Nikeko Hevitriny Zan̈ahary Momba Lio

Nitantara Fiain̈ananany Dokotera Araiky

ZAHO koa fa baka nandiniky antony nahafaty olo marary araiky zay, nifintin̈iko tamy dokotera maromaro raha hitako tamy chambra araiky malalaka tamy lopitaly tao. Kansera nahafaty olo io. Volan̈iko: “Zaho mieritreritry fa ny ten̈a antony nahafaty olo io, potiky lio menanany baka io reins nany tsy miasa tsara eky baka amy lio marobe nampidirin̈y taminany.”

Nisy profesera araiky neloko mare ke izy nivolan̈a mare karaha ty: “Anao ma tihivolan̈a fa lio tsy nety taminany in̈y nampiasainay?” Volan̈iko taminany: “Tsy zen̈y foeky raha tiako volan̈iny.” Naboakako izy hely sariny reins nolo marary io, baka io zaho nivolan̈a: “Hitako eto fa ten̈a maro liomena potiky tamy reins nany, ke tsy maintsy ho zen̈y fo raha nahavy izio karaha io.” * Tsapako fa nahinihiny mare dokotera sasany. Naiky aby koa tendanaka fotony zaho navozo. Marin̈y fa zaho mbala dokotera tanora, baka io profesera nanohitry raha nivolan̈iko io, kanefa haiko tsarabe fa tsy afaka himpody afara aminy hevitrinaka io zaho.

Mbala tsy Vavolombelon̈o Jehovah zaho tamy raha jiaby zen̈y nandalo. Zaho teraka taminy 1943 ta Sendai, tanàna araiky amy faritry avaratra Japon an̈y. Zaho nanapakevitry han̈ano dokotera fotony pan̈ano fikarohan̈a momba aretin̈y asany babako sady pitaha aretintsain̈y. Nanambady tsaiky man̈angy zay zaho taminy 1970 tamy taon̈o faharoe nianarako ho dokotera. Masuko an̈aranany.

Nanomboko nan̈ano fikarohan̈a momba aretin̈y zaho

Niasa Masuko parapivitany fianaran̈anaka mba han̈ampian̈a fidirambolanay. Ten̈a tiako fianaran̈a momba dokotera io. Gaga zaho nahita fa ten̈a mahavarian̈a fomba nan̈amboaran̈a vatan̈antsika olombelon̈o ty! Zaho taloha tsy nieritreritry foeky fa misy Pamoron̈o zen̈y. Araka dinikinaka, fikarohan̈a momba fahasalaman̈a ataoko io fo ten̈a mahatsara fiain̈ananaka. Nitohizako fo fikarohan̈a nataoko ke zaho baka tio loso dokotera. Nanomboko nan̈ano fikarohan̈a momba aretin̈y amy zay zaho ke tafiditry an̈atinizen̈y, fomba iboahany aretin̈y araiky, antony mahavy izio, baka io vokatranizio.

Nanomboko nan̈ontany ten̈a zaho, asa raha mba mahomby edy fampidiran̈a lio, izikoa zahan̈a olo marobe matiny kansera io. Koa fa niaho kansera io, mandeha lio olo marary io ke mety ho tsy ampy lio. Ndray zen̈y, hita tamy fikarohan̈a fa mampihen̈y angovo fiarovan̈a amy vatan̈a fampidiran̈a lio io. Zen̈y koa mety hahavy kansera io himpody ndraiky, baka io hahavy olo marary io mety hofoaty. *

Taminy 1975, niboaka raha nitantaraiko tamy voanalohany tarỳ in̈y. Manampahizan̈a momba lio profesera niandraikitry izio. Zen̈y nahavy izy neloko mare koa fa naharen̈y zaho nivolan̈a fa, baka tamy lio nampidirin̈y taminolo marary io nahafaty izy! Nitohizako fo fan̈azavan̈anaka ke nahaikalma moramora izy.

