2 Samuel 10:1-19
-
Ku ganartaʼal ammonitaʼob yéetel sirioʼob (1-19)
10 Le ka máan kʼiineʼ u rey le ammonitaʼoboʼ+ kíimi. Anún, u hijo, túuneʼ tu beetuba reyil tu lugar.+
2 Le ka tu yojéeltaj leloʼ, Davideʼ tu yaʼalaj: «Yaan in weʼesik in wutsil* tiʼ Anún, u hijo Naas, utiaʼal in sutik u jeel le utsil tu yeʼesajten u papáoʼ». David túuneʼ tu túuxtaj jujuntúul máakoʼob utiaʼal u líiʼskoʼob u yóol Anún úuchik u kíimil u papá. Chéen baʼaleʼ le ka kʼuch le máakoʼob túuxtaʼaboʼob tumen David teʼ luʼum tuʼux yaan le ammonitaʼoboʼ,
3 le príncipeʼob ammonitaʼoboʼ tu yaʼaloʼob tiʼ Anún, le u reyoʼoboʼ: «A tuklikeʼ, ¿chéen wa taak u yeʼesik David ku respetartik a papá úuchik u túuxtik máakoʼob utiaʼal u líiʼskoʼob a wóol? ¿Maʼ wa tu túuxtoʼob utiaʼal u chʼúuktoʼob le kaajoʼ, utiaʼal ka u yiloʼob bix yanil, yéetel beyoʼ ka u xuʼulsoʼobtiʼ?».
4 Le ka tu yuʼubaj leloʼ, Anúneʼ tu machaj le máaxoʼob túuxtaʼaboʼob tumen Davidoʼ, tu tsʼikaj táanchumuk tiʼ u meʼexoʼobeʼ+ ka tu xotʼaj xan táanchumuk u nookʼoʼob, kʼuch u xotʼik u nookʼoʼob tak tu nalgasoʼob, ka tsʼoʼokeʼ tu yaʼalajtiʼob ka xiʼikoʼob.
5 Le ka aʼalaʼab tiʼ David le baʼax úuchaʼ tu séebaʼanil tu túuxtaj jujuntúul máakoʼob utiaʼal ka xiʼik ilbiloʼob, tumen le máakoʼoboʼ jach suʼlakoʼob kaʼachi. Le reyoʼ tu yaʼalajtiʼob: «Pʼáateneʼex Jericó+ tak ken chowakchajak a meʼexeʼex tu kaʼatéen, le kéen tsʼoʼokkeʼ ka suuteʼex».
6 Le ka máan kʼiineʼ le ammonitaʼoboʼ tu tsʼáajoʼob cuenta de ke jach pʼektaʼanoʼob tumen David. Le oʼolaleʼ binoʼobeʼ ka tu boʼotoʼob 20,000 soldadoʼob sirioʼob utiaʼal ka áantaʼakoʼob teʼ baʼateloʼ. Le soldadoʼobaʼ tiʼ u taaloʼob kaʼach Bet-reob+ yéetel Zobá.+ Tu boʼotoʼob xan 1,000 soldadoʼob tiʼ u reyil Maaká,+ yéetel tu boʼotoʼob 12,000 soldadoʼob tiʼ u luʼumil Istob.*+
7 Le ka tu yuʼubaj leloʼ Davideʼ tu túuxtaj Joab bey xan tuláakal le soldadoʼoboʼ, tu túuxtaj tak le soldadoʼob maas jach u yojloʼob baʼateloʼ.+
8 Le ammonitaʼob túunoʼ jóokʼoʼob tu entradail le kaajoʼ ka tu tsolubaʼob utiaʼal u baʼateloʼob. Chéen baʼaleʼ le sirioʼob ku taaloʼob Zobá yéetel Reob junmúuchʼ yéetel le soldadoʼob ku taaloʼob Istob* yéetel Maakáoʼ tiʼ pʼáatoʼob teʼ táax luʼumoʼ.
