Anaro Man̈angy, Ikia Fahifan̈any Vadinaro
Anaro Man̈angy, Ikia Fahifan̈any Vadinaro
“Lelahy lohany man̈angy.”—1 KOR. 11:3.
1, 2. a) Ino raha nisoratiny apostoly Paoly momba lamin̈y napetrakany Jehovah? b) Ino fan̈ontanian̈a hidinihintsika amy lahatsoratra ty ato?
APOSTOLY Paoly nanoratra karaha ty: “Kristy lohany lelahy jiaby”, avio “Zan̈ahary lohany Kristy.” (1 Kor. 11:3) Jehovah nametraka lamin̈y io. Hitantsika tamy lahatsoratra taloha in̈y fa ravoravo mare Jesosy nan̈eky fahifan̈any Jehovah Zan̈ahary, fotony taminany izio voninahitry maventy. Hitantsika koa fa Kristy lohany lelahy kristianin̈y. Izy tsara fan̈ahy, mahay mahinakinaka, malemy fan̈ahy, baka io tsy tia ten̈a foeky. Tokony hangala tahaka toetrinany aby zen̈y koa iro lelahy kristianin̈y aby io, izikoa fa mifandray aminolo, intsaka eky amy vadindro.
2 Ke azovy fo ma lohany man̈angy? Paoly nanoratra karaha ty: “Lelahy lohany man̈angy.” (1 Kor. 11:3) Karakory tokony ho fahitany man̈angy volan̈a zen̈y? Mbala tafiditry amy toro lalan̈a io koa ma vadiny tsy Vavolombelon̈o? Dikanizio ma man̈angy tsy mahazo man̈ambara hevitrinany foeky izikoa fa misy fanapahankevitry alain̈y? Karakory ma man̈angy man̈eva hahazo dera zen̈y?
“Zaho handeha han̈amboatra pitahitahy” ninany
3, 4. Nan̈ino ma olo fivadiany mila man̈araka lamin̈y napetrany Jehovah?
3 Efa nalaminy Jehovah azovy olo manan̈a fahifan̈a an̈atiny fianakavian̈a. Zan̈ahary koa fa baka niasa Adama, karaha ty raha nivolan̈iny Jehovah Zan̈ahary: “Tsy tsara izikoa lelahy io tsisy naman̈a. Handeha han̈amboarako pitahitahy mifan̈araka aminany izy, hameno izy.” Ke izikoa fa vita famoron̈any Zan̈ahary i Eva, ravoravo mare Adama nahazo naman̈a ndreky panahitahy, ke ho izy: “Ty zalahy ten̈a taolan̈a baka amy taolan̈anaka ndreky nofotro baka amy nofotronaka ankitin̈y.” (Gen. 2:18-24) Ten̈a tsara raha niambin̈y Adama ndreky Eva. Iro baka hanjary raimandreninolo jiaby. Lavorary taranakandro salakady hiain̈y tsisy farany amy Paradisa ambony tany.
4 Fa iro olobentsika voanalohany io nivadiky, ke nanjary tsy voahaja tsara eky lamin̈y napetraka Jehovah in̈y. (Vakia Romanina 5:12.) Fa ndray zen̈y, lamin̈y io mbala tsy niova fo firaka zioty. Izikoa ampiasainy lelahy tsarabe fahifan̈a anan̈any io, sady man̈angy koa mifen̈y man̈aja fahifan̈anany, hahazo hatsaran̈a iro roe fivadiany salakady ho sambatra vadian̈andro. Hanjary mira raha tsapany Jesosy koa raha tsapandro. Talohany naviany tambony tany tatỳ, Jesosy efa nan̈eky fahifan̈any Jehovah, ke ‘ravoravo fo izy tankilanany.’ (Ohab. 8:30) Na lelahy na man̈angy samy tsy lavorary, ke tsy afaka hanjary vady ten̈a tsara zen̈y. Fa ndray zen̈y, izikoa iro mifen̈y fo man̈ano erakany vitandro han̈ajan̈a lamin̈y io, iro ho sambatra fo.