Tsy ho hisy eky aretin̈y ndreky fahafatesan̈a

Fandrendrekinizen̈y, nisy man̈angy efa matoe zay nitsidiky vadiko. Vavolombelon̈o Jehovah man̈angy io. Nampiasa volan̈a “Jehovah” izy koa fa nikoran̈a, ke nan̈ontaniany vadiko izy, ino ma dikanizen̈y. Ho man̈angy io: “Jehovah zen̈y an̈aran̈a Zan̈ahary ten̈a marin̈y.” Efa rango mbala hely Masuko namaky Baiboly. Nisoloan̈a “TOMPO” an̈arany Zan̈ahary tamy Baiboly nivakiny. Hainy eky taminio fa ten̈a misy Zan̈ahary, sady misy an̈aran̈a!

Direkty nianatra Baiboly tamy man̈angy efa matoe io Masuko. Zaho koa fa navy tantran̈o baka ta lopitaly taminy inera maraindrain̈y, ravoravo izy nivolan̈a taminaka: “Koran̈iny Baiboly fa tsy ho hisy eky aretin̈y ndreky fahafatesan̈a!” Volan̈iko taminany: “Mba tsara eky zen̈y koa raha ho hisy e!” Baka io izy nanohy koran̈anany karaha ty: “Anao iziô tsy tokony handanindany fotoan̈anao eky fa efa ho avy donia vaovao.” Izy ambarako nivolan̈a taminaka fa zaho tokony hiala dokotera. Neloko mare zaho ke ten̈a tsy nilamin̈y foeky zahay.

Nifen̈y mare fo vadiko, baka zaho ho lian̈a tamy fahamarin̈ana. Nivavaka tamy Zan̈ahary izy, baka hahita andininy mety han̈ampiany zaho. Naboakany zaho iro andininy aby in̈y baka io. Mpitoriteny 2:22, 23, ten̈a nanohin̈y fonaka. Karaha ty koran̈iny ao: “Ino ma hatsaran̈a azonolo baka aminy asa mare ataony ndreky fifen̈any miasa mare ambaniny masoandra atỳ? ... Tsy milamin̈y foeky fonany an̈atiny alin̈y jiaby in̈y. Mbala an̈isany raha tsisy dikany koa zen̈y.” Ten̈a iain̈ako ankitin̈y raha volan̈iny andininy io, fotony zaho nanokanten̈a alin̈y matsan̈a amy fitahan̈a olo, kanefa zaho tsy afapo aby.

Taminy 1975, tapakevitry tampoko zaho fa han̈araka vadiko handeha amy Tran̈o Fivorian̈any Vavolombelon̈o Jehovah lera izy nandeha tan̈y tamy dimansy maraindrain̈y araiky zay. Taitry mare izy nahita zaho tan̈y. Nandray zaho tsara Vavolombelon̈o Jehovah tan̈y. Nanomboko tamy zen̈y zaho nivory fo isaka dimansy. Fanjava araiky tafaranizen̈y, nisy Vavolombelon̈o Jehovah araiky nampianatra Baiboly zaho. Natao batisa vadiko, telo fanjava tafarany nifanojiany voanalohany tamy Vavolombelon̈o Jehovah.

Nikeko fomba fihevitry Zan̈ahary momba lio

Nianarako tsy ela tafaranizen̈y fa Baiboly mivolan̈a fa Kristianin̈y “fady lio.” (Asan’ny Apostoly 15:28, 29; Genesisy 9:4) Tsy sarotro taminaka nan̈eky fomba fihevitriny Zan̈ahary momba lio, fotony zaho efa nan̈ontany ten̈a, asa raha mba mahomby marin̈y fitahan̈a misy fampidiran̈a lio io. * Karaha ty raha navy tan̈aty jeriko tao: ‘Izikoa ten̈a misy Pamoron̈o, ke izy mivolan̈a fa mila fady lio atsika, tsy maintsy marin̈y fo volan̈anaka in̈y.’

