1, 2. მუთ მოგენს ჩქინ სიტუაცია იერუსალიმშა დორთელ იუდეველეფიშ სიტუაციას? (ქოძირით ჩარჩო  „ანგიაშ, ზაქარიაშ დო ეზრაშ დროს მოხვალამირ მოვლენეფ“).

 ᲛᲘᲜᲨᲐ სვანჯის ხომ ვაიდინუანა თიშე ფიქრ, მუ მოხვადუ მომავალს? შილებე სამუშა მიოდინეთ დო თიშე ნერვიანენთ, ანწ მუჭო ოკო ეიჯუმუათ ოჯახ. თეს გეძინელ, შილებე თქვან ქიანას პოლიტიკურო სტაბილურ მდგომარეობა ვა რე ვარდა რწმენაშ გურშენ რთხოზუნა დო ათეშენ, თქვან ოჯახიშ უსაფრთხოებაშე წუხენთ. თეცალ სირთულეეფს ჯვეშ დროს მახორუ ისრაელეფქ ხოლო შეხვადეს. თიშე დაფიქრება, მუჭო მეხვარ იეჰოვაქ თინეფს, გურშა ელაიკინანა დო გაიმანგარენა თიშ რწმენას, ნამდა იეჰოვა თქვა ხოლო მიგეხვარებნა.

² თი იუდეველეფს, მიდგაქ ბაბილონს დებადეს დო მირდეს, დიდ რწმენა დესაჭირებდეს, ნამდა ქიდიტუესკო თექიან კომფორტულ ცხოვრება დო მიდართესკო თიცალ ქიანაშა, ნამდგაშ გურშენ ბრელ მუთუნ ვა უჩქუდეს. ისრაელშა ენულაშე ბრელ დროს ვემკურთუმუნ თეშ, თინეფქ შხვადოშხვა სირთულეეფს შეხვადეს. მაგალთო, ეკონომიკურ პრობლემეფქ ქუდაჭყეს დო მოწინააღმდეგეეფშე თხოზინს ხვადუდეს. თეს თინა ხოლო გიაძინუდ, ნამდა სპარსეთიშ იმპერიას პოლიტიკურ არეულობა რდჷ. თე ირფელიშ გურშენ ნამთინე იუდეველს გუჭირდჷ, მთელ ყურადღება იეჰოვაშ ტაძარიშ აღდგენაშ საქმეშა გეგნიღკო. ათეშენ, ჯვ. წ. 520 წანას იეჰოვაქ თინეფშა ჟირ წინასწარმეტყველ, ანგია დო ზაქარია მიდაშქვჷ, ნამდა თინეფიშ საშვალებათ გურშა ელუკინკო მუშ ხალხის (ანგ. 1:1; ზაქ. 1:1). თე წინასწარმეტყველეფიშ ინულას ჯგირ შედეგიქ მაჸუნ დო იუდეველეფს ჯვეშობურ მონდომაქ დართეს. მარა სოდგარენ 50 წანაშ უკულ, ისრაელშა დორთელ იუდეველეფს კინ დესაჭირეს თიშ გოშინაქ, ნამდა მუნეფიშ ცხოვრებას იეჰოვაშ მსახურება პირველ ადგილს გიორინესკო. თე შემთხვევას თინეფიშ მახვარებელო იეჰოვაქ ეზრა გიმირინუ, მით კანონიშ გინმაჭარალ რდჷ (ეზრ. 7:1, 6).

3. მუს გუვარჩიენთ თე სტატიას? (იგავ. 22:19).

 ³ ულირს, ანგიაშ დო ზაქარიაშ წინასწარმეტყველებეფქ მეხვარ ღორონთიშ ხალხის, წინააღმდეგობაშ უმკუჯინუო, კინ მიენდესკო იეჰოვას. თე წინასწარმეტყველებეფ ამდღა ჩქი ხოლო მოხვარნა, დარწმუნებულ ვორდათ, ნამდა მუდგა სირთულეს ვეშეფხვადათინ, იეჰოვა ხუჯის დამკინენა დო ქელამდირთუნა (წეკითხით იგავეფიშ 22:19). თე სტატიას გუვარჩიენთ ანგიაშ დო ზაქარიაშ გაცხადებულ ღორონთიშ ცნობას. თეს გეძინელ, გუვარჩიენთ ეზრაშ შემთხვევას ხოლო დო ქუპასუხენთ სუმ კითხვას: მუჭო იმოქმედ იერუსალიმშა დორთელ იუდეველეფშა სირთულეეფქ? მუშენ ოკო გივორინუათ იეჰოვაშ ართგურო მსახურება პირველ ადგილს სირთულეეფიშ უმკუჯინუო? მუჭო შემლებნა გემანგარათ იეჰოვაშ მიმართ ნდობა სირთულეეფიშ დროს?

