1 Crónicas 15:1-29
15 Davideʼ seguernaj u beetik u maasil u yotochoʼob teʼ kaaj ku kʼaabaʼtik u Kaajal Davidoʼ. Tsʼoʼoleʼ tu preparartaj xan junpʼéel lugar utiaʼal u tsʼaʼabal u cajail u pacto le u jaajil Diosoʼ, tu armartaj junpʼéel naj de nookʼ utiaʼal u tsʼaʼabaliʼ.+
2 David túuneʼ tu yaʼalaj: «Chéen le levitaʼob unaj u biskoʼob u cajail u pacto le u jaajil Diosoʼ, mix máak uláakʼ unaj u bisik. Unaj u beetaʼal beyoʼ tumen Jéeobaeʼ tsʼoʼok u yéeyik le levitaʼob utiaʼal u biskoʼob u cajail u pacto Jéeobaoʼ yéetel utiaʼal u meyajtikoʼob Dios mantatsʼ».+
3 David túuneʼ tu muchʼkíintaj tuláakal Israel tu kaajil Jerusalén utiaʼal u biskoʼob u cajail u pacto Jéeoba teʼ lugar tu preparartaj utiaʼal u tsʼaʼabaloʼ.+
4 David túuneʼ tu muchʼkíintaj u paalal Aarón+ bey xan le levitaʼoboʼ:+
5 ichil le koatitaʼoboʼ tu muchʼkíintaj Uriel le u nojchiloʼ yéetel 120 tiʼ u sukuʼunoʼob,
6 ichil le meraritaʼoboʼ tu muchʼkíintaj Asaya+ le u nojchiloʼ yéetel 220 tiʼ u sukuʼunoʼob,
7 ichil le guersomitaʼoboʼ tu muchʼkíintaj Joel+ le u nojchiloʼ yéetel 130 tiʼ u sukuʼunoʼob,
8 ichil u paalal Elizafáneʼ+ tu muchʼkíintaj Semaya le u nojchiloʼ yéetel 200 tiʼ u sukuʼunoʼob,
9 ichil u paalal Hebróneʼ tu muchʼkíintaj Eliel le u nojchiloʼ yéetel 80 tiʼ u sukuʼunoʼob,
10 yéetel ichil u paalal Uzieleʼ+ tu muchʼkíintaj Aminadab le u nojchiloʼ yéetel 112 tiʼ u sukuʼunoʼob.
11 Tsʼoʼoleʼ Davideʼ tu tʼanaj xan Sadok+ yéetel Abiatar+ le sacerdoteʼoboʼ bey xan le levitaʼobaʼ: Uriel, Asaya, Joel, Semaya, Eliel yéetel Aminadab.
12 Tu tʼanoʼobeʼ ka tu yaʼalajtiʼob: «Teʼexeʼ u nuuktakil u familiaʼob le levitaʼoboʼ. Teʼex yéetel a sukuʼuneʼexeʼ limpiokíintabaʼex utiaʼal ka a taaseʼex u cajail u pacto Jéeoba, u Dios Israel, teʼ lugar tsʼoʼok in preparartik utiaʼal u tsʼaʼabaloʼ.
13 Le yáax juntéenoʼ maʼ teʼex taas u cajail le pactooʼ,+ k-Dios Jéeoba túuneʼ pʼuʼuj t-éetel+ tumen maʼ t-beetaj jeʼex u yaʼalmiloʼ».+
14 Le oʼolaleʼ le sacerdoteʼob yéetel le levitaʼoboʼ tu limpiokíintubaʼob utiaʼal u biskoʼob u cajail u pacto Jéeoba, le u Dios Israeloʼ.
15 Le levitaʼob túunoʼ tu bisoʼob u cajail u pacto le u jaajil Diosoʼ, tu kuchoʼob yóokʼol u hombroʼob yéetel le cheʼoboʼ,+ tu beetoʼob jach jeʼex aʼalaʼanil tiʼ Moisés tumen Jéeobaeʼ.
16 Davideʼ tu yaʼalaj tiʼ u nuuktakil le levitaʼob ka u yéeyoʼob jujuntúul tiʼ u sukuʼunoʼob ku kʼaayoʼoboʼ. Letiʼobeʼ yaan u kʼaayoʼob yéetel yaan u paxkoʼob yéetel kiʼimak óolal u nuʼukuliloʼob paax yaan u cuerdailoʼob, arpaʼob+ yéetel címbaloʼob.*+
17 Le levitaʼob túunoʼ, ichil u tribuʼobeʼ, tu yéeyoʼob Emán+ u hijo Joel, Asaf+ u hijo Berekías, yéetel Etán+ u hijo Kusayá, letiʼeʼ ku taal tiʼ le meraritaʼoboʼ.
