1, 2. a) Ino ma raha mamparavoravo atsika? b) Nan̈ino ma atsika amy ziôty mbala tsy miadan̈a na milamin-tsain̈y tsarabe? (Zahava sary amy fôn̈ony.)

 ATSIKA jiaby samby tihiain̈y milamin̈y, tsisy asaloha. Ravoravo atsika fôtony amezan’i Jehovah “fiadanan̈an’ny Zan̈ahary”, tsy ino zen̈y fa filaminan-tsain̈y afaka miaro atsika tsy hiasaloha na halahelo dila loatra. (Fil. 4:6, 7) Efa nanokan-ten̈a tamy Jehovah koa atsika ke ‘mihavan̈a tsara aminany.’​—Rom. 5:1.

² Fa ndray zen̈y, mbala tsy navy fotoan̈a han̈anaovan’ny Zan̈ahary raha hampisy ten̈a fiadan̈ana ambony tany eto. Andra farany ziôty ke sarotro iain̈ana sady feno raha manahiran̈a. Maro olo koa tia malo. (2 Tim. 3:1-4) Atsika Kristianin̈y koa mila miady amy Satana ndreky amy fampianaran̈a diso aparitany. (2 Kor. 10:4, 5) Havantsika tsy Vavolombelon̈o aby io koa mety han̈ano raha hampiasaloha atsika mare. Sasany amindrô mety hankaratsy raha inoantsika, na hivolan̈a fa atsika mampisaratsaraka fianakavian̈a, na himenasy hanosaka falafa atsika izikoa atsika tsy miala amy finoan̈antsika. Ino raha tsy mila adin̈antsika izikoa misy havantsika manohitry atsika? Ino han̈ampy atsika hiatriky zen̈y?

3, 4. a) Ino vokatran’ny fampianaran̈an’i Jesosy? b) Amy lera karakôry ten̈a sarotro man̈ara-dia Jesosy?

³ Hain’i Jesosy fa fampianaran̈anany mety hampisaratsaraka olo. Hainy koa fa mila korazy mare mpan̈ara-dia izy baka handresy fanoheran̈a. An̈isan’izen̈y fanoheran̈a ataon’ny havan̈a. Jesosy nivolan̈a karaha ty: “Aza mieritreritry fa zaho io navy hitondra fihavanan̈a ambony tany. Tsy hitondra fihavanan̈a naviako, fa hitondra sabatra. Diako atỳ hampisaraka zanakalahy amy babany, zanaka man̈angy amy reniny, aviô vinantovavy amy rafozambaviny. Ke olo tran̈o araiky aminany fo hanjary fahavalon’olo araiky.”​—Mat. 10:34-36.

⁴ Ino ma raha tian’i Jesosy volan̈iny amin’ny “aza mieritreritry fa zaho io navy hitondra fihavanan̈a”? Tiany ho hain’olo mitandren̈y izy raha mety hahazo irô izikoa irô man̈ara-dia izy. Raha ampianariny baka mety hampisaratsaraka olo. Marin̈y fa han̈ambara hafatran’ny Zan̈ahary mikasiky fahamarin̈ana tanjon̈on’i Jesosy fa tsy handravan̈a fianakavian̈a. (Jaona 18:37) Fa ndray zen̈y, mety ho sarotro amin’olo araiky tsy hivadiky amy fampianaran̈an’i Kristy izikoa misy naman̈a na havan̈a marikitry tsy tia izio.

5. Ino raha niaretan’ny mpan̈ara-dia Jesosy?

⁵ Jesosy nivolan̈a fa mpan̈ara-dia izy mila efa pare hiaritry jaly. (Mat. 10:38) An̈isany jaly io fanoheran̈a baka amy fianakavian̈a. Tihahazo fankasitrahan̈a amy Kristy mpianatranany, ke irô tsy maintsy miaritry baraka na tihitihy baka amin’ny havandrô. Fa ndray zen̈y, be lavitrin’ny raha hafoendrô raha ho azondrô.​—Vakia Marka 10:29, 30.

6. Ino raha tsy mila adin̈antsika izikoa misy havantsika manohitry atsika?

⁶ Mbala tiantsika fo havantsika aby io ndray irô manohitry atsika noho atsika manompo Jehovah. Fa tsy mila adin̈antsika fo fa tôkony fitiavantsika Zan̈ahary ndreky Kristy beben’ny fitiavantsika irô. (Mat. 10:37) Mila alaintsika onon̈o koa fa fitiavantsika havantsika io mety hararaotin’i Satana hampivadiky atsika amy Jehovah. Alô atsika handiniky raha sasany mety hahavy fianakavian̈antsika hanohitry atsika. Hizahavantsika koa akôry hahavitantsika hiaritry raha sarotro mety hiboaka.