Nianarako koa fa nohony fahotan̈a nilovaintsika taminy Adama ndreky Eva in̈y nahavy olo marary ndreky maty. (Romanina 5:12) Nan̈ano fikarohan̈a momba arthérosclérose (antony mahavy olo mety ho tapaka lalandra maventy) zaho tamy zen̈y. Mahaimahery ndreky mahaimaletry raha mampiparitaka lio io, atsika koa fa mahaimatoe. Mahavy aretimpo ndreky aretin̈iny lalandra an̈atiny loha ao, baka io reins izio. Hitako tsarabe fa baka aminy atsika tsy lavorary mahavy raha jiaby zen̈y. Tafaranizen̈y zaho tsy dia ten̈a nazoto nianatra raha momba fitahan̈a eky. Jehovah Zan̈ahary zaraiky fo afaka man̈adoso aretin̈y ndreky fahafatesan̈a!

Taminy 1976 zaho niala tamy lopitaly fiofan̈ana ho dokotera, fito fanjava tafarany nianarako Baiboly. Navozo mare zaho tsao fo tsy ho loso dokotera, kanefa nahita asa tamy lopitaly fo zaho. Tamy May 1976 zaho natao batisa. Tsapako fa fitorian̈a vaovao tsara man̈ariva andra na man̈ano pisava lalan̈a, fomba ten̈a tsara ampiasako fiain̈ananaka. Nanomboko nan̈ano pisava lalan̈a zaho taminy 1977.

Niaro fomba fihevitriny Jehovah momba lio zaho

Tamy Novambra 1979 zahay roeny Masuko nifindra tamy fiangonan̈a araiky amy faritaniny Chiba, fotony ten̈a nila pitory tan̈y. Nisy lopitaly navitako niasa tapapotoan̈a tan̈y. Nivory nan̈odidin̈y zaho dokotera maromaro taminy andra voanalohany niasako. Nan̈ontanintany zaho karaha ty iro: “Akory hataonao koa misy olo marary mila ampidiran̈a lio avy eto, kanefa anao Vavolombelon̈o Jehovah?”

Nazavaiko tamindro fa zaho han̈araka raha koran̈iny Zan̈ahary momba lio. Nivolan̈a koa zaho fa misy raha hafa mety man̈ampy lio, ke han̈ano zay vitako zaho han̈ampian̈a olo marary avy aminaka. Nahadin̈y lera araiky koran̈anay io. Nivolan̈a karaha ty sefony pandidy: “Mazava aminaka koran̈anao ke ambilà zahay fo hikarakara lan̈iany olo very lio be.” Nalaza sarotindraha sefony pandidy io, kanefa loso nifan̈araka tsara zahay tafarany koran̈a in̈y. Hajainy fo lan̈iany raha inoako.

Problemo baka tamy tsy fan̈ikian̈a hampiditry lio

Nisy birony sampan̈any Vavolombelon̈o Jehovah nahorin̈y ta Ebina teto, tamy zahay nanompo ta Chiba. Betela koa ikahian̈a izio. Nandeha tan̈y isaka herin̈iandra zahay fivadiany hizaha fahasalaman̈any Vavolombelon̈o niasa antsitrapo tao. Nikahian̈a hiasa manontolo andra tamy Betelany Ebina zahay fanjava vitsivitsy tafaranizio. Nanomboko nipetraka tamy tran̈o vonjimeky, hipitrahany piasa antsitrapo 500 zahay tamy Marsy 1981. Nan̈ampy tamy fan̈adiovan̈a tran̈o ndreky kabone zaho isaka maraindrain̈y, fa folakandra nanomboko nan̈ano consultation.

