• TERAKA: 1963

• TANY FAVIAN̈A: GRANDE-BRETAGNE

• IZY TALOHA: NANAN̈A ASA TSARA

FIAIN̈ANANAKA TALOHA:

Zaho teraka ta Croydon. Atsimony Londres tany misy izio. Sivy zahay jiaby kibo araiky, fa zaho fahatsiota. Ry olobeko baka amy nosy a St. Vincent, amy faritry Caraïbe an̈y. Mamako nivavaka tamy fivavahan̈a metôdisty. Zaho olo farandraha tia mianatra, fa izikoa raha momba Zan̈ahary zen̈y tsy nahasetry zaho foeky. Matetiky zahay koa fa vakansy, zaho mandeha amy matsabory antanànanay. An̈y zaho mamaky boky maro nindramiko tamy biblioteky.

Nanjary tihan̈ampy olo sahiran̈a zaho, tsy ela hely nivitany fianaran̈anaka. Asanaka nan̈ampy olo tsisy tran̈o ipitrahan̈a ndreky misy antsa avio olo marary sain̈y. Zaho avio nianatra momba siansy mifandray amy fitahan̈a, taminy iniversite. Tsy nampoiziko foeky fa izikoa zaho fa nahazo diplomy, zaho loso nahazo asa tsara fo, ke nanjary nanambola mare. Panolotsain̈y momba fandaminan̈a asa ndreky pikaroko momba fiarahamonin̈y asanaka. Zaho niasa ten̈a. Ordinatera ndreky Internet fo raha nilaiko, zaho fa afaka niasa edy. Matetiky tan̈atiny herin̈iandra vitsivitsy, zaho nandeha tandafy. Nandeha taminy hotely farany tiako zaho, avio nankafy raha maro tsara man̈odidin̈y iô. Zaho koa nandeha tamy toeran̈a misy rano mafana fan̈atsaran̈a vatan̈a aby in̈y, ndreky tamy tany fan̈anaovan̈a spaoro. Taminaka, zen̈y ten̈a fiain̈ana! Fa zaho fo mbala tihan̈ampy olo sahiran̈a fo.

BAIBOLY NAN̈OVA FIAIN̈ANANAKA:

Taon̈o taon̈o zaho nan̈ontany: “Ino loatra ma nampisy atsika ty?” Fa zaho tsiary nieritreritry hitady valinizio tamy Baiboly. Tandraraiky, taminy 1999, Margaret zandriko namangy zaho niaraka tamy kamaradinany Vavolombelon̈o Jehovah. Efa Vavolombelon̈o Jehovah koa Margaret. Namany io ten̈a tihan̈ampy zaho. Ke zaho nan̈eky hianatra Baiboly taminany. Fa fianaran̈anay fo tsy niteky foeky, fotony zaho mbala sahiran̈a taminy asanaka ndreky tamy fiain̈ana.

Taminy 2002, zaho nifindra tatsimoandrefany Angletera tatỳ. Zaho nanohy fianaran̈a taminy iniversite, fotony tiako hahazo doctorat amy fikarohan̈a raha mikasiky fiarahamonin̈y. Nandeha nivory matetiky tamy Tran̈o Fivorian̈a zaho ndreky zanako lelahy. Nahita fianaran̈a mare zaho, kanefa efa tamy Baiboly tao fo nahaizako ino ten̈a antony mampisy raha manahiran̈a amy fiain̈ana ndreky ino raha afaka man̈adoso izio. Marin̈y ankitin̈y raha koran̈iny Matio 6:24. Atsika hoizy ao tsy afaka manompo tompo aroe, fa tsy maintsy mifidy: Zan̈ahary sa harian̈a. Haiko fa zaho tsy maintsy mifidy ino raha ataoko amy voanalohantoeran̈a amy fiain̈ananaka.