7. Ino raha mila tsaroan’olo manambady olo tsy Vavolombelon̈o?

⁷ Baiboly efa mampitandrin̈y fa olo manambady “hanan̈a fahorian̈a amy nôfotro.” (1 Kor. 7:28) Izikoa tsy Vavolombelon̈on’i Jehovah vadinao, mety mbala misôsoko koa asalahonao. Ndray zen̈y, anao mila hitovy fomba fihevitry amy Jehovah fo. Vadinao nata tsy tihanompo Jehovah, zen̈y tsy antony ahafahanao miala izy na misaraka aminany. (1 Kor. 7:12-16) Ndray tsy mitariky fianakavian̈anany hanompo Jehovah lelahy araiky tsy Vavolombelon̈o, izy tsy maintsy hajain’ny vadiny fo fôtony izy loham-pianakavian̈a. Lelahy koa tsy maintsy tia vadiny ndreky mikarakara izy tsara, nata man̈angy io tsy manompo Jehovah.​—Efes. 5:22, 23, 28, 29.

8. Ino aby fan̈ontanian̈a mety dinihinao izikoa vadinao tsy man̈aomba anao hanompo matetiky?

⁸ Akôry izikoa vadinao tsy man̈aomba anao hanompo matetiky? Misy andra sasany, ohatra, ranabavy araiky zay imboan’ny vadiny mandeha manompo. Izikoa karaha zen̈y raha mavoa anao diniha ty: ‘Zaho ma tsy ambelany vadiko manompo Jehovah foeky? Izikoa tsy zen̈y, tsao mba mety ataoko fo raha angatahiny zen̈y?’ Tsy hatetiky himalo anarô fivadiany izikoa anao mahay mandanjalanja.​—Fil. 4:5.

9. Akôry ataon’ny olo araiky hampianatra zanany han̈aja vadiny tsy Vavolombelon̈o?

⁹ Izikoa tsy manompo Jehovah vadinao, mety ho sarotro aminao koa hitarimy zanakanarô. Tsaiky aby io baka tsy maintsy ampianarinao han̈araka didy ty: “Hajà babanao ndreky reninao.” (Efes. 6:1-3) Fa akôry ndraiky izikoa vadinao tsy man̈araka fitsipikin’ny Baiboly? Mifen̈a ho môdely tsara ke hajà fo vadinao. Toetry tsaranany fo zahava, baka iô volàn̈a aminany fa anao mankasitraka raha ataony. Aza mankaratsy izy ankilan’ny zanakanarô. Hazavà amindrô fa safidin’olo tsiaraikiaraiky mifidy hanompo Jehovah sa tsy hanompo izy. Izikoa hitan’ny vadinao fa zanakanarô man̈aja izy, mety mbala han̈iry hianatra momba Jehovah fo izy andra araiky an̈y.

10. Izikoa tsy manompo Jehovah vadinao, akôry mety hampianaranao Baiboly zanakanarô?

¹⁰ Misy lelahy tsy man̈eky foeky izikoa zanany tsy man̈ano fety sasany misy ifandraisany amy fanompoan-tsampy. Misy koa mifôrse zanakandrô hianatra raha ampianarin’ny fivavahan̈any nata diso izio. Lelahy sasany koa tsy man̈aomba vadindrô hampianatra Baiboly zanakandrô. Fa ndray zen̈y, ranabavy io mila mifen̈y erakan’ny vitany mampianatra Baiboly zanany. (Asa. 16:1; 2 Tim. 3:14, 15) Mety misy ranabavy araiky tsy ambelan’ny vadiny mampianatra Baiboly zanakandrô tsy ampy taon̈o. Tsy hambelany koa izy mitondra tsaiky io mandeha mivory. Ranabavy io man̈aja fanapahan-kevitrinany zen̈y. Ndray zen̈y, mbala afaka koran̈iny amy zanany io fo raha inoany lera izy mahita ôkazion han̈anaovan̈a zen̈y, amy zen̈y tsaiky aby io hahay Jehovah ndreky fitsipikinany. (Asa. 4:19, 20) Mazava hoazy ndraiky fa, afara an̈y, anjaran’ny tsaiky aby io mifidy hanompo Jehovah irô sa tsy hanompo izy.​—Deot. 30:19, 20. a

11. Ino raha mety hazahoantsika prôblemo amin’ny havan̈a tsy Vavolombelon̈o?

¹¹ Tamy voanalohany, mety mbala tsy nambaranao ry havanao fa anao mianatra Baiboly amy Vavolombelon̈on’i Jehovah. Fa koa fa nahaifatatra finoan̈anao, hitanao fa tôkony koran̈inao amindrô raha nianaranao. (Mar. 8:38) Kanefa izikoa fan̈ambaranao raha zen̈y tamindrô nanjary nampisy prôblemo aminarô, ty misy soso-kevitry afaka man̈ampy anao hifandray tsara amindrô salakady hanompo Jehovah fo.