5. Nan̈ino ma olo fivadiany mila man̈araka torohevitry amy Romanina 12:10?
5 Baka ho sambatra vadian̈andro, olo fivadiany mila man̈araka torohevitry amezany Baiboly atsika ty: “Irarian̈a anaro hifandray ampô mare ndreky hifankatia karaha ataonolo pirahalahy kibo araiky. Irarian̈a anaro ho voanalohany amy fifan̈amezan̈a voninahitry.” (Rom. 12:10) Mila mifen̈y mare iro roe fivadiany mba ho ‘tsara fan̈ahy, hahinakinaka ndreky ten̈a han̈ambela hadisovan̈a.’—Efes. 4:32.
Izikoa lelahy io tsy Vavolombelon̈o
6, 7. Ino vokany izikoa ranabavy mifen̈y fo man̈aja vadiny tsy panompony Jehovah?
6 Fa karakory ndraiky tokony hataony man̈angy izikoa vadiny io tsy panompony Jehovah? Baiboly mamaly karaha ty: “Anaro man̈angy mila man̈eky vadinaro fo, ndray izy tsy man̈araka volan̈a masin̈y io, baka izy voataon̈onaro tsy amy volan̈a, fa amy raha tsara ataonaro, fotony hitany fa anaro madio fitondranten̈a ndreky man̈aja izy mare.”—1 Pet. 3:1, 2.
7 Volan̈a Zan̈ahary man̈ambara fa man̈angy mila man̈aja vadiny fo, ndray izio tsy panompony Jehovah. Mahita fitondranten̈a tsarany man̈angy io izy, ke mety ho tiany ho hay ino antony. Ke izy mety ho tihahay raha maromaro momba finoan̈any vadiny, ary mety han̈eky fahamarin̈ana foeky izy amy farany.
8, 9. Ino raha mety ataony ranabavy, izikoa tsisy vokany amy vadiny fitondranten̈a tsara anan̈any io?
8 Fa karakory fo basy izikoa tsisy vokany amy lelahy io fitondranten̈a tsara anan̈any vadiny? Baiboly mandrisiky viavy han̈aboaka toetry tsara fo, nata tsy mora man̈ano zen̈y. Ohatra, 1 Korintianina 13:4 mivolan̈a: “Fitiavan̈a io maharidraha.” Ke tsara izikoa man̈angy mifen̈y fo “hanetry ten̈a ndreky halemy fan̈ahy fo, hanampaharetan̈a”, ke han̈aboaka fitiavan̈a fo man̈oloan̈a toejavatra misy. (Efes. 4:2) Ke fan̈ahy masin̈iny Zan̈ahary han̈ampy anao hahavita han̈aboaka toetry tsara fo, ndray tsy mora raha mahazo anao.
9 Paoly nanoratra: “Baka aminy araiky man̈amia angovo zaho in̈y mahavy zaho manan̈a angovo hindesin̈y hiatriky karazandraha jiaby.” (Fil. 4:13) Fan̈ahy masin̈y han̈ampy anao hahavita han̈ano raha maro mety tsy posibla ho vitanao foeky. Mety tihamaly faty ohatra anao, izikoa vadinao mampijaly anao mare. Kanefa Baiboly man̈iraka atsika karaha ty: “Na azovy nan̈ano ratsy taminaro na azovy, aza mamaly faty. ... Fotony efa voasoratra fa: ‘Anjaranaka mamaly, ke zaho hamaly’, volan̈iny Jehovah. ” (Rom. 12:17-19) Amy 1 Tesalonianina 5:15 koa mivolan̈a: “Tandrema tsao misy mamaly ratsy ny ratsy, fa mifen̈a fo han̈ano raha tsara aminaro samy anaro, ndreky aminolo hafa.” Baka amy fan̈ampiany fan̈ahy masin̈y, ho vitanao han̈ano raha tsy posibla ho vitanao zaraiky. Ke mivavaha! Angataha Jehovah han̈amia anao fan̈ahy masin̈inany han̈ampian̈a anao.
10. Karakory nataony Jesosy izikoa fa nisy olo nivolan̈a na nan̈ano raha nampalahelo izy?
10 Jesosy nan̈ambela ohatra tsara nintsika, izikoa misy olo mivolan̈a na man̈ano raha mampalahelo atsika. Mivolan̈a 1 Petera 2:23 fa “izikoa fa nisy olo nanihitihy izy, izy tsy nanihitihy iro. Izy koa fa nijaly, izy tsy nasiaka fa nankin̈iny taminy araiky mitsara erakany hitsiny fo fiain̈ananany.” Atsika hampirisihin̈y hangala tahaka modely tsara nambelany io. Raha ratsy ataonolo io aza ambela hampameloko anao. Kristianin̈y ampirisihin̈y mba ‘hahay hahinakinaka, hanetry ten̈a, ndreky tsy hamaly ratsy ny ratsy’, avio tsy tokony ‘tsy han̈isy fotiny olo man̈ambanimbany iro.’—1 Pet. 3:8, 9.