Taon̈o man̈araka, Vavolombelon̈o Jehovah nianatra tamy boky Misy Mpamorona Iray Miahy Anao Ve? a Zaho niaraka nianatra tamindro, ke zaho resy lahatra fa efa Jehovah Zan̈ahary fo mahavaha raha manahiran̈a amy fiain̈ananolombelon̈o. Taminy iniversite nianarako tan̈y zahay nampianarin̈y fa izikoa tianao ho hisy dikany fiain̈ananao, anao tsy voatery mino Pamoron̈o zen̈y. Neloko mare zaho. Ke fanjava aroe tafarany nianarako tan̈y, zaho niala avio zaho tapakevitry fa hifantoko amy fianaran̈a Baiboly ndreky fifandraisako amy Zan̈ahary.

Nandrisiky zaho hiova mare raha koran̈iny Ohabolana 3:5, 6: “Matokisa Jehovah amy fonao jiaby, fa aza mitoron̈o fahaizan̈anao. Iritrireta izy amy raha jiaby ataonao, ke hataony mandeha mahitsy fiain̈ananao.” Mbala maromarony hatsaran̈a nazoko taminy harian̈a ndreky laza avio fianaran̈a an̈abo, hatsaran̈a nazoko izikoa zaho fa nahay momba Zan̈aharintsika be fitiavan̈a io. Arakarakany zaho nahay momba fikasan̈any Jehovah momba tany ty ndreky soron̈o nataony Jesosy, zaho nahaitihanokana fiain̈ananaka niny Zan̈aharintsika io fo. Ke natao batisa zaho taminy Avrily 2003. Nan̈atsotra fiain̈ananaka tsihelihely amy zay zaho tafaranizen̈y.

HATSARAN̈A NAZOKO:

Tsisy raha valera mandilatra fifandraisako amy Jehovah. Loso milamintsain̈y mare koa zaho sady ravoravo fotony mahay izy. Ravoravo koa zaho fotony afaka mifandray aminolo ten̈a manompo Zan̈ahary.

Mahaimaro fo raha haiko izikoa zaho fa mianatra Baiboly ndreky mivory. Tiako koa mizara raha haiko aminolo. Zen̈y asako ziô. Afaka man̈ampy olo tsarabe eky zaho iziô sady man̈ampy iro hanan̈a fiain̈ana tsara rango zioty ndreky hahazo donia vaovao. Nanjary pitory manontolo andra zaho nanomboko tamy Ziain 2008. Zaho mbala tsiary ravoravo ndreky afapô mandilatra zen̈y. Haiko eky ziô antony nampisy atsika. Man̈ano mersy Jehovah mare zaho.

• TERAKA: 1973

• TANY FAVIAN̈A: AOTRISY

• IZY TALOHA: PILOKA

FIAIN̈ANANAKA TALOHA:

Zaho tombo ta Braunau. Izio tanàna hely a Aotrisy atỳ. Maro pan̈arivo olo tamy faritry nisy zahay io, sady tsy dia nisy loatra olo man̈ano asa ratsy. Katoliky fianakavian̈anaka.

Taminy 1984,mbala kadiriny 11 taon̈o tio zaho taminio nisy raha ratsy mare nandalo. Zaho ndreky kamaradiko be zay taminio niaraka nisaoma laboly. Folakandranizio, izy nikon̈ony tomobily ke naty. Ten̈a nisy vokany mare taminaka raha zen̈y. Taon̈o maro tafarany nifatesany in̈y, zaho loso diniky fo asa mba man̈ano karakory olo izikoa fa maty.

Izikoa fa vita fianaran̈anaka, zaho nanjary elektrisiain. Zaho nanjary zatra niloka, sady aminio tsy raha helihely vola nan̈anaovako loka. Fa ndray zen̈y, zaho mbala tsiary sahiran̈a arabola. Zaho koa tia nan̈ano spaoro, sady nanjary tia hira heavy métal. Niasa nandeha diskô fo zaho, man̈ano fety fo fiain̈ananaka. Raha tiako ndreky namparavoravo zaho fo raha nataoko, sady zaho ten̈a ratsy fitondranten̈a. Kanefa zaho mbala tsy afapô tamy fiain̈ana.

