1. Ino ma hafatrany paminan̈y Isaia taminy Israelita aby io?

 PAMINAN̈Y Isaia nivolan̈a fa Jehovah io ‘Zan̈ahariny fahamarin̈ana.’ Izikoa arabakiteny, dikany volan̈a nadika “fahamarin̈ana” io “ameny.” (Isaia 65:16, l.p.a.) Dikany “ameny” io “irarian̈a raha zen̈y ho tanteraka”, na “marin̈y ankitin̈y zen̈y.” Amy Baiboly ao, matetiky volan̈a “ameny” io ampiasain̈a han̈amezan̈a antoko fa tsy maintsy marin̈y zay raha volan̈iny Jehovah na Jesosy. Ke ty hafatrany Isaia taminy Israelita aby io: Zay raha volan̈iny Jehovah tsy maintsy hiboaka. Sady Jehovah tsiary ndraiky tsy nan̈atanteraka fampan̈antinan̈anany.

2. Nan̈ino atsika afaka matoky raha ampan̈antinainy Jehovah atsika, avio ino aby fan̈ontanian̈a hidinihintsika ato?

² Afaka matoky koa ma atsika fa tsy maintsy ho tanteraka fampan̈antinan̈any Jehovah momba ny hoavy? Efa ho 800 taon̈o tafarany andrany Isaia, apostoly Paoly nan̈azava nan̈ino atsika afaka matoky fa tsy maintsy ho tanteraka raha ampan̈antinainy Zan̈ahary. Karaha ty ho izy: ‘Zan̈ahary tsy mahay mavandy.’ (Heb. 6:18) Diniha baka ty, tsiary nisy lohatany sady man̈aboaka rano mamy ndreky man̈aboaka rano masin̈y. Ambaka zen̈y koa Jehovah. Izy Loharanony fahamarin̈ana, dikanizen̈y izy tsy mahay mavandy. Ke atsika afaka matoky tsarabe zay raha volan̈iny Jehovah, an̈isanizen̈y fampan̈antinan̈anany jiaby momba ny amaray. Amy lahatsoratra ty, atsika handiniky fan̈ontanian̈a aby ty: Ino raha nampan̈antinainy Jehovah hamian̈a atsika aminy hoavy? Akory nan̈amezany toky atsika fa tsy maintsy ho tanteraka fampan̈antinan̈anany aby zen̈y?

3. a) Ino fampan̈antinan̈a valera mare amy vahoakany Zan̈ahary? (Apokalypsy 21:3, 4) b) Ino raha volan̈inolo sasany lera atsika mikoran̈a zen̈y amindro?

³ Fampan̈antinan̈a hidinihintsika ty valera mare amy vahoakany Zan̈ahary man̈erantany. (Vakia Apokalypsy 21:3, 4.) Jehovah mampan̈anten̈a fa ho hisy fotoan̈a “fahafatesan̈a tsy ho hisy eky, alahelo tsy ho hisy, tarain̈y tsy ho hisy, tehotehoko tsy ho hisy.” Maro amintsika tia mampiasa andininteny mankahery io lera mitory aminolo ndreky lera man̈azava amindro karakory fiain̈ana amy Paradisa. Fa karakory ho sasany izikoa atsika fa mikoran̈a fampan̈antinan̈a zen̈y amindro? Iro mety mivolan̈a: “Mba posibla edy raha tsarabe zen̈y?”

4. a) Ino ma raha efa hainy Jehovah tsialohaloha? b) Ankoatrany nan̈amia fampan̈antinan̈a io, ino koa raha nataony Jehovah?

⁴ Tamy Jehovah nan̈iraka Jaona nanoratra fampan̈antinan̈a momba Paradisa io, efa hainy Jehovah fa atsika hikoran̈a aminolo momba izio lera mitory hafatra momba Fanjakan̈anany. Efa hainy Jehovah koa fa ho sarotro aminolo maro hino fampan̈antinan̈a ‘raha vaovao’ io. (Isaia 42:9; 60:2; 2 Kor. 4:3, 4) Ke akory mety an̈ampiantsika olo hatoky fa ho tanteraka iro hatsaran̈a koran̈iny Apokalypsy 21:3, 4 io? Avio akory koa hahavy atsika hatoky tsarabe Jehovah ndreky fampan̈antinan̈anany? Jehovah tsy vitany nan̈amia fampan̈antinan̈a mankahery be io fo fa mbala nambarany koa antony maventy mahavy atsika tôkony hatoky izio. Ino aby ma antony aby zen̈y?

