NIVOLAN̈A karaha ty Julian: “Zanako lelahy koa fa natao filazan̈a fa voaroaka, nahiziky raha jiaby taminaka. Io zanako talan̈olo. Taloha baka zahay nifandray mare baka io niaraka nan̈ano raha fo. Tsaiky nisy jery tsarabe izy taloha fa tio fo loso nan̈ano raha tsy fatao. Nitomoan̈y fo vadiko ke efa tsy haiko foeky hatao hankahery izy. Zahay nieritreritry, tsao atsika ty mba tsy nahay nitaiza e!”

Nan̈ino atsika mivolan̈a fa porofony fitiavan̈a fandroasan̈a io, kanefa izio mampijaly be karaha zen̈y? Ino aby antony baka amy Soratra Masin̈y ahafahantsika mangala fanapahankevitry mentitry be karaha zen̈y? Nan̈ino olo araiky roasin̈y?

Koa fa misy Vavolombelon̈o Jehovah vita batisa voaroaka, misy raha aroe tsy maintsy mandalo. Voanalohany, nan̈ano fahotan̈a maventy izy. Faharoe, izy tsy nibebaka.

Jehovah tsy man̈anten̈a atsika ho lavorary. Ndray izy man̈ano zen̈y, izy manan̈a fitsipikinany masin̈y ke tiany atsika panomponany han̈araka izio. Ohatra izio atsika tsy imboany man̈ano fahotan̈a maventy aby ty: Mijangajanga, manompo sampy, mangalatra, mandrava rahanolo, mamono olo, baka io mifandray amy fan̈ahy ratsy.​—1 Kor. 6:9, 10; Apok. 21:8.

Akory fahitanao izy, tsy hitanao fa rariny salakady miaro atsika man̈araka fitsipikiny Jehovah io? Tiantsika miaraka miain̈y aminolo tia fihavan̈ana, tsara fitondranten̈a, baka io mafatoky. Anan̈andro rahalahy ndreky ranabavy aby io toetry aby io. Atsika koa fa nanokanten̈a tamy Jehovah, samby nampan̈anten̈a tamy Jehovah fa han̈araka taridalan̈anany amy Volan̈anany ao.

Akory fo basy izikoa Kristianin̈y araiky vita batisa nan̈ano fahotan̈a maventy? Nan̈ano hadisovan̈a karaha zen̈y koa panompony Jehovah tsy nivadiky sasany taloha tan̈y, kanefa mbala nikeny Jehovah hanompo izy fo. Ohatra izio Davida, izy nijangajanga ndreky namono olo. Karaha ty ho Natana Paminan̈y taminany: ‘Jehovah nan̈ambela hadisovan̈anao.’​—2 Sam. 12:13.

Nambelany Jehovah fahotan̈a maventy nataony Davida fotony Davida ten̈a nibebaka. (Sal. 32:1-5) Dikanizen̈y, panompony Jehovah tsy mibebaka na mbala manohy man̈ano raha ratsy io fo roasin̈y. (Asa. 3:19; 26:20) Iro antipan̈ahy aby an̈isany komity pitsara aby io handroaka izy koa fa hitandro fa ten̈a tsy nibebaka izy.

Mety hieritreritry atsika amy voanalohany fa sarotiny loatra na man̈ano tsy rariny iro antipan̈ahy aby io, indraka eky koa olo marikitry atsika olo voaroaka io. Tsy tokony hadin̈antsika fa misy antony mazava tsarabe amy Volan̈a Zan̈ahary ao fa porofony fitiavan̈a fandroasan̈a io.

Jesosy nivolan̈a fa “fahendrenanolo araiky, raha ataony mankamarin̈y izy.” (Lioka 7:35, l.p.a.) Ten̈a fahendrena androasan̈a olo araiky nan̈ano raha tsy manjary kanefa tsy mibebaka. Atsika iziô hizaha antony telo mankamarin̈y zen̈y.

Mahazo voninahitry an̈aran̈any Jehovah. Raha ataontsika io misy vokany aminy an̈aran̈any Jehovah fotony atsika mitondra an̈aranany. (Isaia 43:10) Mety hahavy raimandreny hahazo voninahitry na ho voabaraka baka amy raha ataony zanany. Misy vokany amy fomba fahitanolo Jehovah koa raha ataontsika, na tsara zen̈y na ratsy. Taminy andrany Ezekiela, nampifandraisindro hafa firenena aby io an̈aran̈a Jehovah ndreky Jiosy. (Ezek. 36:19-23) Ampifandraisinolo aminy an̈arany Jehovah koa Vavolombelon̈o Jehovah zen̈y izioty. Ke atsika koa man̈araka lalàn̈anany, atsika han̈amia voninahitry izy.

