნამდა „გამორიცხულ რე, [ღორონთიქ] ტყურა ქოთქუას“ (ტიტ. 1:2). იეჰოვაშ გურშენ რაგადებულ თე სიტყვეფ უმოს სანდოთ გინაშქვანს თიშ დუნაპირებუს, ნამუთ გამოცხადებაშ 21:​5, 6-ის რე მოჩამილ.

8. მუჭო მარწმუნენა იეჰოვა, ნამდა აუცილებერო შეასრულენს მუშ სიტყვას? (ეს. 46:10).

⁸ მორთ ასე გუვარჩუათ მა-5 მუხლის მოჩამილ სიტყვა „ქიდეკვირ“ (გამოცხ. 21:5). თე ბერძნულ სიტყვა წიგნ „გამოცხადებას“ ბრელ დიხას რე გიმორნაფილ დო თიშ გურშენ ართ ნაშრომს ჭარჷ: „თე სიტყვას ხშირ შემთხვევას თიმწკუმა ირინუანა, მუჟამსით ოკონა, პიროვნებაქ განსაკუთრებულ ყურადღება მიაქცუას თი აზრის, ნამდგას თე სიტყვაშ უკულ წეკითხენს“. თეშ უკულ, ღორონთ იჩიებ: „ვოჭყანქ ირფელს ახალს“. ყურადღება ქიმიაქცით, ნამდა ღორონთ იჩიებ, „ვოჭყანქ ირფელს ახალს“ დო ვართ ხოლო „გუვოჭყანქ ირფელს ახალს“. მართალ რე, სამოთხეწკუმა დაკავშირებულ ღორონთიშ დუნაპირებ მომავალს შისრულებ, მარა თიშ გურშენ ჩიებაშ დროს იეჰოვა თიცალ სიტყვეფს ირინუანს, ითამ თინა უკვე შესრულებურ რდას. მუშენ? მუშენდა იეჰოვას გვალო ჯგირო უჩქჷ, ნამდა თიშ სიტყვეფშა მუთუნს ვეწარინე დო მუდგაქ ვა მოხვადასინ, აუცილებერო შისრულებ (წეკითხით ესაიაშ 46:10).

9. ა) მუ ჟირ მუდგარენ იგულისხმებ იეჰოვაშ სიტყვეფს: „ვოჭყანქ ირფელს ახალს“? ბ) მუ აღოლე „წოხოლენ ცას“ დო „წოხოლენ დედამიწას“?

⁹ მორთ ასე გუვარჩუათ, მუს ნიშნენს გამოცხადებაშ 21:5-ის ენოჭარილ იეჰოვაშ სიტყვეფ: „ვოჭყანქ ირფელს ახალს“. ბიბლიაშ თე მონაკვეთის ეჭარილ რე ჟირ მუდგარენ, მუდგას იეჰოვა გაკეთენს. პირველ, ჯვეშის ახალით დოთირანს დო მაჟია, დაზიანებულს გეგშასწორენს. პირველ რიგის მუს დოთირანს იეჰოვა? გამოცხადებაშ 21:1-ის ბკითხულენთ: „წოხოლენ ცა დო წოხოლენ დედამიწა განადგურებედ“. „წოხოლენ ცას“ იგულისხმებნა პოლიტიკურ მთავრობეფ, მით სატანაშ დო დემონეფიშ გავლენაშ თუდო რენა (მათ. 4:​8, 9; 1 იოან. 5:19). ბიბლიას გიმორნაფილ სიტყვას „დედამიწა“ მინშა ხვალე პლანეტა ვარინ, კაცობრიობა ხოლო იგულისხმებ (დაბ. 11:1; ფსალმ. 96:1). თაშ ნამდა, „წოხოლენ დედამიწას“ იგულისხმებნა ამდღა მახორუ უბადო ადამიანეფ. იეჰოვა „წოხოლენ ცას“ დო „წოხოლენ დედამიწას“ ვა გაუჯგუშენსინ, მოსპუნს დო „ახალ ცათ“ დო „ახალ დედამიწათ“ დოთირანს. თენა ნიშნენს, ნამდა დედამიწას მართალ ადამიანეფ იცხოვრენა დო აჸვენუნა ახალ მთავრობა, მით სამართლიანო იმართველენს.

