Sanjy io Raha Ten̈a Nanahiran̈a Zaho

NITANTARAINY EILEEN BRUMBAUGH

NITAIZAIN̈Y tamy fivavahan̈a Batista nitaritinolo aroe pirahalahy tan Allemagne zaho. Nitandrin̈y mare fototro finoan̈a taloha tan̈y zaho. Mitovy amy fivavahan̈a Amish ndreky Mennonites izio, ke nanomboko nisy tan Allemagne tan̈y taminy 1708. Nifen̈y mare zaho nitariky olo ho tia fivavahan̈a ndraiky. Mivolan̈a Rakipahalalan̈a Momba Fivavahan̈a (angiley) fa nampiavaka ezaka taminio “finoan̈a fa ilainolo filazantsara momba Kristy.” Zen̈y iziô nampahomby asa misionera nataonolo aroe Pirahalahy Batista io tamy firenena maro.

Nisy sasany tamindro io navy firaka ta Pennsylvanie, a Etazonỳ an̈y, taminy 1719, ke Alexander Mack nitariky iro. Baka io iro nisaraka ke namoron̈o antokompivavahan̈a ke samy amy fomba nan̈azavany fampianaran̈any Alexander Mack. Nisy olo 50 tio zahay tamy fiangonan̈a helinay io. Nankamafisin̈y mare tamy zen̈y fa ilain̈y mamaky Baiboly ndreky man̈araka fanapahankevitriny pivavaka tao.

Nan̈araka finoan̈a ndreky fombafomba zen̈y fianakavian̈anay efa letry ela, rango tamy dadilahibenay ndreky dadibenay tan̈y. Rango zaho 13 taon̈o efa nan̈araka fivavahan̈a io ndreky natao batisa tao. Nampianarin̈y zahay fa ratsy mampiasa tomobily, na traktera, na telefony, baka io radio ndreky fitaovan̈a hafa mandeha amy koran. Man̈angy jiaby nan̈ano fisanjian̈a tsotra fo, tsy nanapaka fan̈eva, baka io nifon̈o loha fo. Nanangantsombotro ndraiky lelahy. Arakany hevitrinay, dikany tsy an̈isany donia ty zen̈y tsy man̈ano fisanjian̈a avahizo na man̈ano makiazy na ravaka. Zahay nieritreritry fa olo miavonkavon̈o fo olo man̈ano raha aby io, ke manota olo miavon̈o zen̈y.

Nampianarin̈y zahay fa ten̈a tokony hajain̈y mare Baiboly io, baka io izio hanin̈y arapan̈ahy. Isaka maraindrain̈y talohany zahay nihina, zahay nivory tamy salon niaraka nitandren̈y papako namaky ndreky nan̈azava toko araiky amy Baiboly. Zahay jiaby samy nandohaliky, izy koa fa nivavaka. Tafaranizen̈y, mamako ndraiky nan̈ampody Vavaka Nampianariny Tompo. Efa tsy din̈iko foeky fotoan̈a han̈anovan̈a vavaka isaka maraindrain̈y io, fotony nifantoko tamy raha arapan̈ahy zahay jiaby taminio.

Zahay nipetraka marikitry Delphi, a Indiana amy toeran̈a fambolian̈a araiky zay. Ke namboly legimo isankarazany zahay tan̈y. Nitaterinay tamy sarety taritiny sevaly iro legimo aby io, baka io nalafonay tamy sisiny lalabe na nitety tran̈onolo zahay nan̈ano dalaly. Nataonay an̈isany fanompoan̈a Zan̈ahary foeky asa mare zen̈y ke nifantoko mare tamy zen̈y zahay, fa dimansy fo tsy nan̈ano. Tsy nimboan̈a nan̈ano asa mare zahay koa fa dimansy. Nisy fotoan̈a zahay ten̈a varian̈a mare taminy asanay, ke loso sarotro taminay nifantoko tamy raha arapan̈ahy.

