Ino ma Raha Ianarantsika Baka amy Zavaboary?

“An̈ontania azafady iro biby aby io, fa iro hampianatra anao, baka io koa iro voron̈o mitilin̈y amy lan̈itry aby io, fa iro hivolan̈a aminao. Na koa, diniha tsarabe tany, fa izy hampianatra anao. Iro laoko andranomasin̈y an̈y koa han̈ambara zen̈y aminao.”​—JOBA 12:7, 8.

TAON̈O maro tafarafara tato, iro pahay siansy ndreky ainzeniera aby io nianatra raha maro baka tamy raha maniry ndreky biby. Dinihindro tsarabe rafitry an̈atiny zavaboary isankarazany, baka io iro mangala tahaka izio han̈amboarandro raha vaovao, ndreky hankatsaran̈a raha vitany fitaovan̈a sasany. Misy ohatrany zavaboary vitsivitsy handeha hidinihintsika iziô, ke anao koa mandiniky iro io, man̈ontania ten̈a karaha ty: ‘Izikoa fa zahavan̈a fomba niasan̈a iro io, azovy ten̈a man̈eva derain̈y?’

Ino raha Ianaranao Baka amy Tan̈any Trozon̈o

Ino raha mety hianarandro ainzeniera miasa avion aby io baka amy baleine à bosse na trozon̈o misy trafony? Maro raha afaka ianarandro amizio. Kadiriny 30 taony baleine à bosse araiky efa be, zen̈y efa mitovy amy kamion araiky feno entan̈a. Vatan̈any trozon̈o io somary enjan̈a, baka io izy manan̈a tan̈ana maventy mitovy elatra. Mandeha folo aroe amby metara halavasan̈anany. Fa ndray zen̈y, izy farandraha mavitriky eky izikoa fa an̈aty rano. Karaha ty iziô, ohatra, fataony izikoa fa mahita hanin̈inany: Izy miodikodin̈y manonga an̈abo, baka io tsiko man̈odidin̈y izy tsofiny. Metara araiky fo diametrany boribory ataony io. Ke rano io baka io manjary feno mibontribontrin̈y madiniky maro, ke zen̈y man̈aposy iro laoko ndreky patsa aby tavela an̈ivony boribory io ao manonga. Avio iro direkty arapakany trozon̈o io amy zay.

Raha ten̈a naharikian̈a pikaroko aby io, akory fomba hahavitany biby io mihodikodin̈y man̈ano boribory hely karaha zen̈y, kanefa vatan̈anany henjan̈a mare? Hitandro fa kaiky amy poziny tan̈anany ao misy sekirenany. Aloha amy tan̈ananany io tsy malamatra mira elatrany avion in̈y, fa misy nifinifiny ndreky raha mivoha milahadahatra.

Lera trozon̈o io milomaon̈o in̈y, raha mivoha aby io man̈ampy izy hahavita mampihen̈y angovony rano ndreky hanonga malaky. Nan̈ino? Gazety Natural History man̈azava fa mizarazara tsara an̈elan̈elan̈a raha mivoha aby io ao rano in̈y sady mivily. Ke trozon̈o io amy zay manjary afaka mandeha malaky, ndray lera izy manonga mahitsy be in̈y. Fa izikoa ndraiky malamatra alohany tan̈ananany io, izy tsy ho afaka hihodikodin̈y boribory tery be karaha zen̈y. Fotony rano manjary afaranany ao ke tsy afaka man̈aposy izy manonga.

Ino hatsaran̈a mety ho azo baka amy raha hitany pikaroko zen̈y? Elatrany avion izikoa atao mitovy amy tan̈any trozon̈o io, manjary hihen̈y kontiny fitaovan̈a fan̈ovaovan̈a fandihanany tsiko, mila hapetraka aminany ao. Manjary mahay azo antoko ndreky ho mora kobabin̈y fo elatra karaha zen̈y. John Long manampahaizan̈a momba fiasany vatan̈a, mino fa tsy ho ela “mety hisy raha mivoha karaha amy tan̈any trozon̈o in̈y koa ho hita aminy elatrany avion maventy jiaby.”

Mangala Tahaka Elatrany Samy

Marin̈y fa baka taminy elatrany voron̈o nangalan̈a tahaka elatrany avion. Kanefa raha zen̈y tatoato, efa natsaraindro ainzeniera aby io. Karaha ty volan̈iny gazety New Scientist: “Nisy karazan̈a avion vaovao namboariny pikaroko aminy Iniversiteny Floride an̈y. Izio mahay mijanon̈o aminy habakabaka arỳ, baka io mahay mijotso ndreky manonga malaky karaha voron̈o samy in̈y. Baka io izio tsy mila piloty fa baka lavitry fo anten̈a mikomandy izy. Mandilatra antsasaka metara fo halavasanizio.”