10. ხოლო მუს გაკეთენს იეჰოვა?

¹⁰ ხოლო მუ გაგებათ გაჭყანს იეჰოვა „ირფელს ახალს“? (გამოცხ. 21:5). თინა დაზიანებულ დედამიწას დუდშე ბოლოშა გაახალენს დო ადამიანეფს სრულყოფილებაშა ქიმიჸუნანს. მუჭოთ ესაიაშ წინასწარმეტყველებაშე ბკითხულენთ, მთელ დედამიწა ედემიშ ბაღცალ სქვამ იჸუაფ. თეს გეძინელ, იეჰოვა ჩქი ხოლო გუმაახალენა თი გაგებათ, ნამდა სადღამუშოთ მოსპუნს თი ირფელს, მუთ ცოდაქ მომღეს. თი დროს „თოლს ვარწყენან თინეფს თოლსინთე ქუმაკათუნა დო ჸუჯის ვერჩქილენან თინეფ ქიგეგონენა . . . ქულა ირემცალო გილასხაპუნდას იჸი“ დო მუთ არძაშ უმოს მთავარ რე, ღურელეფ ხოლო გეთელებნა (ეს. 25:8; 35:​1—7).

11. მუ მითითება მეჩჷ იეჰოვაქ იოანეს დო მუშენ?

¹¹ ხოლო მუ მტკიცებულება მუჩეს იეჰოვაქ დო მუჭო დუმარწმუნეს, ნამდა მუშ სიტყვეფს აუცილებერო შეასრულენს? თიქ მოციქულ იოანეს უწუ: „დოჭარ, მუშენდა თე სიტყვეფ სარწმუნო დო ჭეშმარიტ რე“ (გამოცხ. 21:5). იეჰოვას ხვალე თინა ვა უთქუალ იოანეშა, თე სიტყვეფ დოჭარია, თიშ მიზეზ ხოლო უწუ, მუშენ ოკო აკეთკო თენა დო გეუძინ: „თე სიტყვეფ სარწმუნო დო ჭეშმარიტ რე“, მუთ ნიშნენს, ნამდა ღორონთიშ სიტყვეფ სანდო რე დო ვეგემტყუნებ. მუ ჯგირ რე, ნამდა იოანექ დემორჩილ იეჰოვას დო კილ-კილშა „დოჭარ“ ირფელ. ზუსტას თეშ ჭყოლოფათ ამდღა, ბიბლიას, ღორონთიშ დუნაპირებუშ გურშენ ბკითხულენთ დო მიღნა საშვალება, დეფიფქრათ თი დიდებულ კურთხევეფშე, ნამუთ წიმი მელნა.

12. მუშენ თქუ იეჰოვაქ, „შისრულ“?

¹² თე სიტყვეფიშ უკულ, ღორონთ იჩიებ: „შისრულ!“ (გამოცხ. 21:6). მუშენ იჩიებ იეჰოვა, ნამდა მუშ დუნაპირებუქ შისრულ, მუჟამსით თენა დიო ვა მოხვალამე? თეშ პასუხ არგამა რე: მუთუნს ვაცილებე იეჰოვაშა, ქიმიოჭირინუას მუშ განზრახვას  დო გაკეთას თინა, მუთ რაგადებულ აფჷ! მა-6 მუხლის იეჰოვა ხოლო ართ ძალიერ მტკიცებულებას მარზენა, მუთ მარწმუნენა, ნამდა თიშ დუნაპირებ აუცილებერო შისრულებ. მორთ ქიგებგათ, მუ რე თენა.

13. მუშენ თქუ იეჰოვაქ, „მა ვორექ ალფა დო ომეგა“?