5. Ino aby andininteny man̈ampy atsika hatoky fampan̈antinan̈any Zan̈ahary, avio ino raha volan̈indro io?

⁵ Hitantsika aminy andininy ty antony mahavy atsika matoky Paradisa hampan̈antinainy Jehovah, ho izy: ‘Karaha ty nivolan̈iny Araiky nipetraka tamy sezy fiandrianan̈a: “Ataoko vaovao raha jiaby.” Volan̈iny koa: “Sorata fa azo antoko ndreky marin̈y volan̈a aby zen̈y.” Ho izy taminaka koa: “Efa tanteraka zen̈y! Zaho Alfa ndreky Omega, fanombohany ndreky fifaran̈any.”’​—Apok. 21:5, 6a.

6. Nan̈ino volan̈a aby aminy Apokalypsy 21:5, 6 ao mahavy atsika hatoky mare fampan̈antinan̈any Zan̈ahary?

⁶ Nan̈ino ma andininy aby io man̈ampy atsika hatoky tsarabe fampan̈antinan̈any Zan̈ahary? Karaha ty raha volan̈iny boky Apokalypsy momba andininteny aby io: “Jehovah mira man̈ano sin̈e taratasy man̈amia antoko momba iro fitahian̈a mbala ho avy aby io.” b Fampan̈antinan̈any Zan̈ahary io hita aminy Apokalypsy 21:3, 4 ao. Fa aminy andininy faha-5 ndreky faha-6, izy man̈ano sin̈atira han̈amezan̈a toky atsika fa fampan̈antinan̈anany io tsy maintsy ho tanteraka. Alo hizahavantsika tsarabe karakory volan̈a ampiasainy Jehovah an̈amezan̈a toky atsika io.

7. Azovy mikoran̈a aminy andininy faha-5, avio nan̈ino raha zen̈y ten̈a miavaka?

⁷ Karaha ty fanombohany fan̈amezantoky baka amy Zan̈ahary io: ‘Karaha ty nivolan̈iny Araiky nipetraka tamy sezy fiandrianan̈a.’ (Apok. 21:5a) Miavaka volan̈a aby io fotony intelo fo Jehovah, amy bokiny Apokalypsy ao, mivolan̈a mivantan̈a. Ke io araiky amy zen̈y. Jehovah foeky man̈amia toky iô, fa tsy anjely na Jesosy. Zen̈y mahavy atsika afaka matoky tsarabe volan̈a man̈araka izio. Nan̈ino? Fotony Jehovah “tsy mahay mavandy.” (Tit. 1:2) Dikanizen̈y, volan̈a aby aminy Apokalypsy 21:5, 6 io tsy maintsy ho tanteraka.

8. Ino ma raha volan̈iny Jehovah man̈aboaka fa tsy maintsy ho tanteraka fampan̈antinan̈anany? (Isaia 46:10)

⁸ Baka tio, Zan̈ahary nivolan̈a: ‘Ataoko vaovao raha jiaby.’ Marin̈y ndraiky fa mbala aminy amaray Jehovah vo han̈ano raha aby zen̈y. Kanefa efa azony antoko tsarabe fa fampan̈antinan̈anany io tsy maintsy ho tanteraka. Ke zen̈y mahavy izy mivolan̈a izio efa mira raha tanteraka in̈y.​—Vakia Isaia 46:10.

9. a) Ino ma raha aroe ataony Jehovah baka han̈atantirahan̈a volan̈anany ‘ataoko vaovao raha jiaby’? b) Hatao karakory ‘lan̈itry’ ndreky ‘tany’ amy zioty io?

