Mahaiza Mandanjalanja Amy Figiahan̈a Toaka

TEN̈A nety ho hafa foeky fiain̈anany Tony, izikoa izy mba tontohitry fa efa nanjary problemonany figiahan̈a toaka io. Fa kanefa hitany karaha tsy mamo aby izy ndray matetiky migiaka be, ke izy nihevitry fa avoafehiny tsarabe fiain̈ananany. Nan̈ino izy diso hevitry karaha zen̈y?

Efa tsy niasa tsara eky jeriny Tony azony figiahan̈a toaka dila loatra. Karaha ty ny ten̈a marin̈y aminany na hainy raha zen̈y na tsy hainy: Efa robaka toaka betronany, ke efa tsy mahakomandy taova mibeko fihitsehany ndreky sain̈inany, avio fonany. Arakaraka igiahany toaka, mahay tsy hainy fo raha mahazo izy.

Mbala diso hevitry fo koa Tony fotony izy tsisy tihiala toaka. Tamy voanalohany Alain, araiky nikoran̈intsika taloha in̈y, tsy ten̈a nan̈eky fa misy problemo amy figiahan̈a toaka. Volan̈iny: “Nasitriko fa zaho nigiaka, baka io nitady fan̈odian̈a fo zaho koa tatra nigiaka. Nataoko sary tsy hay fa efa nigiaka dila loatra zaho. Niaro ten̈a fo zaho fotony tsy tihiala toaka.” Na Tony na Alain samy tsy nan̈eky fa iro misy problemo amy figiahan̈a toaka, kanefa olo jiaby efa nahay fa iro efa nandivoziny toaka. Iro ten̈a nila nan̈ano raha. Ino raha tokony hataondro?

Man̈anaova Raha!

Maro taminolo nahavita niala toaka aby io nan̈araka volan̈a Jesosy ty: “Izikoa masonao ilany ankavanan̈a mahavy anao avoatsikon̈o, poaha an̈y izy, baka io aria lavitry an̈y. Tsaratsara aminao afaka rantsambatan̈a araiky, toizay vatan̈anao jiaby atsipy amy Gehena an̈y.”​—Matio 5:29.

Aminy andininy io Jesosy tsy nivolan̈a fa mila tapahan̈a rantsambatan̈a araiky. Nampiasa iro volan̈a an̈ohatra aby io izy han̈aboahan̈a amintsika fa atsika tokony ho von̈ono han̈adoso lan̈iany raha mety hisakana fifandraisan̈antsika amy Zan̈ahary. Nata tsy mora man̈ano zen̈y, fan̈anaovantsika zen̈y hisakana atsika hieritreritry na han̈ano raha mety hahavy atsika higiaka toaka dila loatra. a Tsara anao man̈ano raha izikoa fa nisy olo navy nivolan̈a taminao fa be loatra toaka giahinao. Anao tokony ho von̈ono tsy higiaka eky izikoa fa hitanao fa tsy mahay mandanjalanja amy resaka toaka anao. Ten̈a tsy mora zen̈y, kanefa sitrany anao man̈ano zen̈y toy zay ho robaka fiain̈ananao.

Mieritreritry higiaka toaka ma anao na tsy andivoziny izio? Izikoa zen̈y, akory hahavy anao hahay handanjalanja?

Aia Mety Hazahoanao Fan̈ampian̈a?

1. Matokisa fa ten̈a mahery vavaka matetiky ndreky baka amy fô. Baiboly man̈amia hevitry lan̈iany olo tihamparavoravo Zan̈ahary. Karaha ty koran̈iny ao: “Aza miasaloha anaro, na aminino zen̈y na aminino, fa amy raha jiaby, koran̈a amy Zan̈ahary fo raha tianaro hangatahin̈y, amy vavaka ndreky fangatahan̈a mare ndreky fankasitrahan̈a izy. Fiadanan̈a Zan̈ahary, bebeny eritreritry jiaby, amiany aminy an̈aran̈a Kristy Jesosy, hiambin̈y fonaro ndreky sain̈inaro.” (Filipianina 4:6, 7) Ke ino raha mety koran̈inao lera anao mivavaka aminany, baka anao hahazo fiadanantsain̈y io?