¹³ მუჭოთ ჟიშე მიფშინეთ, წიგნ „გამოცხადებას“ მოჩამილ რე სუმ შემთხვევა, მუჟამსით მიდგაინ შხვა ვარინ, პირადო იეჰოვა რაგადანს (გამოცხ. 1:8; 21:​5, 6; 22:13). თე სუმხოლო შემთხვევას იეჰოვა იჩიებ: „მა ვორექ ალფა დო ომეგა“. „ალფა“ ბერძნულ ანბანიშ პირველ ასო რე დო „ომეგა“ — ბოლო. თე შედარებაშ გიმორნაფათ იეჰოვა აარგამენს, ნამდა, მუჟამსით მუდგარენ საქმეს დიჭყანს, თის აუცილებერო ბოლოშახ ქიმიჸუნანს.

14. ა) გენწყით, მუჟამ თქუ იეჰოვაქ „ალფა“ დო მუჟამ თქუანს „ომეგა“? ბ) მუშა მარწმუნენა დაბადებაშ 2:1—3-ს ინოჭარილ სიტყვეფ?

¹⁴ მუჟამსით იეჰოვაქ ადამ დო ევა გაჭყჷ, თინეფშა ვა უფულ, მუ ულამუდ დო ქუგაგებაფუ, მუ განზრახვა უღუდ დედამიწა დო კაცობრიობაწკუმა დაკავშირებით. ბიბლიას ბკითხულენთ: «აკურთხჷ ღორონთიქ თინეფ დო უწუ თინეფს: „ინაყოფიერით, გემრავლით, გეიოფშით დედამიწა“» (დაბ. 1:28). თაშ ნამდა, მუშ განზრახვაშ გაცხადებაშ დროს იეჰოვაქ, თაშ ქოფთქუათინ, თქუ „ალფა“. თე განზრახვა თიმწკუმა შისრულებ, მუჟამსით ადამ დო ევაშ მორჩილ დო სრულყოფილ გამნარყ გეიოფშანს დედამიწას დო თის სამოთხეთ გინართინუანს. მუჟამსით თენა ქუმოხვადუ დო ღორონთიშ განზრახვა საბოლათ შისრულებ, თინა თაშ ქოფთქუათინ, თქუანს „ომეგა“. მუჟამსით იეჰოვაქ გათუ „ცაშ, დედამიწაშ დო თი ირფელიშ გოჭყაფა, მუთ თექ რე“, ხოლო ართ მტკიცებულება მუჩეს, მუდგათ ოძირუ, ნამდა მუშ განზრახვა აუცილებერო შისრულებ. თეშ გურშენ დაბადებაშ 2:1—3-ს ბკითხულენთ (წეკითხით). იეჰოვაქ მა-7 დღა წმინდათ გეგმაცხად. თეშ კეთებათ დუმარწმუნეს, თაშ ქოფთქუათინ, გარანტია მუჩეს, ნამდა მუდგაქ ვა მოხვადასინ, მა-7 დღაშ ბოლოს დედამიწა დო კაცობრიობაწკუმა დაკავშირებულ მუშ განზრახვას აუცილებერო შეასრულენს.

15. მუშენ შილებე თეშ იძირედკო, ითამ სატანაქ ეცილ იეჰოვას განზრახვაშ შესრულებას?

 ¹⁵ თიშ უკულ, მუთ ადამ დო ევაქ ოჭიშ ქურთინუეს იეჰოვას, ცოდამეფო გინირთეს დო მუნეფიშ გამნარყის ხოლო ცოდა დო ღურა ქუმუღეს (რომ. 5:12). მუჟამსით თექ ქუმოხვად, შილებე თეშ იძირედ, ითამ იეჰოვაშ დუდშეიან განზრახვა, ნამდა სრულყოფილ დო მორჩილ ადამიანეფქ გეიოფშესკო დედამიწა, ვეშისრულებუდ დო თეშ გიშეშ, ითამ სატანაქ ეცილ იეჰოვას, თქუკო „ომეგა“. სატანა შილებე ფიქრენდჷ, ნამდა იეჰოვა ვარიას ქოთქუანდჷ მუშ განზრახვაშ შესრულებაშე ვარდა ადამ დო ევას ღურათ დასაჯენდჷ დო თინეფიშ მანგიორო ედემიშ ბაღის შხვა წყვილს ქუდახორუანდჷ, მით შეასრულენდჷ კაცობრიობაწკუმა დაკავშირებულ ღორონთიშ დუდშეიან განზრახვას. მარა ღორონთის თენა გუკეთებუდკონ, სატანა აუცილებერო ბრალს ქიგედვანდჷ თის დო თქუანდჷ, ნამდა მეტყურე რდჷ. მუშენ იფჩიებუთ თეს? მუშენდა, მუჭოთ დაბადებაშ 1:28-შე ბგებულენთ, იეჰოვაქ ადამ დო ევას უწუ, ნამდა თინეფიშ გამნარყ გეიოფშანდჷ დედამიწას დო ვართ ხოლო შხვაშ.

