1. Ino ma raha nataony Davida? Nan̈ino?

 PANJAKA DAVIDA nanoratra karaha ty: “Jehovah io be, ke ten̈a man̈eva derain̈a.” (Sal. 145:3) Fitiavany Jehovah nahavy izy nivolan̈a: “Zaho hidera anao an̈ivony fiangonan̈a.” (Sal. 22:22; 40:5) Azo antoko fa anao tia Jehovah ndreky man̈eky volan̈a Davida ty: “A Jehovah Zan̈ahariny Israely razambenay, irarian̈a anao hiderain̈a mandrakizay mandrakizay.”​—1 Tan. 29:10-13.

2. a) Akory fomba iderantsika Jehovah? b) Nan̈ino tsy mora aminolo sasany raha zen̈y? Ino raha hidinihintsika ato?

² Araiky amy fomba hahafahantsika midera Jehovah, fan̈amezan̈a valinteny amy fivorian̈a. Tsy mora amy rahalahy ndreky ranabavy maro raha zen̈y. Tihamaly iro fa mavozo. Ke ino raha mety hataondro? Akory hataontsika jiaby mba an̈amezan̈a valinteny mampahery? Hizahantsika antsendriky antony matomboko efatra mahavy atsika mamaly teny koa fa mivory, avio atsika hamaly fan̈ontanian̈a aby io.

3-5. a) Izikoa Hebreo 13:15 io zahan̈a, nan̈ino atsika man̈amia valinteny? b) Izio ma tokony hitovy aby valintenintsika jiaby? Hazavà.

³ Namezany Jehovah tombontsoa hidera izy. (Sal. 119:108) An̈isany “soron̈o fideran̈a” Jehovah valinteny amezantsika ampivorian̈a an̈y, sady tsisy olo afaka man̈ano zen̈y amy pilasintsika. (Vakia Hebreo 13:15.) Mitovy fo ma soron̈o na valinteny takiny Jehovah amintsika tsiaraikiaraiky? Tsy mitovy!

⁴ Hainy Jehovah fa tsy miran̈a raha haintsika ndreky raha iain̈antsika, ke ankasitrahiny mare zay soron̈o amezantsika izy amy fô jiaby. Asa azonao onon̈o, karazan̈a fan̈atitry karakory nikeny Jehovah tamy faha Israelita aby io? Sasany tamindro nan̈amia zanaka ondrikondriky na bengy. Nisy ndraiky masikiny ke nan̈amia “domohin̈y aroe na zanaka pizin̈y aroe.” Koa nisy tsy afaka nan̈amia domohin̈y na zanaka pizin̈y zen̈y, mbala nikeny Jehovah fo ndray “lafariny voadisa tsara impolony efaha.” (Lev. 5:7, 11) Tsy lafo vangany lafariny io fa nikeny Jehovah fo izikoa izio “tsara disa tsarabe.”

⁵ Jehovah tsy niova. Izy tsy mitaky amintsika tsiaraikiaraiky valinteninolo mahay mivolan̈a karaha nataony Apolosy in̈y, na mahay mandresy lahatra mare, karaha Paoly in̈y. (Asa. 18:24; 26:28) Raha takiny Jehovah fo, atsika man̈amia valinteny tsara erakany vitantsika. Azonao onon̈o man̈angy naty vady nan̈amia vola madiniky aroe in̈y? Tiany Jehovah mare izy, fotony nan̈amia zay farany tsara mety ho vitany.​—Lioka 21:1-4.

6. a) Izikoa Hebreo 10:24, 25 io zahan̈a, ino vokany izikoa atsika maharen̈y valinteninolo hafa? b) Ino raha mety ataonao izikoa fa misy valinteny mankahery anao?

⁶ Mifampahery atsika koa fa mamaly teny. (Vakia Hebreo 10:24, 25.) Tiantsika maharen̈y valinteny isankarazany. Ohatra, tiantsika maharen̈y valinteny tsotra ndreky baka amy fô ataony tsaiky. Mahazo angovo atsika koa fa maharen̈y olo ravoravo mikoran̈a momba fahamarin̈ana nianarany. Tiantsika mahita olo “misikin̈y korazy” mamaly teny ndray iro bihen̈amaso, na mbala tsy mahay tsara volan̈antsika. (1 Tes. 2:2) Akory an̈aboahantsika fa ankasitrahantsika ezakandro? Ataontsika mersy iro koa fa vita fivorian̈a. Valinteny amezantsika koa man̈aboaka fa atsika mankasitraka iro. Ke tsy basiny mahazo fampahirezan̈a fo atsika fa mba man̈amia fampahirezan̈a koa​—Rom. 1:11, 12.