4, 5. მუშ გურშენ შილებე იუდეველეფს ტაძარიშ შენებაშ სურვილქ მეუდინესკო?

⁴ იერუსალიმშა დორთელ იუდეველეფს ქიანაშ მუდგარენ აფდეს ოკეთებელ. თინეფქ ხეთეშე აღადგინეს იეჰოვაშ სამსხვერპლო დო ტაძარიშ საძირკველ ქინაბეს (ეზრ. 3:​1—3, 10). მარა დუდშე უღდესინ თი მონდომაქ დო ენთუზიაზმიქ ჭიჭე ხანშა მეუდინეს. მუ რდჷ თეშ მიზეზ? თინეფქ ხვალე ტაძარ ვარინ, მუნეფიშ ჸუდეეფ ხოლო ოკო აშენესკო. თეს გეძინელ, ოკო დოთასესკო მარცვლეულ დო ქიმკაჯინესკო მუნეფიშ ოჯახეფს (ეზრ. 2:​68, 70). ხვალე თენა ვარინ, წინააღმდეგობას ქეშეხვადეს ნტერეფშე, მით ირნერო ოცადუდეს, გაჩერესკო ტაძარიშ შენებაშ საქმე (ეზრ. 4:​1—5).

⁵ დორთელ იუდეველეფს ეკონომიკურ პრობლემეფქ ხოლო ქაშის, მუშენდა თიმ პერიოდის იერუსალიმ რდჷ სპარსეთიშ იმპერიაშ ნაწილ, სოდეთ პოლიტიკურ მდგომარეობა დაძაბულ რდჷ. ჯვ. წ. 530 წანას სპარსეთიშ მეფე კიროსიშ ღურაშ უკულ თიშ მემკვიდრექ, კამბისექ, ეგვიპტეშ წინააღმდეგ გეგშართჷ. ეგვიპტეშა მიმაულარ კამბისეშ ჯარიშკოჩეფქ ისრაელიშ ტერიტორია გემკორთეს დო საეგებიოთ, თექიან მახორუეფს წყარ, ოჭკუმალ დო დუდიშგითაფორაფალ მოთხის, მუთ იერუსალიმს მახორუ იუდეველეფიშ მდგომარეობას ხოლო უმოსო დამონკენდჷ. უმოს გვიანო, სამეფო ტახტშა კამბისეშ მემკვიდრექ, დარიოს I-ქ გეშართჷ, ნამდგაშ მეფობაშ დაჭყაფ წანეფს ქიანას აბუნტებეფ დო არეულობა რდჷ. თე ირფელ იერუსალიმშა დორთელ იუდეველეფს ოწუხებელს გურჩქინანდჷ თიწკუმა დაკავშირებით, მუჭო მიკაჯინესკო მუნეფიშ ოჯახეფს. თე ქიანაშმადიდა სირთულეეფიშ გურშენ ნამთინე იუდეველ ფიქრენდჷ, ნამდა დიო ვა რდჷ ტაძარიშ შენებაშ დრო (ანგ. 1:2).

6. ხოლო მუ სირთულეეფს შეხვადეს იუდეველეფქ დო მუშა დარწმუნ ზაქარიაქ თინეფ? (ზაქ. 4:6, 7).

