Diniha ino ny raha ten̈a maventy. Baiboly mivolan̈a: ‘Zahava tsarabe raha ten̈a maventy.’ (Filipianina 1:10) Ataova listy zay raha meky ndreky ten̈a ilain̈a. Ndray zen̈y, aleva onon̈o fa raha araiky ndray ten̈a ilain̈a, izio tsy voatery ho meky. An̈isany raha maventy iziô mandoky hanin̈y, fa tsy voatery atao iô ny iô. Karaha zen̈y koa, anao mety hizaha tele fotony misy programo tianao ao, fa izio tsy voatery ho ten̈a raha maventy. a

Mahaiza mandamin̈y tsialohaloha. Karaha ty koran̈iny Mpitoriteny 10:10 ao: “Izikoa magofon̈o famaky kanefa tsy rangitin̈y, ho be edy angovo lany. Fa fahendrena azahoan̈a tombony.” Ino ma raha ianarantsika baka amy zen̈y? Alohany anao hampiasa famaky, izio tsy maintsy rangitinao antsendriky. Dikanizen̈y, efa alamin̈inao tsialohaloha fomba tianao hankifan̈a asanao. Raha koa fa tsy ten̈a ilain̈a, aza atao fa anao ho reraka fo sady ho lany lera. Izikoa vitanao bonera asanao sasany, direkty ataova araiky man̈araka. Hahavita raha maro be anao izikoa mahay mandamin̈y fotoan̈a karaha zen̈y.

Aza ankasarotin̈y fiain̈ana. Anao koa han̈ian̈a raha jiaby, anao ho reraka fo salakady hahinihiny mare. Ke raha koa fa tsy dia ilain̈a, ambilà.

Aza mangataka andra avio aza misalasala. “Lan̈iany mandiniky tsiko, tsy hamafy edy. Baka io lan̈iany mizaha rondro, tsy hijinja.” (Mpitoriteny 11:4) Hitantsika baka aminy andininy io fa tsy mety mangataka andra, fotony fotoan̈a mandeha fo fa asa tsy ho vita. Izikoa pamboly araiky iziô miambin̈y andra ho tsara mare vo han̈ano raha, izy tsy mety hahavita hamafy na hijinja foeky. Karaha zen̈y koa, izikoa anao miambin̈y raha araiky efa azo antoko na efa hainao tsipiriany raha jiaby momba izio, anao tsy hahavita hanapakevitry. Marin̈y ndraiky fa ilain̈a mikaroko avio mandiniky tsara alohany hanapakevitry, sirto izio koa fanapahankevitry maventy. Fa Ohabolana 14:15 mivolan̈a: ‘Olo misy jery mandiniky dianany.’ Matetiky, ndray raha araiky tsy azonao antoko, anao mila manapakevitry fo.​—Mpitoriteny 11:6.

Aza mitady raha lavorary. Jakoba 3:17 mivolan̈a karaha ty: “Fahendrena baka an̈abo an̈y [baka amy Zan̈ahary] ... mahay mandanjalanja.” Tsisy maharatsy man̈ano raha farany tsara. Kanefa, ndraikindraiky, atsika tihan̈ano raha tsara loatra, ke lôso diso fan̈antinan̈a fo baka io. Karaha ataony olo mianatra langy iziô tsy maintsy efa man̈amboatra jery fa han̈ano diso. Man̈ampy izy tsy han̈ampody raha tsy mety raha zen̈y. Fa izikoa izy tsy mivolan̈a foeky, fotony mavozo tsao han̈ano diso, tsy mety hitombo raha hainy. Ohabolana 11:2 mivolan̈a karaha ty: ‘Hendry lan̈iany olo manetry ten̈a.’ Ke aza mitady raha lavorary! Salakady olo manetry ten̈a tsy mety han̈ameloten̈a izikoa man̈ano diso, fa imoezany fo hadisovan̈anany.

Mahaiza mipezipezy asa ndreky fangalan̈a diandian̈a. “Sitrasitrany koa fangalan̈a kajo fenony tan̈ana araiky tozay asa mare feno tan̈ana aroe, kanefa mira manambotro tsiko fo.” (Mpitoriteny 4:6) Olo andivoziny asa tsy mangala kajo foeky. Izy mamango man̈ano “asa mare feno tan̈ana aroe”, kanefa tsy azony fỳ aby asa mare ataony zen̈y fotony izy kajo loatra. Olo kamo ndraiky tsy miasa foeky fa miasa mangala diandian̈a “feno tan̈ana aroe”, ke lanilany fo fotoan̈anany. Zen̈y mahavy Baiboly mivolan̈a fa mila mandanjalanja atsika. Karakory ma zen̈y? Salakady tsy miasa mare loatra atsy avio mba mangala fotoan̈a hiravoravoan̈a. “Kadô baka amy Zan̈ahary” haravoan̈a azontsika zen̈y.​—Mpitoriteny 5:19.

