Mahatsara Anao ma Fangalan̈a Diandian̈a Ataonao?

“Zahava tsarabe fo raha tiany Tompo.”​—EFES. 5:10.

1, 2. a) Akory han̈aboahany Baiboly fa tiany Jehovah atsika hankafỳ fiain̈ana? b) Izikoa atsika mihevitry fangalan̈a diandian̈a io “kadô baka amy Zan̈ahary”, tokony handrisiky atsika han̈ino raha zen̈y?

 MARO volan̈a amy Baiboly ao man̈aboaka fa atsika io tiany Jehovah ho velon̈o sady hankafỳ fiain̈ana. Ohatra, koran̈iny Salamo 104:14, 15 fa Jehovah mahavy “tany hamokatra hanin̈y” ndreky ‘divain mamparavoravo fonolombelon̈o, avio izy koa mampamendomendo sorandro. Baka io tany koa azahoanolo mety maty mofo iankin̈any fahin̈ana.’ Baka amy Jehovah mampaniry voandraha atsabo aby io, baka aminany menaka io, ndreky divain mahavelon̈o atsika. Fa divain io koa ‘mamparavoravo fontsika.’ (Mpito. 9:7; 10:19) Ten̈a tiany Jehovah ho ravoravo atsika, ke fontsika tiany ho “feno haravoan̈a.”​—Asa. 14:16, 17.

² Tsy diso atsika izikoa ndraikindraiky mba mangala fotoan̈a mizaha tsarabe iro voron̈o amy lan̈itry an̈y, ndreky iro folera maniry aby io. Mety man̈ano raha han̈adosoan̈a hakajoan̈a koa atsika, hamparavoravo atsika amy fiain̈ana. (Mat. 6:26, 28; Sal. 8:3, 4) Haravoan̈a amy fiain̈ana zen̈y “kadô baka amy Zan̈ahary.” (Mpito. 3:12, 13) Izikoa karaha zen̈y fiheverantsika fangalan̈a diandian̈a io, hampiasaintsika izio han̈amezan̈a voninahitry Zan̈ahary nan̈amia atsika kadô io. a

Maro Fangalan̈a Diandian̈a Mety Hatao fa Mila Mahay Mifidy Fo

3. Nan̈ino ma maro fangalan̈a diandian̈a mety hatao?

³ Mila mahay mipezipezy atsika. Maro baka fangalan̈a diandian̈a mety hataontsika, kanefa tsy ho vitantsika aby jiaby. Fotony nan̈ino? Fangalan̈a diandian̈a io baka mira hanin̈y fo. Tany jiaby samy aminy hanin̈y mahazatra izy. Hanin̈y tianolo amy tany araiky mety tsy ho tianolo amy tany hafa. Tsisy nihafa amy zen̈y koa, fangalan̈a diandian̈a tianolo amy tany araiky mety tsy ho tianolo amy tany hafa. Nata Kristianin̈y mipetraka amy tany araiky, mety ho samy isany fangalan̈a diandian̈a tiandro. Sasany mety ho tia mandrimandry mamaky boky, fa amy sasany ndraiky raha zen̈y mampaempaka. Misy koa olo tia misaoma bisikilety, fa amy sasany ndraiky raha zen̈y mampakajo. Hitantsika baka amy zen̈y fa maro fangalan̈a diandian̈a mety hataonolo, avio olo samy amy raha tiany.​—Rom. 14:2-4.