⁶ წეკითხით ზაქარიაშ 4:6, 7. იუდეველეფ, შხვა სირთულეეფწკუმა ართო, თხოზინს ხოლო ხვადუდეს. ჯვ. წ. 522 წანას თინეფიშ ნტერეფქ სპარსეთიშ იმპერია ახნარეს, ნამდა გუჩერებდესკო იეჰოვაშ ტაძარიშ აღდგენაშ საქმე. მარა ზაქარიაქ დარწმუნ იუდეველეფ, ნამდა იეჰოვა მუშ ძალიერ წმინდა შურიშ საშვალებათ მეხვარებუდ თინეფს, გიორჯგინესკო ნებისმიერ სირთულეს დო გაგრძელესკო თე საქმე. ქოთ თაშ ქუმოხვად. ჯვ. წ. 520 წანას მეფე დარიოსიქ იუდეველეფს უფლება ქიმეჩ, გაგრძელესკო ტაძარიშ მშენებლობაშ საქმე. ხვალე თენა ვარინ, ფინანსურო ხოლო ელუდირთჷ დო ადგილობრივ ხელისუფლებას უზოჯ, მეხვარკო თინეფს ტაძარიშ აღდგენაშ საქმეს (ეზრ. 6:1, 6—10).

7. მუჭო აკურთხჷ იეჰოვაქ იერუსალიმშა დორთელ იუდეველეფ, მუჟამსით ღორონთიშ ნებაშ შესრულება პირველ ადგილს გიორინეს?

 ⁷ ანგიაშ დო ზაქარიაშ საშვალებათ იეჰოვაქ დეპირ მუშ ხალხის, ნამდა, მუჟამსით პირველ ადგილს ტაძარიშ აღდგენაშ საქმეს გიორინუანდეს, თინა ირნერო ელუდირთუდ დო ხუჯის დუკინენდჷ თინეფს (ანგ. 1:8, 13, 14; ზაქ. 1:3, 16). თიშ უკულ, მუთ წინასწარმეტყველეფქ გურშა ელუკინეს იუდეველეფს, თინეფქ ჯვ. წ. 520 წანას ქიდიჭყეს ტაძარიშ მშენებლობა დო 5 წანაშე ნაკლებ დროშა გათუეს თე საქმე. მუჟამსით იუდეველეფქ, სირთულეეფიშ უმკუჯინუო, ღორონთიშ ნებაშ შესრულება პირველ ადგილს გიორინუეს, იეჰოვაქ ელუდირთჷ თინეფს. ღორონთიქ თინეფიშ ხვალე მატერიალურ საჭიროებეფშო ვარინ,  სულიერ საჭიროებეფშო ხოლო ქიზრუნ. შედეგო, თინეფ ხიოლით ომსახურდეს იეჰოვას (ეზრ. 6:14—16, 22).

8. მუჭო მიმეხვარებნა ანგიაშ 2:4-ის ინოჭარილ სიტყვეფ, ნამდა პირველ ადგილს იეჰოვაშ ნებაშ შესრულება გივორინუათ? (ქოძირით სქოლიო).

⁸ „დიდ გაჭირება“ მონჭაფილ რე. ათეშენ მარჩქილენა, მუსხით მნიშვნელოვან რე, მივაჸუნათ იესოშ მითითებას დო სახიოლო ამბე გინოფჩათ ადამიანეფს (მარ. 13:10). მარა ფინანსურ პრობლემეფიშ ვარდა თხოზინიშ გურშენ შილებე ირიათო ადვილ ვა მაფდან, მსახურება ჩქინ ცხოვრებას პირველ ადგილს ქიგვორინუათ. მუ მიმეხვარებნა სირთულეეფიშ უმკუჯინუო, პირველ ადგილს ქიგვორინუათ ღორონთიშ ნებაშ შესრულება? დღას ვაგმოჭყორდან, ნამდა იეჰოვა, „ლაშქარეფიშ ღორონთ“, b ჩქინწკუმა რე. მუჟამსით ჩქინ ინტერესეფშე წოხოლე ღორონთიშ ნებაშ შესრულებას გივორინუანთ, იეჰოვა დღას ვემმოტენა დო ელამდირთუნა. ათეშენ, შიშიშ მუთუნნერ მიზეზ ვა მიღნა (წეკითხით ანგიაშ 2:4).

9, 10. მუჭო დერწმუნ ართ წყვილქ მათეშ 6:33-ს ინოჭარილ იესოშ სიტყვეფიშ ჭეშმარიტებაშა?