Fanambadian̈a ndreky fianakavian̈a

Taminy 1963, zaho taminio 17 taon̈o, zahay roeny James nan̈ano mariazy. Izy olo miaraka mivavaka aminay. Efa rango ry dadilahiny dadilahiny tan̈y efa nivavaka tamy Pirahalahy Batista edy. Samby nan̈iry hanompo Zan̈ahary zahay, sady nino zahay fa fivavahan̈anay io fo marin̈y.

Taminy 1975, tsiota zanakanay, baka io taminy 1983 araiky fahafito farany. Rebecca zanakanay faharoe fo zanakanay man̈angy. Zahay ten̈a tsotra fiain̈ana sady niasa mare baka io tsy nandanindany vola. Nifen̈y zahay nampianatra toro lalan̈any Baiboly iro zanakanay aby io. Lan̈iany raha nampianariny raimandreninay zahay in̈y koa nampianarinay zanakanay.

Ten̈a raha maventy tamy Pirahalahy Batista, resaka sanjy ndreky fan̈eva. Tsisy olo mahita raha an̈aty fonolo, ke zahay nieritreritry fa fisikinan̈anolo fo man̈aboaka ny ten̈a raha an̈atinolo araiky. Koa nisy olo nan̈amboatra tsara fan̈evanany, zahay nieritreritry fa izy olo miavon̈o ndreky pan̈ambany olo. Izikoa lambanolo araiky maro oe sary aminany, efa olo miavon̈o edy fahitanay izy. Raha karaha zen̈y ten̈a nizahanay fa tsy Soratra Masin̈y.

Nigadrain̈a

Nitaizain̈y tamy fivavahan̈a Batista koa Jesse, rahalahiny vadiko. Tamy faramparany taon̈o 1960, izy nigadra fotony tsy nety nan̈ano maramila. Tan̈y izy nifankahita tamy Vavolombelon̈o Jehovah. Mino koa Vavolombelon̈o Jehovah fa tsy mifan̈araka amy toro lalan̈any Baiboly fandihanan̈a miady. (Isaia 2:4; Matio 26:52) Matetiky Jesse niaraka nandiniky Baiboly tamindro sady nandiniky toetry tsarandro. Natao Batisa izy ke loso Vavolombelon̈o Jehovah koa fa baka nandalin̈y tsarabe Baiboly. Neloko mare zahay koa fa naharen̈y zen̈y.

Nikoran̈iny Jesse tamy vadiko raha nianarany. Nifen̈y mare izy baka zahay hahazo Tilikambo ndreky Mifohaza! fo. James koa fa baka namaky iro gazety aby in̈y, izy nahay tihahay raha momba Baiboly fo. Efa ela izy nan̈iry tihanompo Zan̈ahary, kanefa mbala nahatsiaro lavitry izy fo. Nahalian̈a izy aby lan̈iany raha mety han̈ampy izy hahaiharikitry Zan̈ahary.

Misy pitandrin̈y araiky zay nandrisiky zahay hamaky bokimbavakany Amish ndreky Mennonites baka io niny fivavahan̈a Batista hafa, ndray iro io niritriretinay an̈isany donia ty. Farandraha halany papako eky Vavolombelon̈o Jehovah. Nieritreritry izy fa zahay tsy tokony hamaky Tilikambo ndreky Mifohaza! foeky. Ten̈a nampiasaloha zaho mare nahita James namaky iro io. Navozo baka zaho tsao izy han̈araka fampianarandiso.

Efa ela James nisalasala momba raha sasany ninoany Pirahalahy Batista. Hitany fa iro io tsy mifan̈araka tamy Baiboly, indraka eky fampianaran̈a mivolan̈a fa fahotan̈a miasa andra dimansy. Iro ohatra, nampianatra fa mety mampigiaka biby aminy andra dimansy, fa tsy mety man̈ombotro ahitry ratsy amy tsabo na araiky fo. Tsy vitandro pitandrin̈y aby io nan̈aporofo izio baka amy Soratra Masin̈y. Nanjary nanomboko nisalasala momba iro fampianaran̈a aby io koa zaho.

