AJAWULEJE PASOGOLO LIGONGO “LISIKU LYEKULUNGWA LYA YEHOFA LIŴANDICHILE”

“Kwende tujawule pasogolo.”—AHEB. 6:1.

1, 2. Ana Aklistu ŵaŵatamaga ku Yelusalemu soni ku Yudeya, ŵapatile chamtuli upile ‘wakutilila ku matumbi’?

 YESU paŵaliji pachilambopa, ŵakulijiganya ŵakwe ŵayiche ni kumwusya kuti, “Ana tichichitendekwa chichi kulosya kuti ndaŵi jikwanile jakwikasoni kwa ŵalakwe nambosoni mbesi ja chilambo chapasi?” Kukwanilichikwa kwandanda kwa chakulochesyachi, kwakwanilichikwe mu yaka 100 yandanda. Yesu jwasalile chakutendekwa chakulosya kuti tuli kumbesi kwa chilambo chakusakalachi. Ŵandu pachachilola chakutendekwachi, ‘ŵali mu Yudeya chatilile ku matumbi.’ (Mat. 24:1-3, 15-22) Ana ŵakulijiganya ŵa Yesu ŵamanyilile ya chimanyilochi soni kutenda yindu mwakamulana ni malangiso gaŵasalile?

² Pali pamasile yaka yitatu, mu 61 C.E. Paulo jwalembile chikalata chakwawula kwa Aklistu ŵa kwa Ahebeli, ŵaŵatamaga ku Yelusalemu soni madela gakusyungulila. Mu chikalatachi mwaliji utenga wangapita mumbali. Paulo soni ŵakulupilila achimjakwe nganamanyililaga kuti paliji pali pasigele yaka msano kuti mbali jandanda ja “yisawusyo yakogoya mnope” yiwonechele. (Mat. 24:21) Mu 66 C.E., Cestius Gallus jwasigele panandi kuti akawujonanje msinda wa Yelusalemu pakamulichisya masengo asilikali ŵa Chiloma. Nambo mwangajembecheya jwalakwe ni asilikali ŵakwe ŵachenjile nganisyo. Yeleyi yapeleche upile wakuti ŵandu ŵaŵaliji mu msindamo atile.

3. Ana ni malangiso gapi gele Paulo ŵapele Aklistu ŵa kwa Ahebeli soni ligongo chichi?

³ Aklistuŵa ŵasosekwaga kumanyilila kuti kutendekwa kwa yeleyi kwaliji kukwanilichikwa kwa maloŵe ga Yesu soni ŵasosekwaga kukopoka mumsindamo. Nambo ŵane mwa jemanjaji ŵaliji “ŵakupikana panandipanandi.” Jemanjaji ŵaliji mpela ŵanache ŵaŵasosechelaga “mkaka.” (Aŵalanje Ahebeli 5:11-13.) Atamose kuti ŵane mwa jemanjaji ŵaliji ali mu usyesyene kwa yaka yejinji nambope ŵaliji, “alilekangenye ni Mlungu.” (Aheb. 3:12) Ŵane ŵakwete “ndamo” jangasimanikwa pa misongano ja Chiklistu. Yeleyi yatendekwaga pandaŵi jele “lisiku [lyaŵandichile] kwika.” (Aheb. 10:24, 25) Paulo jwapele malangiso ga pandaŵi jakwe gakuti, “Patulesile chijiganyo chandanda cha Klistu, sambano kwende tulinjelinje kuti tuŵe ŵakomangale mwausimu.”—Aheb. 6:1, NWT.

4. Ligongo chichi kuŵa mesope kuli kwakusosekwa soni tukusosekwa kutenda chichi?

⁴ Tukutama mu ndaŵi jele chakulochesya chakumalisya chiŵasasile Yesu chikukwalichikwa. “Lisiku lyekulungwa lya AMBUJE” ndaŵi jele jwalakwe chachijonanga chilambo cha Satanachi ‘jiŵandichile.’ (Sef. 1:14) Apano tukusosekwa kuŵa mesope patukulola kukwanilichikwa kwa yakulochesya ya m’Baibulo soni kutenda yakuti tuŵe paunasi wambone ni Yehofa. (1 Pet. 5:8) Ana yeleyi ni yatukutenda? Kwawula pasogolo mwausimu mpaka kutukamuchisye kumanyilila kuti tukutama m’masiku gakumalisya.

Ana Kwawula Pasogolo Kukusagopolela Chichi?