⁹ გუვარჩუათ ართ პიონერ წყვილიშ, ოლეგ დო ირინაშ c შემთხვევა. თინეფქ ართ კრებაშ მახვარებელო შხვა ტერიტორიაშა გეგნორთეს, მარა მუნეფიშ ქიანას ეკონომიკურ მდგომარეობაქ გეუფრაშ, მუდგაშ გურშენ მიოდინეს სამუშა, ნამდგათ დუდის ეიჯუმუანდეს. თინეფ სოდგარენ ართ წანას მეგორუნდეს მუდმივ სამუშას. მართალ რე თიქ ვაშის, მარა იეჰოვაშ ელარნას ირიათო გინაფლენდეს დო მინშა და დო ჯიმალეფშე ხოლო ღებულენდეს ელარნას. მუქ მეხვარ თინეფს, გაურზესკო თე სირთულეს? ოლეგ დუდშე მანგარო ნერვიანენდჷ თე ირფელიშ გურშენ, მარა, მუჭოთ თინა მირაგადუნა, მსახურებას აქტიურო მონაწილებაშ მეღებაქ მეხვარ თინეფს, მთელ ყურადღება თიშა გეგნიღესკო, მუთ არძაშ უმოს მნიშვნელოვან რე ცხოვრებას. მუშო ოკო რაგად, ოლეგ დო ირინა აგრძელენდეს სამუშაშ  გორუას, მარა მსახურებას ხოლო აქტიურო ღებულენდეს მონაწილებას.

¹⁰ ართ დღას, მუჟამსით ოლეგ დო ირინაქ მსახურებაშე დირთეს, ჸუდეშ კარს პროდუქტეფით ეფშა ჟირ სუმკაქ ქუდოხვადეს. მუჭოთ უკულ მეზობელშე გეგეს, თინა მუნეფიშ ხოლოშიან მეგობარს ქუდუტებ, მუდგაშ გურშენ 160 კილომეტრ მიკორთჷ. ოლეგ იჩიებ: „თიმ დღას ხოლო ართშა დებრწმუნით, ნამდა იეჰოვაშო დო და დო ჯიმალეფშო მანგარ ძვირფასეფ ვორეთ დო ზრუნენა ჩქინდე. აკაბცხა ეჭვ ხოლო ვა მიღნა, ნამდა იეჰოვა დღას ვეგიჭყოლიდუანს მუშ მსახურეფს, სიტუაცია მუდგა უიმენდო ვეძირედასინ“ (მათ. 6:33).

11. მუ შედეგის მიბღენთ ღორონთიშ საქმეს პირველ ადგილს ქიგვორინუანთ-და?

¹¹ იეჰოვას ოკო, ნამდა მთელ ყურადღება მოწაფეეფიშ მომზადებაშ საქმეშა მაფდან გინოღალირ, მუშენდა თენა რე საქმე, ნამდგას ადამიანეფიშ სიცოცხლეშ რსხება შეულებ. მუჭოთ  მა-7 აბზაცშე გებგით, ანგიაქ იეჰოვაშ ხალხის ელუჩ, კინ თიცალ მონდომათ გაგრძელესკო ტაძარიშ მშენებლობაშ საქმე, მუნერით დუდშე უღდეს. ანგიაქ თიშა ხოლო დარწმუნ იუდეველეფ, ნამდა თაშ ქიმიქციებდეს-და, იეჰოვა აუცილებერო აკურთხენდჷ თინეფს (ანგ. 2:​18, 19). ჩქი ხოლო შემლებნა ბჯერდან, ნამდა იეჰოვაშ მსახურებას პირველ ადგილს ქიგვორინუანთ-და, თინა კურთხევეფით ემოფშანა.

12. მუშენ დესაჭირებდეს ეზრას დო დორთელ იუდეველეფს ძალიერ რწმენა?

