Kulinjikwa kuli kukumbila kutenda cindu cinecakwe mnopemnope cakusakala. Kwende tuwanicisye kuti wawojo ali mu golosale ni aciweni cindu cinecakwe cakusalala mnope. Kaneko sikwayicila nganisyo syakuti agambe kwiŵa cinduco ligongo lyakuti pangali mundu jwampaka ŵawone. Nambo cikumbumtima cawo cikwakanya. Kaneko nganisyo syakusakalasyo akusityosya. Apa mpaka tujile kuti akombwele kuŵa ŵakulupicika pakulinjikwa.

YAJIKUSASALA BAIBULO

Pakulinjikwa ngayikusagopolela kuti wawojo ali ŵakusakala. Baibulo jikusasala kuti jwalijose mpaka alinjidwe. (1 Akolinto 10:13) Nambo ngani jigonile pa yatukusatenda patulinjidwe. Ŵandu ŵajinji akusajigalika mnope ni yakumbila mpaka kutenda yakusakala. Nambo ŵane akusawujila munyuma ni kuleka ganicisya cakusakalaco.

“Mundu jwalijose akusalinjidwa ni lisosa lya mtima wakwe.”—Yakobo 1:14.

Baibulo jikusasala yindu yampaka yimlongolele mundu kutenda cakusakala. Lilemba lya Yakobo 1:15 likusasala kuti, “Lisosa [lyakusakalali] palikusile mnope likusaŵeleka ulemwa.” Mwakata mpaka tujile kuti naga tukukunda kuti yakumbila yetu yitamilicice munganisyo mwetu, yikusatutendekasya kuti mpaka tutende cakusakalaco. Nambope mpaka tukombole kumalana ni yakumbila yakusakala.

BAIBULO MPAKA JAKAMUCISYE

Pasituyicile nganisyo syakumbila yakulemweceka mpaka tukombole kusityosya. Mwamtuli? Mwakuŵika nganisyo syetu pa yindu yine mpela kutenda yineyakwe, kunguluka ni mjetu, kapena ganicisya yiliyose yayili yambone. (Afilipi 4:8) Nambosoni mpaka tutende cenene kuganicisya yakusawusya yampaka tusimane nayo ligongo lyakuti tukundile kuti kulinjikwa kutugomece. Yeleyi mpaka yipwaticepo kulagasika nganisyo, kusokonecela kwa cilu soni umi wetu wausimu. (Deuteronomo 32:29) Lipopelo mpaka likamucisyesoni mnope. Yesu Klistu jwatite, “Apopeleje mwangalecesya kuti akalinjikwa.”—Matayo 26:41.

“Akasiŵalambusya, Mlungu ngaŵa mkumloŵesya. Cilicose camisile mundu cacigowola cicoco.”—Agalatia 6:7.

YISYESYENE YAKWE

Akuwoneje kulinjikwa kuti wuli mtego wampaka utendekasye mundu jwakuloŵela kapena kuti mundu jwangamanyilila yejinji kusimana ni yipwetesi. (Yakobo 1:14) Yeleyi yili yisyene, mwambone, naga mundu atesile yamsese mpaka asimane ni yakogoya mnope.—Miyambo 7:22, 23.

BAIBULO MPAKA JAKAMUCISYE

Yesu jwatite, “M’yoyo, naga liso lyenu lya kumlyo likumlemwekasya mlikolotole ni kulijasa.” (Matayo 5:29) Apa Yesu nganagopolelaga kuti tukusosekwa kulityosya liso lisyesyenelyo. Nambo ŵagopolelaga kuti naga tukusaka kumsangalasya Mlungu soni kuti citukapate umi wangamala, tukusosekwa kuyitendekasya yiŵalo yetu kuŵa yewe ku yindu yakusakala. (Akolose 3:5) Yeleyi yikulosya kuti mpaka tusosekwe kutendapo kandu mwacitema patukulinjikwa. Mundu jwine jwakulupicika jwa Mlungu jwapopesile kuti, “Atendekasye meso gangu kuti gakalola yindu yangali mate.” —Salimo 119:37.

Yili yisyene kuti kuligosa mpaka kuŵe kwakusawusya mnopemnope ligongo lyakuti “cilu cetu cili celopotoce.” (Matayo 26:41) M’yoyo citulemwesyejepe. Nambope patuyiweni kuti tulemwisye nikutenda yakomboleka kuti cikaŵa cisyoŵe, Mkupanganya jwetu, Yehofa Mlungu, cacitutendela “canasa.” (Salimo 103:8) Yeleyi yili yakulimbikasya.

“Wawo Ya, yikaŵe kuti akusalolecesya yakulemwa, ana ŵani ŵakajimi pameso pawo, wawo Yehofa?”—Salimo 130:3.