Chikalata Chakwawula kwa Ahebeli 8:1-13
8 Sambano pakwamba yatukuŵechetayi, yisyesyene yakwe nayi: M’weji tukwete jwamkulungwa jwa ŵakutaga mbopesi jweleju, soni jwalakwejo atemi kumkono wamlyo wa Mlungu jwakuchimbichika jwali pampando waumwenye kwinani.
2 Jwalakwejo ali jwakutumichila m’malo geswela soni mu chitenti chisyesyene chiŵataŵile Yehofa ngaŵaga ŵandu.
3 Pakuŵa jwamkulungwa jwa ŵakutaga mbopesi jwalijose akusamsagula kuti apelecheje mituka soni mbopesi. Myoyo yaliji yakuŵajilwa kuti jwalakwejosoni akole chindu chakuti apeleche.
4 Yikaŵe kuti jwalakwejo ali chiŵela pachilambopa, yikaliji yangakomboleka kuti aŵe jwakutaga mbopesi, ligongo apali kala ŵakutaga mbopesi ŵane ŵakusapeleka mituka mwakamulana ni Chilamusi.
5 Ŵakutaga mbopesi ŵeleŵa akusatenda utumiki wawo pakujigalila chisyasyo cha yindu yakwinani soni kawoneche kakwe. Yeleyi yawonechele chenene pandaŵi jele Mlungu ŵamsalilaga Mose kataŵe ka chitenti. Ŵamsalile kuti, “Mlolechesye kuti mpanganyisye yindu yosope mwakulandana ni yindu yinamlosisye petumbi pala.”
6 Nambo apano Yesu apochele utumiki wambone mnope ligongo jwalakwejo alisoni namangoswe jwa chilangano chine chambone. Chilangano chelechi ŵachitamilikasisye mwakukuya malamusi soni chili cha yindu yambone yaŵasasile Mlungu.
7 Yikaŵe kuti chilangano chandandacho nganichikola yakulepela, nikuti ngamkanipasosekwasoni chilangano chaŵili.
8 Mlungu ŵapatile yakulepela pasikati pa ŵanduwo kupitila m’maloŵe aga gakuti, “Yehofa akuti, ‘Mpikane. Masiku gakwika gele chinjitenda chilangano chasambano ni nyumba ja Yisalayeli soni nyumba ja Yuda.
9 Chilangano chelechi ngasichiŵa chakulandana ni chilangano chinatesile ni achinangolo ŵawo pa lisiku linakamwile jemanjajo pamkono ni kwakoposya m’chilambo cha Iguputo. Ligongo lyakuti jemanjaji ŵalesile kukuya yitwalangene, unejo nalesile kwasamalila,’ akuti myoyo Yehofa.
10 “Yehofa akuti, ‘Pagachimala masiku gelego chinjitenda chilangano achi ni nyumba ja Yisalayeli: Chinjiŵika malamusi gangu munganisyo mwawo, soni chinjigalemba m’mitima jawo. Une chinjiŵa Mlungu jwawo, soni jemanjajo chachiŵa ŵandu ŵangu.
11 “‘Pangali mundu juchachimjiganyaga mjakwe jwakutama najo m’chilambo chimo kapena mlongo mjakwe kuti, “Mummanyilile Yehofa.” Ngasatenda yeleyo ligongo wosope chachimanyilila une, kutandila ŵangachimbichika mpaka ŵakuchimbichika.
12 Pakuŵa une chinjatendela chanasa pa yitendo yawo yakusakala, soni ngasingumbuchila yakulemwa yawo.’”
13 Mlungu pakuŵecheta kuti “chilangano chasambano,” nikuti atendekasisye chilangano chakala chila kuŵa changali masengo. Sambano chilangano chachimasile masengocho chikalambele soni chisigele panandi kuwa.