¹² ჯვ. წ. 468 წანას ბაბილონს დოსქილადირ იუდეველეფიშ მაჟია ჯგუფიქ იერუსალიმშა მიდართჷ. თინეფ შქას რდჷ ეზრა ხოლო. თე ნაბიჯიშ გინოდგუმა დო იერუსალიმშა დორთა დიდ რწმენას ითხინდჷ. თინეფს წიმი ოშქურანჯ შარა გეუძუდეს, მუშენდა ტაძარშო შეწირულ ანაყუ ოქრო დო ვარჩხილ მეუღდეს დო შილებედ მახირალეფქ ქიგიანთხესკო დუდის (ეზრ. 7:12—16; 8:31). თეს გეძინელ, ვართ იერუსალიმ რდჷ ოცხოვრებელო უსაფრთხო ადგილ. თექ ბრელ ხალხ ვახორანდჷ დო თიშ კარმინოლეფს დო გალავანს აღდგენა ოსაჭირუდ, მუშენდა აკორღვაფილ რდჷ. ეზრაქ, მით დორთელ იუდეველეფ შქას რდჷ, რთულ სიტუაციეფიშ დროს ბოლოშა მიენდჷ იეჰოვას. მორთ ქობძირათ, მუშ გურაფა შემლებნა თიშე.

13. მუქ გუმანგარ ეზრას იეჰოვაშ მიმართ ნდობა? (ქოძირით სქოლიო).

¹³ ეზრა ორწყედ, ნამდა იეჰოვა მუშ ხალხის ელურდჷ განსაცდელეფიშ დროს. წანეფით ადრე, ჯვ. წ. 484 წანას, მუჟამსით მეფე ახაშვეროშიქ ზოჯჷ, ნამდა სპარსეთიშ იმპერიას არძა იუდეველ დოჸვილესკო, საეგებიოთ ეზრა ბაბილონს ცხოვრენდჷ დო თიშ სიცოცხლე ხოლო საფრთხეშ თუდო რდჷ (ესთ. 3:7, 13—15). მუჟამსით მეფეშ ნაზოჯინა არძა სამთავროს მახორუ იუდეველეფქ ქიგეგეს, გურქ დემონკეს. თინეფ ხონენდეს დო იეჰოვას ლოცვას მოხვარას ოხვეწუდეს (ესთ. 4:3). წერმიდგინით, მუჭო იმოქმედენდჷ ეზრაშა დო შხვა იუდეველეფშა თიშ ძირაფა, ნამდა იეჰოვაქ ირფელ მუნეფიშ საჯგირობუოთ გემკართინუ. თინეფქ, მიდგას იუდეველეფიშ ჸვილუა ულამდეს, კინ იუდეველეფიშ ხეშე დოღურეს (ესთ. 9:1, 2). მუშო ოკო რაგად, მოხვალამირ ეზრას მომავალ სირთულეეფშო მამზადენდჷ დო დარწმუნენდჷ, ნამდა იეჰოვას უღჷ ძალა, დოთხილუას მუშ ხალხ. d

14. მუს ბგურაფლენთ ანასტასიაშ შემთხვევაშე?

¹⁴ მუჟამსით სირთულეეფიშ დროს იეჰოვაშ მზრუნველ ხეს ვორწყეთ, თიშ მიმართ ნდობა ხოლო უმოსო მემანგარებნა. გუვარჩუათ აღმოსავლეთ ევროპას მახორუ ართ ჩქინ დაშ, ანასტასიაშ, შემთხვევა. პოლიტიკურო ნეიტრალურქ ქუდოსქიდკონ თიშენ თის სამუშაქ აჸუ დატებელქ. თინა იჩიებ: „ჩქიმ ცხოვრებას პირველო მოხვად ფარაშ უმშო დოფსქიდინ. თე საკითხ იეჰოვას მივანდჷ დო ქობძირ, ნამდა თიქ ხოლო მიმეხვარ. სამუშაქ ანწ ხოლო მემდინასინ, ართ წუთით ვა მაშქურნე, მუშენდა დარწმუნებულ ვორექ, ჩქიმ ზეციერ მუმა ჩქიმდე ამდღა ქოზრუნენს-და, თეს ჭუმან ხოლო გაკეთენს“.

15. მუ ოხვარუდ ეზრას ღორონთიშ მიმართ ნდობაშ გამანგარებას? (ეზრ. 7:27, 28).

 ¹⁵ ეზრა ორწყედ იეჰოვაშ ხეს მუშ ცხოვრებას. თინა ხშირას ფიქრენდჷ, მუჭო მეხვარ იეჰოვაქ ულირს, მუთ ოხვარუდ, გემანგარკო თიშ მიმართ ნდობა. ყურადღება ქიმიაქცით, მუ თქუ თიქ: „ჩქიმ ღორონთ იეჰოვა ელამირდჷ“ (წეკითხით ეზრაშ 7:27, 28). ეზრაქ ღორონთიშ შთაგონებათ ჭარილ მუშ წიგნის ხოლო მუსხირენშა მიშინუ იგივე აზრ (ეზრ. 7:6, 9; 8:18, 22, 31).

