Man̈ova Olo Baiboly

INO nahavy rasta araiky nanapaka fan̈evanany ndreky tsy nan̈avakavaka olo malandy eky? Baka iô, ino nandrisiky manafolahy araiky hiova kanefa izy kafiry sady mpitaky volan’olo mpivarotro jamala? Zahava raha volan̈indrô.

“Nahavita tsy nan̈avakavaka fo zaho.”​—HAFENI NGHAMA

TAON̈O: 34

TANY FAVIAN̈A: ZAMBIE

IZY TALOHA: RASTA

FIAIN̈ANANAKA TALOHA: Zaho teraka tamy tobin’ny mpitsoa-ponen̈ana ta Zambie teto. Mamako niala ta Namibie tamy fotoan̈an’ny ady, aviô izy niditry tamy Fikambanan̈an’olo Mipetraka an Afriky Atsimoandrefa (SWAPO). Fikambanan̈a io niady tamy fitondrasan̈an’i Afriky Atsimo. Izio baka fitondrasan̈a nitondra Namibie tamy zen̈y.

Firaka tamy zaho 15 taon̈o, zaho niasa nifindrafindra toby fo. Tanora jiaby tamy tobin’ny SWAPO nampiofan̈iny handrisiky olo hitaky fahafahan̈a. Zen̈y raha nampidirin̈y tan̈aty jerinay, aviô zahay nampianarin̈y tsy ho tia olo malandy.

Tamy zaho 11 taon̈o, zaho nan̈iry hivavaka tamy fivavahan̈a araiky tamy toby tao. Nifangaro tamy fivavahan̈a io tao finoan̈a katôliky, loterianin̈y, anglikany, ndreky finoan̈a hafa. Fa pasitera nikoran̈ako raha zen̈y ndraiky nisakan̈a zaho tsy han̈ano zen̈y, ke zaho nanjary tsy nino Zan̈ahary eky. Ke tamy zaho 15 taon̈o, zaho niaraka tamin’ny antokon’ny Rasta. Zaho baka tia reggae salakady tihan̈afoan̈a tsy rariny mavoa olo jôby an Afriky eto. Ke nataoko lava fan̈evanaka sady nitaliako, zaho nihina jamala, nifady hena, ndreky nitaky fahafahan̈an’olo jôby. Zaho nan̈asaha, naloto fitondran-ten̈a sady nizaha filma misy adiady.

BAIBOLY NAN̈OVA FIAIN̈ANANAKA: Tamin’ny 1995, tamy zaho kadiriny 20 taon̈o tiô, zaho nanomboko nieritreritry mare momba raha tôkony hataoko amy fiain̈ana. Ke nianarako aby bokin’ny Rasta jiaby. Sasany tamindrô io nikoran̈a andinin-teny amy Baiboly, fa ndray zen̈y tsy ten̈a nazava taminaka fan̈azavan̈a tao. Ke zaho nanapa-kevitry hamaky Baiboly.

Baka tiô, nisy rasta namako zay nan̈amia zaho boky fianaran̈a Baiboly naboakan’ny Vavolombelon̈on’i Jehovah. Nianarako niaraka tamy Baibolinaka izio. Tafara tatỳ, zaho nifanôjy tamy Vavolombelon̈on’i Jehovah ke zaho nianatra Baiboly tamindrô.

Niady mare zaho ke vitako fo tsy nifima ndreky tsy nigiaka toaka be eky. (2 Korintianina 7:1) Nivoako sanjinaka, nitapako fan̈evanaka, aviô zaho tsy nizaha sary vetaveta ndreky filma misy adiady sady tsy nan̈asaha eky. (Efesianina 5:3, 4) Ndray zaho efa tsy nan̈avakavaka olo eky koa tafara tatỳ. (Asan’ny Apostoly 10:34, 35) Zaho nahavita niova fôtony zaho efa tsy nitandren̈y hira mandrisiky olo han̈avakavaka, aviô zaho efa tsy niaraka tamindrô namako taloha aby in̈y eky, irô baka tsy vôly nitariky zaho himpody ndraiky tamy fiain̈ananaka taloha.