12. Nan̈ino irô havantsika tsy Vavolombelon̈o aby io mety hanohitry atsika, fa akôry han̈aboahantsika fitiavan̈a amindrô?

¹² Diniha raha tsapan’ny havanao. Anao mety ho ravoravo mare fôtony nahay ny marin̈y amy Baiboly. Fa irô ndraiky mety hieritreritry fa anao voafitaka, na nanjary nan̈araka sekty. Mety hieritreritry koa irô fa irô nanjary tsy tianao eky matoa anao efa tsy miaraka man̈ano fety amindrô. Mety havozo foeky irô tsao anao ho very mandrakizay. Zen̈y mahavy anao mila mandiniky raha tsapandrô ndreky mahatakatra eritreritrindrô. Anao koa mila mitandren̈y raha volan̈indrô amy zen̈y hainao ino raha ten̈a mampiasaloha irô. (Ohab. 20:5) Niezaka nan̈ano karaha zen̈y koa apôstôly Paoly koa fa nitory vaovao tsara tamy ‘karazan’olo jiaby.’ Ke atsika tôkony hangala tahaka izy.​—1 Kor. 9:19-23.

13. Karakôry tôkony hataontsika mikoran̈a amin’ny havantsika tsy Vavolombelon̈o?

¹³ Mifen̈a ho tsara fan̈ahy koa fa mikoran̈a. Baiboly mivolan̈a karaha ty: “Volan̈a tsara fo tôkony hivolan̈inarô.” (Kol. 4:6) Atsika afaka mangataka fan̈ahy masin̈y amy Jehovah amy zen̈y atsika hahavita ho tsara fan̈ahy lera mikoran̈a amin’ny havantsika. Atsika tsy tôkony hiady hevitry momba raha diso jiaby ampianarin’ny fivavahan̈andrô. Izikoa mampameloko atsika raha volan̈indrô na ataondrô, atsika tôkony hangala tahaka irô apôstôly aby io. Karaha ty ho Paoly: ‘Zahay koa fa nambanimbanin̈y, zahay nirary hatsaran̈a; zahay koa fa ninjehin̈y, zahay niaritry fo; zahay koa nindrikindrehin̈y, zahay namaly moramora fo.’​—1 Kor. 4:12, 13.

14. Nan̈ino atsika tôkony hifen̈y ho tsara fitondran-ten̈a fo?

¹⁴ Mifen̈a fo ho tsara fitondran-ten̈a. Mety hifandray tsara amin’ny fianakavian̈antsika atsika izikoa tsara fan̈ahy lera mikoran̈a amindrô. Kanefa hahaiho tsara fo koa vokany izikoa atsika tsara fitondran-ten̈a. (Vakia 1 Petera 3:1, 2, 16.) Ke ataova hitandrô amy fiain̈ananao fa Vavolombelon̈on’i Jehovah sambatra tokantran̈o, mikarakara tsara zanaka, man̈ano ny marin̈y ndreky tsara fitondran-ten̈a, baka iô afa-pô amin’ny fiain̈ana. Fa nata fianakavian̈anao tsy man̈eky fahamarin̈ana foeky, anao tôkony ho ravoravo fo fôtony anao tsy mivadiky salakady man̈ano raha mamparavoravo Jehovah.

15. Ino raha mety ataontsika tsialohaloha baka atsika tsy himalo amin’ny havan̈a tsy Vavolombelon̈o?

¹⁵ Diniha tsialohaloha raha mety hiboaka. Diniha ino raha mety hampimalo anao ndreky havanao, aviô ino raha hataonao izikoa zen̈y miboaka. (Ohab. 12:16, 23) Karaha zen̈y nataon’ny ranabavy araiky an Australie. Ho izy: “Rafozandahiko nanohitry mare taloha. Isaka zahay fivadiany hikaiky izy amy telefaony, zahay nivavaka tamy Jehovah antsendriky baka zahay tsy hahinihiny lera izy meloko. Efa noman̈inay tsialohaloha raha handeha volan̈inay amy zen̈y milamin̈y fo koran̈anay. Sakavy nasianay erany koa fotoan̈a ikoran̈anay aminany, fôtony matetiky lôso amin’ny adihevitry momba fivavahan̈a koran̈anay koa lava.”