16. მუჟამ შილებე ბძირათ იეჰოვაშ ხე ჩქინ ცხოვრებას? (ქოძირით სურათ).

¹⁶ შემლებნა დარწმუნებულეფ ვორდათ, ნამდა იეჰოვას შეულებ ჩქინ მოხვარა სირთულეეფიშ დროს. მაგალთო, მუჟამსით უნჩაშის ფთხინთ, ნამდა კონგრესიშ დასწრებელო, სამუშაშე მუსხირენ დღათ გუმათავისფალან ვარდა კრებაშ შეხვალამეფქ ვა გომჩირთანინ თიშენ, სამუშა გრაფიკ დომთირუან, შესაძლებლობა მერზიებნა, ქობძირათ იეჰოვაშ ხე. თიქ ჩქინ მახვარებელო შილებე თიცალ მუდგარენ გაკეთას, მუდგაშეთ დღას ვეფიფქრენდით. მუჟამსით ჩქინ ცხოვრებას იეჰოვაშ ხეს ვორწყეთ თიშ მიმართ ნდობა უმოსო მემანგარებნა.

17. მუჭო გიმირჩქინანდჷ ეზრა თანდაბლობას სირთულეეფიშ დროს? (ქოძირით სურათ გალენ გვერდის).

¹⁷ ეზრა ლოცვას თანდაბლურო თხინდჷ იეჰოვას მოხვარას. ირიათო, მუჟამსით ეზრა წუხენდჷ, შეასრულებედ დო ვარ მუშა მენდებულ პასუხიშმგებლობეფ, თანდაბლობას გიმირჩქინანდჷ დო ლოცვას იეჰოვას თხინდჷ მოხვარას (ეზრ. 8:21—23; 9:​3—5). ეზრაშ მიმაჯინუ შხვეფს ხოლო სურვილ ურჩქინდუდეს, ხუჯ ქუდუკინესკო თის დო მიაჸუნესკო თიშ რწმენაშ მაგალითის (ეზრ. 10:1—4). ჩქი ხოლო იეჰოვას ოკო მივენდათ დო ლოცვას მოხვარა ფთხუათ, მუჟამსით სვანჯის მიდინუანა ჩქინ პირად საჭიროებეფშო დო ოჯახიშ უსაფრთხოებაშო ფიქრ.

18. მუ მიმეხვარებნა, უმოსო მივენდათ იეჰოვას?

¹⁸ იეჰოვას უმოსო ქიმვენდებუთ, მუჟამსით თანდაბლურო ქოფთხინთ თის მოხვარას დო თანაქრისტიანეფს ქიმეფჩანთ საშვალებას, ქელამდირთან. გუვარჩუათ ართ დაშ, ერიკაშ, შემთხვევა, ნამდგას სუმ სქუა ჸუნს. თის ართ-მაჟიაშ მეჸუნელო შხვადოშხვა ტრაგედიაქ ქიგიოტირხჷ დუდის. თიქ დიო, დაბადებულ ვა რდუნ ფერ ბაღანა მიოდინუ დო ჭიჭე ხანშა, საჸოროფო ქომონჯიქ ხოლო დუღურ. მარა თე რთულ პერიოდის ხოლო ვა უდინუაფ იეჰოვაშ მიმართ ნდობა დო დარწმუნებულ რდჷ, ნამდა ქიზრუნენდჷ თიშე. თი ირფელიშ უკულ, მუდგაქ დუდის გიოტირხჷ, ერიკა იჩიებ: „წინასწარ დღას ვაიჩქ, მუჭო მიგეხვარებ იეჰოვა. თიქ შილებე თიცალ მუდგარენ გაკეთას, მუდგას შუროთ ვეფიქრენდჷ. ქობძირ, ნამდა ჩქიმ ბრელ ლოცვას იეჰოვა ჩქიმ მეგობრეფიშ საშვალებათ პასუხენდჷ. ქიმეფხვად, ნამდა მეგობრეფს გურს გეგნუფაჩუნქ დო ჩქიმ ჭუაშენ ალალას ქივეჩიებუქ-და, თინეფს უმოს ადვილ აჸინა ჩქიმ მოხვარა“.