Zaho koa fa baka nan̈ano fiovan̈a aby io, zaho nitady tany misy Tran̈o Fivorian̈an’ny Vavolombelon̈on’i Jehovah, aviô zaho nangataka hiditry an̈isany fivavahan̈a io. Neloko taminaka ry havako, zaho koa fa nanapa-kevitry han̈ano batisa ke hanjary Vavolombelon̈on’i Jehovah. Mamako nivolan̈a taminaka fa zaho zen̈y afaka mifidy zay fivavahan̈a “Kristianin̈y” tiako, ankoatran’ny Vavolombelon̈on’i Jehovah. Nisy havanay araiky nanan̈a plasy an̈abo tamy fitondrasan̈a zay tsy vôly nivolambolan̈a zaho fôtony zaho miaraka amy Vavolombelon̈on’i Jehovah.

Ino raha nan̈ampy zaho hahavita hiaritry fanoheran̈a ndreky adroadron’olo? Nianarako akôry nataon’i Jesosy nifandray tamin’olo, baka iô narehako torohevitrinany. Nampiran̈iko tamy Baiboly raha jiaby nampianarin’ny Vavolombelon̈on’i Jehovah, ke zaho resy lahatra tsarabe fa nahita fivavahan̈a marin̈y. Irô, ohatra, man̈araka raha volan̈in’ny Baiboly ke mandeha mitory. (Matio 28:19, 20; Asan’ny Apostoly 15:14) Baka iô, irô tsy man̈ano pôlitiky.​—Salamo 146:3, 4; Jaona 15:17, 18.

HATSARAN̈A NAZOKO: Nahazo hatsaran̈a maro zaho koa fa nan̈araka raha volan̈in’ny Baiboly. Zaho, ohatra, efa tsy lany vola mandeha an-jatony dolara isaka fanjava amy fividianan̈a jamala. Zaho koa efa tsy mahita raha hafahafa eky, aviô jerinaka ndreky vatan̈anaka nahaisalama.

Tanteraka fan̈irian̈anaka tamy zaho mbala hely fôtony haiko eky ziôty fomba hitondrasako fiain̈ananaka. Fa ny ten̈a maventy, tsapako fa zaho afaka mifandray marikitry amy Zan̈ahary.​—Jakoba 4:8.

“Zaho Nianatra Nifehy Helokonaka.”​—MARTINO PEDRETTI

TAON̈O: 43

TANY FAVIAN̈A: AUSTRALIE

IZY TALOHA: MPIVAROTRO JAMALA

FIAIN̈ANANAKA TALOHA: Tamy zaho mbala hely, fianakavian̈anaka matetiky nifindrafindra. Zahay nipetraka tambanivolo, tan-tanàmbe, aviô nisy fotoan̈a zahay niaraka nipetraka tamy mpivavaka nan̈ano misionera tambanivolo tan̈y. Tiako mare tamy zen̈y, zaho ndreky havanay sasany nandeha namintan̈a, nangôron̈o, aviô niasa boomerang ndreky raha hafa.

Papako mpan̈ano box, ke mbala hely zaho efa nampianariny niady. Zaho baka tiô nanjary kafiry. Mbala tsy ampy 20 taon̈o zaho efa nandany fotoan̈a nigiaka toaka tamy bara. Niasa nikatsiky ady tamin’olo fo zaho ndreky namako aby io. Meso ndreky kakazo fisoman̈a base-ball nampiasainay niadivan̈a tamin’olo 20 na mandilatra zen̈y.

Asanaka nivarotro jamala ndreky entan̈a nangalarin’ny mpiasan’ny paoro. Zaho koa mpitaky volan’olo mpandafo jamala sady firahindrô nimenasy amy basy olo anan̈andrô trosa. Tanjon̈onaka hanjary mpamono olo. Na zaho maty na zaho mahafaty; zen̈y fo ninaka.