Anao antsendriky mila man̈eky fa ten̈a problemo aminao figiahan̈a io, avio anao fo lakilenizio. Ke izikoa koran̈inao amy Zan̈ahary raha iritriretinao hatao, avio mifen̈y anao mitady fan̈ampian̈a ndreky mitandrin̈y amy raha mety hahavy anao ho tafigiaka ndraiky koa, Zan̈ahary hitahy anao. Koran̈iny Baiboly fa “zay olo tsy nan̈araka lalàn̈a ke manitriky raha ratsy nataony tsy hahomby, fa zay olo man̈ambara hadisovan̈a ke miala amy raha ratsy nataony, hahazo famindrampo.” (Ohabolana 28:13) Jesosy nivolan̈a koa fa atsika mety mivavaka karaha ty: “Aza ambela ho resiny fakampan̈ahy zahay, fa avota aminy araiky ratsy in̈y zahay.” (Matio 6:13) Fa karakory han̈anaovanao raha mifan̈araka vavaka ataonao? Akory hazahoanao valimbavaka?

2. Man̈ovoza angovo baka amy Volan̈a Zan̈ahary. “Fotony Volan̈a Zan̈ahary io velon̈o ndreky mahery ... ke mahavita man̈avaka vatan̈anolo ndreky raha an̈aty fô an̈y, baka io mampisaraka van̈iny taolan̈a ndreky tsoka, ke mahay raha iritreritiny fô ndreky raha tianizio hatao.” (Hebreo 4:12) Hitanolo maro navy pigiaka taloha fa ten̈a nan̈ampy iro mamaky andininy vitsivitsy isanandra, avio misaintsain̈y iro io. Ho panoratra salamo araiky ty: “Sambatra olo tsy man̈araka torohevitrinolo ratsy fan̈ahy, ndreky tsy mitsangana amy lalan̈a fandihanany panota, ndreky tsy mipetraka amy tany fipitrahanolo pikotran̈a olo. Lalàn̈any Jehovah fo tiany, ke lalàn̈anany io vakiny moramora matsan̈a alin̈y. ... Raha jiaby ataony hahômby aby.”​—Salamo 1:1-3.

Fianaran̈a Baiboly niaraka tamy Vavolombelon̈o Jehovah nan̈ampy Alain, ke izy nivolan̈a: “Haiko tsarabe fa izikoa tsy tio Baiboly ndreky toro lalan̈a an̈atinizo ao, zaho otrizay tsy nafaka tamy toaka fa mety efa naty foeky.”

3. Mahaiza mifehy ten̈a. Volan̈iny Baiboly fa nisy olo tamy fiangonan̈a kristianin̈y efa navy namolava taloha, kanefa efa navoasasa madio tsarabe, tamy ‘fan̈ahiny Zan̈aharintsika.’ (1 Korintianina 6:9-11) An̈isany nan̈ampy iro hiala tamy figiahantoaka dila loatra ndreky ho vôly tamy fety tsy voafehy fanan̈andro fifehezanten̈a. Fan̈ahy masin̈iny Zan̈ahary man̈ampy olo hanan̈a toetry io. “Anaro tsy mila mamony divay, fotony izio mitariky anaro han̈erampo amy fitondranten̈a ratsy. Anaro mila feno fan̈ahy masin̈y fo.” (Efesianina 5:18; Galatianina 5:21-23) Jesosy Kristy nampan̈anten̈a fa izy “han̈amia fan̈ahy masin̈y lan̈iany olo mangataka zen̈y aminany.” Ke “mangataha fo, fa hamian̈a edy anaro.”​—Lioka 11:9, 13.