Samy izikoa fa mitilin̈y in̈y, elatranany aroe samby ampanongainy baka io somary ataony miforitry an̈ivonizio, ke zen̈y mahavy izy mahavita man̈ano fihetsiky maharikian̈a. Gazety tio in̈y mivolan̈a koa fa elatrany avion io natao mora miforitry karaha zen̈y koa. ‘Vy maromaro baikoany motera hely araiky zay, izy man̈etsiky elatra aby io.’ Ten̈a mivohatra mare elatrany avion hely io, ke izio aby mahavita mijanon̈o an̈elan̈elandro tran̈o etazy maro an̈abo be aby in̈y. Sady izio koa mahay mijotso ndreky manonga malaky be. Efa tsy din̈iny tafiky amerikain aby hahavitan̈a avion mora hindesin̈y karaha zen̈y, hampiasain̈y hitadiavan̈a fitaovan̈a simiky findesin̈y miady na misy otrikaretin̈y, antanambe.

Mitovy Amy Vitiny Antsatsaka

Maro koa raha afaka hianaranolombelon̈o baka amy biby antanety. Ohatra, misy antsatsaka hely araiky zay mahay mandady amy riba ndreky mahay misampin̈y an̈atiny tafontran̈o. Efa letry taminy andrany Baiboly, efa nahaizan̈a biby io edy fahaizan̈anany maharikian̈a zen̈y. (Ohabolana 30:28) Karakory ma hahavitany man̈ano zen̈y?

Antsatsaka io mahavita mandeha firaka amy tany malamatra, karaha ataony amy fitaratra. Feno volovolo madiniky amy felambitinany ao ke zen̈y mahavy izy mahavita zen̈y. Amy felambitinany ao tsisy lakoly, fa misy angovo madiniky, angovony van der Waals man̈ampy felambitinany io hahavita hipetaka amy riba na amy raha hafa. Raha ny tokony ho izy, angovo io resiny angovony tany, ke zen̈y mahavy olombelon̈o tsy afaka misampin̈y amy riba baka amy tan̈ana fo, karaha antsatsaka. Fa antsatsaka ndraiky tsy latsaka foeky fotony iro volovolo madiniky mandeha andrivony amy felambitinany ao io mahaimampitombo angovo io fo. Sady izy koa raha mahivan̈a hely.

Ino hatsaran̈a azo baka amy raha hitany pikaroko zen̈y? Afaka alain̈y tahaka koa iro volovolo amy vitiny antsatsaka io han̈amboaran̈a fitaovan̈a syntetiky mitovy amy Velcro (raha hafa nalain̈y tahaka baka tamy zavaboary). * Gazety Economist mikoran̈a fa nisy pikaroko nivolan̈a fa izikoa misy ‘lamba famon̈osan̈a ratra nalain̈y tahaka baka tamy volovolo amy felambitiny antsatsaka io’ ten̈a hiasa mare amy fitsaboan̈a, intsaka eky izikoa “dokotera tsy afaka mampiasa lamba na raha madity hafa famon̈osoan̈a ratra.”

Azovy ma Mendriky Derain̈y?

Sampandraharaha Amerikain Mikarakara Sambondan̈itry Ndreky Raha An̈abo Tsy Hita Maso an̈y (NASA) koa iziô efa man̈amboatra robot misy vity valo afaka mandehandeha karaha scorpion. Ainzeniera a Failandy koa efa nahavita karazan̈a traktera manan̈a vity tsiota, karaha biby hely maventy be aby in̈y, ke izio mahavita mandingana raha. Misy pikaroko hafa ndraiky mieritreritry han̈amboatra ravindamba misy lafenaitra madiniky afaka mibian̈a ndreky mifody, karaha voany kakazo kesiky. Misy pan̈ano tomabily koa man̈amboatra tomabily nalain̈y tahaka baka amy karazan̈a laoko mahay milomaon̈o malaky. Pikaroko sasany koa efa ampandinihin̈a antony mahavy kokiazy sasany tsy mora vaky, ke izio mety ampiasain̈y han̈amboaran̈a lamba miaro amy bala ndreky mahivan̈a tsara.