Anao ma tsy mahazo mivolan̈a hevitrinao?
11. Ino tombontsoa miavaka anan̈any man̈angy kristianin̈y sasany?
11 Dikany man̈aja fahifan̈any vady zen̈y ma man̈angy tsy mahazo man̈ambara hevitrinany foeky mikasiky raha momba fianakavian̈andro na raha hafa? Tsy zen̈y. Karaha lelahy, maro tombontsoa namezany Jehovah man̈angy. An̈isanizen̈y ziô, man̈angy sasany amindro 144 000 nitindren̈y hanjary panjaka ndreky pisoron̈o andan̈itry an̈y. Iro hiaraka amy Kristy lera izy hitondra tany ty. Voninahitry maventy ankitin̈y zen̈y! (Gal. 3:26-29) Dikanizen̈y, namezany Jehovah anjara asa maventy koa man̈angy.
12, 13. Man̈ameza ohatra man̈aboaka fa nisy man̈angy koa naminan̈y.
12 Taloha, ohatra, nisy man̈angy naminan̈y. Efa nivolan̈a tsialohaloha Joela 2:28, 29: “Handatsahako fan̈ahinaka aby karazan̈a nofotro jiaby, ke zanakanaro lelahy ndreky zanakanaro man̈angy haminan̈y ... Handatsahako fan̈ahinaka aby firaka aminy andevonaka lelahy ndreky man̈angy, aminandra zen̈y.”
13 Man̈angy koa sasany tamindro pianatrany Jesosy 120 nivory ta Jerosalema, tamy Pantekoty taon̈o 33. Iro jiaby tan̈aty tran̈o io tao samby nilatsahany fan̈ahy masin̈y aby. Ke nampihariny Petera tamindro lelahy ndreky man̈angy aby io faminanian̈any Joela in̈y. Ho izy: “Ke karaha ty raha nirahin̈y nivolan̈iny Paminan̈y Joela: ‘Aminy andra farany’, ho Jehovah, ‘handatsahako tapany amy fan̈ahinaka olo jiaby, ke zanakanaro lelahy ndreky zanakanaro viavy samby haminan̈y. ... Ary amy fotoan̈a zen̈y koa, andevonaka lelahy ndreky andevonaka man̈angy koa handatsahako tapany amy fan̈ahinaka, ke iro haminan̈y.’ ”—Asa. 2:16-18.
14. Ino anjara asany man̈angy tamy fiparitahany fivavahan̈a kristianin̈y, tamy taonjato voanalohany?
14 Tamy taonjato voanalohany, man̈angy an̈isany nandray anjara maventy tamy fan̈aparitahan̈a fivavahan̈a kristianin̈y. Iro nitory momba Fanjakan̈any Zan̈ahary io taminolo, sady nan̈ano raha mifandray aminy asa fitorian̈a. (Lioka 8:1-3) “Panompo amy fiangonan̈a a Kenkrea an̈y”, ohatra, nikahiany apostoly Paoly i Foiby. Maro koa an̈arany ranabavy tsy nivadiky, nitonon̈iny Paoly tamy taratasy nan̈anaovany samitsara piaramanompo taminany, an̈isanizen̈y “Tryfena ndreky Tryfosa, man̈angy miasa mare amy Tompo.” Iô koa “Persy, ranabavy ten̈a tiantsika mare, fotony izy niasa mare tamy Tompo.”—Rom. 16:1, 12.