4. Nan̈ino ma atsika mila mahay mifidy fangalan̈a diandian̈a? Hazavà aminy ohatra.

⁴ Fa atsika nata afaka mifidy zay fangalan̈a diandian̈a tiantsika, zen̈y tsy mivolan̈a fa mety aby zay tiantsika aminany io. Karaha ataony hanin̈y tio in̈y fo izio. Atsika ndray tia hanin̈y isankarazany, atsika tsy mety hihina hanin̈y montraka. Olo lefaka fo mihina hanin̈y karaha zen̈y. Tsy basinizen̈y koa fa mamparary mihina hanin̈y efa robaka. Ke atsika ndray afaka mifidy fangalan̈a diandian̈a tiantsika, atsika tsy han̈ano fangalan̈a diandian̈a mety hahafaty atsika, na saoma mafana, avio fangalan̈a diandian̈a feno fitondranten̈a ratsy. Tsy mifan̈araka amy toro lalan̈a Baiboly koa raha zen̈y, sady mety handrobaka vatan̈antsika ndreky fihavan̈antsika amy Zan̈ahary. Ke atsika koa fa hifidy fangalan̈a diandian̈a, mila dinihintsika tsialohaloha ino fangalan̈a diandian̈a io, avio mahatsara atsika ma izio sa tsy mahatsara atsika. (Efes. 5:10) Akory han̈anaovantsika zen̈y?

5. Akory hahaizantsika fangalan̈a diandian̈a mifan̈araka amy fitsipikiny Zan̈ahary?

⁵ Izikoa tiantsika hamparavoravo Jehovah fangalan̈a diandian̈a ataontsika, avio izikoa tiantsika hahazo hatsaran̈a baka amizio, mila ataontsika mifan̈araka tsarabe amy fitsipikinany izio. (Sal. 86:11) Misy raha telo tsara ataonao listy, ke mila zahavanao isaka anao mieritreritry han̈ano fangalan̈a diandian̈a araiky. Ty iro fan̈ontanian̈a telo zen̈y: Ino, ombian̈a ndreky azovy. Hazavaintsika tsiaraikiaraiky iro io.

Ino ma Fangalan̈a Diandian̈a Io?

6. Fangalan̈a diandian̈a karakory ma tsy tokony hataontsika foeky? Nan̈ino?

⁶ Alohany anao hifidy fangalan̈a diandian̈a araiky, ty fan̈ontanian̈a voanalohany tokony hapetrakanao: ‘Ino ma fangalan̈a diandian̈a tiako hatao io?’ Fa baka hahitanao valiny, tsara tsy adin̈anao fa misy karazany aroe karazan̈a fangalan̈a diandian̈a io. Misy fangalan̈a diandian̈a tsy tokony hatao foeky. Fa araiky faharoe ndraiky miankiny amy feony fieritreretan̈a. Karakory ma araiky voanalohany io? Izio fangalan̈a diandian̈a fataonolo amy donia ty. Tsy mifan̈araka amy lalàn̈a ndreky fitsipikiny Zan̈ahary foeky izio. (1 Jaona 5:19) Kristianin̈y tsy mety han̈ano fangalan̈a diandian̈a karaha zen̈y foeky. An̈atinizen̈y fangalan̈a diandian̈a misy hakafirianan̈a, olo maloto fitondranten̈a, lelahy samy lelahy na man̈angy samy man̈angy mifanambady, sary vetaveta, ndreky fifandraisan̈a amindro demony aby io. (1 Kor. 6:9, 10; vakia Apokalypsy 21:8.) Tiantsika haboaka amy Jehovah fa atsika ‘tsy tia raha ratsy’, ke atsika tsy mety han̈ano fangalan̈a diandian̈a karaha zen̈y, na misy olo namantsika man̈ano izio, nata atsika zaraiky fo.​—Rom. 12:9; 1 Jaona 1:5, 6.

7, 8. Man̈ameza ohatra han̈azavan̈a akory hahaizantsika hifidy fangalan̈a diandian̈a.

⁷ Karazan̈a fangalan̈a diandian̈a araiky faharoe ndraiky, tsisy lalàn̈a mivantan̈a mandrova fan̈anaovan̈a izy. Ke alohany olo araiky han̈ano izio, izy mila mandiniky tsarabe antsendriky tsao tsy mifan̈araka aminy hevitriny Jehovah izio. (Ohab. 4:10, 11) Avio, baka hadio fo eritreritrinany, izy mila mangala fanapahankevitry tsara. (Gal. 6:5; 1 Tim. 1:19) Fa karakory ma han̈anaovan̈a zen̈y? Diniha baka ty: Izikoa atsika mba tihan̈andran̈a hanin̈y tsiary nohanintsika, tiantsika ho hay raha jiaby nataondro tan̈atinizio. Karaha zen̈y koa amy resaka fangalan̈a diandian̈a. Mila haintsika ino aby ma raha an̈atiny fangalan̈a diandian̈a tiantsika hatao io, zay atsika vo manapakevitry han̈ano sa tsy han̈ano izio.​—Efes. 5:17.