Lan̈iany olo tihankasitrahany Jehovah amy fanompoan̈a ataony, izy mila manan̈a fifehezanten̈a. Famakian̈a ndreky fianaran̈a Baiboly, avio vavaka baka amy fô han̈ampy iro amy raha zen̈y. Aza mora kivy, fa aleva onon̈o fampan̈antinan̈a amezany Baiboly ty: “Lan̈iany olo mamafy amy fan̈ahy ndraiky hijinja fiain̈ana mandrakizay baka amy fan̈ahy. Ke irarian̈a atsika tsy ho vôly han̈ano ny tsara, fotony amy fotoan̈a mety, atsika hijinja izikoa atsika tsy kajo.”​—Galatianina 6:8, 9.

4. Miaraha amy naman̈a tsara. “Lan̈iany olo miaraka aminolo misy jery hanjary ho hisy jery, fa hidirany antambo ndraiky lan̈iany olo minaman̈a aminolo tsisy sain̈y.” (Ohabolana 13:20) Ambarà iro namanao taloha fa anao efa nanapakevitry hitandrin̈y amy figiahan̈a toaka. Baiboly efa nivolan̈a fa anao koa miala amy “figiahan̈a divay be loatra, ndreky fety feno fitondranten̈a ratsy, ndreky mifan̈oesa migiaka, iro lany hevitry ke tsy voly ‘hanihitihy anao.’ (1 Petera 4:3, 4) Ke mifen̈a tsy hiaraka aminolo efa hitanao fa mety hanambatamban̈a ezaka ataonao.

5. Asiava erany toaka higiahanao. “Aza man̈eky hibolibolainy donia ty eky, fa man̈ovoà ke avaoza sain̈inaro, misy handinihanaro tsarabe ndreky hahaizanaro sitrapony Zan̈ahary salakady tsara, ankasitrahin̈y, baka io tsisy tsin̈iny.” (Romanina 12:2) Zan̈ahary hankasitraka fomba fiain̈ananao izikoa toro lalan̈any Baiboly ambelanao han̈isy erany toaka higiahanao, fa tsy iro namanao na “donia ty.” Karakory fo hahaizanao eran̈a toaka ten̈a fanaoko anao?

Izikoa jerinao efa tsy miasa tsarabe eky, dikanizen̈y efa be loatra toaka nigiahanao. Ke anao koa mifidy higiaka toaka, ataova aminany tsara eran̈any toaka iritriretinao higiahan̈a fa aza atao farifary an̈y fo. Aza adin̈a fa anao misy problemo amy figiahan̈a. Asiava erany tsara habezany toaka higiahanao, avio aza atao marikitry erany araiky efa mampamamo anao in̈y.

6. Mianara man̈ano “ehe.” “Fa volan̈anaro izikoa fa ‘Ia’, ia, izikoa fa ‘ehe’, ehe.” (Matio 5:37) Izikoa misy olo tsy vôly mandrisiky anao higiaka, nata izy olo tsy ratsy jery fa diso hevitry fo, mahaiza man̈ano ehe. “Volan̈a tsara ndreky mamy sira fo tokony hivolan̈inaro, baka ho hainaro raha tokony hivolan̈iny aminolo tsiaraikiaraiky.”​—Kolosianina 4:6.

7. Mangataha fan̈ampian̈a aminolo. Mivolàn̈a aminolo hitanao mety han̈ampy anao ho tapakevitry hitandrin̈y, izikoa anao fa migiaka, sady afaka hankafatatra finoan̈anao. “Tsara aroe toizay araiky, fotony azahoandro hatsaran̈a maro asa mare ataondro. Fa izikoa lavo araiky afaka man̈anko izy namany.” (Mpitoriteny 4:9, 10; Jakoba 5:14, 16) Karaha ty koa torohevitry baka amy fikambanan̈a araiky miady amy figiahantoaka dila loatra, an Etazony an̈y: “Mety ho sarotro mare fialan̈a amy figiahan̈a toaka dila loatra io. Ke iangavia havanao na namanao han̈ampy anao hanakatra tanjon̈onao.”