15. Aminy andrantsika zioty, ino anjara asany man̈angy amy fiparitahany fivavahan̈a kristianin̈y?
15 Aminy andrantsika zioty koa, man̈angy aby ankamaraozandro pitory mandilatrany fito tapitrisa man̈ambara vaovao tsara momba Fanjakan̈any Zan̈ahary, man̈erantany. (Mat. 24:14) Misy amindro io tsaiky, tanora, olobe, avio matoe. Maro amindro io koa panompo manontolo andra, misionera, ndreky Betelita. Karaha ty hira nataony Davida: “Baka amy Jehovah hiboahany iraka, avio tafiky maventy man̈angy man̈ambara vaovao tsara aby io.” (Sal. 68:11) Ten̈a marin̈y volan̈a aby io! Jehovah ten̈a mankasitraka man̈angy mitory vaovao tsara ndreky mandray anjara amy fan̈atantirahan̈a sitraponany. Ke man̈angy kristianin̈y ndray irahin̈y man̈aja fahifan̈a, iro mahazo mikoran̈a hevitrindro fo koa.
Man̈angy aroe nan̈ambara hevitrindro
16, 17. Karakory ahitan̈a baka aminy ohatrany Saraha in̈y fa man̈angy afaka man̈ambara hevitrindro?
16 Ndray Jehovah fo man̈amia tombontsoa maro niny man̈angy, tsy tokony mba man̈ontany hevitriny vadiny koa ma lelahy izikoa fa hangala fanapakevitry maventy? Misy jery izy izikoa man̈ano zen̈y. Baiboly mitantara fa navy nisy man̈angy nivolan̈a hevitrinany na nan̈ano raha tsara fo, ndray izy tsy nirahiny vadiny nan̈ano zen̈y aby. Ty misy ohatra aroe.
17 Nivolan̈a taminy Abrahama fo, ohatra, Saraha fa tokony hiroasin̈y an̈y Hagara ndreky zanany fotony iro tsisy fan̈ajan̈a. “Ten̈a nampaneloko Abrahama raha zen̈y.” Fa Jehovah ndraiky nivolan̈a taminany: “Aza atao mampameloko anao volan̈a Saraha momba tsaiky io ndreky andevovavinao io. Tandrin̈esa volan̈anany.” (Gen. 21:8-12) Ke Abrahama nan̈araka volan̈a Jehovah. Nitandrin̈esany raha nivolan̈iny Saraha, avio nataony raha nangatahany.
18. Ino ma raha nataony Abigaila?
18 Iritrireta koa baka Abigaila, vadiny Nabala. Tamy Davida nilefa helokony Saoly panjaka in̈y, izy nidoko marikitry tany nisy ondrikondrikiny Nabala. Fa izy ndreky olonany tsy nandrava fanan̈any Nabala, fa niaro izio fo. Ndray zen̈y, Nabala “nasiaka ndreky ratsy jery” sady “nan̈adary mare” taminy olony Davida. Izy ten̈a “olo tsy manjary aminy ankitin̈y” sady ‘tsy nety nikoran̈ana foeky.’ Olony Davida aby io izikoa fa nangataka hanin̈y taminany, tsy namezany foeky. Ke akory nataony Abigaila izikoa fa ren̈iny raha nandalo io? Izy tsy nivolan̈a tamy Nabala, fa loso izy “nandeha nangala mofo 200, avio sajoa maventy aroe feno divain, ondrikondriky dimy efa voakarakara, voambary natôno indiminy seha, mofo zato vita tamy rezain maiky, baka io mofo 200 vita taminy aviavy nipotserin̈y.” Avio izio namezany Davida ndreky olo niaraka taminany. Nety ma raha nataony Abigaila in̈y? Baiboly mivolan̈a fa “nivangoeny Jehovah i Nabala, ke naty.” Ke Abigaila baka tio nanjary vadiny Davida.—1 Sam. 25:3, 14-19, 23-25, 38-42.
Man̈angy man̈eva ‘hahazo dera’
19, 20. Karakory ma man̈angy man̈eva hahazo dera zen̈y?
19 Baiboly midera man̈angy man̈araka toro lalan̈any Jehovah. Bokiny Ohabolana mikoran̈a momba “vady tsara.” Ho izy: “Man̈angy karaha zen̈y misy valera mandilatra harandranomasin̈y. Vadiny matoky izy amy fô jiaby. Efa anan̈any vadiny valera jiaby. Raha tsara fo ataony man̈angy io amy vadiny fa tsy raha ratsy, aminy andra jiaby ivilomany.” Tsy zen̈y fo fa, “lera izy mivolan̈a, hita fa izy ten̈a hendry, sady lalàn̈any hatsarampan̈ahy fo amy vavany. Izy man̈aramaso raha mandalo an̈aty tokantran̈onany ao, sady tsy mihina mofony hakamoan̈a. Mitsangana zanakanany, ke mivolan̈a fa izy sambatra. Mitsangana koa vadiny midera izy.”—Ohab. 31:10-12, 26-28.