9 Le ka tu yilaj Joab jach nukaʼaj atacarbil táanil yéetel paachileʼ, tu yéeyaj junmúuchʼ tiʼ u maas maʼalobil u soldadoiloʼob Israeleʼ ka tu beetaj u tsolkubaʼob utiaʼal u baʼateloʼob tu contra le sirioʼoboʼ.+
10 Tsʼoʼoleʼ tu tsʼáaj u yalab le soldadoʼob utiaʼal ka nuʼuktaʼakoʼob tumen Abisay, u sukuʼunoʼ.+ Tu tsʼáajoʼob utiaʼal ka beetaʼak u tsolkubaʼob utiaʼal u baʼateloʼob tu contra le ammonitaʼoboʼ.+
11 Joab túuneʼ tu yaʼalaj tiʼ Abisay: «Wa le sirioʼob ku maas antal u páajtaliloʼob ke teneʼ, techeʼ unaj a taal a wáanten. Chéen baʼaleʼ wa le ammonitaʼob ku maas antal u páajtaliloʼob ke techeʼ, teneʼ yaan in bin in wáantech.
12 Maʼ a chʼaʼik saajkil mix u péek a wóol,+ koʼox baʼateʼel tu yoʼolal k-kaajal bey xan tu yoʼolal u kaajaloʼob k-Dios, Jéeobaeʼ yaan u beetik le baʼax maas maʼalob u yilkoʼ».+
13 Joab yéetel u soldadoʼob túuneʼ seguernaj u náatsʼloʼob tiʼ le sirioʼob utiaʼal u baʼateloʼob tu contraʼoboʼ, chéen baʼaleʼ le sirioʼoboʼ púutsʼoʼob tu táan.+
14 Le ammonitaʼob túunoʼ le ka tu yiloʼob tsʼoʼok u púutsʼul le sirioʼoboʼ, letiʼob xaneʼ púutsʼoʼob tiʼ Abisayeʼ ka binoʼob teʼ kaajoʼ. Le ka tsʼoʼok túun u baʼateʼel Joab yéetel le ammonitaʼoboʼ suunaj tu kaajil Jerusalén.
15 Le ka tu yilaj le sirioʼob tsʼoʼok u ganartaʼaloʼob tumen u kaajil Israeleʼ, tu kaʼa muchʼubaʼob.+
16 Adadézer+ túuneʼ tu túuxtaj chʼaʼabil le sirioʼob yanoʼob naatsʼ tiʼ le Ríooʼ.*+ Letiʼob túuneʼ kʼuchoʼob tak Elaam, yéetel táan kaʼach u nuʼuktaʼaloʼob tumen Sobak, u nojchil u soldadoʼob Adadézer.
17 Le ka aʼalaʼab tiʼ David lelaʼ tu séebaʼanil tu muchʼaj tuláakal u soldadoiloʼob Israeleʼ ka tu kʼáatmáansaj le Jordánoʼ, ka kʼuch tak Elaam. Le sirioʼob túunoʼ tu tsolubaʼob utiaʼal u baʼateloʼob tu contra David, ka joʼopʼ u baʼateloʼob tu yéetel.+
18 Chéen baʼaleʼ le sirioʼoboʼ áalkabnajoʼob utiaʼal u púutsʼloʼob tiʼ le israelitaʼoboʼ. David túuneʼ tu kíimsaj 700 u túulal tiʼ le soldadoʼob bisik u carroiloʼob baʼateloʼ, tu kíimsaj xan 40,000 soldadoʼob sirioʼob u natʼmoʼob u tsiiminoʼob. Teʼeloʼ tu kíimsaj xan Sobak, le máax nuʼuktik le soldadoʼob sirioʼoboʼ.+
19 Tuláakal túun le reyoʼob áantik Adadézeroʼ, le ka tu yiloʼob tsʼoʼok u ganartaʼaloʼob tumen Israeleʼ, tu séebaʼanil tu chʼaʼajoʼob junpʼéel acuerdo yéetel Israel utiaʼal maʼ u seguer u yantal baʼateʼel ichiloʼob. Letiʼob túuneʼ yanchajoʼob yáanal u páajtalil Israel.+ Le sirioʼoboʼ maʼ seguernaj u yáantkoʼob le ammonitaʼoboʼ tumen tu chʼaʼajoʼob saajkil.
Notas
^ Wa «nojoch yaabilaj».
^ Wa «tiʼ u luʼumil Tob».
^ Wa «tiʼ u luʼumil Tob».
^ Uláakʼ bix kʼaj óolaʼanileʼ Éufrates.