8. Aza miovaova hevitry. “Ke anaro tokony ho pan̈araka volan̈a fa tsy pitandren̈y fo, amy zen̈y anaro tsy hamitaten̈a aminy hevitry diso. Fa lan̈iany mizaha tsarabe lalàn̈a lavorary mankafaka olo ke man̈araka izio fo, hanjary pan̈araka volan̈a izy fa tsy basiny mitandren̈y fo. Ho sambatra izy, izikoa man̈araka volan̈a.”​—Jakoba 1:22, 25.

Akory atao miala amy toaka?

Tsy olo jiaby migiaka toaka dila loatra zay andivoziny toaka aby. Fa iro olo mazàn̈a migiaka ndreky migiaka tsy mahay efa aby in̈y fo manjary andivozinizio. Ke olo karaha zen̈y nata efa von̈ono hiala amy toaka, avio nata efa misy olo man̈ampy izy ho fatatra finoan̈a, mbala tsy ampy izy zen̈y. Efa misy raha mitady toaka io baka an̈atiny vatan̈anany ndreky amy jerinany ao. Karaha ty nivolan̈iny Alain: “Hitako narary mare taminaka fialan̈a tamy toaka io. Tio zaho vo nahay fa mila mitaha amy dokotera zaho, ankoatrany fan̈ampianolo zaho hankafatatra finoan̈anaka.”

Maro koa olo pigiaka toaka mila man̈aton̈o dokotera, baka ho afaka amy toaka ke tsy himpody amizio eky. b Sasany amindro io mila midriky lopitaly foeky. Fa sasany ndraiky mety mila mihina aody fo baka tsy ho resiny fan̈irian̈a mare higiaka, avio baka tsy himpody higiaka eky. Karaha ty nivolan̈iny Zanaka Zan̈ahary sady pan̈ano fahagagan̈a in̈y: “Olo marary mila dokotera fa tsy olo matanjaka.”​—Marka 2:17.

Mahatsara atsika fan̈arahan̈a toromarikiny Zan̈ahary

Mahatsara atsika torohevitriny Baiboly momba toaka, fotony baka amy Zan̈ahary marin̈y. Izy man̈ano raha hampasambatra atsika rango izioty ndreky mandrakizay. Karaha ty ho Alain, efa 24 taon̈o tafarany nivolezany toaka: “Ten̈a ravoravo zaho nahay fa zaho mbala afaka niova, ndreky nahay fa Jehovah ten̈a tihan̈ampy zaho han̈itsy fiain̈ananaka, sady avio koa…” Kalikaly ho latsaka ranomasonany izikoa fa nimpody tan̈atiny jerinany ao raha nataony taloha in̈y. Nihaimbe aby izy nivolan̈a karaha ty: “Jehovah mahay raha mahazo olo ankitin̈y, ke izy mikarakara ndreky man̈amia fan̈ampian̈a ilainolo io. Karaha tsy mampino kony ay!

Ke izikoa anao izioty mbala andivoziny toaka na mbala migiaka dila loatra, aza mora kivy, avio aza mihevitry fa efa tsisy hevitry eky anao. Tsisy ny hafa amy raha nahazo Alain ndreky olo maro koa raha mahazo anao. Nahavita nan̈isy erany toaka higiahandro fo iro tamy farany, avio sasany nafaka toaka foeky. Iro tsy nanen̈iny, ke matokisa anao fa anao koa tsy hanen̈iny!

Anao na hifidy higiaka erakany antonony, na anao hifidy tsy higiaka toaka foeky, areha volan̈a feno fitiavan̈a baka amy Zan̈ahary ty: “Izikoa baka anao man̈araka didinaka, fiadanan̈anao hanjary karaha ten̈arano, baka io fahamarin̈ananao hanjary karaha darobandranomasin̈y!”​—Isaia 48:18.

[Lamariky amy pazy ambany]

[Efajoro/​Sary]

 Andivoziny Toaka ma Anao?

Man̈ontania ten̈a karaha ty:

• Mahay be fo ma toaka giahiko?

• Mahay matetiky fo ma zaho migiaka?

• Mahay mahery fo ma toaka giahiko?

• Zaho ma koa fa miasaloha na misy problemo efa mila toaka edy?