20 Viavy karakory ma ten̈a man̈eva hahazo dera? Ohabolana 31:30 mivolan̈a fa “bikabika tsara ndreky hatsaran̈any sora io mamitaka, fa man̈angy mavozo Jehovah fo hahazo dera.” Man̈angy mavozo Jehovah zen̈y von̈ono han̈eky fahifan̈a napetrany. “Lelahy lohany man̈angy” karaha ataony “Kristy lohany lelahy jiaby” ndreky “Zan̈ahary lohany Kristy.”—1 Kor. 11:3.
Ataova mersy Jehovah nan̈amia kadô
21, 22. a) Nan̈ino ma olo fivadiany tokony han̈ano mersy Jehovah? b) Nan̈ino atsika tokony han̈aja lamin̈y napetrakany Jehovah? (Zahava efajoro amy pazy 17.)
21 Maro raha mety han̈anaovanolo fivadiany mersy Jehovah! Iro baka nataony afaka ho sambatra. Ke iro mankasitraka mare Jehovah nan̈amia iro kadô io, fotony noho izio, iro afaka miaraka manompo Jehovah. (Rota 1:9; Mika 6:8) Jehovah ten̈a mahay ino raha mampasambatra tokantran̈o, fotony izy niasa izio. Ke areha fo taridalan̈anany, fa ‘haravoan̈a baka amy Jehovah io riba miaro anaro’, ndray mbala amy donia mikorontan̈a ty.—Neh. 8:10.
22 Lelahy kristianin̈y izikoa tia vadiny karaha ataony tia ain̈inany, izy halemy fan̈ahy aminany ndreky hikarakara izy tsarabe. Ke vadiny ho tia izy mare, sady han̈aja ndreky hanohan̈a izy. Fa ny ten̈a maventy, tokantran̈ondro ho modely tsara ke han̈amia voninahitry Zan̈ahary Jehovah.
Asa Azonao Onon̈o?
• Ino ma lamin̈y napetrakany Jehovah?
• Nan̈ino ma olo fivadiany tokony hifan̈amia voninahitry?
• Karakory tokony hataony man̈angy kristianin̈y amy vadiny tsy Vavolombelon̈o?
• Nan̈ino lelahy tokony han̈ontany hevitriny vadiny alohany han̈anaovan̈a fanapahankevitry maventy?
[Fan̈ontanian̈a]
[Efajoro]
Nan̈ino Ilain̈y Man̈aja Fahifan̈a?
Efa nisy lamin̈y nataony Zan̈ahary amy zavaboarinany manantsain̈y. Mahatsara olombelon̈o ndreky anjely raha zen̈y. Izio man̈amia iro fahafahan̈a han̈aboaka fa iro mifidy han̈eky Zan̈ahary ndreky han̈amia voninahitry izy. Ke iro miray sain̈y, miaraka manompo Jehovah.—Sal. 133:1.
Voahosotro aby io man̈eky fahifan̈any Kristy Jesosy. (Efes. 1:22, 23) Jesosy koa man̈eky fahifan̈any Jehovah “Araiky nahavy raha jiaby han̈eky izy in̈y, Zan̈ahary hanjary raha jiaby aminolo jiaby.” (1 Kor. 15:27, 28) Hita baka amy zen̈y fa olombelon̈o nanokanten̈a amy Zan̈ahary koa tokony han̈eky fahifan̈a misy an̈atiny fiangonan̈a ndreky fianakavian̈a! (1 Kor. 11:3; Heb. 13:17) Izikoa atsika man̈ano zen̈y, Jehovah hankasitraka atsika sady han̈amia hatsaran̈a atsika.—Isaia 48:17.
[Sary]
Vavaka io man̈ampy man̈angy kristianin̈y han̈aboaka toetry tsara
[Sary]
Ten̈a hankasitrahany Jehovah raha ataony man̈angy hampandihanan̈a asany Fanjakan̈any Zan̈ahary