Ten̈a tsy mora taminay niala tamy Pirahalahy Batista. Efa rango ela zahay nieritreritry fa izio fiangonan̈a Zan̈ahary, baka io hainay koa raha mety hahazo zahay koa tsy man̈araka izio. Nan̈enjiky zahay eritreritrinay ke tsy maintsy niala tamy fivavahan̈a tsy man̈araka raha koran̈iny Baiboly zahay. Taminy 1983 zahay nanoratra taratasy nan̈azavanay antony nahavy zahay niala tao, ke nangatahinay mba hivakin̈y tamy fiangonan̈a izio. Niroasindro zahay baka io.

Nitady fivavahan̈a marin̈y

Nanomboko nitady fivavahan̈a marin̈y zahay baka io, fivavahan̈a ahitan̈a pivavaka man̈atanteraka raha ampianarindro olo. Efa tsy niritriretinay foeky koa fa fivavahan̈a mandray anjara taminy ady. Fivavahan̈a tsotra fo ten̈a tianay, fotony zahay nieritreritry fa fiain̈ana tsotra ndreky fisikinan̈a tsotra ny ten̈a ahaizan̈a fivavahan̈a tsy an̈isany donia ty. Nisy fotoan̈a zahay nitety Etazonỳ nanomboko taminy 1983 firaka taminy 1985 mba handinihan̈a fivavahan̈a karaha ataony Mennonites, Quakers, baka io fivavahan̈a “tsotra” hafa.

Nisy Vavolombelon̈o Jehovah navy nitsidiky zahay tamy tany fambolianay, marikitry Camden, a Indiana, tan̈atiny fotoan̈a zen̈y. Nitandrin̈esanay tsarabe iro, baka io nivolan̈inay iro tsy hampiasa Baiboly koa tsy Dikanteniny Panjaka Jaques fo. Ten̈a najaiko hevitriny Vavolombelon̈o Jehovah momba ady. Kanefa ten̈a tsy mora taminaka nitandren̈y iro fotony iro tsy nan̈ano sanjy tsotra, baka tsy an̈isany donia ty, ke ho zaho tsy marin̈y fivavahan̈andro. Zaho nieritreritry fa fiavon̈ana fo mahavy iro tsy man̈ano sanjy karaha ninay io. Zaho koa nino fa nahavy olo hiavonkavon̈o fanan̈ana io.

Nanomboko nandeha tamy Tran̈o Fivorian̈any Vavolombelon̈o Jehovah tan̈y James. Nindesiny tan̈y koa zanakanay lelahy sasany. Nitahominy hiaraka taminany tan̈y zaho fa zaho tsy nandeha. Tandraraiky ho izy: “Anao ndray tsy han̈araka raha jiaby ampianarindro, mba mavia fo mizaha fifandraisan̈andro.” Ten̈a nampiafatra zaho fifandraisan̈andro.

Ke nan̈eky handeha tan̈y zaho tamy farany, kanefa tsy lampolampon̈o. Nan̈ano lamba tsotra ndreky foloara zaho, koa fa nandeha tamy Tran̈o Fivorian̈a tan̈y. Zanakanay lelahy tsy nan̈ano kiraro baka io tsotra lambanay. Tsy tamban̈andro han̈aton̈o zahay zen̈y ke niraisindro tamimpitiavan̈a zahay. Tan̈aty jerinaka tan̈y: “Zahay tsy mitovy amindro kanefa raisindro tsara.”