BAIBOLY NAN̈OVA FIAIN̈ANANAKA:

Taminy 1995, nisy lelahy Vavolombelon̈o Jehovah efa matoe zay, nikonkon̈o varavaran̈anaka. Zaho baka tio namezany boky zay mikoran̈a raha volan̈iny Baiboly momba man̈ano karakory atsika izikoa fa maty. Nalaiko boky io fotony mbala ten̈a nampieritreritry zaho mare nifatesany kamaradiko in̈y. Tsy toko mikoran̈a momba fahafatesan̈a in̈y fo nivakiko, fa boky io jiaby.

Fan̈ontanian̈anaka jiaby momba fahafatesan̈a in̈y voavaly tao aby. Ary mbala nisy raha hafa koa nianarako. Zaho tamy zen̈y mbala katoliky, ke Jesosy fo ten̈a inoanay. Fa izikoa zaho fa nandiniky Baiboly tsarabe, zaho loso nifandray tamy Zan̈ahary Jehovah. Izy Babany Jesosy. Rikian̈a zaho nahay fa kaiky Jehovah mikarakara atsika sady tiany koa atsika mba mahay izy. (Matio 7:7-11) Loso haiko koa fa kaiky Jehovah manan̈a fihetsehampo, avio izy tsiary ndraiky ke tsy mitana volan̈anany fo. Loso tiako nandalin̈y momba faminanian̈a amy Baiboly ndreky nizaha karakory nahatantirahandro io. Raha hitako baka tamizio nahainankafatatra finoako Zan̈ahary fo.

Tsy ela, hitako fa kaiky Vavolombelon̈o Jehovah fo olo ten̈a tia man̈ampy olo hahay raha koran̈iny Baiboly. Nizahako tamy Baiboly katolikinaka tao iro andininy tan̈atiny bokiny Vavolombelon̈o Jehovah. Arakaraka zaho nianatra, zaho nahairesy lahatra fo fa nahita ny marin̈y.

Hita tamy fianaran̈a Baiboly nataoko io fa tiany Jehovah zaho hiain̈y mifan̈araka amy fitsipikinany. Izikoa zaho fa baka namaky Efesianina 4:22-24, hitako fa mila adosoko ‘toetrinaka taloha, araiky mifan̈araka amy fitondranten̈anaka taloha.’ Avio zaho mila ‘misikiny toetry vaovao, niforon̈iny mifan̈araka amy sitrapony Zan̈ahary.’ Ke nialako fitondranten̈a ratsinaka in̈y. Hitako koa fa zaho tsy maintsy voly tamy filokan̈a io, fotony izio mahavy olo ho tia vola ndreky poerapoera. (1 Korintianina 6:9, 10) Haiko fa tsy ho vitako hiova izikoa zaho mbala mifandray amindro namako taloha aby io. Zaho mila miaraka aminolo man̈araka fitsipiky mitovy aminaka koa.

Tsy nora taminaka niova. Fa zaho nanomboko nivory niaraka tamy Vavolombelon̈o Jehovah avio zaho ninaman̈a tamindro tampivorian̈a tan̈y. Zaho mbala nanohy fo koa tamy fianaran̈a Baiboly nataoko in̈y. Zen̈y nan̈ampy zaho han̈ova hira tandrin̈esako, tanjon̈onaka, ndreky sanjinaka. Natao batisa zaho taminy 1995.

HATSARAN̈A NAZOKO:

Zaho iziô efa tsy tia vola ndreky harian̈a mare eky. Avio zaho efa tsy mora meloko be karaha taloha in̈y. Zaho ziô koa efa tsy miasaloha be momba raha hiboaka aminy hoavy.