⁸ Ohatra, anao mety tia man̈ano spaoro, fotony izio mahasalama ndreky mahavy olo havilavila. Fa izy ndraiky edy, anao mila mandiniky tsara. Misy aminany io baka mahavy olo tia mifan̈oesa, kafiry, maratra ndreky tia tanindrazan̈a avio man̈ano fety tsy avoafehy. Ke anao koa fa baka mandiniky tsarabe karaha zen̈y, hazava aminao fa spaoro karaha zen̈y tsy mifan̈araka amy Jehovah. Tsy basinizen̈y koa fa atsika mandeha mitory mandrisiky olo hihavan̈a ndreky hifankatia, ke atsika ndraiky man̈ano spaoro feno hakafirianan̈a? Tsy mifan̈araka amy raha koran̈intsika aminolo raha karaha zen̈y. (Isaia 61:1; Gal. 5:19-21) Fa izikoa ndraiky raha jiaby atao amy fangalan̈a diandian̈a io mifan̈araka tsarabe aminy hevitriny Jehovah, ho ravoravo ndreky hahazo angovo atsika koa fa baka man̈ano izio.​—Gal. 5:22, 23; vakia Filipianina 4:8.

Ombian̈a ma Anao Man̈ano Izio?

9. Ino ma raha ho haintsika baka amy fan̈ontanian̈a: ‘Ombian̈a ma han̈anaovako fangalan̈a diandian̈a tiako io?’

⁹ Ty fan̈ontanian̈a faharoe tokony hapetrakanao: ‘Ombian̈a ma han̈anaovako fangalan̈a diandian̈a tiako io? Ziska kelera ma han̈anaovako izio?’ Fan̈ontanian̈a araiky ino in̈y hahaizan̈a raha ten̈a an̈atiny fontsika ao, fa araiky ombian̈a io ndraiky hahaizanao ino raha ten̈a maventy amy fiain̈ananao. Ke akory fo hahaizanao asa mety na tsy mety lera han̈anaovanao fangalan̈a diandian̈a io?

10, 11. Nan̈ino ma hahavy atsika han̈isy erany lera han̈anaovantsika fangalan̈a diandian̈a volan̈a Jesosy amy Matio 6:33?

¹⁰ Ho Jesosy karaha ty tamindro pan̈aradia izy aby io: “Ke tiava Jehovah Zan̈aharinao amy fonao jiaby ndreky vatan̈anao jiaby ndreky jerinao jiaby ndreky angovonao jiaby.” (Mar. 12:30) Dikanizen̈y, tokony fitiavantsika Jehovah raha ten̈a maventy amy fiain̈anantsika. Akory han̈aboahantsika zen̈y? Amy fan̈arahantsika raha nivolan̈iny Jesosy ty: “Ke Fanjakan̈anany ndreky fahamarin̈ananany fo tadiava voanalohany, fa ho azonaro edy raha jiaby zen̈y.” (Mat. 6:33) Nan̈ino ma andininy io hahavy atsika hahay fotoan̈a ndreky hamarozany lera hilanintsika amy fangalan̈a diandian̈a?