Ten̈a nampiafatra zaho fitiavan̈a naboakandro, kanefa zaho mbala tsy tapakevitry fo. Koa fa nandeha hira lera iro nihira, zaho tsy nitsangana. Lera ravan̈a, nan̈apitrahako fan̈ontanian̈a maro iro momba raha niritriretiko tsy mety atao, na dikany toko sy andininy hafa. Ravoravo nikoran̈a taminaka lan̈iany olo nan̈ontaniako, ndray zaho karaha nivantambantan̈a volan̈a. Olo isankarazany nan̈apitrahako fan̈ontanian̈a mitovy, kanefa nifan̈araka fo valiny namiandro zaho. Nahavarian̈a zaho raha zen̈y. Nisoratindro tamy taratasy valiny namiandro zaho in̈y ndraikindraiky. Ten̈a nan̈ampy zaho raha zen̈y fotony mbala afaka namaky iro in̈y zaho tafara tatỳ.

Nandeha nan̈aton̈o fivoriambeny Vavolombelon̈o Jehovah ta Memphis, a Tennessee, zahay jiaby tran̈o araiky taminy 1985, raha mba hizaha raha fo dianay. James in̈y mbala lava sombotro fo baka io zahay nan̈ano lamba tsotra oe. Tsy be fotoan̈a tsy nikoran̈anay taminolo lera pozy in̈y. Ten̈a nankahery zahay fitiavan̈a naboakandro taminay ndreky fikarakarandro zahay, avio tiandro fo ndray tsy nitovy tamindro. Nampiafatra zahay koa firaisantsain̈indro. Mitovy fo raha nampianarin̈y iro, na taia na taia tany nivorianay.

Nianatra Baiboly James fotony ten̈a nanohin̈y fonany fikarakarandro Vavolombelon̈o aby io zahay. Nidinihiny tsara raha jiaby, fotony tiany ho azo antoko tsarabe raha ianarana io. (Asan’ny Apostoly 17:11; 1 Tesalonianina 5:21) Koa fa nandeha fotoan̈a, James niaiky fa nahita fahamarin̈ana izy. Fa zaho in̈y ten̈a nijaly jery. Zaho tihan̈ano raha marin̈y, kanefa zaho tsy tia “man̈araka lamody” fotony iro io niritriretiko “an̈isany donia ty.” Tamy zaho voanalohany nan̈eky hianatra Baiboly, napetrako tamy lohalikinaka Baiboly Dikanteniny Panjaka Jacques, baka io tamy lohalikinaka ilany, Baiboly Fandikanteniny Tontolo Vaovao niboaka tsy ela. Nizahako tamy Baiboly aroe io andininy tsiaraikiaraiky, baka ho azoko antoko tsarabe fa tsy voafitaka zaho.

Ny raha namparesy lahatra zaho

Zahay koa fa niaraka nianatra Baiboly tamy Vavolombelon̈o Jehovah, loso hitanay fa Zan̈ahary araiky fo Babantsika andan̈itry an̈y io fa tsy tokana olo telo zen̈y, baka io tsisy fan̈ahy tsy mety maty zen̈y. (Genesisy 2:7; Deoteronomia 6:4; Ezekiela 18:4; 1 Korintianina 8:5, 6) An̈isany raha ten̈a maventy koa fianaranay momba motrobe, fotony tsy nifan̈araka momba izio foeky Pirahalahy Batista.

Mbala loso diniky fo zaho, akory marin̈y ma maha fivavahan̈a marin̈y Vavolombelon̈o Jehovah, kanefa an̈aty jeriko an̈y iro io mbala an̈isany donia ty fo. Fahitako iro tsy nanan̈a fiain̈ana tsotra, kanefa zen̈y raha ten̈a naventy taminaka. Fa ny raha hitako ndraiky, iro man̈atanteraka didiny Jesosy hitory vaovao tsarany Fanjakan̈any Zan̈ahary aminolo jiaby. Ten̈a nialamboetry jerinaka.—Matio 24:14; 28:19, 20.