BAIBOLY NAN̈OVA FIAIN̈ANANAKA: Tamy mbala hely, zaho efa naren̈iren̈y momba Vavolombelon̈on’i Jehovah. Tsaroako fa tamy zaho kadiriny 20 taon̈o mahery tiô, zaho nan̈ontany mamako asa izy mahay aia tany mety ahitan̈a irô. Andra aroe tafaran’izen̈y, nisy Vavolombelon̈on’i Jehovah araiky nikonkon̈o varavaran̈anay. Dixon an̈arany. Nikoran̈a elaela zahay, aviô zaho nikahiany han̈aton̈o fivorian̈an’ny Vavolombelon̈on’i Jehovah. Zaho nandeha tan̈y, aviô zaho nanohy nivory fo, efa mandilatrany 20 taon̈o ziôty. Fan̈ontanian̈anaka jiaby nivaliandrô baka tamy Baiboly.

Ravoravo zaho nahay fa Jehovah tia olo tsiaraikiaraiky, firaka amin’olo ratsy fan̈ahy. (2 Petera 3:9) Nanjary haiko fa izy Baba be fitiavan̈a mikarakara zaho, ndray tsisy olo mijery zaho. Nahivankivan̈a koa zaho koa fa nahay fa hambelany hadisovan̈anaka izikoa zaho miova. Ten̈a nisy vokany taminaka Efesianina 4:22-24. Izio nandrisiky zaho ‘han̈adoso toetrinaka taloha’ ndreky “hisikiny toetry vaovao, niforôn̈iny mifan̈araka amy sitrapon’ny Zan̈ahary.”

Elaela zaho vo nahavita niova. Vitako tsy nikasiky jamala koa fa andavanandra, fa izikoa zaho fa tafiaraka tamy namako aby io tamy farany herin̈iandra, zaho resy fo. Tontohitry zaho fa izikoa zaho tihiova ankitin̈y, zaho mila miala lavitry irô kamaradiko aby io. Ke zaho nanapa-kevitry hifindra tanàna. Nisy namako sasany tihan̈araka zaho, ke zaho nan̈eky. Fa zahay koa fa tamy lalan̈a, irô nifima jamala aviô zaho namezandrô koa. Nivolan̈iko tamindrô fa zaho efa tsy karaha taloha eky, ke zahay nisaraka koa fa navy tamy sisin-tany. Ren̈iko tafara tatỳ fa irô namako aby in̈y nandeha nitondra basy namaky banky.

HATSARAN̈A NAZOKO: Zaho koa fa tsy ninaman̈a tamy kamaradiko aby in̈y eky, hitako noranora taminaka niova. Vita batisa zaho tamin’ny 1989, ke nanjary Vavolombelon̈on’i Jehovah. Tafaran’ny batisanaka, anabaviko ndreky mamako aviô papako samby nanjary mpanompon’i Jehovah koa.

Efa 17 taon̈o iziô vadian̈anay, aviô telo zanakanay. Zaho nianatra nifehy helokonaka, nata lera misy olo man̈ano raha mampameloko zaho. Zaho koa nianatra nankatia olo baka amy ‘foko, karazan̈a ndreky volan̈a samihafa.’ (Apokalypsy 7:9) Tsapako fa ten̈a marin̈y raha nivolan̈in’i Jesosy ty: “Mpianatranaka ankitin̈y anarô, izikoa tsy miala amy volan̈anaka. Anarô hahay ny marin̈y, ke ny marin̈y io hankafaka anarô.”​—Jaona 8:31, 32.

[Volan̈a nalain̈y]

Zaho nahavita niova fôtony zaho efa tsy nitandren̈y hira mandrisiky olo han̈avakavaka

[Volan̈a nalain̈y]

Niasa nikatsiky ady tamin’olo fo zaho ndreky namako aby io. Meso ndreky kakazo fisoman̈a base-ball nampiasainay niadivan̈a tamin’olo 20 na mandilatra zen̈y