2 Reyes 7:1-20
7 Eliseo túuneʼ tu yaʼalaj: «Uʼuyeʼex baʼax ku yaʼalik Jéeoba. Jéeobaeʼ ku yaʼalik: ‹Walkil sáamalaʼ, tu joonajil* Samariaeʼ junpʼéel sea* maʼalob harinaeʼ yaan u tojoltik 11 gramos* plata, yéetel kaʼapʼéel sea* cebadaeʼ yaan xan u tojoltik 11 gramos plata›».+
2 Le máak áantik le reyoʼ, le máak tiʼ jach ku confiar le reyoʼ, le ka tu yuʼubaj le baʼax aʼalaʼab tumen le máak meyajtik le u jaajil Diosoʼ, tu yaʼalajtiʼ: «Kex ka u beet Jéeoba u jeʼepajal u joonajiloʼob le kaʼan utiaʼal u kʼáaxal jaʼoʼ, ¿jeʼel wa u béeytal le baʼax ka waʼalikoʼ?».+ Eliseoeʼ tu núukajtiʼ: «Yaan a wilik u béeytal,+ chéen baʼaleʼ maʼ ken a jaant mix junpʼíitiʼ».+
3 Tu joonajil le kaajoʼ yaan kaʼach kantúul máakoʼob yaan lepra tiʼob,+ letiʼobeʼ táan kaʼach u yaʼalikoʼob tu baatsiloʼob: «¿Baʼax tiaʼal k-kutal k-páaʼt kíimil wayeʼ?
4 Wa k-okol ichil le kaaj beora jach táan u yilaʼal wiʼijilaʼ tiʼ ken k-kíimiliʼ.+ Yéetel wa k-pʼáatal kutal wayeʼ láayliʼ yaan xan k-kíimileʼ. Le oʼolaleʼ maas maʼalob ka xiʼikoʼon teʼ tuʼux yaan le sirioʼoboʼ. Wa maʼ tu kíimsoʼonoʼobeʼ tsʼoʼok k-salvartikba, pero wa tu kíimsoʼonoʼobeʼ jaʼalibeʼ».
5 Le ka áakʼabchajeʼ líikʼoʼobeʼ ka binoʼob teʼ tuʼux jelekbal le sirioʼoboʼ. Le ka kʼuchoʼob tu jáal le tuʼux jelekbaloʼoboʼ tu yiloʼobeʼ mix máak yaniʼ.
6 Jéeobaeʼ tsʼokaʼaniliʼ u beetik u yuʼubaʼal tumen le sirioʼob u juum u taal u carroiloʼob baʼateʼel bey xan tsíiminoʼob, jeʼex u juum u taal junpʼéel nojoch ejércitoeʼ.+ Le sirioʼob túunoʼ joʼopʼ u yaʼalikoʼob: «¡Ilawileʼex! ¡U reyil Israeleʼ tsʼoʼok u boʼotik u reyoʼob le ititaʼoboʼ bey xan u reyoʼob le egipcioʼob utiaʼal ka baʼatelnakoʼob t-contraoʼ!».
7 Le sirioʼob túunoʼ kex de áakʼabeʼ líikʼoʼob tu séebaʼanileʼ ka púutsʼoʼob, tu xúumpʼattoʼob u yotochoʼob de nookʼ, u yalakʼ tsíiminoʼob yéetel u yalakʼ burroʼob. Tu xúumpʼattoʼob tuláakal jeʼex yaniloʼ ka púutsʼoʼob utiaʼal maʼ u kíimsaʼaloʼob.
8 Le ka kʼuch le máakoʼob yaan lepra tiʼob tu jáal le tuʼux jelekbal le sirioʼoboʼ, ookoʼob tiʼ junpʼéel chan naj de nookʼeʼ ka joʼopʼ u jaantikoʼob yéetel u yukʼikoʼob le baʼaxoʼob yanoʼ. Tu chʼaʼajoʼob plata, oro yéetel nookʼoʼobeʼ ka bin u taʼakoʼob. Le ka tsʼoʼokeʼ suunajoʼobeʼ ka ookoʼob tiʼ uláakʼ naj de nookʼeʼ ka tu chʼaʼajoʼob le baʼaloʼob yanoʼ ka bin u taʼakoʼob.