Fitiavan̈andro Vavolombelon̈o aby io ten̈a nan̈ampy zaho nahita ny marin̈y, tan̈atiny fotoan̈a sarotro in̈y. Ten̈a nikarakara fianakavian̈anay fiangonan̈a jiaby. Namangy zahay fo sasany tamindro, ny sasany ndraiky nan̈ano sary nividy ronono ndreky antody fan̈odian̈a. Kaiky iro raha tihamangy zahay fo. Tio vo ten̈a hitanay fa iro io olo ten̈a tsara. Namangy zahay fo iro ndray efa nisy olo nampianatra zahay. Nitsidiky zahay fo iro koa fa nandalo marikitry tran̈onay. Ten̈a nilainay raha jiaby zen̈y fotony nan̈ampy zahay hahay tsarabe Vavolombelon̈o Jehovah. Ankasitrahinay mare fikarakarandro ndreky fitiavandro zahay zen̈y.

Tsy iro Vavolombelon̈o tamy fiangonan̈a man̈odidin̈y zahay tio fo nan̈ano zen̈y. Navy namangy zahay koa Kay Briggs, Vavolombelon̈o baka amy fiangonan̈a hafa tsy lavitry tio, tamy zaho niasaloha mare momba fisikinan̈a ndreky fan̈amboaran̈a fan̈eva zay. Nan̈ano lamba tsotra izy baka io tsy nan̈ano makiazy. Nilamin̈y tsarabe sain̈inaka nikoran̈a taminany fa zaho tsy nen̈anen̈atra foeky. Namangy zaho koa Lewis Flora tandraraiky. Nitaizain̈y tamy fivavahan̈a “tsotra” koa izy. Hitany tamy soranaka fa zaho ten̈a sahirantsain̈y, ke nandifasany taratasy mandeha 10 pazy mba hampilamin̈y jerinaka. Ten̈a nanohin̈y fonaka hatsarampan̈ahinany zen̈y ke latsaka foeky ranomasonaka, baka io nampodipodiko nivakin̈y taratasy aby io.

Nirahiko nazavainy ranadahy O’Dell piandraikitry faritry zay taminaka Isaia 3:18-23 ndreky 1 Petera 3:3, 4. Volan̈iko taminany: “Raha tiany volan̈iny amy zen̈y ma, mila manan̈a fiain̈ana tsotra atsika koa tihamparavoravo Zan̈ahary?” Nampisaintsain̈y zaho karaha ty izy baka io: “Ino maharatsy man̈ano fon̈oloha? Ratsy ma mitaly?” Tamy zahay mbala tamy Pirahalahy Batista, zahay nitaly tsaiky man̈angy mbala hely, baka io man̈angy mifon̈o loha. Tamy zen̈y tsapako fa tsy ten̈a nan̈araka raha koran̈iny Baiboly zahay. Ten̈a nampiafatra zaho koa fanan̈ana faharetan̈a ndreky hatsarampan̈ahy naboakany piandraikitry faritry io.

Nahairesy lahatra tsihelihely zaho in̈y fa kanefa mbala misy raha nanahiran̈a jerinaka. Tsy ino zen̈y fa man̈angy manapaka fan̈eva. Nampisaintsain̈y zaho iro antipan̈ahy aby io fa mety tsy haniry lava fan̈evany man̈angy sasany, fa niny sasany ndraiky mety ho lava be. Ho iro taminaka, arakany fahitanao izy, olo lava fan̈eva tiatiany Zan̈ahary tozay olo fohiky fan̈eva? Nan̈ampy zaho hahita zen̈y fa miankin̈y aminy eritreritriny tsiaraikiaraiky lamba ndreky fan̈eva, baka io zaho namiandro lahatsoratra misy fan̈azavan̈a hafa hidinihiko antran̈o.

Narehanay raha nianaranay

Nitady vokatra tsara zahay ke ten̈a nahita ankitin̈y. Karaha ty ho Jesosy: “Baka amy zen̈y ahaizanolo fa anaro pianatranaka ankitin̈y, izikoa anaro mifankatia.” (Jaona 13:35) Ten̈a nan̈eky zahay fa be fitiavan̈a ankitin̈y Vavolombelon̈o Jehovah. Nijaly jery Nathan ndreky Rebecca, zanakanay aroe voanalohany, tamy fotoan̈a aby in̈y fotony iro efa nan̈eky fivavahan̈any Pirahalahy Batista, baka io efa natao batisa tao. Fa tafara tatỳ, mifanohitry tamy fampianaran̈andro io fahamarin̈ana baka amy Baiboly nambaranay iro ndreky fitiavan̈a naboakany Vavolombelon̈o Jehovah.