An̈isanolo marary nikarakaraiko, Ilma Iszlaub, misionera baka an Australie, navy ta Japon taminy 1949. Voany kanserany lio izy baka io dokoteranany nivolan̈a taminany fa hofoaty izy afaka fanjava vitsivitsy fo. Tsy nan̈eky hampidiran̈a lio foeky Ilma baka ho elaela velon̈o. Nanapakevitry hipetraka tamy Betela teto izy mandrapifatesany. Tamy zen̈y mbala tsisy foeky aody karaha ataony érythropoïétine zen̈y na aody hafa man̈ampy vatan̈a han̈amboatra lio mena. Ndraikindraiky nijotso mare firaka 3 na 5 gramo hémoglobine taminy Ilma! (12 firaka 15 ny ten̈a normaly) Nifen̈y fo zaho nan̈ano erakany vitako hitahan̈a izy. Fito taon̈o tafara tatỳ naty Ilma, tamy Zanvie 1988, kanefa ten̈a nino volan̈a Zan̈ahary fo izy.

Nisy piasa antsitrapo vitsivitsy nila nididian̈a, tamy birony sampan̈any Japon teto tan̈atiny taon̈o maromaro. Ten̈a mankasitraka iro dokotera tamy lopitaly man̈odidin̈y eto zahay, fotony iro nan̈eky handidy iro io kanefa tsy hampiditry lio. Matetiky zaho nirahin̈y nandeha tamy chambra nisy iro nididian̈a aby io nizaha karakory nanindro. Nisy fotoan̈a zaho nan̈ampy foeky tamy fandidian̈a. Ten̈a mankasitraka mare iro dokotera aby io zaho fotony iro ten̈a nan̈aja fomba fihevitriny Vavolombelon̈o Jehovah momba lio. Matetiky zaho nanan̈a fahafahan̈a nikoran̈a raha ninoako tamindro. Vo tsy ela, nisy araiky tamindro dokotera aby io natao batisa.

Ny marin̈y aminany, ten̈a nisy vokany maventy tamy fitahan̈a ezakandro dokotera tsy nampiasa lio koa fa nitaha Vavolombelon̈o Jehovah. Voaporofo baka amy fandidian̈a tsy ampiasan̈a lio fa maro hatsaran̈a azo koa tsy mampiditry lio. Hita fa malakilaky janga olo nididian̈a kanefa tsy nampidiran̈a lio.

Mbala mianatra amy Dokotera farany maventy

Mifen̈y zaho baka haharaka fandrosoan̈a farany momba fitahan̈a. Kanefa zaho mbala mianatra amy Jehovah fo fotony izy Dokotera farany maventy. Izy tsy mizaha ambelan̈a fo fa mizaha firaka an̈atiny fontsika ndreky sain̈intsika koa. (1 Samoela 16:7) Amy maha dokotera zaho, mifen̈y zaho hahay raha an̈aty fô ndreky sain̈inolo marary, fa tsy mifantoko aminy aretin̈y fo. Man̈ampy zaho hikarakara iro tsarabe raha zen̈y.

Mbala miasa amy Betela eto fo zaho. Mbala an̈isany raha ten̈a mamparavoravo zaho, man̈ampy olo hianatra momba Jehovah, ke tafiditry amy zen̈y fomba fahitany lio. Zaho man̈anten̈a fa han̈adoso aretin̈y jiaby ndreky fahafatesan̈a Dokotera araiky farany mavety io, tsy azovy zen̈y fa Jehovah.—Nitantarainy Yasushi Aizawa.

[Lamariky amy pazy ambany]

[Volan̈a nalain̈y]

“Zaho nivolan̈a fa misy raha hafa mety mampan̈avy lio, baka io han̈ano erakany vitako zaho han̈ampian̈a olo marary avy aminaka eto”

[Volan̈a nalain̈y]

“Voaporofo baka amy fandidian̈a tsy ampiasan̈a lio fa maro hatsaran̈a azo koa tsy mampiditry lio”

[Sary]

An̈abo: Man̈ano kabaro baka amy Baiboly

Ankavanan̈a: Zahay roeny Masuko zioty