Man̈anaova ampy toromaso. “Hoandrihoandry ndreky hatoro ampiadan̈ana zaho, fotony anao zaraiky fo Jehovah mahavy zaho tsy hiasaloha.” (Salamo 4:8) Karaha ataony olo be iziô mila matoro an̈atiny lera valo isaka alin̈y, amy zen̈y izy ho salama vatan̈a tsara ndreky salama sain̈y ndreky fô. Lera andrian̈a zen̈y tsy mety ho very boriny. Olo araiky koa ampy toro tsarabe, izy lôso mahay raha fotony izy mora mifantoko sady mahazo onon̈o raha. Fa olo tsy ampy toro ndraiky tsy miasa tsara jerinany, ke mora man̈ano diso ndreky mandrobadraha, avio satain̈y.

Mifidiana tanjon̈o mora takarin̈y. “Sitrany miravoravo amy raha hitany maso tozay aveziveziny fan̈irian̈a.” (Mpitoriteny 6:9) Akory zen̈y? Olo misy jery mifehy ten̈a, fa tsy mitady hahazo zay raha tiany, intsaka eky raha efa hita fa tsy ho azo. Izy koa tsy mitrosatrosa na rikian̈a amy lamaodindraha mandalo. ‘Raha hitany masony’, na raha mety takariny fo iravoravoany.

Diniha fomba itondrasanao fiain̈ananao. Miankiny amy fomba fitondrasan̈a five andihanany lakana. Karaha zen̈y koa, miankiny amy taridalan̈a arehanao hiafarany fiain̈ananao. Izikoa tsara taridalan̈a arehanao, raha tsara salakady ten̈a ilain̈a handihanany jerinao. Miankiny amy zen̈y koa fomba ampiasanao fotoan̈anao, isaka lera na isanandra. Ary efa amy Baiboly ao edy mety hahitan̈a taridalan̈a tsara.​—Ohabolana 2:6, 7.

Ataova raha ten̈a maventy aminao fitiavan̈a. Koran̈iny Kolosianina 3:14 fa fitiavan̈a “tady mampifandray amy fomba feno.” Izikoa an̈atiny tokantran̈o tsisy fitiavan̈a, tsy ho hisy fahasambaran̈a fa ratrampô fo. Lan̈iany olo tsy miasalohany raha zen̈y, tsy maintsy hamono ten̈a miasa, mitady vola, kanefa izy tompiny fo hijaly. Zen̈y mahavy Baiboly mikoran̈a matetiky be momba fitiavan̈a io.​—1 Korintianina 13:1-3; 1 Jaona 4:8.

Manokàn̈a fotoan̈a hianaran̈a Baiboly. Infirmie i Geoff. An̈isany olo mba tsara karama izy, sady ten̈a tia izy vady amanjanakanany ndreky iry namany. Izy koa fa ampiasan̈a, matetiky izy mahita olo mijaly ndreky maty, ke loso diniky karaha ty izy: ‘Efa karaha ty fo ma fiain̈ana?’ Tandraraiky izy namaky boky naboakany Vavolombelon̈o Jehovah, ke hitany tao valiny fan̈ontanian̈a nanahiran̈a jerinany io.

Nikoran̈iny Geoff tamy vady amanjanakanany raha zen̈y, ke ten̈a tiandro raha ren̈indro. Nandeha fotoan̈a, iro tran̈o araiky niaraka nianatra Baiboly, ke iro nanjary sambatra avio nanjary haindro tsarabe nampiasa fotoan̈andro. Iro nanjary nan̈anten̈a hiain̈y mandrakizay amy donia araiky tsisy jaly eky.​—Apokalypsy 21:3, 4.

Hita baka tamy tantarany Geoff io fa marin̈y ankitin̈y volan̈a Jesosy amy Matio 5:3 ty: “Sambatra lan̈iany mahatsiaro fa mila Zan̈ahary.” Ke asa anao mba von̈ono hanokan̈a fotoan̈a hely hianaran̈a raha momba Zan̈ahary? Baka amy zen̈y hazahoanao fahendrena ke hahaizanao hampiasa tsara fotoan̈anao isanandra ndreky amy fiain̈ananao jiaby.