16. Ino raha mety ataonao izikoa anao mavozo tsao mampalahelo havanao?

¹⁶ Marin̈y fa tsy maintsy ho hisy fotoan̈a fo anao ndreky havanao tsy Vavolombelon̈o io tsy hiady koran̈a. Ke anao mety han̈amelo-ten̈a fôtony irô tianao aviô anao tihan̈ano raha mamparavoravo irô. Ndray zen̈y, aza adin̈a fa Jehovah tôkony ho tianao mandilatra havanao. Izikoa anao tsy mivadiky amy Jehovah, mety hazava amin’ny havanao fa ten̈a ilain̈a man̈araka raha volan̈in’ny Baiboly. tsarova fa anao tsy afaka mifôrse olo han̈eky fahamarin̈ana. Karaha ataon’i Jehovah amintsika, irô koa mba hambelany hifidy hanompo izy na tsy hanompo izy. Fa anao ndraiky afaka man̈ampy irô hahita fa mahatsara anao man̈araka volan̈an’i Jehovah.​—Isaia 48:17, 18.

17, 18. Ino han̈ampy anao hahavita hiaritry fo nata havanao niala Jehovah?

¹⁷ Lera misy havanao voaroaka na niala tsy ho Vavolombelon̈o, anao mety harary mare karaha voatomboko sabatra. Ke ino raha afaka han̈ampy anao?

¹⁸ Aza vôly manompo Jehovah. Ataova fo raha hampafatatra finoan̈anao. Amy fomba karakôry? Aza vôly mamaky Baiboly, man̈oman̈a fivorian̈a, mandeha mivory ndreky manompo, baka iô mivavaha baka hahavita hiaritry. (Joda 20, 21) Fa karakôry ndraiky izikoa anao efa man̈ano raha aby zen̈y fa izy fo efa lôso fahazaran̈a fo? Aza rivan̈a fa tohiza fo raha aby zen̈y. Izikoa zatra man̈ano raha ara-pan̈ahy, fônao hilamin̈y salakady anao tsy hiasaloha be. Diniha baka raha niain̈an’ny mpanoratra Salamo faha-​73. Nisy fotoan̈a izy niasaloha mare fôtony tsy vitany nifehy jerinany ndreky fônany. Fa izy koa fa nandeha tamy tran̈o fivavahan̈a tamin’i Jehovah, nanjary vitany nan̈itsy fomba fisain̈ananany. (Sal. 73:16, 17) Ke aza vôly manompo Jehovah fôtony izy han̈ampy anao.

19. Akôry han̈aboahanao fa anao man̈aja fandaharan̈a ataon’i Jehovah?

¹⁹ Hajà fandaharan̈a ataon’i Jehovah han̈anaran̈a mpanomponany. Marin̈y fa malahelo mare atsika koa fa misy havantsika voaroaka. Kanefa raha zen̈y mahatsara atsika, intsaka lay olo voaroaka. Izio baka mety han̈ampy izy himpody ndraiky amin’i Jehovah. (Vakia Hebreo 12:11.) Mandrapavian’izen̈y, tôkony harehantsika didin’i Jehovah man̈iraka atsika “tsy hifanerasera eky” amin’olo man̈ano raha ratsy kanefa tsy mibebaka. (1 Kor. 5:11-13) Nata atsika malahelo, fifandraisantsika amin’ny havantsika voaroaka io tsy tôkony hataontsika karaha taloha. Atsika tsy tôkony hifandray aminany tsy amin’antony, na amy telefaony zen̈y, na mesazy na taratasy na e-mail, na koa amy réseaux sociaux.

20. Ino raha mety antinaintsika?

²⁰ Manàn̈a fan̈antinan̈a fo. Fitiavan̈a “man̈anten̈a raha jiaby”, ke atsika man̈anten̈a fa havantsika niala Jehovah io mbala himpody fo. (1 Kor. 13:7) Ke akôry atao izikoa misy havanao araiky voaroaka hitanao karaha efa miova? Anao afaka mivavaka amy Jehovah baka izy hahazo angôvo baka amy Soratra Masin̈y, ke hahavita han̈araka volan̈an’i Jehovah ty: ‘Mimpodiana aminaka.’​—Isaia 44:22.

21. Ino raha tôkony hataonao izikoa misy havanao manohitry anao?

²¹ Jesosy nivolan̈a fa izy tôkony ho tiantsika mandilatra olo hafa. Izy natoky fa mpianatranany hanan̈a korazy ke hahavita tsy hivadiky aminany foeky ndray manohitry mare fianakavian̈andrô. Ke mivavaha amin’i Jehovah baka anao hampiany hiaritry izikoa misy havanao manohitry anao nohony anao man̈ara-dia Jesosy. (Isaia 41:10, 13) Ho ravoravo aminao Jehovah ndreky Jesosy izikoa anao tsy mivadiky, ke ho maro hatsaran̈a azonao.