7. Ino hatsaran̈a ho azontsika izikoa atsika man̈amia valinteny?

⁷ Mahazo hatsaran̈a atsika koa fa man̈amia valinteny. (Isaia 48:17) Fotony voanalohany, izikoa atsika mieritreritry han̈amia valinteny, mahavy atsika man̈oman̈a tsara fivorian̈a raha zen̈y. Ke loso mahaimazava amintsika fo Volan̈a Zan̈ahary. Tsy ho sarotro amintsika amy zay hampihatra raha ianarantsika. Faharoe, hahaitiantsika fo fivorian̈a io fotony atsika mba mahazo mivolan̈a amizio. Fahatelo, matetiky raha nivolan̈intsika io tsy hadin̈antsika foeky fotony atsika efa niezaka mare tamizio.

8-9. a) Izikoa Malakia 3:16 io zahan̈a, akory fahitany Jehovah valinteny amiantsika? b) Ino fo raha mbala tsapanolo sasany ndray raha zen̈y efa haindro?

⁸ Ravoravo Jehovah atsika koa fa man̈aboaka finoan̈antsika. Matoky atsika fa tandrin̈esany Jehovah ndreky ankasitrahiny ezakantsika mba han̈amezan̈a valinteny. (Vakia Malakia 3:16.) Jehovah mitahy ezaka jiaby ataontsika. Zen̈y koa an̈aboahany fa izy mankasitraka atsika.​—Mal. 3:10.

⁹ Marin̈y fa tsara antony mahavy atsika tihan̈amia valinteny koa fa mivory. Kanefa, olo sasany mavozo manangatan̈ana. Korazy fo izikoa zen̈y koa raha tsapanao. Alô atsika hizaha toro lalan̈a vitsivitsy amy Baiboly. Hizaha ohatra avio sosokevitry han̈ampy atsika hahavita han̈amia valinteny matetiky amy fivorian̈a koa atsika.

10. a) Ino raha havozoany ankamarozantsika? b) Nan̈ino ma tsy voatery ho ratsy raha zen̈y?

¹⁰ Mitotoko mare ma fonao ndray anao mbala tsy manangatan̈ana aby? Maro foeky olo karaha zen̈y. Ny marin̈y aminazy, ankamarozantsika mavozo aby koa fa mamaly teny. Koa tianao handresy tahotronao, mila hainao antsendriky ino mahavy anao mavozo. Mavozo ma anao tsao tsy ho azonao onon̈o ma raha hivolan̈inao? As mavozo anao tsao ho diso valinteninao? Sa anao miasaloha tsao valinteninao tsy ho tsara karaha ninolo hafa? Tsy man̈ino aby zen̈y! Misy mahatsara zen̈y aby ke! Hita baka amy zen̈y fa anao manetry ten̈a, fotony anao mihevitry olo hafa ho an̈abon̈abonao. Tiany Jehovah toetry zen̈y. (Sal. 138:6; Fil. 2:3) Tiany Jehovah hidera izy ndreky piaramanompo anao, lera mivory. (1 Tes. 5:11) Tiany Jehovah anao ke hamezany korazy hahavitanao zen̈y.

11. Ino raha koran̈iny Baiboly ke mety han̈ampy anao?

¹¹ Aleva onon̈o raha nambarany Baiboly. Mivolan̈a izio fa atsika jiaby io samy man̈ano hadisovan̈a aby amy raha volan̈intsika ndreky fomba ivolan̈antsika raha. (Jak. 3:2) Na Jehovah na iro piaramanompo amintsika aby io tsisy mitaky amintsika hanjary lavorary. (Sal. 103:12-14) Iro io tsy basiny fianakavian̈antsika arapan̈ahy fa iro koa ten̈a tia atsika. (Mar. 10:29, 30; Jaona 13:35) Haindro fa ndraikindraiky, mety tsy erakany itiavantsika izy valinteny amezantsika.

12-13. Ino raha hianarantsika baka amy Nehemia ndreky Jona?