Maro hevitry tsara nanjary hitany pikaroko aby io izikoa fa nandiniky rafitry misy an̈aty zavaboary. Ke izio ataondro lisity, baka io ajarisindro an̈atiny ordinatera. Gazety Economist koa mivolan̈a fa iro pahay siansy aby io afaka mizaha amizio ao izikoa fa “mitady vahaolan̈a lera fa misy problemo raha hamboarindro.” Hevitry hita amy lisity io ao kaian̈a “zony zavaboary.” Zavaboary baka mitovy aminolo na sosiete araiky nahita hevitry vaovao na namoron̈o fitaovan̈a vaovao, ke izy manan̈a zo aradalàn̈a ho tomponizen̈y. Ke gazety Economist io nivolan̈a fa “zony zavaboary” zen̈y mety tsarabe hikaian̈a iro hevitry mahavarian̈a azo baka amy zavaboary io.

Baka taminjovy naviany hevitry mahavarian̈a aby azo baka amy zavaboary aby in̈y? Pikaroko maro mivolan̈a fa baka taminy evolision nampisy zavaboary. Misy raha tsotra zen̈y niova tsihelihely, tan̈atiny andrivony taon̈o, ke nanjary raha misy fahin̈ana. Kanefa misy pikaroko hafa tsy mitovy hevitry amy zen̈y. Karaha ty nivolan̈iny Michael Behe, manampahaizan̈a momba raha manampahin̈ana madiniky, tamy gazety New York Times, taminy 2005: ‘Atsika izikoa fa tsy mahita porofo hanoheran̈a fa nisy olo niasa tran̈o vaovao araiky, dikanizen̈y atsika tsy maintsy man̈eky raha zen̈y marin̈y. Karaha zen̈y koa, tsy maintsy ikentsika fa nisy niasa raha jiaby io, fotony maro porofo ahitan̈a fa efa niritriretin̈y tsara tsialohaloha fomba namoron̈ana izio, sady tsisy porofo afaka hanoheran̈a zen̈y.’ Karaha ty namaran̈any izy: “Izikoa fa hita be fa raha araiky nisy niasa, zen̈y efa tsy tokony mbala hifamaran̈a eky.”

Ten̈a mendriky derain̈y iro ainzeniera nan̈amboatra elatrany avion azo antoko tsara, sady mety tsara aby in̈y. Karaha zen̈y koa iro namoron̈o lamba na raha hafa mety amon̈osan̈a ratra isankarazany, na ravindamba mety tsara amy raha ilavan̈a izy, na tomabily mandeha tsara. Kanefa mety ampitovisin̈y amy pangalatra olo araiky, izikoa izy nangala tahaka raha niforon̈inolo hafa kanefa izy tsy man̈amia voninahitry olo io aby, na tsy man̈eky foeky fa misy izy.

Lera iro fa tojy problemo amy raha amboarindro, iro pikaroko ten̈a mahay aby io mangala tahaka raha hitandro amy zavaboary. Kanefa misy sasany amindro pikaroko aby io mbala masaky mivolan̈a fo fa tsisy pamoron̈o mahay niasa zavaboary zen̈y, fa baka taminy evolision fo nampisy izio. Ikenao zen̈y? Ndray raha nalain̈y tahaka baka tamy zavaboary aby in̈y fo mila olo mahay mare vo mahavita izy, tsy intsaka eky zavaboary aby io? Ke azovy ten̈a man̈eva derain̈y: Pamoron̈o araiky farany mahay io sa iro olo aby mangala tahaka raha vitany?

Famaran̈ana Mety Tsara

Maro olo nandiniky izikoa raha jiaby io ten̈a nisy namoron̈o ankitin̈y sa tsisy, ke iro nanjary nitovy hevitry tamy pan̈ano salamo ty: “Ten̈a maro ankitin̈y raha niasainao Jehovah! Tamy fahendrena nan̈anovanao iro jiaby io. Feno tany ty raha niasainao.” (Salamo 104:24) Mitovy hevitry amy zen̈y Paoly, panoratra Baiboly. Karaha ty hoizy: “Fotony toetrinany tsy hitany maso, angovonany tsisy lan̈iny ndreky maha Zan̈ahary izy io, hita mazava rango niasany zao tontolo zao, ke hita amy raha nataony.”​—Romanina 1:19, 20.