5, 6. (a) Ana komangala mwausimu kukusapwatikapo chichi? (b)  Ana ni yindu yiŵili yapi yatukusosekwa kutenda kuti tukule mwausimu?

⁵ Paulo nganagamba kwalimbikasya Aklistu ŵa m’yaka 100 yandanda ŵa kwa Ahebeli kuti ajawule pasogolo nambo ŵasalilesoni yayikusosechela kuti mundu ajawule pasogolo. (Aŵalanje Ahebeli 5:14.) “Ŵandu ŵakomangale” mwausimu ŵangagamba kumwa “mkaka” nambo akusalya “yakulya yakulimba.” Myoyo jemanjaji akusamanyilila yosope “majiganyo gandanda” soni yijiganyo “yakusokoka mnope” ya usyesyene. (1 Akoli. 2:10) Konjechesya pelepa akusakamulichisya masengo lunda lwawo pakulekanganya chachili chambone ni chakusakala. Pakusaka kusagula yakutenda, lundalu lukusakamuchisyaga kumanyilila mfundo sya m’Baibulo soni mwampaka asikamulichisye masengo.

⁶ Paulo jwalembile kuti, “Paligongo lyeleli, tuyikamulichisye mnope yele yitwapikene, kogopela kuti tutakujigalwa.” (Aheb. 2:1) Kujigalwa kweleku mpaka kutendekwe mwapanandipanandi ni kuleka chikulupi chetu. Mpaka “tuyikamulichisye masengo mnope yatwapikene” mwakuŵalanga Baibulo chinga patuli panyumba kapena pa misongano ja Chiklistu. Myoyo jwalijose akusosekwa kuliwusya kuti: ‘Ana nguganichisyape majiganyo gandanda? Pangani jakwayana ni yindu yausimu, ana ngusatenda yindu mwamwambo? Ana mpaka ndende yamtuli kuti njawule pasogolo mwausimu?’ Kuti tujawule pasogolo, tukusasosekwa kutenda yindu yiŵili ayi. Tukusasosekwa kugamanyilila chenene Maloŵe ga Mlungu soni kuŵa ŵakupikanila.

Tugamanyilileje Chenene Maloŵe ga Mlungu

7. Ana kugamanyilila chenene Maloŵe ga Mlungu mpaka kutukamuchisye mwamtuli?

⁷ Paulo jwalembile kuti, “Mundu jwalijose jwagamba kumwa mkaka ali chiŵela likandi, soni ngaŵa mkomboleka kwiganya chijiganyo chakusala kuti ayi ni yambone.” (Aheb. 5:13) Kuti tukule mwausimu tukusosekwa kugamanyilila chenene Maloŵe ga Mlungu. Ligongo lyakuti maloŵega gakusasimanikwa m’Baibulo, tukusosekwa kugaŵalangaga soni kuŵalangaga mabuku gakusakoposya “kapolo jwakulupichika ni jwalunda.” (Mat. 24:45-47, NWT) Kulijiganya mwalitala lyeleli mpaka kutukamuchisya kumanyilila kaganisye ka Mlungu soni kwiganya lunda lwetu. Kwende tulole chisyasyo cha mklistu jwine. Jwalakwe jwasasile kuti, “Chakusawusya changu chekulungwa mnope pa umi wangu chaliji kuŵalanga Baibulo mwakutamilichika. Yajigalile yaka yiŵili kuti malisye kuŵalanga Baibulo josope. Nambo nalipikanaga kuti keleka kaliji kandanda kuti nammanyilile chenene Mlungu. Nalijiganyisye yakusanonyela Mlungu, yakusaŵengana nayo, lunda lwakwe soni machili gakwe. Kuŵalanga Baibulo lisiku lililyosye kungamuchisye kuti ngomboleje kumalana ni yakusawusya ya paumi wangu.

8. Ana Maloŵe ga Mlungu mpaka gatukamuchisye chamtuli?

⁸ Kuŵalanga mwakutamilichika Maloŵe ga Mlungu kukusakamuchisya kuti utengawo, ‘ukamuleje masengo’ mwa m’weji. (Aŵalanje Ahebeli 4:12.) Kuŵalanga mwakutamilichika mpaka kutukamuchisye kuti tuŵe mundu jwambone soni kutenda yindu yakumsangalasya Yehofa. Ana akuyiwona kuti akusosekwa kola ndandanda jakuŵalanjila Baibulo soni kuganichisya yakuŵalangayo? Ana wawojo mpaka atende uli kuti akoleje ndaŵi jakwanila jakuŵalanjila Baibulo soni kuganichisya mwakusokoka yaŵalasileyo?