¹¹ Jesosy iô tsy nivolan̈a: ‘Lera anao malalaka vo mitady voanalohany Fanjakan̈a io, fa ‘Fanjakan̈a io tadiava voanalohany.’ Hainy Jesosy baka fa atsika mila tran̈o ndreky hanin̈y ndreky lamba sikinin̈y, avio mila mianatra, miasa, mangala diandian̈a, ndreky man̈ano raha hafa koa. Fa izy fo nivolan̈a fa Fanjakan̈a io mila ataontsika voalohantoeran̈a. (1 Kor. 7:29-31) Dikanizen̈y, Fanjakan̈a io fa tsy fangalan̈a diandian̈a raha tokony hataontsika voalohantoeran̈a amy fiain̈anantsika. Ke hahatsara atsika fangalan̈a diandian̈a ataontsika, izikoa ataontsika amy toeran̈a faharoe fo ndreky hiferintsika lera han̈anaovantsika izy.

12. Izikoa fangalan̈a diandian̈a koran̈iny, akory han̈arehantsika Lioka 14:28?

¹² Safe alohany atsika han̈ano fangalan̈a diandian̈a araiky, mila mipetraka antsendriky atsika mikonty lera hilanintsika amizio. (Lioka 14:28) Atsika koa fa baka man̈ano zen̈y, iô atsika vo manapakevitry asa ten̈a mety lanin̈a amizio fotoan̈antsika sa tsy mety. Fa izikoa fangalan̈a diandian̈a tiantsika hatao io tsy hahavitantsika han̈ano raha ten̈a maventy aby io, dikanizen̈y tsy mety fotoan̈a tiantsika han̈anaovan̈a izy. Atsika baka mila man̈ano fianaran̈a manokan̈a, fotoampivavahan̈any fianakavian̈a, mandeha mivory, ndreky mila mitory. (Mar. 8:36) Fa izikoa fangalan̈a diandian̈a ataontsika io azahoantsika angovo sady ahavitantsika man̈ano voalohantoeran̈a Fanjakan̈a io, dikanizen̈y mety tsarabe lera an̈anaovantsika izio.

Azovy ma Hiaraka Hangala Diandian̈a Aminao?

13. Nan̈ino tokony hidinihintsika tsarabe olo hataontsika naman̈a amy fangalan̈a diandian̈a io?

¹³ Ty ndraiky fan̈ontanian̈a fahatelo: ‘Azovy ma hiaraka hangala diandian̈a aminaka io?’ Ten̈a maventy fan̈ontanian̈a io. Nan̈ino? Fotony arakaraka olo iarahanao mangala diandian̈a hahavy izio hampahivankivan̈a anao. Ravoravo atsika izikoa miaraka mihina aminolo maromaro. Karaha zen̈y koa izikoa atsika misy naman̈a miaraka mangala diandian̈a amintsika. Zen̈y mahavy olo maro tia miaraka aminolo maro izikoa fa mangala diadian̈a, sirto iro tanora aby io. Ke izikoa tiantsika ho ravoravo amy fangalan̈a diandian̈a hataontsika io, mila haintsika tsialohaloha azovy aby namantsika amizio, misy ahaizantsika olo tsy tokony hiarahan̈a na tokony hiarahan̈a.​—2 Tan. 19:2; vakia Ohabolana 13:20; Jak. 4:4.

14, 15. a) Izikoa resaka fifidianan̈a olo atao kamarady be koran̈iny, akory hangalantsika tahaka Jesosy? b) Ino aby fan̈ontanian̈a mila dinihintsika momba naman̈a tiantsika?

¹⁴ Hahavy atsika hahay hifidy naman̈a hiarahan̈a mangala diandian̈a koa ohatrany Jesosy. Rango tamy niasandro olo, Jesosy efa tia olombelon̈o edy. (Ohab. 8:31) Naboakany koa taminizy tambony tany teto fa izy ten̈a tia olo ndreky farandraha mahinakinaka olo eky. (Mat. 15:29-37) Fa ndray zen̈y, tsy olo jiaby kamaradibeny Jesosy. Karaha ty raha nivolan̈iny tamindro apostolinany 11 tsy nivadiky taminany aby io: “Kamaradiko anaro, izikoa anaro man̈araka didinaka.” (Jaona 15:14; zahava koa Jaona 13:27, 30.) Safe iro olo nan̈aradia izy ndreky nanompo Jehovah fo nataony Jesosy kamarady.

