INO MA RAHA KORAN̈IN’NY BAIBOLY?

Ino ma Dikan’ny Lelahy Lohan’ny Vadiny Zen̈y?

AMY tany maro, amy mariazindrô olo fivadiany samby man̈ano vava. Amy fotoan̈a io, man̈angy mampan̈anten̈a fa izy han̈araka volan̈an’ny vadiny fo. Kanefa, tsy tian’ny man̈angy maro mieritreritry fa lelahy lohan’ny fianakavian̈andrô. Diniha baka raha ampianarin’ny Baiboly momba zen̈y. Ho hitanao fa amy rariny ndreky mety arehan̈a tsarabe raha ampianarin’ny Baiboly.

Fomba Fahitan’ny Zan̈ahary Fahifan̈an’ny Lelahy

Amin’ny Efesianina 5:22-24 ahitan̈a raha koran̈in’ny Baiboly momba fahifan̈an’ny lelahy an̈atin’ny tokantran̈o. Karaha ty ho izy ao: “Man̈angy mila man̈eky vadiny karaha ataony man̈eky Tompo in̈y fo, fôtony lelahy lohan’ny vadiny, tsisy ny hafa amy Kristy lohan’ny fiangonan̈a ... Ke man̈angy tôkony han̈eky vadiny amy raha jiaby, karaha ataon’ny fiangonan̈a man̈eky Kristy.” Lelahy lohan’ny tokantran̈o fôtony “lelahy lohan’ny vadiny.” Ke man̈angy tôkony han̈araka volan̈anany ndreky han̈aja fahifan̈anany.​—Efesianina 5:33.

Voafetra fahifan̈an’ny lelahy manambady fôtony ndray izy koa mba ambany fahifan̈an’ny Zan̈ahary ndreky Kristy. Izy tsisy fahifan̈a man̈iraka vadiny han̈ano raha tsy mifan̈araka amy lalàn̈an’ny Zan̈ahary na han̈ano raha mifanohitry amin’ny eritreritrinany efa voahofan̈a tamy Baiboly. Ndray zen̈y, izy namezan’ny Zan̈ahary andraikitry hangala fanapahan-kevitry maventy momba fianakavian̈anany.​—Romanina 7:2; 1 Korintianina 11:3.

Baiboly mivolan̈a fa lelahy tsy tôkony ho tia ten̈a, fa tôkony hieritreritry raha mahatsara vadiny alohalohan’ny raha mahatsara ain̈inany. Efesianina 5:25 mivolan̈a: “Anarô lelahy, tiava fo vadinarô, karaha nataon’i Kristy tia fiangonan̈a, ke nan̈amia ain̈inany hamonjy irô.” Kristy ohatra farany tsara amy fitiavan̈a. Lelahy tôkony hangala tahaka môdelinany ke tsy han̈araraotro fahifan̈anany han̈anaovan̈a raha tiatiany fo.

Baiboly koa mampianatra fa lelahy tôkony hiaraka mipetraka amy vadiny ‘ke hiezaka hahazo fihetseham-pônany.’ (1 Petera 3:7) Ino ma dikan’izen̈y? Tôkony ho hainy fa tsy mitovy lelahy ndreky viavy, na ara-batan̈a zen̈y na ara-pihetseham-pô. Fa tsy zen̈y fo, mila hainy koa raha ilain’ny vadiny.

“Izy Namanao”

Man̈angy man̈aja vady zen̈y ma tsy afaka man̈aboaka hevitry foeky? Diniha ohatran’i Saraha vadin’i Abrahama. Baiboly mivolan̈a izy ten̈a nan̈aja Abrahama. (1 Petera 3:5, 6) Izy nan̈aja Abrahama fo na tamy raha maventy na tamy raha madiniky. Izy, ohatra, nan̈eky niala tran̈o tsara ke nandeha nifindrafindra monin̈y sady nipetraka tamy tran̈olay. Nan̈eky koa izy koa fa nirahan’i Abrahama nandoky hanin̈y tampotampoko. (Genesisy 12:5-9; 18:6) Ndray zen̈y, nisy fotoan̈a irô roen’i Abrahama tsy nitovy hevitry mikasiky raha araiky maventy tamy fiain̈anandrô. Tamy zen̈y Saraha nan̈iraka Abrahama hanaora Hagara ndreky Ismaela zanany talan̈olo. Hagara io vadihelin’i Abrahama. Fa Zan̈ahary tsy nan̈asiaka Saraha, ndray izy aby nan̈iraka Abrahama ‘hitandren̈y raha volan̈iny.’ Ndray tiô zen̈y, Saraha nan̈aja Abrahama fo ke niambin̈y izy fa tsy direkty nanaora Hagara ndreky Ismaela.​—Genesisy 21:8-14.

Hita baka amin’ny ohatran’i Saraha fa man̈angy tsy raha han̈aradrôron̈o fo fa izy ‘naman’ny’ vadiny. Misy hajany mare pilasinany. (Malakia 2:14) Izikoa misy fanapahan-kevitry mila atao mikasiky fianakavian̈andrô, amy maha naman’ny vadiny izy, man̈angy afaka man̈amia soso-kevitry. Misy raha sasany momba fianakavian̈andrô koa anan̈any fahifan̈a, karaha ataony fikarakarahan̈a raha an-tran̈o ndreky raha sasany momba vola. Ndray zen̈y, anjaran’ny lelahy man̈ano fanapahan-kevitry farany fôtony izy lohan’ny fianakavian̈a.​—Ohabolana 31:10-31; 1 Timoty 5:14.

Hajà Araiky Namôron̈o Vadian̈a

Jehovah Zan̈ahary niasa lelahy ndreky viavy. Izy namôron̈o vadian̈a io. Izio masin̈y fôtony izio nataony hampitambatra lelahy ndreky viavy. (Genesisy 2:18-24) Samby namezany andraikitry irô baka irô ho sambatra.​—Deoteronomia 24:5; Ohabolana 5:18.

Jehovah manan̈a zo hamaritry fitsipiky an̈atin’ny vadian̈a salakady izy lastiô ny tena mahay raha zen̈y fôtony izy niasa vadian̈a io. Tahin’ny Zan̈ahary salakady ankasitrahiny olo fivadiany izikoa samby mifen̈y man̈ano andraikitrindrô ndreky man̈araka lamin̈y napetrakan’ny Zan̈ahary mikasiky fahifan̈a. Fôtony tsy noho raha zen̈y tsara fo mahavy irô man̈ano zen̈y fa noho irô man̈aja fahifan̈an’ny Zan̈ahary koa.

EFA NIRITRIRETINAO MA TY:

◼ Azôvy ohatra farany tsara amy fahaizan̈a mitondra olo?​—Efesianina 5:25.

◼ Misy erany ma fahifan̈a namezan’ny Zan̈ahary amy lelahy manambady?​—1 Korintianina 11:3.

◼ Ino ma tanjon̈o namoron̈ana vadian̈a ndreky lamin̈y an̈atin’izio?​—Ohabolana 5:18.

[Sary]

Ho sambatra ndreky ho afa-pô olo fivadiany izikoa man̈araka môdelin’i Kristy mikasiky fampiharan̈a fahifan̈a