9, 10. Ana kugamanyilila chenene maloŵe ga Mlungu kukusapwatikapo chichi? Alondesye.

⁹ Kujimanyilila chenene Baibulo kukusapwatikapo kumanyilila yindu yejinji. Mu ndaŵi ja Paulo, ŵandu ŵele ŵaliji mpela ŵanache mwausimu ngaŵa kuti nganamanyililaga amta panandi maloŵe ga Mlungu. Nambo nganakamulichisyaga masengo yiŵapikeneyo paumi wawo. Nganakunda kuti maloŵe ga Mlungu gamlongoleleje pakusagula yindu ya lisiku ni lisiku.

¹⁰ Kugamanyilila chenene Maloŵe ga Mlungu kukusagopolela kupikanichisya yagakusala ni kuyitendaga. Yaŵasimene nayo mlongo jwine (Kyle) yikusalosya mwampaka tutendele yeleyi. Jwalakwe jwatindene nganisyo ni mjakwe jwa kumasengo. Ana jwatesile wuli kuti amasye ungapikangananawu? Jwasasile kuti, “Lilemba linalikumbuchile mwachitema lyaliji Aloma 12:18, lyalikusati, ‘mtameje mwamtendele ni ŵandu wosope mutimkombolele.’ Myoyo namŵendile kuti tukambilane pachitumalisye kukamula masengopo.” Yakambilanayi yajesile chenene mnope mwamti mjakwejo jwasangalele ni yaŵatesile mlongojo. “Nalijiganyisye kuti naga mundu akukuya yajikusajiganya Baibulo, chilichose champaka atende chikusaŵa chakulondola.”

Aŵeje Ŵakupikanila

11. Ana ni chichi chachikulosya kuti kupikanila patusimene ni yakusawusya, mpaka kuŵe kwakusawusya?

¹¹ Naga yindu nganiŵa chenene paumi wetu, kukamulichisya masengo yindu yatulijiganyisye kutyochela m’Baibulo mpaka kuŵe kwakusawusya. Mwachisyasyo Yehofa ali ŵakulupwisye Aisalaeli ŵaŵaliji ku ukapolo ku Iguputo, jemanjaji, “ŵatandite kangana najo Mose” soni “kwalinga AMBUJE.” Ŵatesile yeleyi ligongo lyakuti ŵasoŵile mesi gakuti amwe. (Eks. 17:1-4) Mkanipamale miyesi jiŵili, jemanjaji ŵaliji ali atesile chilanga kwa Mlungu kuti chachitenda “yosope yaŵechete AMBUJE.” Nambo ŵakasile chilangachi pakutanda kulambila yiwanichisyo. (Eks. 24:3, 12-18; 32:1, 2, 7-9) Ana yeleyi yatendekwe ligongo lyakuti Mose jwachelewe paŵapite ku Litumbi lya Holebe kukupochela malamusi ga Mlungu? Kapena ana ŵaganisyaga kuti Aamaleki naga ali ayiche kuti ŵajimuchile chasoŵe chakutenda? Pajatu Mose ni juŵakamuchisye jemanjaji kuti apunde pangondo ligongo lya kwesya makono gakwe mwinani. (Eks. 17:8-16) Chinga ligongo lyakwe lyaliji lyeleli kapena iyayi nambo mfundo jili jakuti Aisalaeli nganasaka kuŵa ‘ŵakupikanila.’ (Mase. 7:39-41) Paulo jwalimbikasisye Aklistu kuti ‘alinjilile’ kogopela kuti ‘jwine jwa uwe akasaŵa jwangapikana’ mpela muŵatendele Ayisalayeli paŵatendaga woga kwinjila M’chilambo Chelaguchisye.—Aheb. 4:3, 11.