⁹ Jehovah nivolan̈a: ‘Ataoko vaovao raha jiaby.’ (Apok. 21:5) Ino ma dikanizen̈y? Amy toko io, volan̈a aby io manondro raha aroe ataony Jehovah. Ino aby ma zen̈y? Izy misolo ndreky man̈avao. Voanalohany, ino ma raha handeha hisoloany Jehovah? Karaha ty raha volan̈iny Apokalypsy 21:1: ‘Efa loso lan̈itry taloha ndreky tany taloha.’ ‘Lan̈itry taloha’ io fitondrampanjakan̈a ambany fahifan̈any Satana ndreky iro demony aby io. (Mat. 4:8, 9; 1 Jaona 5:19) Amy Baiboly ao, ‘tany’ mety ivolan̈ana olombelon̈o mipetraka ambony tany eto. (Gen. 11:1; Sal. 96:1) Ke ‘tany taloha’ io manondro olo ratsy fan̈ahy aby io. Jehovah tsy zisty han̈amboamboatra fo amy ‘tany’ ndreky ‘lan̈itry’ amy zioty io fa hisoloany tanteraka. Iro io hisoloany ‘lan̈itry vaovao ndreky tany vaovao’, dikanizen̈y hisoloany fanjakan̈a vaovao ndreky vahoaka vaovao.

10. Ino ma raha handeha hataony Jehovah vaovao?

¹⁰ Hitantsika aminy Apokalypsy 21:5 ao koa raha handeha hataony Jehovah vaovao io. Aleva onon̈o fa Jehovah tsy nivolan̈a karaha ty: ‘Zaho man̈ano raha vaovao jiaby’, fa ho izy: ‘Ataoko vaovao raha jiaby.’ Hataony Jehovah mira vaovao in̈y tany ndreky olombelon̈o fotony hampodiny lavorary ndraiky. Eraka raha efa nambarany Isaia, tany jiaby hanjary tsara mare mira zaridainy Edena. Hataony vaovao koa atsika fotony izy hampajanga tanteraka olo jiaby. Ho janga aby olo malemy, olo jamba, olo maren̈iny, avio firaka aminolo maty himpody hivilomin̈y ndraiky.​—Isaia 25:8; 35:1-7.

11. Ino ma raha nirahiny Jehovah nataony Jaona, avio ino antony?

¹¹ Ino koa raha hafa nivolan̈iny Zan̈ahary han̈amezan̈a toky atsika? Jehovah nivolan̈a tamy Jaona: ‘Sorata fa azo antoko ndreky marin̈y volan̈a aby zen̈y.’ (Apok. 21:5) Jehovah tsy zisty nan̈iraka Jaona ‘hanoratra’ fo fa nambarany koa antony. Ho izy: ‘Azo antoko ndreky marin̈y volan̈a aby zen̈y.’ Dikanizen̈y, ten̈a mety atokisan̈a volan̈a Zan̈ahary. Nakiry izy, Jaona nan̈eky ‘nanoratra’ volan̈a aby io. Ke vokany, atsika afaka mamaky fampan̈antinan̈any Zan̈ahary momba Paradisa avio afaka misaintsain̈y hatsaran̈a jiaby miambin̈y atsika aminy amaray.

12. Nan̈ino ma Jehovah nivolan̈a: ‘Efa tanteraka zen̈y!’

¹² Ino raha nivolan̈iny Zan̈ahary baka tio? ‘Efa tanteraka zen̈y!’ (Apok. 21:6) Nan̈ino ma Jehovah nivolan̈a fa efa tanteraka iro fampan̈antinan̈a aby io? Fotony tsisy raha mahavita misakana izy tsy han̈atanteraka fikasan̈anany. Jehovah baka tio koa nivolan̈a raha hafa ahafahantsika matoky fa ho tanteraka ankitin̈y raha zen̈y. Ino izio?

13. Nan̈ino ma Jehovah nivolan̈a: ‘Zaho Alfa ndreky Omega’?

¹³ Efa nikoran̈intsika taloha tio fa intelo aby Jehovah nivolan̈a tamy fahitan̈a nazony Jaona io. (Apok. 1:8; 21:5, 6; 22:13) Isaka teteky, Jehovah nivolan̈a karaha ty: ‘Zaho Alfa ndreky  Omega.’ Litera voanalohany aminy alfabe griky alfa io, fa omega ndraiky litera farany. Izikoa izy fa nivolan̈a fa izy ‘Alfa ndreky Omega’, tiany Jehovah aboaka atsika baka amy zen̈y fa izikoa izy fa manomboko raha araiky, izio tsy maintsy hankifainy firaka amy farany.