• Izio ma efa misy namako na fianakavian̈anaka efa mazovo amy figiahako toaka?

• Efa navy nisy problemo ma zaho tamy tokantran̈o, na tampiasan̈a, na koa fa nan̈ano dia lavitra baka amy figiahan̈a toaka?

• Mafy aminaka ma tsy migiaka toaka an̈atiny andra araiky?

• Tsy azoazoko ma ain̈inaka izikoa fa mahita olo fady toaka?

• Asitriko olo ma hamarozany toaka giahiko?

Izikoa ia araikiaraiky amy valiny fan̈ontanian̈a aby io, tsara anao mangala onondraha amy figiahan̈a toaka.

[Efajoro/​Sary]

Mahaiza Manapakevitry amy Resaka Toaka

Iritrireta ty alohany anao higiaka:

• Mahafehy ten̈a amy resaka toaka ma zaho sa tokony hifady izio?

Torohevitry: Anao koa tsy mahafehy ten̈a amy resaka toaka, tsaratsara aminany anao tsy migiaka.

• Karakory ma hamarozany toaka tokony higiahiko?

Torohevitry: Diany anao mbala mahazo onondraha, iran̈a sandra toaka giahinao.

• Ombian̈a ma zaho higiaka?

Torohevitry: Izikoa anao fa hitondra tomobily, na han̈ano raha mila fifantohan̈a, na han̈ano raha misy ifandraisany amy fivavahan̈a, na mavesatra, na mihina aody, anao tsy tokony higiaka toaka foeky.

• Aia ma zaho tokony higiaka?

Torohevitry: Tsy tokony amy tany mangingin̈y na amy tany tsy hitanolo foeky anao migiaka fa amy tany azo antoko tsarabe.

• Azovy aby namako higiaka?

Torohevitry: Miaraha migiaka amy naman̈a tsara na fianakavian̈a fa tsy aminolo efa mamolava.

[Efajoro/​Sary]

Nan̈ampy Olo Pigiaka Toaka Araiky Volan̈a Zan̈ahary

Mamolava Supot, mipetraka a Tailandy an̈y. Tamy voanalohany, isaka ariva fo izy migiaka. Koa fa nandeha fotoan̈a, loso nigiaka koa izy ndray maraindrain̈y ndray folakandra. Tafara tatỳ baka izy loso mamolava foeky. Nianatra Baiboly tamy Vavolombelon̈o Jehovah izy baka tio. Nianarany Supot fa tsy tiany Zan̈ahary olo mamo, ke tsy nigiaka eky izy. Fa tsy ela tafaranizen̈y, tafimpody nigiaka ndraiky koa izy. Kivy mare fianakavian̈anany.

Ndray zen̈y, mbala tia Jehovah i Supot sady mbala nan̈iry hanompo izy amy fomba ankasitrahiny. Nampiandro namany aby io Supot baka io nampirisihindro koa fianakavian̈anany baka tsy ho kivy fa hanokana fotoan̈a misimisy hiarahan̈a aminany. Mazava raha volan̈iny 1 Korintianina 6:10. Ho izy ao: ‘Olo mamolava tsy handova Fanjakan̈any Zan̈ahary.’ Tontohitry Supot fa ten̈a maventy ankitin̈y problemonany io ke nila nifen̈y mare izy hiala amy toaka.

Tamy zen̈y, Supot loso tapakevitry hiala toaka aminy ankitiny. Nahazo angovo baka tamy fan̈ahy masin̈y izy ke nahavita niala toaka. Nan̈ampy izy koa fianakavian̈anany ndreky olo miaraka mivavaka taminany ke vitany fo niala izio. Haravoan̈a tsisy ambaka izy niny fianakavian̈anany koa fa nahita izy nanokanten̈a tamy Zan̈ahary ndreky natao Batisa. Ten̈a tsara fifandraisan̈a amy Jehovah i Supot amy zioty, tanteraka fan̈irian̈anany ela jiaby in̈y. Man̈ampy olo hafa ho tsara fifandraisan̈a amy Jehovah koa izy amy zioty.