12. Ana Yesu jwalosisye wuli kuti ali jwakupikanila soni yakuyichisya yakwe yaliji yamtuli?

¹² Kuti tujawule pasogolo mwausimu, tukusasosekwa kutenda yakomboleka kuti tumpikanileje Yehofa. Mpela muŵatendele Yesu Klistu mpaka tulijiganye kuŵa ŵakupikanila patusimene ni yakusawusya. (Aŵalanje Ahebeli 5:8, 9.) Jwalakwe mkanayiche pachilambo chapasi, jwapikanilaga Atati ŵakwe. Soni ali pachilambo pano, jwatendaga yindu yakusasaka Yehofa yayikupwatikapo kupilila yakusawusya soni yakulagasya nganisyo. Atamose kuti jwasimanaga ni yakusawusya, Yesu jwalosisye kuti jwaliji jwakupikanila. Yeleyi yatendekasisye kuti jwalakwe aŵe “jwambone mnope” soni kuti aŵe jwakuŵajilwa kuŵa pa udindo wele Mlungu ŵaliji ali amlinganyichisye kala wakuŵa Mwenye soni Jwamkulungwa jwa Ŵambopesi.

13. Ana ni yindu yapi yampaka yilosye kuti tuli ŵakupikanila?

¹³ Nambi wuli m’weji? Ana tuli ŵakoseka kumpikanila Yehofa atamose tuli mkusimana ni yakusawusya? (Aŵalanje 1 Petulo 1:6, 7) Maloŵe ga Mlungu gakusatukamuchisyaga kuti tukoleje ndamo syambone, tuŵeje ŵakuwona mtima soni tuŵecheteje yakulimbikasya. Konjechesya pelepa tukusosekwasoni kulijiganyaga pajika, kusongana soni kulalichila. (Yos. 1:8; Mat. 28:19, 20; Aef. 4:25, 28, 29; 5:3-5; Aheb. 10:24, 25) Ana patusimene ni yakusawusya, yindu yatukolasileyi yikusatukamuchisyaga? Tukusalosya kuti tuli ŵakupikanila soni kuti tukwawula pasogolo naga tukutenda yeleyi.

Ana Ligongo Chichi Kwawula Pasogolo Kuli Kwakusosekwa?

14. Apeleche chisyasyo chakulosya kuti kwawula pasogolo mpaka kutukamuchisye.

¹⁴ Kuli kwakusosekwa kwa Mklistu ligongo mpaka kumkamuchisye kola umanyilisi wampaka ukamkamuchisye kulekanganya chambone ni chakusakala mchilambo chegumbale “yangalumbana.” (Aef. 4:19) Mwachisyasyo m’bale jwine lina lyakwe James juŵaŵalangaga mwakutamilichika Maloŵe ga Mlungu jwapatile masengo gaŵakamulaga ni achakongwe. Jwalakwe jwatite, “Ŵajinji mwa achakongweŵa nganakola ndamo syambone. Nambo jwine jwawonekaga mpela akwete ndamo syambone soni jwalosyaga kuti akusachilila kulijiganya Baibulo.” Lisiku line tuli mkukamula masengo ŵaŵilipe, jwatandite kutenda yindu yakulosya kuti akusaka. Naganisyaga kuti jugamba kwelegula mwamti yasawisye kumlekasya. Nambo kaneko nakumbuchile ya chakutendekwa chine cha mu Sanja ja Mlonda. Sanjaji jasalaga ya m’bale jwine juŵasimenesoni ni yakulingwa ku masengo. M’baleju ali Yosefe juŵanyenjeleledwaga ni ŵamkwawo Potifala. Mwachitema namtopwele msikanajo mwamti jwatyosile. (Gen. 39:7-12) James jwayamichile kuti nganatenda chilichose chakusakala chachikatendekasisye kuti mtima wakwe umlagasyeje.—1 Tim. 1:5.

15. Ana kwawula pasogolo mpaka kukamuchisye mwamtuli mtima wetu?

¹⁵ Kwawula pasogolo kuli kwakamuchisya ligongo lyakuti kukusateteya mtima wetu soni mpaka kukamuchisye kuti tukaneje, ‘yijiganyo ya chilendo yakusokonasya.’ (Aŵalanje Ahebeli 13:9.) Naga tukusalingalinga kukuya yatukusalijiganyaga m’maloŵe ga Mlungu mpaka yitukamuchisye kuti tusaguleje yindu “yayili yambone mnope.” (Afil. 1:9, 10) Myoyo tukusosekwa kumyamichilaga Mlungu ligongo lya yindu yambone yakusatupaga kuti yitukamuchisyeje. (Alo. 3:24) Mklistu jwali “jwamkomangale” akusasangalalaga kuŵa paunasi ni Yehofa.—1 Akoli. 14:20.