14. a) Ombian̈a ma Jehovah mira nivolan̈a “Alfa”, avio ombian̈a izy mira hivolan̈a “Omega”? b) Man̈amia atsika toky momba ino Genesisy 2:1-3?

¹⁴ Jehovah koa fa baka namoron̈o Adama ndreky Eva, nivolan̈iny tamindro ino fikasan̈anany momba olombelon̈o ndreky tany. Karaha ty volan̈iny Baiboly: “Zan̈ahary nitsodrano iro karaha ty: ‘Irarian̈a anaro hanan̈a taranaka avio ho maro, baka tany ty ho feno olo. Anaro hamehy tany ty.’” (Gen. 1:28) Jehovah koa fa baka nivolan̈a zen̈y, izy nira nivolan̈a “Alfa.” Ke fikasan̈anany, tiany hisy olo lavorary sady man̈araka volan̈a Zan̈ahary, taranaka Adama ndreky Eva, hameno tany ty avio han̈ova izio hanjary Paradisa. Lera fikasan̈anany zen̈y tanteraka, Zan̈ahary mira mivolan̈a “Omega.” Jehovah koa fa baka namoron̈o ‘lan̈itry ndreky tany avio raha jiaby amindro io’, izy nivolan̈a raha man̈aboaka fa tsy maintsy ho tanteraka fikasan̈anany. Ahitan̈a raha nivolan̈iny io amy Genesisy 2:1-3. (Vakia.) Jehovah nivolan̈a fa masin̈y andra fahafito. Ino ma dikanizen̈y? Dikanizen̈y, izikoa fa tapitry andra fahafito io efa tanteraka amy fomba feno fikasan̈any Jehovah momba olombelon̈o ndreky tany.

15. Nan̈ino karaha vitany Satana in̈y nandravan̈a fikasan̈any Zan̈ahary?

¹⁵ Adama ndreky Eva koa fa nikomy, iro nanjary panota avio namindra fahotan̈a ndreky fahafatesan̈a tamy taranakandro. (Rom. 5:12) Ke tamy zen̈y, karaha vitany Satana nandravan̈a fikasan̈any Zan̈ahary hahavy tany ty ho feno olo lavorary sady man̈araka  volan̈anany. Mira vitany Satana nampangin̈y Jehovah baka tsy hahavitany hivolan̈a “Omega.” Satana baka mety nieritreritry fa Jehovah tsy hahita fomba han̈atantirahan̈a fampan̈antinan̈anany. Fotony tan̈aty jerinany, mety tsy maintsy hivoneny Jehovah fo Adama ndreky Eva, avio izy mety hamoron̈o olo fivadiany hafa lavorary baka ho tanteraka fikasan̈anany momba olombelon̈o. Kanefa izikoa Zan̈ahary nan̈ano zen̈y, Devoly mety hivolan̈a fa Zan̈ahary pavandy. Nan̈ino? Fotony eraka raha koran̈iny Genesisy 1:28, Jehovah efa nivolan̈a taminy Adama ndreky Eva fa taranakandro hameno tany.

16. Nan̈ino ma Satana mety nieritreritry fa ho vitany hivolan̈a fa Jehovah tsy mahavita raha?

¹⁶ Ino koa ma raha hafa mety tan̈aty dinikiny Satana? Mety tan̈aty jerinany koa, tsy maintsy ambelany Jehovah hiteraka Adama ndreky Eva, fa zanakandro fo tsy ho lavorary foeky. (Mpito. 7:20; Rom. 3:23) Kanefa izikoa zanakandro tsy ho lavorary foeky, ho vitany Satana hivolan̈a fa Jehovah tsy mahavita man̈atanteraka fikasan̈anany. Nan̈ino? Fotony tany ty tsy ho loso Paradisa feno taranaka Adama ndreky Eva lavorary sady man̈araka volan̈a Jehovah.

17. Akory fomba nandaminany Jehovah fikomian̈any Satana ndreky olombelon̈o voanalohany, avio ino ho vokatranizen̈y amy farany? (Zahava koa sary.)