9 Chéen baʼaleʼ joʼopʼ u yaʼalikoʼob tu baatsiloʼob: «Le baʼax táan k-beetkaʼ maʼ maʼalobiʼ. ¡Le baʼax tsʼoʼok u yúuchlaʼ jach maʼalob! Unaj k-bin aʼal tiʼ u maasil. Wa k-páaʼtik u sáastal utiaʼal k-bin aʼaleʼ yaan k-náajaltik k-castigartaʼal. Maas maʼalob ka xiʼikoʼon k-aʼal tu palacio le rey le baʼax tsʼoʼok k-ilkoʼ».
10 Letiʼob túuneʼ binoʼobeʼ ka tu yawtoʼob tiʼ le máaxoʼob kanáantik u joonajil le kaajoʼ, ka tu yaʼaloʼob: «Toʼoneʼ ookoʼon teʼ tuʼux yaan le sirioʼoboʼ, chéen baʼaleʼ mix máak yaniʼ, mix máak t-uʼuyaj u tʼaaniʼ. Chéen tiʼ u kʼaxmoʼob u yalakʼ tsíiminoʼob yéetel u yalakʼ burroʼobiʼ. Tak u yotochoʼob de nookʼeʼ béeyliʼ yaniloʼob jeʼex úuchik u pʼatkoʼoboʼ».
11 Tu séebaʼanileʼ le máaxoʼob kanáantik le joonajoʼ tu yawtoʼob tiʼ le kaaj le baʼax aʼalaʼabtiʼoboʼ, ka tsʼaʼab ojéeltbil tu palacio le reyoʼ.
12 Kex de áakʼabeʼ le reyoʼ líikʼ u yáalkabeʼ ka tu yaʼalaj tiʼ le máaxoʼob meyajtikoʼ: «Paʼatik in waʼalikteʼex baʼax taak u beetiktoʼon le sirioʼoboʼ. Letiʼobeʼ u yojloʼob táan k-kíimil yéetel wiʼij,+ le oʼolal lukʼoʼob teʼ tuʼux ku jeʼeleloʼoboʼ ka bin u taʼakubaʼob teʼ kʼáaxoʼ. Letiʼobeʼ tu tukloʼob waʼaleʼ: ‹Le kéen jóokʼkoʼob tiʼ le kaajoʼ yaan k-cháachkoʼob yéetel yaan k-okol ichil le kaajoʼ›».+
13 Juntúul tiʼ le máaxoʼob meyajtik le reyoʼ tu yaʼalaj túun: «Beet uts a waʼalik tiʼ jujuntúul máakoʼob ka u chʼaʼob cinco u túulal tiʼ le tsíiminoʼob pʼaatloʼob teʼ kaajaʼ, ka a túuxt u yiloʼob jach baʼax úuchi. Tumen kex ka pʼáatkoʼob wa kex ka xiʼikoʼobeʼ deporsi yaan u kíimloʼob jeʼex u maasil israelitaʼob yanoʼob wayaʼ».
14 Le máakoʼob túunoʼ tu chʼaʼajoʼob kaʼapʼéel carroʼob ku jíitaʼal tumen tsíiminoʼobeʼ ka túuxtaʼaboʼob tumen le rey teʼ tuʼux yaan le sirioʼoboʼ. Le reyoʼ tu yaʼalajtiʼob: «Xeen a wileʼex baʼax úuchi».
15 Le máakoʼob túuxtaʼab tumen le rey túunoʼ bin u kaxtoʼob le sirioʼoboʼ ka kʼuchoʼob tak teʼ Jordánoʼ. Tiʼ tuláakal le bejoʼ tu yiloʼob bix jáayunjáayil le nookʼoʼob yéetel le nuʼukuloʼob tu pʼataj le sirioʼob úuchik u púutsʼloʼob tumen saajkoʼoboʼ. Letiʼob túuneʼ suunaj u yaʼaloʼob tiʼ le reyoʼ.