16. მუშენ შილებე სატანა ფიქრენდკო, ნამდა იეჰოვას ვეშიალებედ შეასრულკო მუშ დუდშეიან განზრახვა?

¹⁶ სატანაშ აზრით, ხოლო მუ შილებე გაკეთკო იეჰოვაქ? თინა შილებე თის ხოლო ფიქრენდკო, ნამდა იეჰოვა უფლებას ქიმეჩანდჷ ადამ დო ევას, ჸუნდესკო არასრულყოფილ გამნარყ, მიდგას დღას ვემიაჭირინედ სრულყოფილებაშა (ეკლ. 7:20; რომ. 3:23). იეჰოვა თეს გაკეთენდჷ-და, მუშო ოკო რაგად, სატანა თე სიტუაციას ხეშე ვა გუტენდჷ დო ბრალს ქიგედვანდჷ ღორონთის, ნამდა თის ვეშიასრულებუ მუშ განზრახვაქ. მუშენდა ადამ დო ევაშ გამნარყის სრულყოფილებაშა დღას ვემიაჭირინედ-და, დედამიწა დღას ვეიფშაფუდ სრულყოფილ ადამიანეფით.

17. მუ აკეთ იეჰოვაქ სიტუაციაშ გიშანწყუალო დო მუ მაჸუნუ თე ირფელს შედეგო? (ქოძირით სურათ).

¹⁷ სატანაშ დო ადამ დო ევაშ დაუმორჩილებლობას ვა უცილებ იეჰოვაშა, შეასრულკო მუშ დუდშეიან განზრახვა. თიქ სიტუაციაშ გიშანწყუალო დო მუშ მიზანიშ მიოჭირნაფალო არძაშ უჯგუშ შარა დოგორ, ნამდგაშეთ სატანა დღას ვეფიქრენდჷ (ფსალმ. 92:5). იეჰოვაქ უფლება მეჩჷ ადამ დო ევას, ჸუნდესკო სქუალეფ დო თინეფიშ გამნარყიქ გეიოფშუკო დედამიწა, მუდგათ დამტკიც, ნამდა მეტყურე ვარინ, სიტყვაშ ართგურ რე. თეს გეძინელ, იეჰოვაქ თინა ხოლო დამტკიც, ნამდა მუშ სიტყვეფ ვემტყუნებუნ, ირიათო ისრულებ. თიქ დედამიწაშა მუშ ხვალეგუნაჭყეფ სქუა, „გამნარყ“, ქუმაშქვჷ, მით მორჩილ ადამიანეფს დერსხენდჷ ცოდა დო ღურაშე (დაბ. 3:15; 22:18). კაცობრიობაშ გიშაჸიდირალო „გამნარყიქ“ მუშ სიცოცხლე ოკო დათმუკო. მუშო ოკო რაგად, სატანა შურო ველუდკონ იჸიდ, ნამდა იეჰოვა მუშ განზრახვაშ შეიოსრულებერო თეშმადიდა მსხვერპლშა მიდეშ. თი გიშაჸიდირალ, ნამუთ იეჰოვა დო იესოქ აკეთეს, ნამდვილ ჸოროფაშა რე გერსხილ (მათ. 20:28;  იოან. 3:16). მარა, სატანას ვა უღჷ თე თვისება, თინა ეგოისტ რე დო ხვალე მუშ დუდშე ფიქრენს. ათეშენ, დღას ვა წერმიდგინენდჷ, ნამდა იეჰოვა ადამიანეფშო თეცალ მუდგარენს გაკეთენდჷ. მუ ჯგირობუას მოუღანს გიშაჸიდირალ მორჩილ ადამიანეფს? ქრისტეშ 1 000 წანიან მართველობაშ ბოლოს, ადამ დო ევაშ მორჩილ დო სრულყოფილ გამნარყ დემკვიდრენს სამოთხეთ გინორთელ დედამიწას, მუჭოთ თენა იეჰოვას დუდშე აფუდ განზრახულ. თე დროს იეჰოვა ქოთქუანს „ომეგა“.