¹² Afaka man̈ampy anao handresy tahotronao koa tantaranolo sasany baka amy Baiboly ao, karaha ataony niny Nehemia. Izy nanompo tamy lapany panjaka araiky natanjaka mare. Nalahelo mare Nehemia koa fa naharen̈y fa robaka barô ndreky ribany Jerosalema. (Neh. 2:1-8) Misaora fombo mare izy koa fa nan̈ontaniany panjaka antony nahavy izy tsy ravoravo! Direkty izy nivavaka, avio namaly fan̈ontanian̈any panjaka. Tsy nampoizin̈y fa nimboany panjaka izy handeha Jerosalema sady namezany raha maro mba han̈ampian̈a olony Zan̈ahary. (Neh. 2:1-8) Niny Jona ndraiky karaha ty: Jehovah koa fa nan̈iraka izy han̈ambara hafatrany Jehovah ta Ninive, navozo mare izy ke tantany hafa foeky nandihanany. (Jona 1:1-3) Fa koa fa nampiany Jehovah izy, loso vitany fo nan̈ano raha nan̈irahan̈a izy. Ke raha zen̈y nan̈avotro iro olo ta Ninive tao. (Jona 3:5-10) Ohatrany Nehemia nahitantsika fa ten̈a ilain̈a mivavaka, alohany han̈amia valinteny. Tamy niny Jona ndraiky nahaizantsika fa vitany Jehovah man̈ampy atsika hanompo izy, ndray atsika mavozo. Tsy ndraiky mba mamaly teny ampivorian̈a eky moramora tozay nan̈ambara didimpitsaran̈a tamindro Ninivita aby io va?

¹³ Ino sosokevitry mety han̈ampy anao, izikoa anao tihan̈amia valinteny mampahery ampivorian̈a? Alo atsika hizaha sasany amy zen̈y.

14. Nan̈ino atsika tokony han̈oman̈a tsarabe? Ombian̈a atsika mety man̈oman̈a?

¹⁴ Omàn̈a fivorian̈a jiaby. Anao koa tihamaly ke efa nan̈oman̈a tsarabe, anao ho loso matoky ten̈a ke tsy havozovozo hamaly. (Ohab. 21:5) Samy amy fotoan̈a fan̈omanany olo jiaby. Amy voanalohany herin̈iandra, ohatra, Eloise, ranabavy 80 taon̈o sady efa maty vady, man̈oman̈a Tilikambo. Ho izy: “Mahaitiako fo fivorian̈a io zaho koa fa man̈oman̈a aloha be.” I Joy ndraiky miasa isanandra. Isaka sabotsy andra fan̈omanany. Ho izy: “Tsy adin̈ako izin̈y baka io.” Ike ndraiky antipan̈ahy sady pisava lalan̈a ke maletriletry fotoan̈anany. Karaha ty nivolan̈iny: “Ny ten̈a mety aminaka, man̈oman̈a tsihelihely an̈atiny herinandra, tozay man̈oman̈a indraiky mipaka.”

15. Karakory ma atao man̈oman̈a tsara zen̈y?

¹⁵ Ino raha tafiditry amy fan̈omanan̈a fivorian̈a io? Mangataha fan̈ahy masin̈y amy Jehovah isaka anao han̈oman̈a fianaran̈a. (Lioka 11:13; 1 Jaona 5:14) Zahava hely antsendriky raha mombamomba lahatsoratra ianaran̈a io. Diniha tsara amy zay lohateny, lohatenihely, sary, fan̈ontanian̈a fameren̈ana, ndreky efajoro. Ianara amy zay fehintsoratra tsiaraikiaraiky, avio mamakia andininteny maro oe. Miniminia tsara raha koran̈iny amy fianaran̈a io, aleva onon̈o tsara hevitry tianao hivalian̈a. Izikoa anao man̈oman̈a tsara, ho maro hatsaran̈a ho azonao sady ho mora aminao han̈amia valinteny.​—2 Kor. 9:6.

16. Ino aby raha mety ampiasainao koa fa mianatra? Akory ataonao koa fa mampiasa iro io?

¹⁶ Izikoa mety aminao, mampiasà fitaovan̈a elektroniky. Jehovah mampiasa fandaminan̈anazy man̈amia atsika programo karaha ataony JW Library. Man̈ampy atsika izio fotony loso afaka alaintsika amy telefonintsika na tabletintsika gazety fianaran̈a io, ke ao fo atsika man̈oman̈a. Ke zay lera mahapare anao, anao afaka mianatra na zisty mamaky fo, na mitandren̈y izio. Misy amintsika zioty, koa fa lera fihinanan̈a matsan̈a ampiasan̈a an̈y na lera rekreasion a lekoly, na koa fa mandeha voiazy in̈y, iro man̈araraotro mampiasa programo io. Tsy zen̈y fo fa atsika koa mbala manan̈a Watchtower Library ndreky FIKAJIAN̈A BOKINY Vavolombelon̈o Jehovah. Ke loso tsy sarotro amintsika eky man̈ano fikarohan̈a tiantsika hatao.