Kanefa misy olo tsotra maro sady man̈aja Baiboly ndreky mino Zan̈ahary, mivolan̈a fa Zan̈ahary mety nampiasa evolision io niasany raha jiaby maro tsara hitantsika io. Zen̈y ankitin̈y ma raha ampianariny Baiboly?

[Lamariky amy pazy ambany]

[Volan̈a nalain̈y]

Baka taminjovy iro hevitry maharikian̈a azo baka tamy zavaboary aby io?

[Volan̈a nalain̈y]

Azovy mendriky hahazo dera baka amy rafitry misy amy zavaboary?

[Efajoro/​Sary]

Ndray raha nalain̈y tahaka fo nila olo mahay be vo vita, intsaka eky zavaboary?

Avion mora hindesin̈y ty nalain̈y tahaka baka taminy elatrany samy

Vitiny antsatsaka tsy mety maloto, tsy man̈ambela diambity foeky, mahavita mipetaka amy raha jiaby ankoantrany “Téflon”(izio raha simiky tsy afaka pitahan̈a), baka io mora mipetaka sady mora miala. Pikaroko aby io mifen̈y mangala tahaka izio.

Laoko io nalain̈y tahaka nan̈amboaran̈a karazan̈a tomabily mahavita mandeha malaky

[Sary nazahoan̈a lalan̈a]

Avion: Kristen Bartlett/​University of Florida; vitiny antsatsaka: Breck P. Kent; laoko ndreky tomabily: Mercedes-Benz USA

[Efajoro/​Sary]

MANAN̈A FAHENDRENA VOAJAN̈AHARY

Maro biby manan̈a “fahendrena voajan̈ahary”, ke hitandro fo lalan̈a tokony himboandro. (Ohabolana 30:24, 25) Aleva onon̈o baka ohatra aroe ty.

◼ Hitany Vitsiky aby io Fo Lalan̈andro Karakory ataony vitsiky aby io mahita lalan̈andro izikoa iro fa baka mitady hanin̈y? Misy pikaroko ta Royaume-Uni nahita fa misy raha simiky misy fofon̈o ambelandro vitsiky sasany amy lalan̈andro. Avio koa iro man̈amboatra lalan̈a mora hita. Gazety New Scientist koa iziô, ohatra, mikoran̈a fa lera vitsiky jaune aby io man̈amboatra lalan̈andro in̈y, ataondro misaraka aroe izio, ke misy araiky fohifohiky. Ino ten̈a mampiavaka lalan̈a io? Lera vitsiky io mody, ke avy amy sampan̈ana io, izy mivily hoazy man̈araka lalan̈a fohiky in̈y. Izin̈y mahavy firaka antran̈onany an̈y. Gazety io koa mivolan̈a fa “mampamora fiviziviziany vitsiky mandeha amindro lalan̈a marobe mifampidimpiditry io koa fomba nizarandro lalan̈a aby io, intsaka eky izikoa misy vitsiky sasany mandeha fa sasany ndraiky mimpody. Tsy kajo koa iro, fotony tsy diso lalan̈a.”

◼ Voron̈o Manan̈a Tondroavaratra Maro voron̈o pifindra toeran̈a, mahay tsara tany tokony handihanany fo ndray izio lavitry mare, avio ndray tsara ndray ratsy andra. Nan̈ino? Hitany pikaroko fa mira misy tondroavaratra na boussole in̈y an̈atindro voron̈o aby io ao, ke haindro fo aia avaratra. Kanefa gazety Science mikoran̈a fa misy tondroavaratra amy toeran̈a sasany tsy ten̈a manondro avaratra aby. Ke nan̈ino fo basy voron̈o pifindra toeran̈a aby io tsy diso lalan̈a foeky? Isaka arivariva, iro mitazan̈a masoandra tsofotro, ke ahitsindro mifan̈araka tsarabe amy zen̈y tondroavaratra an̈atindro ao. Volan̈iny gazety Science io koa fa miovaova arakarakany tany ndreky fizarantaon̈o, toeran̈a ilintehany masoandra. Ke pikaroko aby io mihevitry fa tsy maintsy misy fomba voajan̈ahary fo ahaizany voron̈o aby io fizarantaon̈o.

Azovy nampianatra vitsiky hahay hizara lalan̈a? Azovy nan̈amia voron̈o aby io tondroavaratra, ndreky betro ahaizan̈a fizarantaon̈o? Baka taminy evolision ma nampisy zen̈y? Sa nisy Pamoron̈o araiky ten̈a mahay niasa iro io?

[Sary nazahoan̈a lalan̈a]

© E.J.H. Robinson 2004