¹⁷ Tsy takatrany jeriny Satana foeky ino raha handeha hataony Jehovah. Ndray Satana avio Adama ndreky Eva nikomy, Jehovah mbala nahita fomba ten̈a tsara han̈atantirahan̈a fikasan̈anany. (Sal. 92:5) Nambelany Jehovah hiteraka Adama ndreky Eva, eraka raha efa nivolan̈iny in̈y, ke voaporofo fa izy tsy mavandy. Naboakany Jehovah koa fa tsisy raha mahavita misakana izy tsy han̈atanteraka raha efa nambarany. Nataony azo antoko fa tsy maintsy ho tanteraka fikasan̈anany, ke nataony raha hisiany ‘taranaka’ araiky handeha han̈avotro lan̈iany taranaka Adama ndreky Eva man̈araka volan̈a Zan̈ahary. (Gen. 3:15; 22:18) Taranaka io han̈amia ain̈inany hatao soron̈o han̈avotan̈a olombelon̈o. Tsy takatrany jeriny Satana foeky fandaharan̈a nataony Jehovah zen̈y. Nan̈ino? Fotony vidipan̈avotan̈a io vokatrany fitiavan̈a. (Mat. 20:28; Jaona 3:16) Satana baka tsy manan̈a toetry zen̈y. Izy tia ten̈a. Ke ino hatsaran̈a ho azo baka amy vidipan̈avotan̈a io? Amy farany Fanjakan̈a Arivo Taon̈ony Kristy, taranaka Adama ndreky Eva man̈araka volan̈a Zan̈ahary jiaby hanjary lavorary, ke iro hiain̈y amy Paradisa  ambony tany eraka fikasan̈any Jehovah in̈y. Jehovah amy fotoan̈a zen̈y hahavita hivolan̈a “Omega.”

18. Ino aby antoko telo namezany Zan̈ahary atsika? (Zahava koa efajoro “ Antony Telo Atokisantsika Fampan̈antinan̈any Jehovah.”)

¹⁸ Hitantsika tamy lahatsoratra ty nan̈ino atsika afaka matoky fa tany ty mbala hanjary Paradisa ndreky ino raha mety hikoran̈intsika aminolo baka iro hatoky raha zen̈y? Voanalohany, Jehovah lastio mampan̈anten̈a izio. Bokiny Apokalypsy mivolan̈a: ‘Karaha ty nivolan̈iny Araiky nipetraka tamy sezy fiandrianan̈a: “Ataoko vaovao raha jiaby.”’ Izy tsy vitany man̈iry han̈ano zen̈y fo fa, izy koa manan̈a fahendrena ndreky angovo han̈atantirahan̈a fampan̈antinan̈anany. Faharoe, hainy Jehovah fa izikoa raha efa nivolan̈iny tsy maintsy tanteraka. Zen̈y nahavy izy nivolan̈a: ‘Azo antoko ndreky marin̈y volan̈a aby zen̈y. ... Efa tanteraka zen̈y!’ Fahatelo, Jehovah koa fa manomboko raha araiky, izio tsy maintsy hankifainy. Zen̈y nahavy izy nivolan̈a: ‘Zaho Alfa ndreky Omega.’ Habaribariny Jehovah fa Satana io pavandy ndreky tsy mahavita misakana Izy tsy han̈atanteraka fikasan̈anany.

19. Ino raha mety ataonao izikoa sarotro aminolo mino Paradisa ampan̈antinainy Zan̈ahary?

¹⁹ Aleva onon̈o fa hahaiho fatatra fo fatokisanao Jehovah, isaka anao mikoran̈a aminolo raha nivolan̈iny Jehovah han̈amezan̈a toky atsika fa tsy maintsy ho tanteraka fampan̈antinan̈anany. Ke ino raha mety ataonao izikoa misy olo mivolan̈a aminao “mba ho posibla edy raha tsarabe zen̈y?”, lera izy hamakianao fampan̈antinan̈a mankahery momba Paradisa aminy Apokalypsy 21:4 ao? Nan̈ino izikoa vakinao ndreky hazavainao aminany andininy faha-5 ndreky faha-6? Aboaha izy fa nataony Jehovah sin̈atira lastio fampan̈antinan̈anany io baka han̈aboahan̈a fa ten̈a azo antoko izio.​—Isaia 65:16.