17. a) Ino mahatsara man̈oman̈a valinteny maro? b) Ino raha ianaranao baka amy video Ataova Pare Valinteninao?

¹⁷ Koa mety, man̈omàn̈a valinteny maromaro isaka fianaran̈a. Nan̈ino? Fotony anao koa tsy voatondro aminy araiky, ho voatondro aminy araiky. Mety maro baka olo miaraka manangatan̈ana kanefa tsy maintsy araiky fo tondroeny rahalahy mitariky io. Baka lerany fivorian̈a tsy hihoatra, pitariky io efa mahay olo firy tondroeny amy fehintsoratra araiky. Ke izikoa anao tsy voatondro amy voanalohany fianaran̈a, aza kivy na mieritreritry fa tsy tia anao pitariky io. Ke izikoa anao man̈oman̈a valinteny maromaro, anao mbala mety ho voatondro fo. Anao mety mamaky andininteny. Fa ten̈a tsara izikoa anao mamaly amy fomba fivolan̈anao. b

18. Nan̈ino tokony hataontsika fohiky fo valintenintsika?

¹⁸ Man̈ameza valinteny tsotra. Matetiky valinteny koa fa tsotra ndreky fohiky, in̈y ten̈a mampahery. Ke mifen̈a man̈amia valinteny fohiky. Aza atao mandilatra 30 segondy valinteninao. (Ohab. 10:19; 15:23) Izikoa fa taon̈otaon̈o zay anao efa pan̈amia valinteny fo, ten̈a tsara zen̈y. Man̈amia modely tsara anao izikoa ataonao tsotra ndreky fohiky valinteninao. Fa izikoa valinteninao be fan̈azavan̈a loatra ke mahadin̈y minity maromaro, mety misy olo hihevitry izy tsy mahay, fotony tsy mahatafaboaka karaha ninao. Fa izikoa valinteninao ataonao fohiky, maro olo afaka handray anjara. Izikoa anao voatondro voanalohany, man̈ameza valinteny mivantan̈a. Aza volan̈iny aby hevitry jiaby an̈atiny fehintsoratra io. Ambilà avoakoran̈a antsendriky hevitry maventy amy fehintsoratra araiky, zay vo mikoran̈a hevitry hafa.​—Zahava efajoro “ Ino aby Valinteny Afaka Amezako?”

19. Ino koa raha mety ataonao izikoa tianao han̈amia valinteny?

¹⁹ Izikoa misy valinteny tianao hamezan̈a, volàn̈a amy rahalahy mitariky fehintsoratra tianao valian̈a. Man̈atòn̈a tsialohaloha pitariky fianaran̈a io anao, alohany fivorian̈a manomboko. Anao koa fa avy amy fehintsoratra tianao valian̈a io amy zay, atsangàna malaky tan̈anao, avio ataova an̈abo tsara tan̈anao baka ho hitany rahalahy mitariky tsarabe.

20. Nan̈ino atsika mira miaraka mihina amy namantsika izikoa fa mivory?

²⁰ Mira miaraka mihina amy kamaradintsika atsika koa fa lera atsika mivory. Akory izikoa namanao sasantsasany amy fiangonan̈a man̈oman̈a fiarahan̈a ke anao koa mba afaka mitondra raha, ho iro? Akory hataonao? Anao mety hiasaloha hely ino raha hindesinao. Fa ndray zen̈y, azo antoko fa han̈ano zay farany tsara vitanao anao, hamparavoravo namanao aby io. Jehovah koa man̈oman̈a hanin̈y maro masiro mare amy latabatranany isaka fivorian̈a, ke izy mikaiky atsika. (Sal. 23:5; Mat. 24:45) Ten̈a ravoravo Jehovah izikoa atsika mba afaka mitondra raha hely. Ke man̈omàna tsara, avio aza mavozo mandray anjara. Sady hihina amy latabatrany Jehovah anao koa man̈ano zen̈y, avio hitondra kadô hely niny namanao amy fiangonan̈a koa.