Ravoravo zaho fotony an̈isany panompony Jehovah erantany. Misy amindro io nata miatriky problemo be, iro mbala tsy mivadiky amy Jehovah foeky. Efa tsy raha tiako fo raha ataoko, fa zaho efa manompo Jehovah ndreky man̈ampy olo. Zen̈y iziô raha andaniako fotoan̈anaka ndreky angovonaka.

• TERAKA: 1963

• TANY FAVIAN̈A: ANGLETERA

• IZY TALOHA: KIVY TAMY FIAIN̈ANA

FIAIN̈ANANAKA TALOHA:

Zaho teraka tan Angletera. Fa nifindra tan Aostralia zahay tamy zaho fito taon̈o. Zahay nipetraka ta Gold Coast teto. Izio toeran̈a fandihanany pizaha tany a Queensland an Aostralia atỳ. Zahay tsy olo manandraha, fa azonay fo ndraiky raha ten̈a ilainay.

Nilamin̈y fiain̈ananay tamy zen̈y. Ndray zen̈y, zaho mbala tsiary ten̈a nahatsapa sambatra zen̈y. Nata zaho aby loso kivy mare tamy fiain̈ana. Papako mamolava. Ke izy tsy ten̈a tiako, sady izy koa nampijaly mamako fo. Efa tafara tatỳ vo azoko nan̈ino izy man̈ano karaha io. Kaiky izy nan̈ano maramila ta Malezia.

Nanjary nigiaka toaka mare koa zaho izikoa fa tamy lise. Niala nianatra zaho tamy zaho 16 taon̈o, avio loso zaho nandeha tamy tafiky tandranomasin̈y. Zaho nihina jamala avio nandivoziny sigarety. Nahainigiaka toaka fo zaho, ke karaha tsisy varany velon̈o zaho koa tsisy izio. Tamy voanalohany, isaka farany herin̈iandra fo zaho vo mamo, fa baka tio nanjary isanandra foeky.

Tamy zaho kadiriny 20 taon̈o tio, loso diniky zaho asa raha mba ten̈a misy ankitin̈y Zan̈ahary zen̈y. Ke ho zaho: ‘Izikoa ten̈a misy ankitin̈y Zan̈ahary, nan̈ino ambelany olo mijaly avio maty?’ Ndray zaho aby nanoratra tononkalo man̈amia tsin̈y Zan̈ahary amy raha ratsy jiaby misy amy donia ty.

Niala tamy tafiky tandranomasin̈y zaho tamy zaho 23 taon̈o. Avio zaho nan̈ano asa isankarazany, sady nandeha tampitandranomasin̈y tan̈atiny taon̈o araiky. Fa nata zen̈y, zaho mbala kivy fo. Zaho tsy nan̈iry hanan̈a tanjon̈o zen̈y. Tsisy raha nahasofy zaho. Karaha hitako tsisy dikany foeky manan̈a tran̈o, asa tsara, na toeran̈a an̈abo zen̈y. Efa figiahan̈a toaka ndreky fitandrin̈esan̈a hira edy raha nampahivankivan̈a zaho.

Tsaroako fa tamy fotoan̈a araiky zay, tiako hay mare ino ma antony nampisy atsika olombelon̈o. Ta Pologne zaho taminio, nandeha nitsidiky toby fitanana a Auschwitz. Zaho efa navy namaky boky mitantara hakafirianan̈a natao tamy toby io tao. Fa tamy zaho nitsangana tamy toeran̈a io avio nahita habezanizio, tiô zaho vo ten̈a nalahelo. Tsy azoko foeky nan̈ino eky olo ratsy nahavita nikafiry naman̈a mare karaha zen̈y. Tadidiko fa latsaka aby ranomasonaka tamy zaho nihodinkodin̈y tamy toby io tao sady nivolan̈a ‘raha nan̈ino loatra.’