Fa atsika koa man̈ano raha ratsy, atsika hangala baraka an̈aran̈a masin̈iny Jehovah. Apostoly Petera nivolan̈a tamy Kristianin̈y karaha ty: “Zanaka man̈araka volan̈a anaro, ke aza man̈eky eky hitaritiny fan̈irian̈anaro taloha, taminy anaro mbala tsy nahay. Masin̈y araiky nikaiky anaro io, ke tokony ho masin̈y koa anaro amy fitondranten̈anaro jiaby, fotony karaha ty raha efa voasoratra: “Tsy maintsy masin̈y anaro, fotony zaho masin̈y.” (1 Pet. 1:14-16) Hahazo voninahitry an̈aran̈any Jehovah izikoa atsika madio fitondranten̈a.

Vavolombelon̈o Jehovah araiky koa zatra man̈ano raha ratsy, ho hainolo na ho hainy kamaradiny ndreky olo mahay izy raha zen̈y. Hita baka amy fandroasan̈a io fa manan̈a vahoaka madio sady man̈araka toro lalan̈any Soratra Masin̈y Jehovah baka iro hadio fo. Ohatra izio, nisy lelahy araiky ta Suisse nivory tamy Tran̈o Fivorian̈a. Nivolan̈a izy fa mba tiany ho an̈isany fiangonan̈a araiky ‘tsy milefitry amy fitondranten̈a ratsy.’ Voaroaka baka anabaviny lelahy io fotony naloto fitondranten̈a.

Ho voaharo madio fo fiangonan̈a. Apostoly Paoly nivolan̈a tamindro Korintianin̈y aby io fa hahita problemo fiangonan̈a araiky izikoa misy olo kinia man̈ano fahotan̈a an̈aty ao. Nampitovisiny tamy vokatrany levira an̈aty koba, vokatrany fahotan̈a ataonolo araiky. Volan̈iny: “Levira hely fo efa mampitombo koba jiaby.” Izy baka tio nan̈amia torohevitry karaha ty: “Adosoa aminaro olo pan̈ano ny ratsy zen̈y.”​—1 Kor. 5:6, 11-13.

Olo “pan̈ano ratsy” koran̈iny Paoly io mety olo nan̈erampo tamy fijangajangan̈a. Misy olo hafa tan̈ivony fiangonan̈a mety efa nan̈eky fitondranten̈a karaha zen̈y. (1 Kor. 5:1, 2) Izikoa niliferin̈y fo raha karaha io, mety ho moramora aminolo sasany koa hanjary ho ratsy fitondranten̈a karaha olo tanàna araiky amindro io. Mandrisiky olo hafa tsy hijery fitsipiky Zan̈ahary fiangonan̈a araiky, izikoa ambela karaha io fo olo kinia man̈ano fahotan̈a be. (Mpito. 8:11) Mety ho karaha “lampimbato saron̈any rano” koa olo manota tsy mibebaka, ke mety handrobaka finoan̈anolo an̈ivony fiangonan̈a foeky.​—Joda 4, 12.

Mety ho tontohitry olo nan̈ano ratsy io. Nisy fotoan̈a Jesosy nikoran̈a momba zanaka adala. Niala tantran̈ondry olobeny izy, baka io nilanilaniny taminy adalan̈a fanan̈ananany. Efa voa izy baka io tsapany fa ten̈a ratsy fiain̈ana ambelan̈a tran̈ondry olobeny io salakady ratsy fan̈ahy olo an̈y. Tontohitry izy ke nibebaka baka io nipody tamindry olobeny. (Lioka 15:11-24) Koran̈iny Jesosy fa haravoan̈a tsisy ambaka izy niny babany koa fa nipody zanany io. Hitantsika baka amy zen̈y fihetsehampony Jehovah. Man̈amia toky atsika izy fa ‘tsy sitraponany hahafatesanolo ratsy fan̈ahy, fa mba hialany amy lalan̈a ratsy baka izy ho velon̈o.’​—Ezek. 33:11.

Mety ho tsapanolo voaroaka koa fa maro hatsaran̈a efa tsy azony eky izy koa fa voaroaka. Karaha ataony fifandraisany amy fianakavian̈anany na piaramanompo. Mety ho tontohitry izy koa fa mizaha vokatrany fahotan̈anany ndreky mahatsiaro fotoan̈a nankahery izy taminizy mbala nifandray tsara tamy Jehovah ndreky piaramanompo.

