LESON 5
Mianatra Raha Baka Aminolobe
KARAKORY MA MIANATRA RAHA BAKA AMINOLOBE ZEN̈Y?
Ten̈a ilainy tsaiky mahazo torohevitry baka aminolobe. Iro mila olo be mitariky iro amy fiain̈anandro. Ke raimandreny ten̈a tsara toeran̈a man̈ano zen̈y. Andraikitrindro raha zen̈y. Fa ndray izy man̈ano zen̈y, olobe sasany koa mbala afaka man̈ampy ndreky man̈amia torohevitry zanakanaro.
NAN̈INO MA TEN̈A ILAIN̈A MIANATRA RAHA BAKA AMINOLOBE?
Amy tany maro, tsy be fotoan̈a iarahany tanora aminolobe. Zahava baka:
A lekoly tany ten̈a handaniany tsaiky fotoan̈a, kanefa an̈y mbala tsaiky maromaro tozay papianatra na olobe hafa.
Lera iro mody antran̈o, iro zaraiky fo ao. Raimandrenindro baka samby miasa.
Araka fandinihan̈a araiky natao ta Etazonỳ, kadiriny lera tsiota iô laniny tsaiky, 8 firaka 12 taon̈o, amy fitaovan̈a elektroniky isanandra. a
Karaha ty ambarany boky Aza Ambela Zanakanao (angiley): “Efa tsy amy mamandro, babandro, papianatrandro, na koa aminolobe hafa hangalany tanora torohevitry, fa... amy tanora mira iro fo. Sady iro io koa ataondro modely.”
AKORY HAN̈AMPIAN̈A IRO?
Mangalà fotoan̈a hiarahan̈a amy zanakanao.
TORO LALAN̈A BAIBOLY: “Rango iro mbala tsaiky efa zara mandeha amy lalan̈a tokony himboandro edy, ke na iro efa matoe, iro tsy hiala amy zen̈y eky.”—Ohabolana 22:6.
“Tiany tsaiky izikoa raimandrenindro man̈ampy ndreky mitaridalan̈a iro. Ndray iro efa mahaibe, mbala torohevitriny raimandrenindro fo tiatiandro tozay niny tsaiky mira taon̈o amindro. Karaha ty baka nisoratiny Pr. Laurence Steinberg, an̈aty boky Anao Ndreky Zanakanao (angiley): “Raha volan̈iny raimandreny ten̈a misy vokany maventy amy toetsain̈y ndreky fihetsikiny zanakandro. Tiany tanora aby io ho hay raha iritriretindry olobendro, avio tandrin̈esandro raha volan̈indro io nata misy raha tsy ikendro.”
Ke araraota! Diany zanakanao mbala mitady torohevitry aminao, ameza. Mangalà fotoan̈a iarahan̈a aminany. Ambarà izy hevitrinao, ino raha ten̈a maventy aminao. Tantarà aminany koa raha niain̈anao.
Mitadiava olo han̈amia hevitry izy.
TORO LALAN̈A BAIBOLY: “Lan̈iany olo miaraka aminolo misy jery hanjary ho hisy jery.”—Ohabolana 13:20.
Anao ma mahay olo maventy mety atokisan̈a sady afaka ataony zanakanao modely? Nan̈ino tsy han̈ontanianao izy tsao izy afaka mba miaraka amy zanakanao? Fa zen̈y tsy mivolan̈a fa loso izy ndraiky ny man̈ano andraikitrinao. Zanakanao raha zisty man̈ampy fo. Baiboly mikoran̈a momba Timoty. Nata izy efa be, Timoty ten̈a nahazo hatsaran̈a tamy fiarahan̈a taminy apostoly Paoly. Salakady ndray Paoly koa mba nahazo hatsaran̈a baka tamy zen̈y.—Filipianina 2:20, 22.
Amy zioty, maro olo pihavan̈a efa tsy tran̈o araiky eky na koa loso mifan̈alavitry tany pitrahan̈a. Ke mety ho lavitry zanakanao tany misy ry dadiny, zamany ndreky angovaviny, avio havanaro hafa. Ke izikoa zen̈y raha misy, mitadiava olobe hafa manan̈a toetry tianao hanan̈any zanakanao.
a Araka fandinihan̈a io fo, hita fa tanora 13 firaka 19 taon̈o mahalany kadiriny lera sivy isanandra amy fitaovan̈a elektroniky. Tsy tafiditry an̈aty tatitry aby io fotoan̈a ampiasandro fitaovan̈a elektroniky io lera io han̈ano devoara na hikaroko raha aminy Internet.