Nan̈iry hihavan̈a tamy Zan̈ahary fo Rebecca. Nanjary nora taminany nivavaka tamy Zan̈ahary koa fa hainy fa izy tsy mandahatra fiain̈ananolo. Loso nahatsiaro narikitry Zan̈ahary koa izy koa fa nahay fa Zan̈ahary zen̈y tsy tokana olo telo sady tsy raha sarotro takarin̈y be karaha zen̈y. (Efesianina 5:1) Ravoravo koa izy fotony tsy voatery han̈araka volan̈a efa kay be tamy Baiboly Dikanteniny Panjaka Jacques tao. Nahatsiaro narikitry Jehovah oe izy koa fa nahay raha takiny momba vavaka, fikasan̈anany han̈apetraka olombelon̈o amy paradisa ambony tany, ke ho afaka hiain̈y mandrakizay olo.—Salamo 37:29; Apokalypsy 21:3, 4.

Hatsaran̈a nazonay

Kadiriny tantsasantsasakany taon̈o 1987, vita batisa zahay roeny James ndreky zanakanay dimy voanalohany, Nathan, Rebecca, George, Daniel baka io John. Taminy 1989 ndraiky Harley vo natao batisa, baka io Simon taminy 1994. Mafana fô mare zahay jiaby man̈ano asa nan̈irahany Jesosy hatao, tsy ino zen̈y fa fitorian̈a vaovao tsarany Fanjakan̈any Zan̈ahary.

Zanakanay dimy iziô efa samy niasa tamy birony sampan̈any Etazonỳ eto aby: Nathan, George, Daniel, John ndreky Harley. Efa 14 taon̈o nanompoan̈a tan̈y George sady mbala an̈y fo firaka iziô. Vo tsy ela koa Simon loso betelita, koa fa vita fianaran̈anany taminy 2001. Antipan̈ahy na pan̈ampy amy fanompoan̈a amy fiangonan̈any Vavolombelon̈o Jehovah aby zanakanay lelahy jiaby. Antipan̈ahy amy fiangonan̈a Thayer a Missouri eto vadiko sady be atao amy fanompoan̈a koa zaho.

Telo zafinay, Jessica ndreky Latisha baka io Caleb. Ravoravo zahay mahita olobendro mampianatra iro ho tia Jehovah rango mbala hely. Ravoravo mare zahay jiaby fotony nampiany Jehovah han̈aton̈o izy ndreky hahay vahoakanany baka tamy fitiavan̈a naboakandro.

Loso hainay tsarabe izioty fihetsehamponolo tihan̈ano raha mamparavoravo Zan̈ahary, kanefa manan̈a eritreritry nitaizain̈y tamy donia man̈odidin̈y izy fa tsy tamy fampianaran̈any Baiboly. Man̈anten̈a zahay fa mbala ho ravoravo karaha zahay koa iro koa fa mandeha isaka tran̈o, tsy hivarotro legimo fa hitondra hafatra momba Fanjakan̈any Zan̈ahary ndreky raha mahavarian̈a mbala hataony. Ten̈a ankasitrahiko koa faharetan̈a ndreky fitiavan̈a naboakany vahoakany Jehovah taminay. Latsaka foeky ranomasonaka, zaho koa mieritreritry zen̈y!

[Sary]

Tamy zaho fito taon̈o ndreky zaho efa be

[Sary]

James, George, Harley, baka io Simon man̈ano lamba tsotra

[Sary]

Niboaka tamy gazety tantanàna teto sarinaka mitondra legimo mandeha bazary

[Sary nazahoan̈a lalan̈a]

Journal and Courier, Lafayette, Indiana

[Sary]

Fianakavian̈anaka amy zioty