16 U máakiloʼob túun le kaajoʼ jóokʼoʼobeʼ ka tu chʼaʼajoʼob tuláakal le baʼax tu pʼataj le sirioʼoboʼ. Yoʼolal lelaʼ junpʼéel sea* maʼalob harinaeʼ kʼuch u tojolt 11 gramos* plata, yéetel kaʼapʼéel sea* cebadaeʼ kʼuch xan u tojolt 11 gramos plata. Béeychaj le baʼax tu yaʼalaj Jéeobaoʼ.+
17 Le reyoʼ u kʼubéentmaj kaʼach tiʼ le máax áantik ka u kanáant u joonajil le kaajoʼ. Chéen baʼaleʼ le máakaʼ paktáantaʼabeʼ* ka yayaʼchaʼataʼab tumen le máakoʼob tu joonajil le kaajoʼ ka kíimi. Béeychaj jach jeʼex úuchik u yaʼalik le máak meyajtik le u jaajil Diosoʼ, béeychaj le baʼax tu yaʼalaj le ka bin ilbil tumen le reyoʼ.
18 Úuch jach jeʼex tu yaʼalil le máak meyajtik le u jaajil Dios tiʼ le reyoʼ, letiʼeʼ tu yaʼalaj: «Walkil sáamalaʼ, tu joonajil Samariaeʼ+ kaʼapʼéel sea* cebadaeʼ yaan u tojoltik 11 gramos* plata, yéetel junpʼéel sea* maʼalob harinaeʼ yaan xan u tojoltik 11 gramos plata».
19 Chéen baʼaleʼ teʼ kʼiin jeʼeloʼ le máak áantik le reyoʼ tu yaʼalaj tiʼ le máak meyajtik le u jaajil Diosoʼ: «Kex ka u beet Jéeoba u jeʼepajal u joonajiloʼob le kaʼan utiaʼal u kʼáaxal jaʼoʼ, ¿jeʼel wa u béeytal le baʼax ka waʼalikoʼ?». Eliseoeʼ tu núukajtiʼ: «Yaan a wilik u béeytal, chéen baʼaleʼ maʼ ken a jaant mix junpʼíitiʼ».
20 Jach bey úuchikoʼ, kíim úuchik u yayaʼchaʼataʼal tu joonajil le kaaj tumen le máakoʼoboʼ.
Notas
^ Wa «tu mercadoiloʼob».
^ Ich hebreoeʼ ku yaʼalaʼal kaʼach «junpʼéel medida sea». Lelaʼ letiʼe bukaʼaj ku bisik junpʼéel nuʼukul kex de 7 litrosoʼ. Ilawil «Sea», página 2579.
^ Ich hebreoeʼ ku yaʼalaʼal kaʼach «junpʼéel siclo». Ilawil «Siclo», página 2580.
^ Ich hebreoeʼ ku yaʼalaʼal kaʼach «kaʼapʼéel medida sea». Lelaʼ letiʼe bukaʼaj ku bisik junpʼéel nuʼukul kex de 14 litros y mediooʼ.
^ Ich hebreoeʼ ku yaʼalaʼal kaʼach «junpʼéel medida sea». Lelaʼ letiʼe bukaʼaj ku bisik junpʼéel nuʼukul kex de 7 litrosoʼ.
^ Ich hebreoeʼ ku yaʼalaʼal kaʼach «junpʼéel siclo».
^ Ich hebreoeʼ ku yaʼalaʼal kaʼach «kaʼapʼéel medida sea». Lelaʼ letiʼe bukaʼaj ku bisik junpʼéel nuʼukul kex de 14 litros y mediooʼ.
^ Wa «jéentantaʼabeʼ; naktáantaʼabeʼ».
^ Ich hebreoeʼ ku yaʼalaʼal kaʼach «kaʼapʼéel medida sea». Lelaʼ letiʼe bukaʼaj ku bisik junpʼéel nuʼukul kex de 14 litros y mediooʼ.
^ Ich hebreoeʼ ku yaʼalaʼal kaʼach «junpʼéel siclo».
^ Ich hebreoeʼ ku yaʼalaʼal kaʼach «junpʼéel medida sea». Lelaʼ letiʼe bukaʼaj ku bisik junpʼéel nuʼukul kex de 7 litrosoʼ.