18 Tu yéeteloʼobeʼ tiaʼan xan u sukuʼunoʼobiʼ, le yanoʼob teʼ segundo grupooʼ,+ letiʼe jeʼeloʼobaʼ: Zacarías, Ben, Jaaziel, Semiramot, Jeyel, Uní, Eliab, Benaya, Maaseya, Matitías, Elifelew yéetel Mikneyá. Le máaxoʼob ku kanan joonajoʼoboʼ Obed-edom yéetel Jeyeel.
19 Le máaxoʼob ku kʼaayoʼoboʼ Emán,+ Asaf+ yéetel Etam, letiʼob kun paxik kaʼach le címbaloʼob de cobreoʼ.+
20 Zacarías, Aziel, Semiramot, Jeyel, Uní, Eliab, Maaseya yéetel Benayaeʼ tu paxoʼob u nuʼukuliloʼob paax yaan u cuerdailoʼob afinartaʼanoʼob utiaʼal Alamot.+
21 Matitías,+ Elifelew, Mikneyá, Obed-edom, Jeyeel yéetel Azazíaseʼ letiʼe máaxoʼob ku paxkoʼob le arpaʼob afinartaʼanoʼob utiaʼal Seminitoʼ,+ letiʼob nuʼuktik le paaxoʼ.
22 Kenanías+ u nojchil le levitaʼoboʼ letiʼ aʼal bix kun bisbil u cajail le pactooʼ, tumen letiʼeʼ jach u yojel bix unaj u beetaʼal.
23 Berekías yéetel Elkanáeʼ letiʼob kanáantik u cajail le pactooʼ.
24 Le sacerdoteʼob tu kʼaʼam ustoʼob le trompetaʼob tu táan u cajail u pacto le u jaajil Diosoʼ,+ letiʼe jeʼeloʼobaʼ: Sebanías, Josafat, Netanel, Amasay, Zacarías, Benaya yéetel Eliezer. Le máaxoʼob kanáantik xan kaʼach u cajail le pactooʼ Obed-edom yéetel Jejías.
25 David, junmúuchʼ yéetel u nuuktakil u kaajil Israel bey xan yéetel u nuuktakil le grupoʼob de 1,000 máakoʼoboʼ bin u chʼaʼob yéetel kiʼimak óolal+ u cajail u pacto Jéeoba teʼ tu yotoch Obed-edomoʼ.+
26 Úuchik u yáantaʼal le levitaʼob tumen le u jaajil Dios utiaʼal u biskoʼob u cajail u pacto Jéeobaoʼ, letiʼobeʼ tu kʼuboʼob siete táankelem toroʼob yéetel siete xibil tamanoʼob.+
27 Davideʼ u takmaj kaʼach junpʼéel nookʼ minaʼan u kʼabil beetaʼan yéetel junpʼéel jach maʼalob tela. Le nookʼaʼ bey jeʼex le nookʼ u takmaj tuláakal le levitaʼob ku biskoʼob u cajail le pactooʼ, le máaxoʼob ku kʼaayoʼoboʼ bey xan Kenanías. Kenaníaseʼ letiʼ nuʼuktik u bisaʼal u cajail le pacto tumen le máaxoʼob ku kʼaayoʼoboʼ. Davideʼ u takmaj xan kaʼach junpʼéel efod* de lino.+
28 Tuláakal le israelitaʼoboʼ jach kiʼimak u yóoloʼob táan u yawatoʼob+ le táan u biskoʼob u cajail u pacto Jéeobaoʼ. Letiʼobeʼ táan kaʼach u yustikoʼob le baakoʼ, le trompetaʼoboʼ,+ le címbaloʼoboʼ, yéetel jach kʼaʼam u paxkoʼob le arpaʼoboʼ bey xan le uláakʼ u nuʼukuliloʼob paax yaan u cuerdailoʼoboʼ.+
29 Chéen baʼaleʼ le ka taasaʼab u cajail u pacto Jéeoba teʼ tu Kaajal Davidoʼ,+ Mikal+ u hija Saúleʼ, paakatnaj teʼ ventanaoʼ ka tu yileʼ le rey Davidoʼ táan u síitʼ yéetel jach kiʼimak u yóol. David túuneʼ sen lúub kʼaasil tiʼ Mikal.*+
Notas
^ Lelaʼ junpʼéel u nuʼukulil paax bey jeʼex le platillos ku meyaj bejlaʼa utiaʼal u yúuchul paaxoʼ.
^ Lelaʼ bey junpʼéel mandileʼ. Ilawil «Efod», página 2562.
^ Ich hebreoeʼ ku yaʼalaʼal kaʼach «lúub kʼaasil tiʼ ichil u puksiʼikʼal».