Tokony ho be fitiavan̈a ndreky mentitry olo araiky man̈amia torohevitry izikoa tiany hahomby torohevitry amiany. Karaha ty ho Davida pan̈ano salamo: ‘Izikoa mamango zaho olo marin̈y, hatsarampan̈ahy feno fitiavan̈a andraisako zen̈y. Baka io koa izy man̈anatra zaho, ataoko karaha menaka isorin̈y amy loha in̈y.’ (Sal. 141:5) Iritrireta hely baka misy olo migiaka ke rofin̈iny. Tsy afaka miain̈y tsara izy ke sahiran̈a mare. Izikoa anao tsy man̈ano raha malaky, izy mety hofoaty. Tsy maintsy domoninao tahezan̈anany baka izy hahazo fahin̈ana. Ke mety harary domon̈o amy tahezan̈a io, kanefa mamonjy fahin̈ana. Nan̈eky koa Davida fa mila olo marin̈y man̈itsy izy baka izy hahazo hatsaran̈a, ndray tsy mora taminany raha zen̈y.

Ndraikindraiky fandroasan̈a io sazy ten̈a ilainolo nan̈ano ratsy io. Ohatra izio Julian, araiky nikoran̈intsika taloha in̈y, loso nan̈ova fiain̈ananany zanany in̈y ndreky nimpody niaraka tamy fiangonan̈a izy, afaka folo taon̈o tafara tatỳ. Antipan̈ahy izy izioty. Karaha ty ho izy: “Zaho koa fa voaroaka, zaho tsy maintsy nizaka vokatrany raha nataoko, kanefa ten̈a nilaiko raha zen̈y.”​—Heb. 12:7-11.

Ten̈a malahelo atsika izikoa misy olo voaroaka. Zen̈y tsy mivolan̈a fa efa tsisy raha mety atao eky. Atsika tsiaraikiaraiky afaka man̈ano ny anjarantsika baka ho takatra tanjon̈o amy fandroasan̈a io.

Tsy mora aminy antipan̈ahy aby io mivolan̈a fa voaroaka olo araiky, kanefa mifen̈y iro mangala tahaka Jehovah ke man̈aboaka fitiavan̈a fo. Iro koa fa mivolan̈a aminolo io fa voaroaka izy, mifen̈y iro ho tsara fan̈ahy ndreky man̈ambara izy ny raha tokony hataony baka izy afaka mimpody ho an̈isany fiangonan̈a ndraiky koa. Izikoa fa mandeha fotoan̈a ke hita fa niova izy, mety han̈ano fandaharan̈a iro antipan̈ahy aby io hitsidihan̈a izy ke hampatsiarovan̈a izy raha tokony hataony baka izy afaka mimpody amy Jehovah. a

Man̈aja fanapahankevitry momba olo voaroaka fianakavian̈anolo voaroaka io koa tia fiangonan̈a ndreky olo nan̈ano ratsy io. Karaha ty ho Julian momba zanany: “Mbala zanako fo izy fa fomba fiain̈ana fo nampisaraka zahay.”

Man̈aboaka fitiavan̈a mifan̈araka amy toro lalan̈a amy Baiboly fiangonan̈a jiaby izikoa tsy mifandray ndreky tsy mikoran̈a aminolo voaroaka. (1 Kor. 5:11; 2 Jaona 10, 11) Ten̈a ho hisy vokany aminolo nan̈ano ratsy io sazy namiany Jehovah baka tamindro antipan̈ahy aby io, izikoa atsika tsy mifandray aminolo voaroaka io. Tsara atsika koa man̈aboaka fitiavan̈a amy fianakavian̈anolo voaroaka io ndreky man̈amia korazy iro. Ten̈a tsy mora amindro raha mahazo iro. Atsika tsy tokony han̈ano raha mety hahavy iro hahatsapa fa iro tsy mahazo miaraka amy piaramanompo.​—Rom. 12:13, 15.

Karaha ty namaran̈any Julian volan̈anany: “Ten̈a ilain̈y fandroasan̈a io. Izio man̈ampy atsika hiain̈y mifan̈araka amy fitsipikiny Jehovah. Ten̈a mampijaly izio kanefa azahoan̈a hatsaran̈a amy farany. Zahay koa nilefitry tamy fitsipiky momba fandroasan̈a io, tsy tafimpody foeky zanako in̈y.”