16. Ana ni chichi chachamkamuchisye Mlongo jwine kuti aŵe ‘jwakulimba mtima’?

¹⁶ Mlongo jwine (Louise) jwasasile kuti pali papitile ndaŵi panyuma pakubatisidwa, chakulinga chakwe chaliji chakusangalala ni ŵane. Jwalakwe jwatite, “Pangali chakulemwa chilichose chinatendaga nambo nganingola mtima wakumtumichila Yehofa. Ni naganichisye yakuti nampeje Yehofa kanekakwe. Mwamti nasosekwaga kuchenga yanatendaga. Chindu chekulungwa chinasosekwaga kutenda chaliji chakuti namtumichileje jwalakwe ni mtima wangu wosope.” Paŵatesile yeleyi, mlongo jula “jwalimbile mtima.” Mwamti Kulimba mtimaku kwawonechele paŵamsimene ni ulwele wekulungwa. (Yak. 5:8) Jwalakwe jwatite, “Nalasile mnope ni ulwelewu nambope naliji paunasi ni Yehofa.”

‘Kupikanila Kwawo Kuŵeje Kwakutyochela mu Mtima’

17. Ana kupikanila kwakamuchisye chamtuli Aklistu ŵa m’yaka 100 yandanda?

¹⁷ Malangiso ga Paulo gakuti “ajawule pasogolo” gakamuchisye Aklistu ŵa m’yaka 100 yandanda ŵaŵatamaga ku Yelusalemu soni ku Yudeya kuti akulupuche. Ŵandu ŵaŵapikanile malangiso ga Yesu gakuti ‘chatilile ku matumbi’ pachachichiwona “chindu chakogoya . . . chili chijimi pa malo gamaswela” ŵapikanile. Jemanjaji paŵachiweni chinduchi ŵaŵaliji asilikali ŵa Chiloma, Aklisutuwo ŵamanyilile kuti akusosekwa kutilila ku matumbi. (Mateyu 24:15, 16) Ŵapikanile yaŵasalile Yesu mwamti ŵatisile msindawo mkaniwujonanjidwe. Jwakulemba mbili jwine (Eusebius) jwasasile kuti jemanjanji ŵatilile mumsinda wa Pela pa litumbi lya Giliyadi. Yeleyi yakamuchisye kuti akulupuche ku yindu yakogoya.

18, 19. (a) Ligongo chichi kupikanila kuli kwakusosekwa mnope paumi wetu? (b) Ana mu ngani jakuyichisya tuchikambilana yamtuli?

¹⁸ Kupikanila uli umboni wakuti tukwawula pasogolo. Mwamti kuchitukamuchisya kuti chitukulupuche patuchikuwona kukwanilichikwa kwa yakulochesya yaŵayisasile Yesu. Jwalakwe jwatite, ‘yisawusyo yekulungwa mnope yichiwoneka’ yakuti nganiwonecheje chitandilile. (Mat. 24:21) Ana tuchipikanila malangiso gatuchipochela kutyochela kwa “jwamasengo jwakulupichika”? (Luk. 12:42) Myoyo tukusosekwa kulijiganya kuŵa ‘ŵakupikanila ni mtima wosope.’—Alo. 6:17.

¹⁹ Kuti tujawule pasogolo, tukusosekwa kulijiganya kuti tuŵe ŵandu ŵalunda. Mpaka tutende yeleyi patukutenda yakomboleka kugamanyilila chenene Maloŵe ga Mlungu soni kulijiganya kupikanila. Nambotu kwa ŵachinyamata yikusaŵa yakusawusya kuti ajawule pasogolo. Mu ngani jakuyichisya tuchikambilana yampaka atende ŵachinyamata pakumalana ni yakusawusyayi.

Ana Alijiganyisye Yamtuli?

• Ana kwawula pasogolo mwausimu kukusagopolela chichi soni mpaka tutende yamtuli kuti tujawule pasogolo?

• Ana kugamanyilila chenene Maloŵe ga Mlungu kukusatukamuchisya mwamtuli patukutenda yakuti tujawule pasogolo?

• Ana mpaka tutende yamtuli kuti tuŵe ŵakupikanila?

• Ana kwawula pasogolo mwausimu kukusatukamuchisya mwamtuli?

[Chiwulili pa peji 10]

Kwawula pasogolo mwausimu kukusamkamuchisya mundu kulimbana ni yakusawusya pakukamulichisya masengo mfundo sya m’Baibulo

[Chiwulili pa peji 12, 13]

Aklistu ŵa m’yaka 100 yandanda ŵakulupwiche ligongo lyakupikanila malangiso

[Mawusyo]