¹⁵ Ke aza adin̈a volan̈any Jesosy io, anao koa fa hifidy olo hataonao kamaradinao be. Man̈ontania ten̈a karaha ty: ‘Hitako amy volan̈a aboakany ndreky amy raha ataony ma fa izy man̈araka didiny Jehovah ndreky Jesosy? Izy ma mba man̈araka fitsipikiny Baiboly momba fitondranten̈a? Mba handrisiky zaho tsy hivadiky amy Jehovah ndreky han̈ano voalohantoeran̈a Fanjakan̈anany edy ma fikamaradianako aminany?’ Izikoa ia aby valiny fan̈ontanian̈a jiaby io, tsara iarahan̈a mangala diandian̈a olo io.​—Vakia Salamo 119:63; 2 Kor. 6:14; 2 Tim. 2:22.

Mba Pare Tsarabe edy Fangalan̈a Diandian̈a Fidiko Io?

16. Ino aby ma raha tokony hiritriretintsika, atsika koa fa hifidy fangalan̈a diandian̈a?

¹⁶ Atsika tio nandiniky fan̈ontanian̈a telo maventy: Ino, ombian̈a, avio azovy. Izikoa tiantsika hahatsara atsika fangalan̈a diandian̈a hataontsika, tokony hifan̈araka tsarabe amy fitsipikiny Baiboly valiny fan̈ontanian̈a telo aby io. Ke izikoa misy fangalan̈a diandian̈a tianao hatao, diniha ino ma izio? Dikanizen̈y, ‘Ino aby ma raha hatao amizio? Mahatsara anao ma izio sa handrobaka anao?’ (Ohab. 4:20-27) Avio iritrireta ombian̈a anao man̈ano izio? Dikanizen̈y, ‘Akory hamarozany lera ho laninao amizio? Lerany tsarabe sa be loatra?’ (1 Tim. 4:8) Farany aminjay, diniha koa azovy ma namanao amizio? Dikanizen̈y, ‘Olo tsara atao kamarady ma izio sa tsy tsara?’​—Mpito. 9:18; 1 Kor. 15:33.

17, 18. a) Akory ahaizanao izikoa mety tsarabe fangalan̈a diandian̈a araiky? Aminao manokan̈a, ino mba fanapahankevitry hiraisinao mikasiky fifidianan̈a fangalan̈a diandian̈a?

¹⁷ Izikoa tsy mifan̈araka amy fitsipikiny Baiboly valiny fan̈ontanian̈a telo aby io, dikanizen̈y tsy mety fangalan̈a diandian̈a tiantsika hatao io. Fa hahatsara atsika ndreky han̈amia voninahitry Jehovah fangalan̈a diandian̈a hataontsika, izikoa mifan̈araka tsarabe amy Baiboly valiny fan̈ontanian̈a telo aby io.​—Sal. 119:33-35.

¹⁸ Ke irarin̈a atsika jiaby hifidy tsarabe fangalan̈a diandian̈a hataontsika, han̈ano izio amy fotoan̈a mety tsarabe, ndreky hifidy tsarabe olo hiarasantsika amizio. Irarian̈a koa tsika jiaby han̈araka torohevitry amy Baiboly ty: “Anaro na mihinan̈a na migiaka, na ino na ino raha ataonaro, ataova han̈amezan̈a voninahitry Zan̈ahary raha jiaby.”​—1 Kor. 10:31.

[Lamariky amy pazy ambany]

Akory Han̈azavanao Ty?

Anao koa fa hifidy fangalan̈a diandian̈a, akory han̈arehanao raha koran̈iny andininy aby ty:

• Filipianina 4:8?

• Matio 6:33?

• Ohabolana 13:20?

[Fan̈ontanian̈a]

[Sarisary]

(Zahava gazety)

✔Ino?

[Sarisary]

(Zahava gazety)

✔Ombian̈a?

[Sarisary]

(Zahava gazety)

✔Azovy?

[Sary]

Akory hangalantsika tahaka Jesosy atsika koa fa mifidy olo hiarahantsika mangala diandian̈a?