19, 20. მუს ბგურაფლენთ თი იუდეველეფშე, მიდგას ვეშიალებუეს იერუსალიმშა დორთაქ?

¹⁹ ჩქი ბრელ მუდგარენიშ გურაფა შემლებნა თი იუდეველეფშე ხოლო, მიდგას ვეშიალებუეს იერუსალიმშა დორთაქ. შილებე ნამთინეშ შემთხვევას მიზეზ ჸოფედკო გლახა ჯამრთელობა, ასაკ ვარდა ოჯახურ ვალდებულებეფ. მართალ რე, თინეფს ვეშიალებუეს იერუსალიმშა დორთაქ, მარა შურ დო გურით ელუდირთეს თინეფს, მით ირთუდეს დო გაკეთეს შესაწირავეფ ტაძარიშ ოშენებელო (ეზრ. 1:5, 6). მუჭოთ იძირე, თინეფ იუდეველეფიშ პირველ ჯგუფიშ იერუსალიმშა დორთაშე სოდგარენ 19 წანაშ უკულ ხოლო, ოჯღონანდეს შესაწირავეფს იერუსალიმშა (ზაქ. 6:10).

²⁰ მუჟამსით იეჰოვაშ მსახურებას თისხი ვა მაკეთებენა, მუსხით მოკონა, შემლებნა დარწმუნებულ ვორდათ, ნამდა იეჰოვაშო იშენით ძვირფასეფ ვორეთ დო მანგარო აფასენს ჩქინ შურ დო გურით გიმორჩქინელ მონდომას. მუშენ იფჩიებუთ თეს? ქიგიფშინათ, მუშ კეთება თხუ იეჰოვაქ წინასწარმეტყველ ზაქარიას. თის ბაბილონს დოსქილადირ იუდეველეფიშ მუნაჯღონა ოქრო დო ვარჩხილშე გვირგვინ ოკო უკეთებუდკო (ზაქ. 6:11). თე „დიდებულ გვირგვინ“ იუდეველეფიშ გურხვე შესაწირავეფიშ „გასაშინეთ“ იჸუაფუდ (ზაქ. 6:14). შემლებნა ბოლოშა დარწმუნებულ ვორდათ, ნამდა იეჰოვა დღას ვეგიჭყოლიდუანს ჩქინ გიმორჩქინელ მონდომას დო თის, ნამდა სირთულეეფიშ დროს, ირნერო ვოცადუთ თიშ ართგურო მსახურებას (ებრ. 6:10).

21. მუ მიმეხვარებნა, მივენდათ იეჰოვას მომავალ სირთულეეფიშ დროს?

²¹ არგამა რე, თე ბოლო დღალეფს, დროშ მიკულაწკუმა ართო, სირთულეეფ მიძინანს დო შილებე მომავალს მდგომარეობაქ ხოლო უმოსო გეუფრაშას (2 ტიმ. 3:1, 13). მარა, მუშო ოკო რაგად, თეშე წუხებას ოკო ვეგნვაჸუნათ. ჯგირ იჸუაფ, ირო ფშუდან იეჰოვაშ სიტყვეფ, ნამუთ ანგიაშ დროს მახორუ მუშ ხალხის უწუ: „მა თქვანწკუმა ვორექ . . . ვა გაშქურნან!“ (ანგ. 2:4, 5). იეჰოვაშ ნებაშ შეიოსრულებერო დუდის ვა დაბზოგენთ-და, შემლებნა დარწმუნებულეფ ვორდათ, ნამდა თინა ჩქინწკუმა ხოლო იჸუაფ. ეზრაშ მაგალითიშ მეჸუნა დო თი ირფელიშ გიმორნაფა, მუთ ანგიაშ დო ზაქარიაშ წინასწარმეტყველებეფშე დიბგურეთ, მიმეხვარებნა, ვა ვოდინუათ იეჰოვაშ მიმართ ნდობა დო მომავალს, მუდგა სირთულეს ვეშეფხვადათინ, თიშა ვორდათ დაიმენდებულ.