BAIBOLY NAN̈OVA FIAIN̈ANANAKA:

Taminy 1993, zaho izikoa fa tafimpody tamy tany nisy zaho, zaho nanomboko namaky Baiboly, misy hahitako valiny fan̈ontanian̈anaka. Tsy ela tafaranizen̈y, nisy Vavolombelon̈o Jehovah aroe nikonkon̈o varavaran̈anaka. Iro nikaiky zaho han̈aton̈o fivoriambe atao amy stady marikitry iô. Zaho nandeha.

Vo fanjava vitsivitsy loso, zaho tamy stady io tao nizaha laboly. Fa tsy nitovy tamy zen̈y foeky fivoriambe io. Iro Vavolombelon̈o Jehovah aby io ten̈a mahalala fomba sady mihaja tsara sanjindro, avio zanakandro misy jery. Rikian̈a zaho izikoa fa lera fihinanan̈a mantsan̈a in̈y. Mandeha anjatony iro niaraka nihina tao, kanefa izikoa iro fa samby nimpody tamy pilasindro, tsisy ahitry nipetrapetraka. Tsy basinizen̈y, fa hitako iro karazanolo mahay afapô ndreky mihavan̈a tsara. Efa zen̈y edy raha niriko. Tsisy tadidiko na araiky tamy raha nikoran̈indro tamy kabaro taminy andra io. Fa tsy mety adin̈ako ndraiky fitondranten̈andro.

Alin̈izio, tsaroako fa nisy zanaka anabaviny papanay zay tia mamaky Baiboly, sady izy nianatra tamy fivavahan̈a isankarazany. Taon̈o vitsivitsy talohanizen̈y, izy nivolan̈a taminaka fa baka amy voany, nivolan̈iny Jesosy, ahaizan̈a aia fivavahan̈a marin̈y. (Matio 7:15-20) Ke zaho nieritreritry fa mila haiko tsara, fara faharatsiny ino raha mampiavaka Vavolombelon̈o Jehovah. Vo sambany tamy fiain̈ananaka zaho nahatsapa nanan̈a fan̈antinan̈a.

Herin̈iandra tafaranizin̈y, nimpody taminaka tao iro Vavolombelon̈o Jehovah aroe nikaiky zaho han̈aton̈o fivoriambe in̈y. Iro nitaon̈o zaho hianatra Baiboly, ke zaho nan̈eky. Zaho koa nanomboko nandeha nivory niaraka tamindro.

Niova fomba fahitako Zan̈ahary, arakaraka zaho nianatra Baiboly. Loso haiko fa kaiky tsy baka aminany aby aviany faharatsian̈a ndreky fijalian̈a io. Nata izy aby malahelo izikoa fa misy olo man̈ano raha ratsy. (Genesisy 6:6; Salamo 78:40, 41) Zaho tapakevitry hifen̈y tsy han̈ano raha mampalahelo Jehovah eky. Tiako hamparavoravo fonany. (Ohabolana 27:11) Zaho efa voly toaka ndreky jamala. Avio nialako koa fitondranten̈a ratsinaka. Natao batisa zaho tamy Marsy 1994.

HATSARAN̈A NAZOKO:

Zaho ravoravo sady ten̈a mahatsiaro afapô. Efa tsy amy toaka eky han̈adosoako asalohanaka, fa zaho nianatra man̈ankin̈y raha man̈avesatra zaho amy Jehovah.​—Salamo 55:22.

Efa folo taon̈o zay zahay roeny Karen loso fivadiany. Vavolombelon̈o Jehovah izy sady tsara saora mare. Karen tamy zen̈y efa nananjanaka man̈angy tsara hely. Nella an̈arany. Ravoravo zahay telo mianaka mampiasa fotoan̈anay an̈ampian̈a olo hahay ny marin̈y momba Zan̈ahary. Iziô vo ten̈a misy dikany fiain̈ananaka.