18. ნამ სუმ მიზეზიშ გურშენ ბჯერა ღორონთიშ დუნაპირებუშ? (ქოძირით ჩარჩო  „სუმ მიზეზ, ნამუთ ღორონთიშ დუნაპირებუშ შესრულებაშა მარწმუნენა“).

¹⁸ თე სტატიას გუვარჩით მუსხირენ მტკიცებულება, მუდგაქ დუმარწმუნეს, ნამდა იეჰოვა შეასრულენს მუშ დოდვალირ სიტყვას დო დედამიწას სამოთხეთ გინაშქვანს. შხვეფ მუჭო დუვარწმუნათ თიშა, ნამდა თე დრო აუცილებერო ქუდოდირთუ? შემლებნა ყურადღება სუმ მუდგარენშა გუმახვილათ. პირველ, თე დუნაპირებუს შხვა ვარინ, პირადო იეჰოვა მარზენა. წიგნ „გამოცხადებას“ ბკითხულენთ: «ტახტის გეხედუნ თიქ თქუ: „ქიდეკვირ, ვოჭყანქ ირფელს ახალს“». იეჰოვას მუშ განზრახვაშ შეიოსრულებერო ქოთ სიბრძნე, ქოთ ძალა დო ქოთ სურვილ უღჷ. მაჟია, იეჰოვა მუშ სიტყვეფშა თიცალ დარწმუნებულ რე, ნამდა, მუჟამსით თე დუნაპირებუს ირზენს, თეშ იჩიებ ითამ თინა უკვე შესრულებურ რდას. ზუსტას ათეშენ რაგადანს: „თე სიტყვეფ სარწმუნო დო ჭეშმარიტ რე . . . შისრულ!“. მასმა, იეჰოვას დოჭყაფილ საქმე ირიათო ბოლოშა მეჸუნს. ზუსტას ათეშენ თქუ თიქ: „მა ვორექ ალფა დო ომეგა“. მალას იეჰოვა დამტკიცენს, ნამდა მუ ვარინ, სინამდვილეს სატანა რე მეტყურე დო დღას ვემიაჭირინე მუშ მიზანშა.

19. მუ შეილებნა აკეთათ, მუჟამსით ხალხის უჭირს ღორონთიშ დუნაპირებუშ დაჯერა?

¹⁹ რშუდან, ირიათო, მუჟამსით მსახურებას ადამიანეფს ღორონთიშ დუნაპირებუშ გურშენ ურაგადუთ, თეთ თქვა ხოლო იმანგარენთ ნდობას თიშ მიმართ. თაშ ნამდა, ანწ, მუჟამსით მიდგაინს გამოცხადებაშ 21:4-ის მოჩამილ გურიშემაკინალ სიტყვეფს წუკითხენთ დო გიწინა: „ჰამენ, თაშ ქოჸოფედას, მარა ვა ბჯერს თე დრო ქუდოდირთუნ“, შეილებნა მა-5 დო მა-6 მუხლეფ ხოლო წუკითხათ დო გეუნწყათ თინეფ. ქაძირეთ ადამიანეფს, მუ საფუძვლიან მიზეზეფ მუჩეს იეჰოვაქ, ნამდა ბჯერდან, თიშ დუნაპირებ აუცილებერო შისრულებ (ეს. 65:16).